المصريين شعب غنى يدعى الفقر ولا شعب فقير فعلا؟؟؟

[tkamal]

تخطىت حصيلة شهادات استثمار قناة السويس 60 مليار جنيه، فى 8 أيام فقط، منذ بداية الطرح عن طريق البنوك يوم الخميس 4 سبتمبر الجارى، وحتى الساعة الـ8 مساء الاثنين.

دة خبر فى اليوم الساقع

السوال لما بلد تعرف تلم من الشعب 60 مليار فى 8 ايام يبقى فين الفقر
خلى باللك 60 مليار مش مليون

بدون الدخول فى تحليل الشهادات فى كميه سيوله من الاموال فى البلد غير طبيعيه
كميه العقارات والبيع والشراء والاسعار فلكيه وبالرغم من كدة فى بيع وشراء

العيد اللى فات رحت مول العرب والله اكتر من ساعتين بس عشان القى مكان اجلس فى الفود كورت دة غير ساعه الاكل غير الباركنك

البلد فيها فلوس كتير ايوة مش مع ناس كتير بس فى فلوس بالهبل

[Adnfalcon]

فعلا البنوك مليانه فلوس وناس كتير معاها مليارات و مئات الملايين وأملاك وربنا كارمهم
فالوجه المقابل تلاقي ناس مش بتعرف تشتري فاكهه واللحمه ياكلوها ف عيد الأضحي فقط
حاجه كده زي الهند

[mk3]

التمويل 90% منه من القطاع المصرفى يعنى ناس فكت شهاداتها واشترت الشهادات دى

[S.h.a.h.e.r]

فاكر انت الكلام بتاع 30 مليون نزلوا يتظاهروا ف 30 يونيو
اهو نفس الهبل اللي كانوا بيقولوا الكلام دا - هما هما اللي بيقولوا 60 مليار

[ENG.MaRk]

للأسف مصر أغني دولة في العالم بخيراتها و لكنها بتتنهب ... دراسة أوروبية تؤكد إن مصر الدولة الوحيدة في العالم اللي تقدر توصل للإكتفاء الذاتي في كل المجالات و لكن الشعب المصري بطبعه مش بيحب الشغل ... أنا عندي ثقة في بلدي و متأكد إنها هتبقي جنة علي الأرض و لكن ناقصنا حاجة واحدة و هي "الضميييييييييييير" ...مصر غنية جدا و لكن في سوء توزيع للموارد و الفلوس يعني 5% بس هم اللي معاهم 85% من موارد البلد و ال15% الباقية متوزعة علي ال95% الباقيين !!!

[midnightman_74]

مصر زى اى شعب فية الغنى وفية الفقير
بس الغنى بيدعى الفقر ..

[tkamal]

للأسف مصر أغني دولة في العالم بخيراتها و لكنها بتتنهب ... دراسة أوروبية تؤكد إن مصر الدولة الوحيدة في العالم اللي تقدر توصل للإكتفاء الذاتي في كل المجالات و لكن الشعب المصري بطبعه مش بيحب الشغل ... أنا عندي ثقة في بلدي و متأكد إنها هتبقي جنة علي الأرض و لكن ناقصنا حاجة واحدة و هي "الضميييييييييييير" ...مصر غنية جدا و لكن في سوء توزيع للموارد و الفلوس يعني 5% بس هم اللي معاهم 85% من موارد البلد و ال15% الباقية متوزعة علي ال95% الباقيين !!!

معلش فين الدراسه دى عشان انا يسمع الكلام دة من زمان ومش لاقى له اساس علمى ومش مقتنع به

[marsguy]

السلام عليكم ورحمة الله وبركاته،،،

مصر مش أغنى دوله في العالم ... مصر دوله فيها ثروات طبيعيه كتير وفيها مشاكل طبيعيه برضه كتير

بس مما لاشك فيه إن مصر لو إستغلت الموارد اللي فيها (وأهمها الموارد البشريه) بشكل أفضل، أكيد هاتكون أحسن كتير.

والطفل المصري مش أذكى طفل في العالم ولا حاجه. الطفل المصري برضه في منه الذكي و في منه المتوسط. بس كون الطفل يكبر ويبقى بنى آدم منتج ومحترم ده مش بس محتاج ذكاء ... في عوامل تانيه كتير زي التعليم والثقافه.

والجندي المصري مش أشجع جندي في العالم ولا حاجه. في بلاد كتير معتقده إن جنودها هم أحسن جنود في الدنيا وعندهم اللي يخليهم يصدقوا كده.

العباره هو إننا لازم نعرف حجمنا الحقيقي على الأرض. عشان هو ده بداية الشغل الصح

لكن كون إننا نبالغ في حجمنا أو نقلل من قدرنا ... الإثنين مش صح

[Ahmed abdkarim]

فعلا لما بروح الفوود كورت فى سيتى ستارز او اى مول بلاقى زحمة غير طبيعية فى معظم الاحيان و بلاقى ناس بتشترى حاجات كتير جدا وغالية جدا وفى نفس الوقت ملهاش لازمة ولما بنزل الباركينج بشوف عربيات كتير غالية ونادرا لما بشوف عربية نص نص . بس برضه انت لو نزلت امبابة حتشوف مستوى اقل كتير . او نزلت القلعة و الحتت اللى حواليها حتحس ان مصر من افقر الدول .

لسه لو نزلت الصعيد وشوفت منظر الناس هناك افتكر ان فى لقاء تلفزيونى فى الصعيد فى برنامج بتاع مساعدات بيسألو واحدة منقبة مين نبى المسلمين قالت لهم سيدنا موسى و واحدة تانية قالت له احنا منعرفش اى حاجه فى الدنيا احنا عايشين كيف البهايم . مصر مش كلها مدينة نصر والرحاب و ماوتن فيو

[ahmed4000]

هو ال60 مليار بالنسبة لدولة زى مصر بعدد السكان مش كبير

ده كانهم فى المتوسط 650 جنيه لكل فرد

احنا زى اى دولة عندنا اغنياء اوى وفقراء اوى وفئة متوسطة

الفجوة عندنا كبيرة والتقسيمة المفروض تبقى احسن من كده

[bRo]

فاكر انت الكلام بتاع 30 مليون نزلوا يتظاهروا ف 30 يونيو
اهو نفس الهبل اللي كانوا بيقولوا الكلام دا - هما هما اللي بيقولوا 60 مليار

بالظبط كدة

[tkamal]

. بس برضه انت لو نزلت امبابة حتشوف مستوى اقل كتير .

فين عند كبدة البرنس الى تقريبا محتاج تحجز من امبارح عشان تاكل عندة اكل معفن
ولا على العماير والشقق الى تقريبا اقل شقه بقت بنص مليون ومتر الارض هنام من خمسه وانت طالع

[tkamal]

هو ال60 مليار بالنسبة لدولة زى مصر بعدد السكان مش كبير

طبعا مش كتير بس لما يتحصلوا فى 8 ايام فى بلد تحت وطاءه الفقر يبقى فى كلام تانى لازم يتقال

[tkamal]

طيب حد خد باله من كميه الكافيهات الى فتحت فى مصر فى الفترة الاخيرة
مش بكلم على القهاوى حتى النظيف منها بكلم على كافيهات باسماء عالميه وغير اسماء عالميه
مع العلم ان الدفع فى هذة الكافيهات بيكون مكلف جدا ولكن دايما مليانه

[Mecha]

للأسف مصر أغني دولة في العالم بخيراتها و لكنها بتتنهب ... دراسة أوروبية تؤكد إن مصر الدولة الوحيدة في العالم اللي تقدر توصل للإكتفاء الذاتي في كل المجالات و لكن الشعب المصري بطبعه مش بيحب الشغل ... أنا عندي ثقة في بلدي و متأكد إنها هتبقي جنة علي الأرض و لكن ناقصنا حاجة واحدة و هي "الضميييييييييييير" ...مصر غنية جدا و لكن في سوء توزيع للموارد و الفلوس يعني 5% بس هم اللي معاهم 85% من موارد البلد و ال15% الباقية متوزعة علي ال95% الباقيين !!!

ازاي مصراغني دول العالم بايه؟؟؟
ميه ناقصه , ارض زراعيه صغيره, صحاري بالهبل
بنيه اساسيه ضعيفه وواضح الكهربا و الميه و الطرق
طاقه بشريه : اه ودي اهم واحده , تعليمهم سئ , مهارات محدوده , كسالي , سلوكيات متخلفه
اذكيا جدا في ذكاء التحايل و المراوغه مش الذكاء الايجابي البناء
كميه فساد وسرقه بشكل جنوني
الاكتفاء الذاتي دي موضه الخمسينات محدش بيعملها
الضمير مفيش حاجه اسمها ضمير ,فيه حاجه اسمها الخوف
لو كل شغيل حس ان شغلته هتروح وهيجوع وهيتشرد و مراتو هتآرط
هيشتغل زي الاكس
الراتب واضح والشروط واضحه والا ...... هو عارف
الشعب وزي اي شعب هيطبق عليه, البشر زي بعض
هيقدر ينجز و الاهم الاهم اخلاقياته المنحطه هتتحسن
اللصوص يتنكل بيهم يتنكل بيهم واصلبهم ,معارف ووسايط نكل بالي جابوهم
كدا يتجدد البشر بعد انهيار وخلق
وموش اول مره تحصل ,خوف الوظيفه كان زمن محمد علي و خوف اللصوص زمن ناصر
اجمعهم الجوز تعمل زمن ميجي ف اليابان,ارض العزيمه الشديده و الهمم العاليه
,