زهراء مدينه نصر

[thatha]

انا عايز مساعدتكم بجد للي يعرف . فيه منطقة اسمها زهراء مدينة نصر .هي المنطقة دي جزيين! جزء تبع الظباط و جزي تاني الناس خدو بوضع اليد وبنو فيه ابراج كتير!!! المهم رحت هناك و عجبتني شقة لان الاسعار معقوله و جمب شغلي في شارع اسمه حسني مبارك. لكن الي مخوفني ان سمعت ان فيه حته اسمها عزبه الهجانه دي انا مش عارف هيا فين؟ هل شارع حسني مبالرك فيها ولا بعيد عنها؟ انا سمعت كتير عن الحته دي و مش معقول اسكن فيها!!!هل حد يعرف حاجة عن الموضوع ده؟؟؟

[Ahmed Selim]

يا باشا عزبة الهجانة دى واخدة جزء كبير من مدينة نصر.....من عند أخر مصطفى النحاس كده لحد طريق السويس عند الكيلو 4.5 كده

[thatha]

متشكر على الرد اوي.... بس انا مش خبير بمدينه نصر! انا بس كنت عايز اعرف الشارع ده قريب ولا فيها ؟اصل العنوان بتاع الشارع مافيهوش عزبه الهجانه خالص!!! حد يعرف الحته دي كويسه ولا ايه نظمها؟

[amr5500]

اللي اعرفه ان عزبه الهجانه معظمها ناس بلطجيه وحراميه
علشان كده الشقق اللي جنبها بتكون ارخص وكمان ممكن العمارات اللي هناك
تكون من غير تراخيص والارض تكون وضع يد

[thatha]

اكيد انا بسمع عنها اكتر من كده لكن الي عايز اعرفه. شارع حسني مبارك ده الي ف الزهراء علاقته بيها ايه؟

[amr5500]

انا مااعرفش الشارع ده بس اكيد حيكون قريب من عزبه الهجانه
وطبعا المناطق القريبه منها بتكون غير امنه
يعني الشقق معرضه للسرقه وممكن لو واحد راجع متاخر شوية ممكن حد يتهجم عليه

[ahmedfouad]

انا ساكن فى الزهراء من سنة 93
واحب اعرفك انى حاليا فى عمارات الضباط اللى بتطل على عزبة الهجانة
وشارع حسنى مبارك يعتبر فى صميم الهجانة
وان العمارات دى كلها الارض بتاعتها بوضع اليد
وده سر رخصها ونصيحة لا لا
ارجو ان اكون قد افدت حضرتك

[دموع الثلج]

هجاااااااااااااااااانه هى العزبه دى هنااااااااااااااك


انا بسمع عنها سمع خير الصراحه لدرجه انى اتخضيت لما قريت اسمها


بس معرفش حاجه عن سؤال حضرتك بالنسبه للمكان


انا عندى سؤال صغنن لما بكون راجعه من مدينه نصر وغالبا باخذ الطريق الدائرى بدخل من زهراء مدينه نصر وبعدى من عند تاون جاس على عمارات الظباط اللى قدام المدافن وبيكون الدنيا ليل ساعات ولوحدى


هى الحته دى خطر نمشى فيها بالليل ؟؟؟؟؟ ولا وضعها ايه

[thatha]

ايوه بس انا شايف انها كلها ابراج جديده

[amr5500]

بص علي وصفك كده اعتقد ان عزبه الهجانه ورا العمارات دي
وده السبب في ان سعرها منخفض

[thatha]

ليسه و احد دلوقتي قالي العزبه دي عند طريق السويس كيلو 4.5 و الارض هي الي اسمها الهجانه. و منطقة الزهراء كلها على ارض الهجانه. الي كانت ايام الجيش لسلاح الهجانه.طب ايه رايكوا ياجماعة؟ اعمل ايه هي بسراحه جنب شغاي و رخيصة و في نفس الوقت مش قادر اسكن في حته وحشة.

[Ahmed Selim]

أنا معرفش قبن بالظبط الشارع ده بس حبيت أوضح المكان اللى أعرفه لعزبة الهجانة

الشارع اللى مكتوب أسمه King Khaled Motorway ده هوه طريق السويس
والشارع اللى مكتوب فيه " قلعة الريان " ده شارع الحى العاشر " أحمد الزمر"

وبينهم فى النص شارع عليه علامات أستفهام ده مصطفى النحاس بس البرنامج مبيكتبش عربى :)

[thatha]

متشكر جدا على الصورة بس انا محتار بجد!!! مش عارف اعمل ايه!!

[Ahmed Selim]

طيب ممكن تقولنا سعر المتر كام ؟

جايز لو فى حاجة أحسن فى نفس الحدود حد يدلك عليها

[MOHAMED EL MALLAHY]

يا جماعة مفهوم تخطيط وتطوير المدن الجديدة ده جديد مش هو نظام بلدنا من زمان 0000 لكن مفيش فى بلدنا تخطيط للامتدادات العمرانية للاحياء الموجودة حاليا وانا شايف ان ده اخطر بكتير ، لان ده هو سبب الاختناقات كلها والضغط على البنية التحتية يعنى عندك كل الامتدادات العمرانية اللى حول مصر الجديدة ومدينة نصر دى كانت فى الاول عشوائيات 0000 بس قانون العرض والطلب هو اللى غير خريطة المناطق دى كلها وخلى الشباب يبدأو يشتروا فيها وبالتالى العشوائيات تزحف بره اكتر كل لما العمران يزحف عليها
والسيناريو اللى يحكيه لينا اهالينا انهم زمان كانوا يسمعوا على مكان نائى بعيد واسعاره رخيصة وبالرغم من انه على قد امكانياتهم بس يبعدوا الفكرة دى عنهم تماما ، بعد 10 سنين تلاقى المكان ده بقى هو مثلا حى السفارات فى التامن اللى محدش يطول يفكر ياخد فيه شقة دلوقت واللى كان فيه اصلا معسكرات وارض صحرا
بص هو السيناريو اللى بيكرر نفسه بس فى زمن قلت فيه الاختيارات 0000 يعنى اهالينا كان عندهم اختيارات 000 الوقت احنا مفبش حتى ولو اختيار واحد ، الناس اللى بانية الابراج دى فى الزهراء بيشتروا الارض من واضعى اليد رخيصة وبيبنوا الابراج دى وعليها اقبال كويس جدا
وهيفضل الشركات اللى بتبنى هناك تشترى ارض كمان من الاهالى بتوع العزبة لحد منلاقيها بعد 5 او 6 سنين منطقة عمارات كويسة جدا بس المشكلة انها مش متخططة
وعاوز اقوللك كمان ان هيسرى عليك اللى هيسرى على عمارات الظباط من حيث الامان والخدمات وكمان انا شايف انها احسن من عمارات الظباط لان الشقق تمليك بالارض مش زى عمارات الظباط اللى مش بتملك ارض واسعارها خيالية 77 متر ب 190000

اسأل كويس وبص لاحتياجاتك 0000 لو عندك نظرة لادام 0000ومتطمن ، استخير ربنا ودور على عمارة الى حد ما حارج العزبة بتطل على ذاكر حسين او عمارات الظباط 0000 وتوكل على الله