هل النسب يمكن التجاوز فيه !!!!!!!!!

[midoabdeen]

السلام عليكم ورحمة الله وبركاته

هو صح ولا غلط ان الواحد يحكم على البنت من اهلها

ياعني لو عرفت ان البنت اللى عايز تتجوززها ابوها متجوز 3 ومخلف منهم والله اعلم بعلقاته التانيه اللى محدش يعرفها

هل هتتجاوز عن نقطة النسب دي ولا لا (حتي لو في حب)

[eng.m7md.ali]

هو حرام ان الواحد يتجوز اكتر من واحدة؟؟

[طارق _عبد السلام]

هو معملش حاجه حرام

والبنت ملهاش اى ذنب فى زيجات والدها ... بالعكس اللى ذى دى بتفتقد الاب وبتعوضه فى زوجها

ومن ناحيه النسب مظنش تعيبه... ممكن انت مع الزمن تعمل زيه..

لكن علاقاته التانيه دى والله اعلم زى مابتقول لازم انت تتأكد الاول ..

[Adnfalcon]

لو متجوز أكتر من واحده = عادي
لو فيه علاقات تانيه = مش عادي

[Dr_Smart]

النسب مهم جدا في اختيار الزوجه ونجاح الزواج

نصيحه اسال عنهم كويس وزورهم كتير لغاية لما تعرف عنهم كل حاجه

عشان انت ماينفعش بعد الجواز تفصل البنت عن اهلها وهتزورهم وتحتك بيهم .. وعشان البنت هتبقى غالبا زي اهلها

وممكن الاهل بعد كده يبقو سبب مشاكل بينكم

موضوع ان الاب متجوز ٣ .. هو مش حرام .. لكن لازم تعرف ليه ومتجوز مين .. اكيد تعدد الزوجات مش حرام لكن في نفس الوقت مش ده العادي في مجتمعنا في مصر

[mk3]

وايه يعنى متجوز 3 ...مش احسن ما يمشى فى الحرام...اختلط لدينا المفاهيم وربنا يستر منبقاش زى تونس ممنوع تتجوز اكتر من واحده

[Abo_Mazen]

إيه علاقة جوازاته التلاته بعلاقاته التانيه ..يعني ليه اﻹختزال المخل بالمعنى ...متجوز تلاته ..أهلا وسهلا ..راجل مقتدر ..راجل مايطيقش الحرام ..راجل مسش عايز يزعل ربنا منه..علاقاته التانيه..راجل قليل اﻷدب ومعندوش دين ..متجوز تلاته حاجه ..وعلاقاته التانيه حاجه

[Hossam_Hassan]

بص يا صديقى

اى ست غالبا بتكون صورة من والدتها، لو والدتها هى الزوجة الأولى، يبقى لازم تفهم اسباب تعدد زواج والدها علشان ما تلاقيش نفسك فى يوم من الأيام فى نفس موقف والدها لو السبب فى تعدد زوجاته انه ملقاش راحته فى بيته.

[midoabdeen]

هو معملش حاجه حرام

والبنت ملهاش اى ذنب فى زيجات والدها ... بالعكس اللى ذى دى بتفتقد الاب وبتعوضه فى زوجها

ومن ناحيه النسب مظنش تعيبه... ممكن انت مع الزمن تعمل زيه..

لكن علاقاته التانيه دى والله اعلم زى مابتقول لازم انت تتأكد الاول ..

طيب و حاجه زي دي اعرفها ازاي

[ESO101]

في أعرافنا مفيش أي مبرر لتعدد العلاقات تحت أي مسمى حتى لو شرعي
وتبرير دا بإنه أحسن من الحرام دا بحد ذاته يدل على بيئة سيئة
و إن والدها واخد الجواز جنس وسرير بدون أي إعتبارات أخرى
ومش العلة في زوجته الأولى لإنه تزوج تاني وهيتزوج رابع وهيطلق ويتجوز تاني
الناس دي بتبقى مرضى في الغالب وعايزين يثبتوا حاجة فقدوها فبيظهروا عكسها للناس
وتلاقيه عنده أمراض الدنيا
سواء جسدية أو نفسية أو خلقية

فدا نسب ميشرفش

ولكن البنت ملهاش ذنب بسلوكيات والدها
بس أبناء المعددين بيبقوا معقدين نفسيًا لإنهم نشأوا في مجتمعات بتبصلهم على إنهم حالة شاذة
وخصوصًا البنت بيكون عندها إحتقار للذات لإنها نشأت على إنها من المنافع
خلي بالك لو إرتبطت بيها هيكون مفهوم الإخلاص عندها مشوه
وخلي بالك كمان ولادك هيكون دا جدهم ( قريب من الدرجة الأولى )

[sasatony]

اسأل عنها وعن أهلها كويس في المنطقة بتاعتهم وعلاقتهم بالجيران ايه؟
وفي مثل بيقولك خد المجنونة بنت العاقلين ولا تاخد العاقلة بنت المجانين
لان الطبع غلاب
وربنا يكرمك بالي فيه الخير

[mk3]

بعد الردود الجميله عرفت ليه عندنا عنوسه

[ESO101]

بعد الردود الجميله عرفت ليه عندنا عنوسه

ليه عندنا عنوسة ؟

[ramymechanics]

متجوز 3 ؟؟ يابن الأيه ؟؟ ممكن تخليه يمضيلى على التيشرت ؟؟

[omar101970]

متجوز 3 ؟؟ يابن الأيه ؟؟ ممكن تخليه يمضيلى على التيشرت ؟؟

بصراحه ردك جامد اوى انا مش أدر ابطل ضحك
لصاحب الموضوع زى ما الزملاء الأفاضل ردو عليك
يتجوز تلاته مش حرام بس غريب شويه فى مجتمعنا يعنى لازم تعرف ليه هو عمل كدا وهل العروسه دى بنت الزوجه الأولى لو كدا ليه انجوز عليها هل بسبب منها هى واسأل كتير على الموضوع دا
لكن علاقات تانيه طبعا مرفوض بلا نقاش