الشتا بالنسبة لك ايه؟

[amr mokhtar]

زميل إسكندرانى أصيل
فعلآ لو هتتكلموا عن الشتاء يبقى هى الإسكندرية
الشتاء بيمثلى هدوء نفسى غريب...مش ببقى متوتر إلا فى ايام الإمتحانات غير كده ببقى هادى بعكس الصيف و الحر بتاعه
أمتع حاجة الواحد ينزل فى المطر سواء ماشى او بالعربية
و بجد يا جماعة الإسكندرية فى ايام النوات اللى بجد بتبقى حاجة تانية (ربنا يكتر منها)
ببقى نايم و سامع شبابيك بتتخبط و حاجات بتتكسر ..فيلم رعب

و كله كوم.. و نزلة الساعة 8 الصبح دى حاجة تانية
و الله بوصل الكلية أدخل أدور على سخان الهواء اللى بيبقى فى الحمام و أحط ايدى تحتية مده لحد ما تفك من التلج اللى بيبقى عليها
أدعوا يكونوا صلحوا السخان ده عشان دول عالم نتنه

[amr mokhtar]

بمناسبة الشتاء دى منطقة المنشية
الصورة دى النهاردة

[mido777]

الشتا بنتظره من اخر يوم بيخلص فيه

اجمل فصول السنه بلا جدال

- كوباية حمص شام فى بير مسعود
- كوباية سحلب وانت قاعد بتلعب طاولة فى القهوة
- اشيك ملابس ممكن تلبسها

ولو قلبك جامد زيي تنزل البحر فى شهر 12 وتكون الدنيا بتشتى

احساس جاممممممممممممممممممممممممممممممد

ده غير اننا كاسكندرانية بنحس ان اسكدرية دى بتعاتنا

ويا سلام لو بتلعب ماتش كورة فى الشتا

[mokhtar]

انا بحب الشتا جدا بس عشان احساسى بيه وبيخلى نفسيتى مرتاحه مش عشان المكان اللى انا فيه يعنى عندنا فى دمياط الشوارع بتبقى اوحال للاسف الميه تنزل تلاقى برك انما بجد المكان اللى بحبه فى الشتا اوى عندنا راس البر وبما انها مصيف فى الشتا مبيبقاش فيها حد بحس انها بتاعتى وانا واقف على البلاج او اللسان بين الصخر والموج بيضرب فى الصخور وييجى رذاذ علينا وممكن الموج يعلى ويبهدلنا والجو متلج والشتا على اخره ومفيش حواليا الا عدد قليل جدا من الناس بجد شعور رااااااءع ان شاء الله هاحاول اصورهالكم فى الشتا وارفع الصور بتبقى تحفه ... وكمان الشتا مفيهوش الاحساس بالحر اللى يخلى الواحد يطلع من هدومه ومش طايق نفسه ولا طايق كلمه من حد انما شد اللحاف ونام فى السقعه بيبقى شعور ممتع جدا
دى شويه صور لراس البر فى الشتا











..mokhtar..

[calipha3]

انا من عشاق الشتا و اول ما الحته تشتي اقعد اغني اغاني زمان الحته بتشتي و هروح لستي تعملي فطيره .......... و ياسلام ذي النهارده كده و اقعد اتفرج علي البرق ملهوش حل سبحان الله!!:k27:

[SHNORY]

طيب بمناسبه روقان اسكندريه والاخوه الاسكندرانيه محبي المطر
مش حنعمل مقابله للاسكندرانيه بقي وناكل بطاطا علي كوبري استانلي
وعزومه البطاطا عندي ومخالفه الوقوف علي الكوبري علي حسابكم
ههههههههههه
واحب اقول لمحمد بيك الطويل اني لسه ليا عندك عزومه علي هاف تايم من يوم المقابله علشان اتشرف بيك تاني

[د.أبونضال]

أنا من عشاق الشتاء

والله الاخت علا دي تستاهل جايزة نوبل في اللذاذة
أول مره أحس إن فيه ناس كتير زييي بتحب الشتا
الشتا بالنسبالي هو الفصل إللي بلاقي فيه نفسي
في الصيف نفسي بتيقى مفتوحة على البحري ، عرق وزهق وكل ما تقعد في مكان تقوم تاني بعد دقيقتين ثلاثة ما فيش استقرار خالص في الصيف . باحاول أعمل أي حاجة بتركيز ما بعرفش ، وأحلى شهرين بالنسبالي هم الشهرين الأولانيين والشهر الأخير ، لأن البرد بيبقى لسه ما بقاش قارص ، لأني ما بحبش الغطا ولا اللبس الثقيل وأهم حاجة باحبها في الشتا هي الاستحمام بالماء الساخن جدا ، لغاية السخان ما يفضى ، ولو كان السخان بتاعي غاز كنت قعدت لغاية ما ادوب في المية .
وأكتر حاجة حلوة في الشتا هي السمك المشوي لأن السمك للي ما يعرفش بيكون حلو جدا كل ما الدنيا تبقى برد ، فطول الشتا بأحب آكل سمنك مشوي ثلاث أو أربع مرات في الأسبوع ، ومش سمك مزارع لأن ده ما لوش طعم لكن لازم يكون سمك بحاري أخضر مبطرخ ، ده بقه بيخدرني زي البنج فبآكل ويا دوب أغسل إيدي وعلى بال ما "أم نضال" زوجتي العزيزة تحط الشاي جنبي باكون في سابع نومه
وفي الشتا بابدأ أشتغل تاني بعد الكسل والملل طوال الصيف ( أنا معيد في الجامعة والشغل بالنسبالي يعني الرساله إللى ما بعرفش اشتغل فيها غير في الشتا )
أهلا أهلا بالشتا وشكرا للأخت علا ولكل عشاق الشتا

[moh_kamal67]

الشتاء بالنسبة لى لسعة برد تداعب الوجه ، وصوت هدوء يريح الاعصاب ، ورخة مطر يتبعها دعاء ، ومشروب دافئ فى حضن الاسرة ونحن صغار ، وكلفتة واحنا نازلين لما كنا اطفال ، وهواء منعش فى اغلب الاوقات
جو القاهرة اجمل بكثير وهو معتدل او بارد ، ولكن حار ورطب بيبقى صعب
جو شتاء القاهرة لطيف موش غلس ، حضرت الشتاء فى الجزائر كان المطر ممكن يستمر 24 او 36 او 48 ساعة متواصلة ، متواصلة ، وكان اللى يخرج يلبس بالطو بلاستيك ويمسك شمسية ويلبس بوت زى بتوع المطافى من شدة علو المياه ، جو صعب والانسان يصاب بتعب عصبى من صوت المطر المستمر
ايام واسابيع لا تشرق الشمس الصبح كالمغرب عندنا واليل تزيد فيه العواصف والامطار
مصر دى جنة الله فى ارضه فلنستمتع بها

[M_ashraf]

الشتاء يعني اشيك ربطة كوفية و انت خارج بالليل
الاسفلت المبلول بيلمع ويعكس نور الشبورة امامك و انت سايق
امتحانات سنة 5 و 6 طب السنتين اللي فاتو
و انا خارج بالليل متكلفت وانا بذاكر مع حد من اصحابي
لما اروح بالليل ابقى مكسل اقلع الشراب من البرد
تتغدى و تجري على السرير و معاك اي فاكهة تاكلها و لتكن اليوسفي
تبقى مش قادر تقوم الصبح من النوم وتنام احلى 5 دقايق لحد ما ال snooz يخلص

[Chicco]

أنا باعشق الخريف و باحب الشتا و باكره الصيف .....المشكلة إن في القاهرة الصيف بقى يطول قوي ....و الشتا قصر جدا ....ما عرفش ده كان احساسي أنا بس و لا الموضوع كان كده فعلا

الشتا دلوقتي بالنسبة لي يعني ثلج .....جليد يعني ....و الحمد لله أنا باموت في حاجة إسمها تلج .....أول مرة أشوفه كان في تركيا ...مدينة اسمها بورصة ....خدنا تليفريك لاعلي جبل ....و أول مرة أشوف تلج ...ما حستش بنفسي ألا و أنا بارمي نفسي فيه و قعدت أجري و أتنطط و أعمل كور تلج أرميها على اللي معايا ....و تمنيت اني أعيش في حتة فيها تلج .....ربنا رازقني من وسع :)

[Ayman_52]

موضوع تحفووون عالاخــر...

الشتاء بيمثلى ...الجو البارد اللى بحبه...المطر والشجر بيلمع....الدنيا الفاضيه...السماء الصافيه وافضل اتأمل فى اشكال السحب واتابعها وهى بتتحرك

وبحب فى الشتاء البس الكوفيه والايس الكاب واضرب السماعات فى الودان...واديها احلى مشى حولين حديقة الطفل.

وبحب فى الشتا اكل اندومى واشرب شوربات كتير..

وبحب لما اصحى الصبح افضل انفخ عالازاز و عالبخار اللى بيتكثف ارسم واكتب.. -عيــل-.
بحب كمان اسمع اغنيه -ايام الشتى- وانا قاعد بتامل بليل واغانى فيروز

وياسلام لما اكون جاى من تحت بردان واتكلفت فى السرير وافضل نايم نايم نايم نايم

بس اكتر حاجه بحبها ان كل الناس بتنام بدرى وانا بفضل قاعد بليل واسمع السكوون ....مش زى الصيف الناس طول اليوم صاحيه


الف شكر عالموضوع التحفه يا ا/عـــلا

[سمير يونس]

الشتاء هو أحلى وقت أمشي فيه في مصر في روكسي أو في مربع وسط البلد (شريف ؛ عدلي ؛ طلعت حرب) دا طبعاً غير ميدان الحسين

و شارع الأزهر و الغورية و أمشي في شوارع و حواري الدرب الأحمر و القاهرة الفاطمية (ساعات أحب أجريها و أتمشى ف حواريها)

خصوصاً الساعة 10 أو 11 صباحا و الطلبة في المدارس و الشوارع نوعاً ما رايقة

يا سلاااااااام متعة بجد

شكراً للأستاذة / علا صاحبة هذا الموضوع القيم

[ams]

هو مش احنا لسا فى الخريف ؟!

[دموع الثلج]

الشششششششششششتاء اجمل فصووووووول السنه

الشتاء بالنسبه لى :

1: ترمـــــــس قهوووووه عربيه ووركنه على الدائرى قبل نزله المعادى تشرب القهوه والهواء بيخبط من كل مكان والله قمه المتعه

2: ااايســــــــــكريم من عند الســــــــلطانه وتمشيه فى الشارع مع الايسكريم واوووووو مع البرد تاكل احلى ايسكريم طعمه مختلف


ا3: لهوووووووووواء البارد التحفه لما يضرب فى الوجهه احساس بالانتعاش رهيب

4:الهـــــــــــــــــدوء وســــــــكون الليل والناس كلها نايمه

5: الكلفته تحت اللحااااااااااااف قدام التليفزيون وجمبك البرتقال ابو صره واللب السوبر و الهوت شكولت

6: اسكندريه فى الششششششششششتاء تجنن تجنن تجنن تجنن

اســـــــــــوء شى فى الشتاء----

1: الطينه والمستنقعات اللى بتبقى فى الشوارع

2: الملابس الصوف بكرهه الصوف موت

3: احيانا جو الغيم يصيبنى بالاكتئاب

[shanodaa]

الشتاء
وقف حال وعطله
كساد وقله دخل
كئابه ونهار قصير
بروده وليل طويل
غيوم ونوم كتير
************
الصراحه
انا لا احب الشتاء
تم التعديل بواسطتي
مشرف فرعي 1