انا بكره ابويا

[someoneels]

متستغربوش الموضوع حقيقي بس خلوني احكى لكم وافضفض معاكم وعلى فكرة دي اول مرة تقريبا اتكلم مع حد في الموضوع ده بالصراحة دي .
انا عضو قديم معاكم بس مقدرتش اتكلم بشخصيتي الحقيقية .
مش عارف بتكلم ليه بس اتعودت انكم زي أخواتي .
انا شاب في اواسط العشرينيات ولد وحيد وعندي اختين بنات .خريج كلية التجارة وشغال فى شركة رائدة فى مجالها براتب كويس . ابويا عنده حوالى 62 سنة
الموضوع ده بدأ من وانا صغير طول عمرى بكره ابويا لأسباب كتير حقولهاكم

ابويا طول عمره عنيف جدا جدا جدا

طول عمر ابويا بيضربنى من وانا صغير جدا بعنف شديد جدا تخيلوا مثلا طفل 10 سنين يضرب لغاية لما جسمه يزرق و يبقى مش عارف يحرك جسمه والموضوع ده عالطول يعنى أي مرة يضربنى فيها بيحصل كده وياريت الضرب كان بيكون على حاجات ليها قيمة كلها حاجات تافهة مثلا باكل وانا بطلع صوت يضربنى ويقولى متطلعش صوت وانت بتاكل مع انى لاحظته ساعتها كان بياكل باكتر طريقة مقرقة وبيطلع صوت جامد جدا .

افتكر مرة ضربنى جامد انا حوالى 4 او 5 سنين في بداية حياتنا كان الحالة المادية قليلة شوية فجدتي ام امى كانت عندنا وكانت جايبة لينا على ما افتكر ديك رومي فاحنا قاعدين بناكل وأمي بتوزع علينا فانا قلت لها لأ انا عاوز حته كبيرة اشمعنا اختى ساعتها كان عندي يمكن 6 او 7 سنين ساعتها ضربنى ضرب شديد جدا وقالي اللي يتحط تأكله وانت عينك فارغة وكلام كتير لدرجة ان عماتي نزلوا من شققهم يهدوه ( احنا عايشين في بيت عيله ) ورمى الاكل في الشارع وحكم على امى متعملش أي فراخ او لحمة لمده شهرين تقريبا .

العنف بتاعه ده مكنش ليا لوحدي طبعا كان بيضرب أخواتي البنات كمان لإخطاء صغيرة وكان كمان بيعاقبنا بطرق غريبة زي مثلا اننا نقف نرفع ايدينا و وشنا في الحيط واللي ينزل ايده يضربه و ده مثلا لمدة ساعتين .

ده طبعا غير الشتيمة و الاهانة لينا كلنا بما فيهم امى اللي هي ست محترمة وخريجة كلية من كليات القمة بس مش بتشتغل . افتكر بعد لما كان بيضربنى وجسمي كان بيزرق امى كانت بتقعد تدهن مرهم على مكان الاصابة وتعيط وتبوس فيا .

عرفت برضه موضوع من فترة ان اختى الكبيرة و هي عندها تقريبا سنتين كانت بتاكل طعمية من غير عيش و كنا احنا معناش فلوس فقال لها الاحق عليكى فلوس منين . فحبسها في الاوضه وهى قعدت تعيط و تخبط على الباب و تنده على امى وعليه . امى كل ما تفتكر الموضوع ده بتفضل تعيط .

ابويا طول عمره فاشل في حياته ابويا خريج كلية من كليات القمة وكل زملائه عملوا حاجات لنفسهم الا هو فضل في شغل الحكومة اصحاب ابويا اللي سافروا دلوقتى معاهم ملايين اصحاب ابويا اللي فتحوا اماكن عمل خاصه دلوقتى معاهم ملايين اصحاب ابويا اللي اشتغلوا في شركات خاصة دلوقتى مرتباتهم في حدود 15000 جنية شهريا ابويا اكتفى بشغل الحكومة و مساعدة اهلة ليه لغاية لما والده مات وساب له فلوس معقولة حوالى نص مليون جنيه في البنك غير الشقة غير الارض الزراعية بتاعتنا واحنا بنأجرها وبناخد ايجارها .
من الاخر عمرى ما شوفت من ابويا حاجه كويسه طول عمره زعيق وضرب واهانة وذل بس .
حتى عمره ما اهتم بتربيتنا ولا عمره اهتم بالدين ابويا مدخن . ابويا عمره ما صلى صلاة الجمعة امى ربنا يكرمها هى اللي علمتني الصلاة وهى اللي ودتني المسجد احفظ قرأن .

طول عمرى ند لابويا مش عارف ليه طول عمرى بتناقش معاه ورأينا يكون مختلف فيفضل يتريق عليا في النقاش و في الاخر يضربني او ياخد قرارات ضدي . مع انها بتكون حاجات تافهة او بيكون هو فعلا غلط .

ابويا شخص مش نضيف في عاداته عالطول بيتف على الارض في البيت مش بيستحمى خالص تقريبا وده من حوالى سنتين . ومع كده بيقول انه بيقرف من عدم النظافة وبطالب الناس انها تبقى نظيفة .
ابويا طول عمره الاوضه بتاعته زي الزريبة ولما امى تحاول تنظفها يزعق ليها جامد ويقول لها انتى كده بتحركي الحاجه مكانها و بتلخبطى الدنيا .
موضوع النقاش معا ابويا قل جدا لما انا كبرت وتقريبا مش بتكلم معاه خالص دلوقتى نظرا لظروف العمل وانى بقيت مسؤول عن نفسى .

برضه في موضوع الدراسة مع ان ابويا معاه فلوس بس طول عمره بيقول لو مجبتش مجموع حتدخل أي حاجه وخلاص مع انه كان يقدر يدخلني كلية خاصة . ابويا بخيل بدرجه رهيبة الا على نفسه حاجات كتير اساسية مكنش بيجيبها لينا زي مثلا الهدوم ابويا طول عمره شايف الهدوم شيء مش أساسي جدتي ام امى الله يكرمها كانت بساعدنا في الموضوع ده واحيانا امى كانت بتحوش من فلوس البيت وتجيب لنا وتقول لابويا ان جدتي هي اللي جايباه لينا .

اما موضوع كرهي لابويا مبدئش من الاول خالص بدأ تقريبا وانا في اولى ثانوي بعد لما الظلم والقهر بتاعه كتر اوى اوى وشفت الابهات بيعملو ايه مع ولادهم اللي هما أصحابي .
بجد انا بتمني موت والدى . مش بس موته اتمنى اشوفه بيتذل قدامى ويتعذب لأنى بكره اكتر من أي حد في الدنيا كلها .
متتخيلوش مدى الضغط العصبي والنفسي اللي كلنا عايشين فيه بسببه .
الكره تجاه والدى من أخواتي و والدتي بدأوا يحسوا بيه برضه من حوالى 7 سنين لما ظلمه و جبروته كتر اوى .
افتكر برضه لما كان بيتخانق مع امى على اتفه الاسباب ويشتمها مع انها معملتش حاجه خالص والله امى من افضل الزوجات اذا مكانتش احسن واحده على الاطلاق ادب واحترام عمرها ما علت صوتها عليه طول عمرة بيقل ادبه عليها وهى اللي بتعتذر له وتصالحه كمان واستحملت ذل واهانه علشان تحافظ على البيت وعلينا .


اللي يجنن بقى انه شايف انه المضحى انه بيعمل حاجات كتير علشان خاطرنا ان اللي فى ايده مش له مع ان تقريبا 1/2 دخلنا هو اللي بيصرفه على نفسه . قال كلمة كده بالنص (( انتو عايشين فى الدنيا بحسى )) مع ان والله هو اللي بيعرنا فى الوسط بتاعنا لان مع السن ابتدى عقله يتأثر و بقى يغير فى الكلام و يعمل مشاكل لأتفه اتفه الاسباب و يهزقنا كلنا .

ابويا معملش أي حاجه ليا خالص . انا اشتغلت فى اماكن كتير قبل ما اشتغل فى الشركة اللي انا شغال فيها دلوقتى
وكانت وظايف فى اماكن كويسه مع ناس محترمين جدا وكل الوظايف دي انا اللي جبتها لنفسي من معارفي انا الشخصية حتى لما قلت له عاوز اعمل مشروع ويساعدني قالي منين . يعنى انت تعمل مشروع واحنا نموت من الجوع .

انا اول مرة اكلم حد فى الموضوع ده بالطريقة دي . ياريت اسمع وجه نظركم فى الموضوع واقسم بالله ان كل كلمة قلتها حقيقية اذا كمان مكنش الواقع أسوء .

[hitman235]

استقل بحياتك و نفضله و حاول تعيش بعيد عنه ولا كأنه موجود ولا كأنك تعرفه و حاول تود امك و اخواتك على فترات و لو قدرت تخليهم يسيبوه هما كمان يبقى رحمتهم

[wawamoha]

اللهم لا حول ولا قوه الا بالله
اصبر و احتسب واديله حقه كما امر الله وحسابه عند ربه
ولو انت او حد من اخواتك تعبان نفسيا بسبب الشخصيه دي - وارد طبعا- ماتبخلش عليه ووديه لدكتور نفسي ثقة
ادعيله بالهدايه

الله معك

[amr011111]

مش عارف ارد بصراحه
مستنى معاك اراء بقية الاعضاء

[someoneels]

استقل بحياتك و نفضله و حاول تعيش بعيد عنه ولا كأنه موجود ولا كأنك تعرفه و حاول تود امك و اخواتك على فترات و لو قدرت تخليهم يسيبوه هما كمان يبقى رحمتهم

انا الى حد ما اعتبر حايشه عنهم و بيعمل لى حساب شوية ولو انا سبتهم حيبهدلهم زيادة عن كده انا مستحمل علشانهم

للاسف منقدرتش نسيبه لاسباب كتيره . اولا اخواتى سله متجوزوش والمظهر الاجتماعى .



ثانيا الاسباب المادية .

منعرفش تصرفه حيكون ايه

[ashouhdy]

بر ابوك وادعي لة بالهداية واستقل بحياتك ويكفيك فقط انة اوصلك الي مكانتك العملية والعلمية

واصبر و احتسب صبرك عند الله.

والاهم اهتم بعملك جدا جدا جدااااا


ذي ما ربنا امر ببر وطاعة الوالدين ربنا برضوا امر بالعطف عالابناء و مودتهم و الحسن اليهم.

قد يكون سوء معاملة والدك لك يحجب عنك مصائب اخري في الدنيا

واحمد ربنا انك طلعت رجل صالح قويم سليم ولم تذهب الي طرق المعاصي .

الحمد لله

[someoneels]

اللهم لا حول ولا قوه الا بالله
اصبر و احتسب واديله حقه كما امر الله وحسابه عند ربه
ولو انت او حد من اخواتك تعبان نفسيا بسبب الشخصيه دي - وارد طبعا- ماتبخلش عليه ووديه لدكتور نفسي ثقة
ادعيله بالهدايه

الله معك

مش قادر اديله حاجه بجد بكره اكتر ما بكره اليهود .

اما نفسيا فكلنا عايشين فى ضغط نفسى و عصبى كبير

[mado83]

امك ثم امك ثم امك ثم ابوك

[someoneels]

بر ابوك وادعي لة بالهداية واستقل بحياتك ويكفيك فقط انة اوصلك الي مكانتك العملية والعلمية

واصبر و احتسب صبرك عند الله.

والاهم اهتم بعملك جدا جدا جدااااا


ذي ما ربنا امر ببر وطاعة الوالدين ربنا برضوا امر بالعطف عالابناء و مودتهم و الحسن اليهم.

قد يكون سوء معاملة والدك لك يحجب عنك مصائب اخري في الدنيا

واحمد ربنا انك طلعت رجل صالح قويم سليم ولم تذهب الي طرق المعاصي .

الحمد لله

مش قادر ادعى له بالهداية بدعى ربنا يذله فى الدنيا و فى الأخرة وادعى ربنا ان يقتص لنا منه فى جهنم

مينفعش استقل بحياتى علشان امى واخواتى

اما انه اوصلنى لما انا فيه كل اللى عمله انه اكلنى وشربنى وبس + انه ذلنى

[ashouhdy]

مش قادر ادعى له بالهداية بدعى ربنا يذله فى الدنيا و فى الأخرة وادعى ربنا ان يقتص لنا منه فى جهنم

مينفعش استقل بحياتى علشان امى واخواتى

اما انه اوصلنى لما انا فيه كل اللى عمله انه اكلنى وشربنى وبس + انه ذلنى

ادعي لة بالهداية عشان ربنا يكرمك انت واخوتك و امك

اعتقد ان والدك مريض نفسي .. و اللي فية بسبب ما ذكرتة من سوء توفيقة في حياتة العملية

و بيبان دة في عصبيتة الشديدة عليكم و محاولة ايجاد ذاتة بالتفوق عليكم نفسيا ومعنويا بيسبب لة ارتياح نفسي مؤقت

اعتبرة مريض نفسي فعلا و ادعي لة و قابل السيئة بالحسني

واصتبر عشان اخواتك وامك



.
.
.

بس يعني الراجل عمرة ما ضحك معاكم ولا خفف عنكم ولا خرجكم يفسحكم ولا حاجة خالص ... انا بحاول اعرف منك هل انت متحامل علية مثلا ولا هي دي الحقيقة

[fepsceasar]

فى البداية انا مش هدافع عن والدك لكن هحاول اشرح سلوكه واقولك على طريقة كويسة فى التعامل
اولا انت بتقول الماديات ما كنتش كويسة فى بداية الحياة وده فى حد ذاته ظرف ضاغط على اى اب، كمان انت بتقول انه مش متدين وده يمكن مخليه شايف الأمان فى الفلوس وما عندوش ثقة فى بكرة، وبالتالي ده يفسر حكاية البخل.
وطبعا بالنسبة للضرب والاهانة ففى اعتقاد عند ناس كتير ان لازم تشد على الاولاد علشان يتربوا كويس واعتقد ان الحكاية دى مش موجودة دلوقتى .
نصيحتي ليك بقى تحاول تتعامل مع والدك كجار انت مش عاوز تخسره وما تجادلوش فى حاجة هو مش مقتنع بيها كتير، يعني صباح الخير، صحتك عاملة ايه ، خد بالك من صحتك. لو لاقيته بيحكيلك على حاجة او موقف حتى لو انت عارفه وحكاه قبل كده اسمعله باهتمام واظهر انك بتايده ولو شايفه غلط فى حاجة ما تقولوش انت غلطان لكن خلى كلامك عام زى مثلا الصوت العالي صعب يجيب نتيجة فى المواقف اللى زي دي
انت ليه ما حكتش عن العلاقة بينكم دلوقتي، اكيد هو بقى أضعف بحكم السن، اتمنى انك ما تاخدهاش فرصة وتحاول تنتقم منه، بالعكس احتسب ده عند ربنا ولو على الفلوس وانك ما دخلتش كلية خاصة فيا سيدي كله ليك ويمكن ده يكون احسنلك وربنا اخترلك الخير

[عبدالحكيم]

أخي الكريم،


في البداية أنبه عليك بضرورة أن تعامل أبيك الذي بلغ من العمر 62 عاماً بوصية ربك: "وبالوالدين إحسانا إما يبلغن عندك الكبر أحدهما أو كلاهما فلا تقل لهما أف ولا تنهرهما وقل لهما قولا كريما".. مهما صدر منه من قول أو فعل..


أنا قرأت الموضوع ولي الملاحظات التالية:


أولاً: والدك لا يكرهك، لكن أسلوب تربيته لك خطأ. يظن في نفسه أنه بالشدة عليك – وأنت ولده الوحيد - سيصنع منك رجلاً.. هو - وللأسف كثير من آباءنا - يعتقد مخطئاً أنه بلين الجانب من قول أو فعل سينعكس سلباً عليك في قادم الأيام..


ثانياً: أنت تقول أنك "نداً" لأبيك طوال الوقت، وتخالفه في تفكيره.. بدلاً من لومه طوال الوقت هل سألت نفسك أنت عن أسلوبك في الكلام معه أو طريقة عرض رأيك المخالف عليه؟



ثالثاً: أنت الآن كبرت وتخرجت من الجامعة وتوظفت فلماذا تمعن في ترديد مواقف حدثت في الصغر ، خصوصاً أن الطرف الآخر هو أبوك؟. من منا لم يتعرض للضرب من أبيه؟ من منا لم يُحرم من شيء يحبه سواء مأكل أو مشرب أو لعب في يوم من الأيام؟


رابعاً: لماذا لم تفكر في أن تصاحبه؟ هل جربت أن تدخل له من مدخل يحبه؟ لكل إنسان مدخل ومؤكد أنك تعرف ما الذي يميل إليه قلب أبيك..


بدلاً من كراهية أبيك وخصامه، لماذا لا تصادقه وتأخذه كمهمة عمل في حياتك؟ لماذا لا تعد خطة لإصلاح بعد أخطائه (معالجة مشكلة النظافة مثلاً من خلال ترغيبه في الصلاة)..


جرّب واصبر على أبيك وتأكد أن كل لحظة من برك إياه وإحسانك إليه سترد لك في يوم من الأيام..

[harphosh]

أخى العزيز واسمح لى أن أقول أخى
أولاً أعانك الله على ما أنت وأهلك الكرام فيه من ظروف
ولكن نصيحتى لك أن تبره ولا تهينه مهما فعل ، فقد ابتلاك الله بمثل هذا البلاء ليرفع عنك شيئاً آخر ولتصبر ولتحتسب احسانك له عند الله ، وان كنت لا تستطيع أن تقدم له شيئاً فاجعل فى نفسك أنك تقدم لله وليس له هو فهل تستطيع أن تقدم لله أم لا ؟
واجعل من نفسك مواسياً لأمك الكريمة واخوتك البنات فليس لهم إل أنت ، وليبارك الله لكم فى أمكم ، وليهديه الله أو يرحمكم منه بإذن الله
وحاول على قدر المستطاع أن تذكره بكبر سنه ومحاولة القرب إلى الله تعالى ، وان استطعت مادياً أن ترسله إلى بيت الله الحرام فى عمرة أو حج فافعل لأن زيارة البيت الحرام تلين القلوب
وأخيراً أدعو الله لكم أن يخفف عنكم ما أنتم فيه وليجزيك الله وأهلك خيراً على الصبر على ما ابتلاكم ( أمين )

[mastr_n]

والله قصتك تكاد تبكينى بالدموع
المفروض تنزل فى بريد الجمعة

يارب يسعدك انت واخواتك ويعوض عليك عوض الصابرين على اللعيشة دية ويرزقك انت واخوانتك بالزواج السعيد اللهم امين

مشكلتك صعبة وانا حاسسها جدا دية عيشة صعبة بجد حلها انك تقرب من ربنا اكتر وتكثر من الاستغفار وان شاء الله ربنا هايعملك الخير ويرزقك السعادة وصدقنى الطبع يغلب التطبع ويؤسفنى اقولك ان والدك يستحيل هايتغير

هوة والد اية علاقتة بربنا يعنى بيصلى ولا لاء

[someoneels]

ادعي لة بالهداية عشان ربنا يكرمك انت واخوتك و امك

اعتقد ان والدك مريض نفسي .. و اللي فية بسبب ما ذكرتة من سوء توفيقة في حياتة العملية

و بيبان دة في عصبيتة الشديدة عليكم و محاولة ايجاد ذاتة بالتفوق عليكم نفسيا ومعنويا بيسبب لة ارتياح نفسي مؤقت

اعتبرة مريض نفسي فعلا و ادعي لة و قابل السيئة بالحسني

واصتبر عشان اخواتك وامك



.
.
.

بس يعني الراجل عمرة ما ضحك معاكم ولا خفف عنكم ولا خرجكم يفسحكم ولا حاجة خالص ... انا بحاول اعرف منك هل انت متحامل علية مثلا ولا هي دي الحقيقة

معتقدش انه مريض نفسى لانه بيتعامل بطريقة مختلفة 100 % مع الناس التانية

مش قادر اسامحه وربنا ينتقم منه


افتكر انى فى حياتى كلها خرجنا مثلا 20 او 30 مرة و طبيعى فى الخروج بيبقى فى تعامل كتير مع بعض او تفاعل فكان بيحصل مشاكل لما نرجع