شراء شالية بنظام التايم شيرنج ممكن من الناس اللي جربت تفيدني

[elpilot]

السلام عليكم
وانا بمون في بنزينة جالي ناس وقالولي انهم تبع شركة سياحة واني ممكن اشتري شالية من عندهم ويكون ليا الحق اقضي فيه اسبوع كل سنة في اي قرية سياحية من القري بتاعتهم ومنها في شرم وراس سدر واسوان واماكن كتير والاسبوع ده اي اسبوع انا اختارة وكمان لو مش عايز الاسبوع بتاعي ممكن اكلمهم يأجروهولي لاي حد وياخدوا10% من الايجار وكمان هيقسطولي الفلوس بما يعادل كل شهر250جنية تقريبا لحد ما اخلص تمنه وكمان فيه عقد بني وبينهم بالكلام ده
الموضوع الصراحة عجبني اوي اني اروح اصيف في قري سياحية ولو مش فاضي يأجروهولي واخد فلوةس كمان فكرت فيه كأنة استثمار او مشروع
فحبيت اخد رأيكم في الموضوع ده هل اشترك فيه ولا ده نصب برضو؟؟؟
الواحد بقي بيخاف من النصب الايام دي اوي
ارجو الافادة من الناس اللي جربت الموضوع علشان لو كده اكلم الشركة واروح اتعاقد معاهم ان شاء الله

[hesham fawzy h]

تايم شير عبارة عن نصباية كبيرة

صاحب الفكرة دة لم فلوووووس بالعبيط

[midnightman_74]

فى شركات سمعتها كويسة وشركات تعبانة
المشكلة انك مش هتعرف تاخدً الأسبوع اللى انت عايزة كل سنة

[sherif4004]

السماء لا تمطر ذهب

[elpilot]

انا سألت واحد صاحبي مشترك مع الشركة دي
قالي انه عمل صحة توقيع علي العقد وطلع فعلا الكلام مظبوط
وبيقولي لو في سنة مروحتش الاسبوع ده من حقك تروحة السنة اللي بعدها او تأجرة بمعرفتك لاي حد او تأجرة بمعرفة الشركة
وبيقول كمان انك بتدفع 200 جنية كل سنة للصيانة عشان تروح تلاقي كل حاجه مظبوطة لمبات راكبة وشغغاله ثلاجة بوتاجاز مكان متروق ونضيف كل حاجه زي الفل
هو جرب معاهم دي تاني سنة ليه اول سنة فعلا راح الاسبوع بتاعه ودي تاني سنة مش فضي يروح قالهم اجروة قالولة انت اتأخرت كده مش هينفع يتأجر بسعر كويس لو كنت قولتلنا في اول الصيف ورحلوهولة للسنة الجاية
انا حسيت انه جديد برضو وممكن بعد ما ادفع كل الاقساط يبدأ النصب فحبيت اسأل ناس خبرة زي اعضاء المنتدي هنا عشان يفيدوني اكتر

[a7medsh3rawi]

ما تصدقش كلامهم لان مفيش مصداقيه وهتخسر فلوسك ووقتك على الفاضى
احنا مشتركين فيها ودفعنا حوالى 9 الاف ج ولسه باقى اقساط
مش مقتنع بيها نهائى ومن الاول عارف انها نصب
قدر الله وما شاء الله فعل

[oousaoo]

الحداية ماترميش كتاكيت

[Elawany13]

ياااااااااااااااه ده الموضوع ده اتهرس بقاله 10 سنين
نصابين ياريس

[fepsceasar]

هى الناس اللى بتقول نصابين ..جربت ولا بالسمع كده
وبعدين هل فى حد حاجز ما رحش أو الاسبوع بتاعه راح عليه؟؟
يعني نصابين دى بناءا على إيه !!!!!!!!

[mastr_n]

بما ان صاحب الموضوع من الزقازيق
هو الكلام دة حصل معاك فى بنزيمة كالتكس ابوحسين ؟

[kar!m]

بص هو الموضوع مش نصب ولا حاجة .. هو الموضوع ببساطة مناسب لناس و مش مناسب لناس تانية .. يعني أنا شاري تايم شير و لما بروح الشركة أحجز بلاقي عملاء كتير مبسوطين جدا .. و بيسافروا كتير و بيستخدموه كتير .. و ناس تانية مش عارفيين يستغلوه صح.

فكرة التايم شير نفسها أنا مقتنع بيها جدا .. أنا ايه اللي يخليني أشتري شاليه و أستغله أسبوع أو اسبوعين في السنة و باقي السنة فلوس مركونة.

هو التايم شير كويس و موفر جدا لحد بيسافر كتير و بيحب يتفسح كتير .. و من ناحية تانية يقدر يخطط انه هيسافر مثلا كمان اسبوعين أو شهر .. عشان انت لازم تقول للشركة قبلها بفترة .. بالنسبة للتوفير .. في القرية اللي أنا حاجز فيها مرة أنا رحت تايم شير و أهلي كانوا رايحيين معايا حاجزين عادي .. دفعوا مبلغ كبير جدا في الفترة اللي قعدوها (اليوم ب 600 جنية تقريبا) و أنا مدفعتش حاجه.

مش مناسب لحد فين و فين لما بيفكر يسافر .. و لما بيحب يسافر بيقول ما تيجو نطلع بكرة .. مع ان أنا شخصيا كلمت الشركة مره و قلت له ايه أقرب ميعاد .. قالوا لي في بكرة لو تحب .. بس غالبا بتحتاج تحجز قبلها بشهر .. هما بس بيعملوا موضوع الحجز قبلها بفترة لتنظيم العملاء في الشاليهات.

مبيعجبنيش في الشركات دي أسلوب البيع .. بيظهر لك كل المميزات و يعمل لك البحر طحينة و يعرض المميزات من ناحية الانتفاع و الاستثمار و كل حاجه .. هو مبيكدبش عليك .. بس انت لازم تركز و تشوف هتنتفع بالموضوع ولا مش مناسب ليك.

من ناحية تانية و ده ال best practice .. غالبا اللي بيشتري تايم شير في أماكن بعيدة مبينتفعش بيه عشان المشوار .. دايما بلاقي تايم شير للبيع في شرم الشيخ مثلا و صاحبه كاتب انه مشتغلوش لمدة 6 سنين مثلا .. فحاول تشتري في مكان قريب.

[elpilot]

بما ان صاحب الموضوع من الزقازيق
هو الكلام دة حصل معاك فى بنزيمة كالتكس ابوحسين ؟

كان في بنزينة شيل اللي بعد الزراعة بس بقالهم فترة مابيقفوش هناك لان البنزينة اتباعت وبقت بتاعة موبيل

[ehabouf]

بغض النظر عن بعض الشركات النصابة
من واقع خبرتي في العمل داخل احدى شركات التايم شير دي التركات الي في الموضوع
1- شركة التسويق عمولتها لوحدها 45% (يعني تقريباً بتشتري الأسبوع بضعف ثمنه علشان عنولة الشركة)
2- سعر الصيانة السنوية في الواقع نسبة كبيرة جداً من السعر الفعلى للأسبوع (على سبيل المثال سعر صيانة الأسبوع سنويا حةالي 900 جنيه في حين لو حبينا نأجر اسبوع لعميل كهدية او خلافه سعره 1300 جنيه)
3- الأسبوع مش تمليك لأن القرى نقسها ارضها مش تمليك دي حق انتفاع لمدة 50 سنة (من وقت التخصيص) بمعنى ان الأسبوع الي بتشتريه لايمكن ان تستخدمه لمدة 50 سنة بالكتر 45 سنة وفي بعض القرى الي كان فيها مشاكل ممكن ماتكملش 25 سنة
4- مصاريف الصيانة مش ثابتة بعد فترة بيزيد وفيه بند كده في العقد (وده الدخل المستمر للقرية)
5- بإختصار انت مابتاخدش اسبوع تمليك - انت بتاخد اسبوع ايجار سنوي (مبلغ الصيانة) والسعر الي انت بتدفعه كأنه خلو رجل لأسبوع الإيجار بتاعك

[elpilot]

بغض النظر عن بعض الشركات النصابة
من واقع خبرتي في العمل داخل احدى شركات التايم شير دي التركات الي في الموضوع
1- شركة التسويق عمولتها لوحدها 45% (يعني تقريباً بتشتري الأسبوع بضعف ثمنه علشان عنولة الشركة)
2- سعر الصيانة السنوية في الواقع نسبة كبيرة جداً من السعر الفعلى للأسبوع (على سبيل المثال سعر صيانة الأسبوع سنويا حةالي 900 جنيه في حين لو حبينا نأجر اسبوع لعميل كهدية او خلافه سعره 1300 جنيه)
3- الأسبوع مش تمليك لأن القرى نقسها ارضها مش تمليك دي حق انتفاع لمدة 50 سنة (من وقت التخصيص) بمعنى ان الأسبوع الي بتشتريه لايمكن ان تستخدمه لمدة 50 سنة بالكتر 45 سنة وفي بعض القرى الي كان فيها مشاكل ممكن ماتكملش 25 سنة
4- مصاريف الصيانة مش ثابتة بعد فترة بيزيد وفيه بند كده في العقد (وده الدخل المستمر للقرية)
5- بإختصار انت مابتاخدش اسبوع تمليك - انت بتاخد اسبوع ايجار سنوي (مبلغ الصيانة) والسعر الي انت بتدفعه كأنه خلو رجل لأسبوع الإيجار بتاعك

شكرا جزيلا لرد حضرتك
كنت محتاج اعرف ايه الاماكن القريبة للزقازيق علشان لو هشترك اخد فيها بحيث يبقي سهل عليا اني اروح واستفيد من الفلوس
وكنت محتاج حتي لو علي الخاص اعرف شركتين ولا ثلاثة من الموثوق فيهم حضرتك ترشحهملي علشان اكلمهم واشوف عرض مناسب اشترك فيه ان شاء الله
وشكرا لحضرتك علي الاهتمام

[kar!m]

2- سعر الصيانة السنوية في الواقع نسبة كبيرة جداً من السعر الفعلى للأسبوع (على سبيل المثال سعر صيانة الأسبوع سنويا حةالي 900 جنيه في حين لو حبينا نأجر اسبوع لعميل كهدية او خلافه سعره 1300 جنيه)
4- مصاريف الصيانة مش ثابتة بعد فترة بيزيد وفيه بند كده في العقد (وده الدخل المستمر للقرية)

هو أنا عندي سعر الصيانة 400 جنية في السنة .. و بيزيد بحد أقصى 10% كل 3 سنوات وده مكتوب في العقد .. يعني أول 3 سنوات 40 جنية .. و بعد كده 48 جنية و هكذا .. في المقابل سعر التايم شير نفسه غلي 7 الاف جنية في ال 3 سنوات دول .. بمعنى ان العميل اللي بيشتري حاليا بشتري أغلى مما أنا اشتريت ب 7 الاف جنية.

3- الأسبوع مش تمليك لأن القرى نقسها ارضها مش تمليك دي حق انتفاع لمدة 50 سنة (من وقت التخصيص) بمعنى ان الأسبوع الي بتشتريه لايمكن ان تستخدمه لمدة 50 سنة بالكتر 45 سنة وفي بعض القرى الي كان فيها مشاكل ممكن ماتكملش 25 سنة

العقد اللي معايا مكتوب فيه انه مدى الحياة و يورث بعد ذلك .. و العقد template من وزارة السياحة .. يعني مش معمول لشركة معينة.