★★★ لو حد ظلمك ... أشتكيه فين ولا أروح لمين ؟!!!

[Y a r i s]

لو حد ظلمك ... اشتكيه فين ولا اروح لمين !

أعزائي أحبائي فلذات أكبادي وحشتوني جداً ... وما شغلني عنكم إلا الشديد القوي ... وهنا عاوز أخود رئيكم في موضوع قاهرني وشاغلني ... لو حد ظلمني اشتكيه فين ... ولا اروح لمين !

فكر كويس قبل ما تجاوبني ... دلوقتي واحد . كل حقك رحت عند محامي علشان ترفع عليه دعوه وتقاضيه كل ما اروح لمحامي ألاقي المحامي يقولي معليش مفيش احسن من الحل الودي روح للخصم وبكلمتين حلوين وبوس على راسوا وطب طب عليه وقلوا انتا عاوز ايه وانا تحت امرك وبلاش ندخل المحاكم بينا. وكده وانشاء الله هيتحل الموضوع !!!!

طبعاً انا بقيت هتجنن ... يعني يا بني ادم هو انا جتلك ولجئت ليك غير لاني استنفذت كل الطرق الودية ... ثم انتا حضرتك محامي ولا مطبطباتي !!!! (( على فكرة ده مش محامي واحد ده كزا محامي وفي كزا موقف وكزا مشكلة !))

★★★★

طيب يعني الحل القانوني فاكيس ... طيب كان زمان على ايامنا كان في حاجة اسمها قعدت عرب ... ودي بنجيب كبار في السن ونحكمهم بينا والي يحكموا بيه ده يبقى سيف على رقبتنا ... بس دلوقتي معدش فيه الكباااار ماتوا والكبار الي فاضليين قاعدين يعضوا في بعض ... (( أللله طيب نعمممممممل ايه !! ))

طيب برضوا من ضمن الحلول ... كنا نبعت لشيخ الحارة ونروحلوا كده بعد الصلاة ونقلوا تعاله يا عم الشيخ أصلح بينا وحكم بينا بالعقل والمنطق وبشرع الله وكنا بنستعين بالشيخ حتى في المشاكل العائلية زي راجل اتخانق مع مراتوا ... تصوروا. اقسم بالله كنا نبعت للشيخ ونقولوا حصل كزا كزا كزا. يخلصك يا عم الشيخ ده يرضي ربنا يا مولانا ... بس دلوقتي معدش الكلام ده موجود لان ناس كتير اساساً ميعرفوش كلمة صلى غير يوم الجمعة اليوم الوحيد الي بيصلوا فيه وكمان بينزلوا والامام خلص الخطبة وعمال يدعي اول ما يسمعوا الامام بيدعي يقوم ضارب الشبشب في رجلوا ونازل جري. على الجامع

فانا هنا بسئل نفسي وبسئلكم .... ميييييييين يقدر يحكم بينااا ... هل في لغة تانيه غير لغة العنف يعني تصوروا المحامي بيقولي ايه ؟ ... بيقولي يا سيدي هات خمسه ست واكسر الباب وخشوا اقعدوا في قلب المكان واعمل محضر اثبات حالة. بس كده وهو ملهوش حاجة عندك ( يا صلاة النبي ...و يا حلالاالالالاوة ويا حلوللي )

طيب والنبي يا مترررر متعرفش نمرة بلطجي ابن حلال وسعروا حنين ومهاود ههههههههههه

لا بجد ... انا هنا باستغرب ليه كل شوية بنسمع في اوروبا ولا امريكا ان وحده ولا واحد رفع قضية على مطعم علشان لقى مثلاً دبانة في قلب الاكل ولا علشان خاطر كيس كاتشب في حين انا هنا مقدرش ارفع قضية على واحد واكل حقي .

وعلشان كده بسئل
★★★ لو حد ظلمك ... أشتكيه فين ولا أروح لمين ؟!!!★★★
وميين يقدر يحكم بينااا
@@@@@
وتحياتي

[DODGE2013]

الشكوى لغير الله مذله

اشتكي لله بياخد الحق

ممكن يطول بس لسبب

واحيانا الشكوى يستجاب له وقتيا وده بيبقى مع الصابرين (ان الله مع الصابرين)

الا في حالة لو انت مظلوم فا بيستجاب لها فورا

والله اعلم

[Ahmed Saad]

اشتكى لربنا واقعد ادعي عليه لان فعلا الشكوى لغير الله مذله واللي حضرتك قولته ده بيثبت أن العادات والتقاليد اللي كانت الناس ماشيه عليها زمان احسن مليون مره من اللوائح والقوانين اللي موجوده دلوقتي ومش بتقدر تجيب حقوق الناس والعباد المظلومين هيا بس بتمص دم الغلابه وبتجيب حقوق الأقوياء والاغنياء

[Y a r i s]

ونعم بالله ... وربنا قادر على كل شيء وربنا على المفتري طبعاً
لكن مفيش حل تاني دنيوي ... حد يحكم بينا. ويكون انسان عادل وكلمتوا نافده ... يعني عارفين مثلاً في القرى والنجوع. بيبقى لمن مثلاً مزارع او فلاح يختلف مع مزارع اخر. وتبص تلاقيه يروح يستنجد بالعومده. والعومدة يستدعي الطرف التاني ويحكم بينهم (( ومات الكلام بعد حكم العومدة )) !

فليه ميبقاش عندنا محاكم صغيرة للبت في الامور البسيطة والمستعجلة بين الناس حتى لو كان الخلاف والنزاع بينا على حتت جموسة ولا فردة كويتش ولا عدة موبايل تيلفون واختلفنا عليه مثلاً اشتريتوا من محل وطلع بايظ وجي ارجعوا الراجل مرضيش يرجعوا.

يااالله ... حسبي الله ونعم الوكيل ... ده حتى على مستوى مستأجر خلص عقد إيجاروا او مبيدفعش الاجره اقعد اجري وراه ايام وليالي وشهور وسنين ... تيجي مثلاً تغيب عن شقتك كام يوم ولا كام شهر ترجع تلاقي واحد واخد السطح وبناه وعمل باب حديد ومانع السكان حد يطلع فوق ... اجي ارفع قضية المحامي يقولك مفيش قضية الله طب انا اعمل ايه. لمن احب ازبط الدش ولا اطلع شويه فوق السطح يقولك حاول تزبط موقفك معاه ياباشا. يعني الحرامي. المفروض اروح اسايسوا :) واحيلوا الله طب ما اخلي مراتي تعملوا صنية بطاطس كمان بالمره !!!!!!

[drcobra]

للاسف لو الحل الودى مش هينفع
لازم قلة الادب مع قليل الادب

[bRo]

شكلا ومضمونا بقينا عايشين في غابة

[the lawyer]

محامين اخر زمن ... طيب قول مشكلتك لو ينفع يمكن نلاقلها حل .
ساعات القانون بعقد الموضوع اكتر ما بيحلوا

[sha2e]

واضح انك روحت لمحامي محترم مش نصاب
فى محاميين كتير ممكن يعملك البحر طحينة ويستنزفك فى الفلوس وتمر سنتين او تلاته وانت مستفدش أي حاجه

واضح من كلامك ان ليك شقة ومأجرها والعقد انتهى ومش عايزين يسيبوا الشقة
قدامك حل من تلاته :
1- انك تدخل المحكمة : ودي ممكن تاخد وقت فى المتوسط من 4 - 7 سنين وتكاليف مفتوحة غير الجري والمرمطه
2- انك تجيب ناس وتعمل قاعدة عرفية : وفى دي تنسى خالص الكلام الى انت كاتبه فوق لان الوقع دلوقتي مختلف كليا عن زمان
دلوقتى القاعدة العرفية مش بتحكم بالعدل زي ما انت فاكر بيحكموا للدافع فلوس أكتر او للشكله لبط وخايفين منه وهيحاولوا يطلعوا من القاعده وهوا مرضي ( وانسى انهم هيحكموا بالصح والعدل والكلام ده كله لان الواقع دلوقتي مختلف )
ولو جبت ناس بتخاف من ربنا (ودول نسبتهم 1% حاليا) وحصل انهم حكموا بما يرضي الله كلامهم مش هيتنفذ ولا ليه اى قيمه
3- انك تعمل اللى المحامين قالولك عليه : وده الحل الاسرع والاريح والاوفر وساعتها
التفاوض هيختلف
من هتاخد كام وتسيب الشقة الى هتدفع كام وتاخد عفشك (بس حاول ان عفشه الى كان فى الشقة ميفضلش فى الشقه تشيله تعينه فى اى مكان تاني ميعرفهوش)

[hero]

اعتقد مشكلة الايجار بسيطة و مش هاتاخد وقت...
انت بترفع علية قضية في المحكمة و لو ما راحش سدد المتأخرات ايلي علية في خزنة المحكمة بتاخد حكم بالطرد

الشطارة بقي انك تبقي عارف حد في تنفيد الاحكام يبعتلك قوة تنفيذية محترمة...ترمي المستأجر في الشارع هو و عفشة....

قضايا الطرد ما عادتش بطيئة و بتخلص بسرعة جدااا خصوصا لو العقد ايجار جديد...مش الدائم القديم...

و ربنا يوفقك...

[Y a r i s]

معاكم حق ... بس ياجماعه المشكلة مش مشكلة قضية ايجار او ساكن ... انا بقول مثلاً مثلاً لكن انا بتكلم بشكل عام لو في مشكلة بينك وبين اي حد خلاف او نزاع ... مين الي يحكم بينك وبينوا بالعدل والاصول !

فاهمني (( وتحياتي )) .

[S O P H O S]

ده احنا عايشين فوحدة
ايه الغيبة دي

[banzai]

معاكم حق ... بس ياجماعه المشكلة مش مشكلة قضية ايجار او ساكن ... انا بقول مثلاً مثلاً لكن انا بتكلم بشكل عام لو في مشكلة بينك وبين اي حد خلاف او نزاع ... مين الي يحكم بينك وبينوا بالعدل والاصول !

فاهمني (( وتحياتي )) .

كفى بالأنسان لعنات ان يولد فى مصر (و هو معندوش واسطه)
مصر بشعبها سرطان خبيث ملوش علاج