مكان اسمه الوطن

[Aladdin]

اسلام سليكم جميعا
انا كنت حابب اشارككم في حاجة شغلاني من مده مش قليلة و هي يعني ايه وطن؟ و يعني ايه انتماء؟ و يعني ايه انني احب وطني؟ و امتى اكره وطني؟
سبحان الله بقالي يومين عايش جوة الموضوع ده اصحابي عايزين بعد ما يتخرجوا يهاجروا و انا بحاول اقنعهم بانهم يفضلوا في مصر و كلنا نصلحها سوى. و غير كده اروح البيت اتفرج على فيلم وثائقي اسمه مكان اسمه الوطن بيحكي عن ناس عاشوا برة في فترة من حياتهم و رجعوا أو ناس عايزين يهاجروا أو ناس بتحب بلدها على ما هي فيه و ما نفسهمش يروحي اي بلد تاني
ياريت اعرف اراكم الكريمة في الموضوع ده و انا هابدأ بنفسي.
أنا وطني الأول و الاخير هو مصر اتولدت و عشت و هاموت فيها ما اعرفليش بلد غيرها و فخور انني انتميلها و من كل قلبي اتمنى الظروف تتحسن فيها شويه و طبعا وطننا العربي و الاسلامي بس بخص مصر اكتر. و انا شايف ان الانتماء هو انك ماتسيبش بلدك ابدا مهما بعدت و عمرك ما تاذي بلدك مهما عملت فيك لان في الاخر الناس هما اللي بياذوك مش البلد. و انا ممكن اكره بلدي لما اكون فاقد كل شيء في الحياة و عاجز تماما عن عمل اي حاجة و دة شيء مستحيل علشان ربنا ادانا عقل و قدرات لا تنتهي و لو ما عرفتش تستخدم اي منها اكيد هايكوون عندك غيرها عشان تستخدمه. ده رايي

يا جماعة انا اه صغير و لسة طري زي ما بيتأللي بس انا متفائل و ان شاء الله بلدنا هاتكوون احسن بينا و اولادنا هايفخروا انهم مصريين و هايفخروا باهلهم و اللي عملوه لبلدهم...

[hazem_khidr]

الناس فاكره ان السفر و الغربه بالساهل بس لما بيجرب بيعرف قيمه بلده.
انا لو حتكلم عن الغربه مش حيكفيني صفحات المنتدي كله اكتب فيها !!!!!
سافرت الامارات و قبل مسافر كنت بسعي للسفر علشان اكون نفسي و اعمل نفسي و اعمل مستقبل و ارجع تاني لحد ما جه وقت الجد و بصيت لقيت نفسي في المطار هناك كل دقيقه بتعدي عليا عاوزه كتب اوصف الاحاسيس اللي فيها هما يدوب تلات ساعات بقيت بعيد عن اهلك و يا عالم حتشفهم تاني ولا لاء يا تري حتعيش ازاي و حتستحمل ولا مش حتبقي راجل قد مسئوليتك؟؟؟ سيبك من دا كله و اهم من الشغل الناس اللي هما اصحابك غصب عنك و مضطر تتكلم معاهم و تتعامل معاهم حتي لو وحشين علشان لو قلت انهم وحشين حيتقال عليك انك متكبر و مش بتحب حد و يطلعو فيك عقد نفسيه تكفي جيل بحاله!!!!!
يااااااااااه فكرتني بايام ربنا ما يعودها تاني .
هيا كتجربه استفدت منها و الحمد لله كتير قدرت اعتمد علي نفسي(بقيت بطبخ و بغسل و بنضف حجرتي لوحدي من غير مساعده) و اتعرفت علي بلد جديده و اتعلمت ازاي اتعامل مع انماط كتير من البشر ما شوفتهاش هنا
الغربه بتقوي الواحد لكن غلط ان الواحد يستمر فيها اللي يسافر يعمل لنفسه فتره يخلصها و يرجع يعمل اي حاجه في مصر.
تعرف انا مره كنت حترحل من هناك علشان مره لقيت واحد مواطن واقف ورايا في طابور في شركه صرافه و بيشتم في المصريين !!! تخيل انه كان فاكرني واخد مكانه و بيقولي دا مكاني قولتله لاء انا واقف هنا من بدري لقيته بيقول حقولك ايه ما انت مصري و ما عندكش نظام.... ما حسيتش بنفسي ساعتها انا بقول ايه ولا بعمل ايه اللي فاكره اني شتمته و شتمت البلد و اللي فيها و ضربته و اتصل بالشرطه و الشرطه جات لولا واحد ابن حلال شهد بالحق انه هو اللي شتم الاول و انا رديت عليه مكنوش قعدوني ساعه واحده في البلد!!و انا بعمل كده عارف ان ممكن اتكنسل من البلد لكن ايه فايده اني افضل في بلد و كرامتي مكسوره و يجي واحد متخلف يشتم فيا علشان الفلوس ؟؟؟ مش عاوزها و يتقفل الباب اللي يجيب فلوس مع الاهانه .
اسف للاطاله بس الموضوع اللي انت فاتحه قلب عليا مواجع كتير

[Aladdin]

السلام عليكم
انا اسف والله يا اخ حازم انني فكرتك بالذكريات دي بس برضه ما تنسلش ان العرب مش فاهم ليه كتير منهم بيكره مصر بس شوفها من ناحية تانية انت حقك رجعلك في ساعتها ارضيت كرامتك بانك ما سكتش و لما كان هايتعكلك مشكلة ربنا وأفلك واحد ابن حلال شهد لك بالحق.. و بعدين اديك اتعلمت حاجات حلوة طبيخ و غسيل و كدة يعني ده انا اخويا مسافر المانيا و هو في البيت ما كنش بيعمل اي حاجة خالص و لما بكلمه مش عارف ياكل اي حاجة و مش عارف ياكل في مطاعم عشان اللحوم مش حلال و هو ملجأ قصدي مطعم واحد بس تركي بياكل منه عشان حلال. على فكرة انا عندي 18 سنة و من 3 سنين كنت سافرت سلوفاكيا باحضر مؤتمر دولي هناك تبع جمعية كنت شغال تبعها و هناك اتعلمت حاجات فرات في حياتي كلها منها انني بايت متسامح مع نفسي و مع غيري بشكل كبير جدا و كمان قبلت التعامل مع ناس مكانش ممكن اتعامل معاهم قبل كده كان في ست من اسرائيل موجودة و كنت افش منها في الاول و بعد كده طلعت محترمة جدا طبعا العلاقة كانت محدودة جدا بس كان في تعامل... و مش بغيظك ولا حاجة بس المدة اللي كونت في سلوفاكيا كانووا اسعد ايام حياتي و عمري ما هنسى الايام دي
فكرتني والله ربنا يكرمك اسعدت يومي

[hazem_khidr]

لا مفيش مشاكل يا اخ علاء عيب عليك. بس السفر لمده اسبوع او اتنين حاجه زي فسحه و السفر علشان الشغل حاجه تانيه.البلد ما انكرش انها كانت نضيفه اوي بس عمري ما استمتعت بيها خالص ولا باي حاجه هناك.كان عندي اتمشي ولو ربع ساعه علي الكورنيش و اتفرج علي الناس احسن ميت مره من اني اتمشي في مناطق بيسموها ارقي مناطق في العالم( هناك في دبي اول ما بتوصل بتلاقي يافطه بتقولك مرحبا بك في ارقي كيلو متر في العالم) شوف بقي انت المنظر عامل ازاي هناك؟لكن البلد اللي بتاكل فيها عيش عمرك ما تعرف تستمتع بيها
عارف يا علاء البلد كانت عامله ازاي بالنسبالي
كانت زي لوحه جميله مرسومه بس ما فيهاش روح ناقصه الروح .
مكنش في حاجه هناك ليها طعم كأني باكل بلاستيك
الايام كلها شبه بعض مفيش فرق رمضان من عيد من اي وقت تاني اليوم مفيهوش اي تغيير.
اول يوم رمضان و الواحد بيتسحر و يفتكر اهله كانت عنيه بدمع انه مش بيتسحر معاهم
و اول يوم لما كان الواحد بيفطر لوحده و يفتكر العائله كلها ملمومه في البيت و بنفطر سوا كان بيبقي هاين عليه ياخد جازه ينزل يفطر معاهم و يرجه

[Aladdin]

و الله ربنا يعوضك عن الايام دى بايام احلى ان شاء الله غالبا انا مبحسش الكلام ده اوي علشان لسة ماعلييش مسؤليات و وجع القلب ده و لما سافرت كننا تقريبا 400 واحد كنا كلنا اصحاب...
بس تعرف تحس ان مصر دي عاملالنا عمل الناس ممكن تشتم فيها و كل حاجة و اول ما يسيبوها يكون نفسهم فى يوم واحد بس من ايامها :lol:...

و انت ما تقلقش اتجوز كدة هاتلاقي واحدة تملا عليك حياتك (وتفضي جيوبك :lol: ) و ساعتها مهما كانت الغربة هاتهونها عليك شوية اعتقد و لو يا ريت تبقا تشوفلي عروسة انا كمان معاك :D

------------
تم التعديل بواسطتى
م/عبدالله

[PRO-DRIVE]

انا اسف والله يا اخ حازم انني فكرتك بالذكريات دي بس برضه ما تنسلش ان العرب مش فاهم ليه كتير منهم بيكره مصر


دة موضوع يطول شرحة اوىىىى و الدول حالات بس انا عموما مش حتكلم طبعا لاحترامى الكبير لكم و عدم رغبتى فى جرح مشاعركم

[جندى مجند]

Re: مكان اسمه الوطن

يعني ايه وطن؟ و يعني ايه انتماء؟ و يعني ايه انني احب وطني؟ و امتى اكره وطني؟

الوطن هو المكان الذى تشعر فيه بكرامتك و بأن لك و لأهلك من حولك قيمة انسانية و بأنك كما تؤدى واجباتك تأخذ حقوقك و كذلك الكل من حولك يؤدون ما عليهم من واجبات و يأخذون ما لهم من حقوق و من اعتدى منهم فأخذ أكثر من حقه أو قصر فى واجبه فيطبق عليه القانون مهما كان منصبه و علاقاته .... تأمل الآية دى كويس ففيها اشارات لمعنى كلمة الوطن و قيمته:

"وَمَا لَكُمْ لاَ تُقَاتِلُونَ فِي سَبِيلِ اللّهِ وَالْمُسْتَضْعَفِينَ مِنَ الرِّجَالِ وَالنِّسَاء وَالْوِلْدَانِ الَّذِينَ يَقُولُونَ رَبَّنَا أَخْرِجْنَا مِنْ هَذِهِ الْقَرْيَةِ الظَّالِمِ أَهْلُهَا وَاجْعَل لَّنَا مِن لَّدُنكَ وَلِيًّا وَاجْعَل لَّنَا مِن لَّدُنكَ نَصِيرًا (75)" -- سورة النساء

[Karim_Monir]

و الله ربنا يعوضك عن الايام في الكويت او لوحدك عموما بايام احلى ان شاء الله غالبا انا مبحسش الكلام ده اوي علشان لسة ماعلييش مسئؤليات و وجع الالب ده و لما سافرت كننا تاريبا 400 واحد كنا كلنا اصحاب بس تعرف تحس ان مصر دي عاهلالنا عمل الناس ممكن تشتم فيها و كل حاجة و اول ما يسيبوها يكون نفسهم فيوم واحد بس من ايامها :lol:
و انت ما تالاش اتجوز كدة هاتلائي واحدة تملا عليك حياتك (وتفضي جيوبك :lol: ) و ساعتها مهما كانت الغربة هاتهونها عليك شوية اعتقد و لو يا ريت تبقا تشوفلي عروسة انا كمان معاك :D

دعوة للكتابة بلغة مفهومة عشان معرفتش اقرا ولا كلمة من اللغة دي اللي لا هيا عربي ولا عامي

[Aladdin]

والله يا استاذ كريم انا متأسف جدا بس ارجو ان تعذر ركاكة لغتي و قلة تمكني منها فانا للأسف مصري و من أبين مصريين و لكني لا لتحدث العربية بطلاقة و يكلفني مجهود رهيب لكي اكتب رسالة بلغة فصحى صحيحة أعذرني مرة اخرى...
و انا حاولت اترجم الكلام بلغة مفهومة :


و الله ربنا يعوضك عن الايام في الكويت لوحدكا بايام احلى ان شاء الله ممكن انا لا اشعر بذلك لاني لا اتحمل مسئوليات كتير و لكن عندما سافرت كننا تقريبا 400 شخص كنا كلنا اصحاب بس تعرف تحس ان مصر دي عاملالنا عمل الناس ممكن تشتم فيها و كل حاجة و اول ما يسيبوها يكون نفسهم فيوم واحد بس من ايامها Laughing
و انت لا تقلق اتجوز كدة ستجد انسانة تمأا عليك حياتك (وتفضي جيوبك Laughing ) و وقتها مهما كانت الغربة ستهون عليك اعتقد و لو يا ريت تبقا تشوفلي عروسة انا كمان معاك
يا رب تعرف تقرأها المرة دي

[Nader]

والله يا جماعة انا نفسي اعرف قيمة بلدي........بس مش عارف!!!!!!

لا تعليــــــــــــــــــــــــــــــــــــــــــــــ ــــــــــــــــــــــق!!! :shock:

[Hossam_Hassan]

من الأخر، مصر دى بتاعتنا، يعنى لو فيها العبر، برضوا بتاعتنا....ملكنا... لا سالفينها و لا مأجرينها و لا محتلينها...... بتاعتنا و مهما حصل لنا فيها و مهما كان بره أحسن، برضك بتاعتنا و هوه ده اللى يفرق بينها و بين أى مكان تانى.

[Aladdin]

الله ينور عليك يا استاذ حسام و الله انا رايي كده برضك
و عشان نفس السبب انا مهتم اصلح بلدي و اخليها احسن بلد في الدنيا كلها مهما كلفني ذلك لأنها ببساطة زي ما تفضلت و قلت (بتاعتنا)
انا دايما بدعي لربنا اننه يستخدمني لفعل الخير و لتقدم الأمة دي

[3mr Farrag]

مع احترامي لأرأكم بس الاستاذ جندي مجند بيقول الوطن هو المكان الذى تشعر فيه بكرامتك و بأن لك و لأهلك من حولك قيمة انسانية و بأنك كما تؤدى واجباتك تأخذ حقوقك و كذلك الكل من حولك يؤدون ما عليهم من واجبات و يأخذون ما لهم من حقوق و من اعتدى منهم فأخذ أكثر من حقه أو قصر فى واجبه فيطبق عليه القانون مهما كان منصبه و علاقاته

حد شايف ان ده بيطبق هنا !!!!!!!!!
انا بصراحه من الناس اللي مش طايق البلد و مش هقول ان العيشه بره هتحس فيها بالانتماء او الاطمئنان....
بس انا كنت بسافر السعوديه في اجازه نصف السنه و اخرها من فتره لأن والدي كان بيشتغل هناك
مع ان صحيح متحسش ولا برمضان ولا العيد رغم ان اهلي معايا....بس معلش البلد نضيفه و فيها نظام و مافيش قرف من كل ناحيه ذي عندنا و تحس انك مرتاح نفسيا لأن كل حاجه حواليك مظبوطه...بس انا شايف لو بلد ذي الامارات مثلا اكيد هيكون العيشه فيها احسن لأن السعوديه مقفله شويه في الحياه......

[Mo3taz Selim]

و الله ياجماعه الكلام عن الوطن محتاج صفحات و صفحات
فعلا أنا ما حستش بقيمة مصر إلا لما خرجت بره مصر و كانت فتره قصيره جدا و لله الحمد لم تتعدى ال 15 يوما لكن خلال تلك الفتره عرفت معنى الوطن فعلا ... معنى إن الإنسان يبقى مطمئن على نفسه و هو ماشى فى بلده فى أى وقت سواء ظهر أو عصر أو فجرا ... و معنى عدم الخوف على زوجتك و بناتك أثناء التسوق داخل أى سوق تجارى ... و معنى الأمان و الحمد لله الأمان ده نعمه كبيره الواحد مش مقدرها كفايه إن الواحد و هو فى أى بلد غريبه ممكن يتحكم فيه شخص ما يسواش 3 تعريفه و غصب عن الواحد لازم يقول حاضر ...

( هناك في دبي اول ما بتوصل بتلاقي يافطه بتقولك مرحبا بك في ارقي كيلو متر في العالم) شوف بقي انت المنظر عامل ازاي هناك؟لكن البلد اللي بتاكل فيها عيش عمرك ما تعرف تستمتع بيها
عارف يا علاء البلد كانت عامله ازاي بالنسبالي
كانت زي لوحه جميله مرسومه بس ما فيهاش روح ناقصه الروح .

و الله يا أستاذ حازم كلام حضرتك ده مظبوط مليون فى الميه و هو ده كان إحساسى فى الكام يوم دول مع الفارق إن أنا كنت رايح زياره فقط ... كنت بعد الأيام و الليالى حتى أرجع إلى مصرنا الحبيبه و ماتتصورش مدى فرحتى أنا و الأسره كلها لما إطارات الطائره لامست أرضية المطار .... أحساس لا يوصف


و زى ما أ/ Hossam Hassan قال

من الأخر، مصر دى بتاعتنا، يعنى لو فيها العبر، برضوا بتاعتنا....ملكنا... لا سالفينها و لا مأجرينها و لا محتلينها...... بتاعتنا و مهما حصل لنا فيها و مهما كان بره أحسن، برضك بتاعتنا و هوه ده اللى يفرق بينها و بين أى مكان تانى.

فعلا هو ده الشعور اللى كان عندى إن مصر دى بتاعتنا مهما الواحد عمل فيها برده هايبقى جواها بمعنى حتى لو مشاده بينى و بين اى حد أيا كانت وظيفته أو رتبته برده فى بلدى و أهلى هايعرفوا أنا فين و لكن بره لأ ممكن الواحد يختفى شهور و سنين و لا أحد يعلم عنه شىء ...

يا جماعة انا اه صغير و لسة طري زي ما بيتأللي بس انا متفائل و ان شاء الله بلدنا هاتكوون احسن بينا و اولادنا هايفخروا انهم مصريين و هايفخروا باهلهم و اللي عملوه لبلدهم...

و الله يا أ / Aladdin
الواحد بيفرح لما بيلاقى شباب زى حضرتك بيفكروا بالفكر العالى ده و عندهم الأنتماء الوطنى الكبير ده و طول ما فكرك كده و حماسك بالصوره دى فعلا الواحد بيطمئن على البلد

[محمد ابراهيم 1]

الناس لما بتشتم فى وطنها بيبقى قصدهم النظام مش البلد لأن النظام هو المسئول عن تدهور أوضاعهم ولجوئهم الى الغربه من اجل تحسين اوضاعهم المعيشيه
ونظرا لأن النظم من هذا النوع بتكون فى الغالب انظمه دكتاتوريه لا تسمح بالحريه الحقيقيه فى الرأى أو كفاله نزاهه الانتخابات فيترتب بالضروره على ذلك احساس الناس بالقهر نتيجه لثقتهم ان رأيهم سيتم تزويره وبالتالى لا ضروره منه الذى يولد بدوره ضعف احساس المواطنه وعدم الإنتماء الأمر الذى يتسبب فى تولد حاله من عدم الإكتراث وهى أمر فى منتهى الخطوره ويكاد يكون السبب الرئيسى فى كل مشاكلنا
من هنا نجد أن وذلك معلوم للكافه أن الديموقراطيه والتقدم مترادفان والعكس صحيح
بديهى أننى لا أتكلم عن مصرنا