القواعد الذهبية للذهاب الى شرم

[YahiaAshraf]

عزيزى القادم من محافظات مصر المحروسة الى المدن السياحية ( شرم الشيخ .والغردقه )
اهلا وسهلا بك فى شرم الشيخ ..موجة حب على ارض مصر )
الى سيادتك بعض التعليمات الواجب اتباعها اثناء تشريفكم لنا
وسوف اتحدث معك باللهجة العاميه وبالبلدى الصريح
شوف ياسيدى الاستاز وياست الهانم وانت ياعم الامور ..
1 اول ماحضرتك تحجز الاتوبيس ..فكر انك رايح شارم الشيخ ..وليس مدينة لاس فيجاس او جزر الهاواى ) يعنى مصر يعنى القيم والاصول والعادات
بلاش تركب الاتوبيس بالشورت وشبشب ابو صباع ونصف فانله على جسمك ..انت فاهم غلط ؟؟؟مش ده الكاجوال ولا الروشنه ؟؟
لان حضرتك الاتوبيس به 52 راكب من مختلف الجنسيات
ومنهم ناس كبار السن زى الحاج والدك وست الحاجه وزى اختك ؟؟
انت مش رايح للحلاق ..10 دقائق وهاتروح ...ده سفر 7 ساعات ...
لماتوصل بالسلامة كده ..راعى اداب وسلوكيات الشارع .
يعنى عينيك هاتشوف واحدة خوجاية ماشية ...بلاش تطلع من بقك صفارة وشهقه وزفير واصوات التعجب ....
3 لما تدخل المطعم علشان تتفضل تتناول طعامك ..بلاش تجرى من باب المطعم حتى البوفيه ...الاكل مش هايخلص ماتخافش ...اول حاجة تعملها وانت داخل ..تقول للناس اللى واقفه تخدمك كلمة صباح الخير ..ازيكم ...اى عبارات ترحاب
تانى حاجة تقعد فى مكانك بهدوء ...وبهدوء ايضا تقوم من مكانك تلقى نظرة فاحصة ماحصة على البوفيه للتعرف على نوعيات الطعام
والبوفيه حضرتك ينقسم الى 4 اجزاء.
بوفيه السخن ( اللحوم + البروتنيات + الاسماك + الارز + الطبيخ يامعلم وحاجات تانى كتير من سوتيه وصوصات
الجزء التانى بوفيه الحلو ...التورت والفاكهة ومالذا وطاب
الجزء الثالث ..السلاطات ...مش هاقولك عليها طبعا انت اكيد عندك فكرة ...بس فى نوع بلاش منه خالص ( الاخطبوط بالصوص ) مالكش دعوة بيه
ولو حضرتك مش عارف نوع من الاكل يوجد يافتة صغيرة على كل صنف ,,اقراءها ...مش عارف انجليزى ...اسال مش عيب
وابوس ايدك ياستى الحاجة ..وياماما وانتى فى المطعم لاحظى يوجد 500 شخص من مختلف الجنسيات االعالم ..وكلهم ماسكين فى ايدهم كاميرات واى باد .. بلاش تزعقى على مصطفى ابنك بالصوت الحيانى وياوواد يامصطفى اللحمة هنا لقيتها ...؟؟هيا ماكنتش ضايعة ياستى
ويابت ياسوسوه تعالى تعالى روحى قولى للشيف اللى واقف هناك هات فرختين كبار كده على ذوقك
ياستى الحاجة لاحظى ان ال500 سائح بيتفرجوا عليكى ومش مصدقين ان فى ناس بتاكل بالطريقة ده. وبالكميات ده. وبتسيب كل الاكل ده.
وكمان نحن العاملين بالسياحة بنبقى مكسوفين وفى نصف هدومنا
والله يخليكى ياستى الحاجة بلاش الاكياس اللى فى جيبك وشنطتك لزوم تعبئة الفاكهة
4 لماتروح ( البيسين ..حمام السباحة ) ياباشا الامور اوع تتحول وتفتكر نفسك سبيدر مان
بلاش حركات البهلونات وفاكر نفسك محصلتش ..انت كبيرك ترعة الماريوطية ...بحركاتك الهبلة ده مش هاتخطف قلوب البنات الخواجات ..انت شايفهم بيضحكوا ..ده من وكستك بيضحكوا عليك
5 لما تروح البيتش (شاطى البحر ) راعى دائما ان بحر شرم الشيخ والغردقة يختلف عن بحر جمصة او راس البر و نهر النيل
بلاش الصياح والزعاق والخناقات والاستظراف وخفة الدم ...والمعاكسات
لان المعاكسة اذا ثبتت عليك ياحيلتها ..هاتدفع 10 الاف جنية وتشرف سنة سجن
لان المعاكسة عند الاجانب اسمها تحرش ؟؟؟
ومش لازم تتحرش فعليا يكفى بالنظرات القاتله ...يعنى عينيك ماطتلعش عن حدودها ؟؟لان ده تحرش بالنظر
وعاوزك تفهم شى مهم وحط فى راسك ( مش كل ابتسامة من سائحة ) تعنى انك واد هرقل وسمارت مان وانك دخلت دماغها ...وواد جامد ؟؟؟ وثقافة القهاوى والغرز ده اللى بتقولك ان الستات دول جاين مصر علشان سمعة وفحولة الشاب المصرى
جاك الف خيبة ...هو بعد سمن الهانم والنخلتين وزيت الجحش ..بقى فيكم صحة
5 ولما تحب تاكل على البحر ...ابوس ايدك بلاش ترمى علب العصير والحاجة الساقعة واكياس الكشرى والطرشى وبواقى البصل الاخضر والفلفل والعيش ..بلاش فى البحر
لان حضرتك قد تتسبب فى موت اوايذاء كائنات بحرية مالهاش ذنب ان حضرتك بتاكل اى حاجة( ماتعملش فيها القلب الطيب وعضو جمعية الرفق بالاسماك
وكمان بلاش حضرتك تمد ايدك وتحاول تصيد اى نوع من الاسماك الملونة لانها قد تكون سامة قاتله ؟
عزيزى ابن بلدى
انت سفير بلدك امام جميع هولاء القادمين من العالم
اعطى انطباع عن ثقافة بلدك وحرصك على مابها
واهم شى فى كل خدمة تقدم لك
تعلم ان تقول كلمى شكرا ..كتر خيرك ..الف شكرا
هذه الكلمات مفتاح لكثير من العلاقات الجيدة
ونصيحة اخيرة
بلاش كلمة بفلوسى ...اعمل اللى انا عايزه ..انا دافع فلوس
شكرا لزيارتك شرم الشيخ
تصحبك السلامة

[mmtronic]

عندك حق فى كل الى انت قولته بس يارب الناس تفهم العار و المظهر الزبالة الى يبكون عليه المصرين فى شرم الشيخ و الغردقة او اى منتجع

كل الى عايز يستمتع باجازته لازم يعرف ان فيه غيره موجود معاه فى نفس المكان يعنى مش قاعد فى الفسحة بتاعه بيته يعمل الى هوه عايزه ....فى آداب و أصول

اعتقد انك عارف ان فيه فنادق فى شرم او الغردقة بتطفش المصريين علشان ميجوش ( وقعت مرتين معاهم و اكتشفت ان فى غرف متاحه بس طبعا علشان عارفين أنى مصرى قالولى غير متاح و انا فهمت ليه )

[بحار]

كلام جمييييل يا استاذ يحيى ...
لكن قوللى هوه انته امتى اشتغلت فى السياحة ؟

[Dr_Mido]

عندك حق فى كل الى انت قولته بس يارب الناس تفهم العار و المظهر الزبالة الى يبكون عليه المصرين فى شرم الشيخ و الغردقة او اى منتجع

كل الى عايز يستمتع باجازته لازم يعرف ان فيه غيره موجود معاه فى نفس المكان يعنى مش قاعد فى الفسحة بتاعه بيته يعمل الى هوه عايزه ....فى آداب و أصول

اعتقد انك عارف ان فيه فنادق فى شرم او الغردقة بتطفش المصريين علشان ميجوش ( وقعت مرتين معاهم و اكتشفت ان فى غرف متاحه بس طبعا علشان عارفين أنى مصرى قالولى غير متاح و انا فهمت ليه )

حقيقه واقعيه

[gade2]

موضوع جامد جدا

[mohabelnegm]

للأسف النزيل المصرى أسوأ نزيل فى الفنادق بدون منافس, بدون مبالغه اسبوعيا كشركة سياحة بنقل عشرات الغرف لأجانب من فنادق فيها مجموعات مصريين لفنادق تانيه مفيهاش مصريين . من الظلم انك تحط نزيل اجنبى مع نزيل مصرى فى مكان واحد...المصرى بيتفنن فى أذى النزلاء و العاملين بسلوكياته(بقصد أو بدون قصد) ...و الله الحل أن يكون فيه فنادق فى شرم و الغردقة تكون فقط للمصريين و ميدخلهاش أجانب...المصريين هيعرفوا يتعاملوا مع بعض فى البوفيه و فى ألأزعاج و تعليه صوت التليفزيون بعد نص الليل و فى التحرش البصرى و اللفظى و على البحر و فى حمام السباحة لما تلاقى فيه يوميا بامبرز أطفال مرمى.....و الله بنخجل لما ألأجانب بيسألوا الناس ديه جايه من أنهى بلد و بيتصرفوا كده ليه وازاى الفندق بيسمح لهم بالتصرفات ديه و ليه بيحطوا كميات رهيبة من ألأكل على الترابيزات و مش بياكلوا حتى ربعه و بياخدوا ألأكل فى أكياس من المطعم و هما خارجين,,ووووو...لسه فاضل كتير أوى لما المصرى يكون واجهة مشرفة و محترمة لبلده!

[Bassem Youssef]

معظم المصريين عار في شرم و الغردقه و خصوصا في تعاملاتهم مع السياح

بعيدا عن شرم و الغردقه

كفايه انك تنزل اسكندريه و تشوف الناس بتعمل ايه علي الشاطئ هناك

[speed_magnum]

فضيحه والله
فعلا الحسنه بتخص والسيئه بتعم
والاسم مصري

[mmtronic]

فضيحه والله
فعلا الحسنه بتخص والسيئه بتعم
والاسم مصري

و الله ما بقى فيه حسنات كله سيئات

على مستوى السياحه او غيرة

لما تلاقى انسان مصرى محترم و على خلق كانك لاقيت لقيه

[Adnfalcon]

أقولكم أنا بعمل ايه !!
أولا لما بشوف سياح روس كتير فأي اوتيل او قريه بعمل شيك أوت علي طول وأشوف مكان تاني لأني أكتشفت ان الروس أزبل شعب فعلا هما والصين و شويه من كوريا والمصري أحسن منهم بمراحل
صاحب الموضوع جاي جامد علي المصريين و يمكن اسلوب التريقه حاجه تزعل برغم ان التصرفات دي بتزعلني أنا شخصيا بس اللي فيه طبع مش بيغيره
عموما الأسعار دلوقتي نار و مش أي مصري بينزل ف 5 نجوم زي زمان

[طارق _عبد السلام]

فعلا صدقت
واصعب حاجه موضوع لما يكون مجموعه شباب مع بعض قمه الاستظراف وتحس انهم موقعين بنات الشرق والغرب من جمالهم ولو واحد لعب له يومين حديد ومفتكر انها فورمه الساحل وان ارنولد جنبه معصعص وتلاقيه لابس بدى ضيق وشادد نفسه طول الوقت لحد مايطق له عرق ومفتكر انه مدوب قلوب العذارى

وفضايح البحر والاكل وارمى اى حاجه على البلاج عادى وسلوكيات تفضح وتكلم ودايما تسمع كلمه ياسيدى دى اجازه ورحله افرح واعمل كل اللى انت عايزه

على فكره لو الموضوع استمر كتير شرم هتبقى بلطيم عادى جدا

[minicooper20]

كل جنسيه فيها الحلو و الوحش
و الروس مهم معفنين برضو مش مليكه
و مش كل المصرين و مش في كل الفنادق
بلاش تعميم شنيع ده
اه في مصرين سلوكهم وحش بس في مصرين احسن من اي اجنبي

[Ah.Farid]

يا جماعة الخير بلاش تحامل على كاتب الموضوع ........الراجل بيقول رأية اللى كثير مننا بيشوفة فى اماكن كتير وسفريات برة وجوة والواحد بيبقى فى نص هدوة من تصرفات بعض الناس
وفعلا احنا عندنا مشاكل كتير فى فنون التعامل بين الناس ومش بنعرف نقول شكرا لاى مقدم خدمة ولا بنعرف نقف بنظام فى اى طابور ولا عندنا فن التسامح مع الاخر ,,,,,,ولازم نفضح نفسنا عشان نحاول نتغير
المصريين زى شعوب كتير فيها الحلو وفيها اللى مش أد كدة ,,, بس المشكلة ان سمعة المصرى فى الخارج بتتأثر فلازم نحاول نوجد مناقشات وحلول لعشر او عشرين سنة قادميين

ولكاتب الموضوع كل الشكر

[عبدالحكيم]

أحييك على هذا الموضوع.. أنا قيمته تقييم ممتاز وإن شاء الله باقي الأعضاء يقيموه.. حتى تعم الفائدة


كلامك صحيح وإن كان لا يخلوا من التعميم..



نتمنى أن يفهم أي مواطن بأنه سفير لبلده وإن كان داخلها، خصوصاً في الأماكن السياحيّة..

[the lawyer]

كلامك ارفعله القبعة ولكن احمد ربنا انهم مبيجبوش الحمير والأحصنة يحموها في البحر زي مبيعملوا في جمصة وراس البر واسكندرية .
انا شوفت صور متداولة على الفيس بوك ان فيه راجل لابس فانلة بحمالات في بوفيه فندق في شرم