عاوزين نهاجر

[khaled_sabry]

عارف ان السؤال ده اتسأل و اتعمل عليه 100 موضوع قبل كده - معلشى خلينها 101 علشان خاطرى
الموضوع انى متزوج و عندى 4 اطفال
و اصبح عندى من فتره قصيره مبلغ كويس بسبب بيع شقه
فإنتعش لدى حلم الهجره لكندا و الذى كان متوقف بسبب عدم توفر الضمان المادى (حاليا اصبح متوافر و الحمد لله لكن بالطبع ليس الى حد هجره كرجل اعمال )

و مما جعلنى افكره به بقوه ايضا ان شركتى الحاليه تمر بازمه و اصبحت مهدد بالرفد و القطاع الخاص زى ما احنا كلنا عارفين و ده يعنى صعوبه ايجاد عمل بديل
غير ان الهدف الحقيقى من الهجره هو انى احس انى بنى ادم و توفير تعليم جيد للاولاد

انا بإذن الله حدخل امتحان IELTS يوم 1 نوفمبر
لكن انا كنت ناوى اقدم السنه دى على نوك 2174 Computer programmers and interactive media developers - بس للاسف لاحظت انهم وصلو للرقم 778 و هما لسه عند تاريخ 1 يونيو
Applications we will accept – Federal skilled workers
يعنى عقبال مايوصلولى حيكون النوك ده اتملى من زمان لإن الحد الاقصى 1000 فى النوك الواحد (واضح ان المبرمجين اللى زى حلاتى هما اعلى نسبه فى طلبات الهجره )
و بالتالى واضح ان ماليش فرصه السنه دى - و السنه اللى جايه حيطبق نظام Express Entry
و اللى فهمته لغايه دلوقتى ان حيبقى التقديم من خلال الموقع و كندا حتختار اعلى الناس اللى تطبق عليهم المعايير بتاعتها - يعنى حيبقى نظام زى التنسيق على مستوى العالم
و بالتالى برضه حتبقى فرصتى ضعيفه

فياريت تشورو عليا ببلد مستواها كويس و تقبل الهجره اليها بدون بهدله او شحططه و اقدر اشتغل فيها فى مهنتى (.Net Developer)

لو حد حيقولى استراليا فكان فيه الموضوع ده اللى قفلنى نهائيا منها - بالاضافه الى ان مافيش اى حد كاتب قصه هجرته لاستراليا نهائى على النت (على عكس كندا) مما يؤكد الكلام اللى مكتوب

http://www.nilemotors.net/Nile/430165-a.html

برضه كان فيه موضوع عن المانيا

http://www.nilemotors.net/Nile/437462-a.html

بس بصراحه مش مصدقه نهائى على الرغم انى سجلت فى المواقع اللى مكتوبه فى الموضوع و قدمت على وظائف و مافيش اى ريسبونس

طبعا الطريقه الكلاسيكيه انى اطلع على اى بلد اوروبى و اتجوز اجنبيه (رغم انى نفسىىىىىىىىىىىىىىىى) ماتنفعشى معايا لإنى عاوز المدام و الاولاد جنبى و القانون هناك مايسمحلكشى تتجوز اتنين غير ان المدام حتكون قتلتنى اصلا قبلها

[MTAK]

فكر برا الصندوق
روح ماليزيا و صديقنا ابو رقيه بقاله فتره هناك و هو جرافيكس يعني له صله بالمجال

شوف واحد هايترفد معااك و اعملوا شركة هناك حتي تكون بوابة العبور و الاقامه

في كل الاحوال ، من قلبي بادعي ان ربنا يوفقك اما فيه الخير لك و لاسرتك

[khaled_sabry]

فكر برا الصندوق
روح ماليزيا و صديقنا ابو رقيه بقاله فتره هناك و هو جرافيكس يعني له صله بالمجال

شوف واحد هايترفد معااك و اعملوا شركة هناك حتي تكون بوابة العبور و الاقامه

في كل الاحوال ، من قلبي بادعي ان ربنا يوفقك اما فيه الخير لك و لاسرتك

انا كلمت خالد ابو رقيه قبل كده
و من الاخر كده قالى ان ماليزيا بلد رجال اعمال و استثمار لكن مش توظيف لإن الهنود واكلين الجو هناك
المشكله انى مش رجل اعمال انا موظف و اتعودت ابقى موظف - ممكن ابقى موظف كبير و اتخذ قرارات فى الشغل عادى لكن ماليش فى لعب الفلوس و المزانيه و اساليب رجال الاعمال بشكل عام
حتى لما قالى على مشروع لاقيت المشروع حياخد كل المبلغ اللى معايا تقريبا

هو على فكره موضوع الرفد ده لغايه دلوقتى مش اكيد - حسب الظروف يعنى بس كده كده انا فى دماغى موضوع الهجره من الاول

[rotanamasoud]

انا بفكر اطلع النمسا لو ربنا اراد لان جوز اختى نمساوى(اخد الجنسيه)بس معقدنى بيقولى امريكا بقت اسهل من النمسا والتاشيره حتترفض
ولو طلعت نيتى صافيه اتجوز ولو اسلمت مستعد اكمل معاها واجيب اولاد والله المستعان

[Bassem Youssef]

لو لم تكن متزوج و ليك في البيزنس كنت قولتلك علي تنزانيا او كينيا او حتي تتعلم استوني و تروح استونيا

بس حضرتك متجوز و ملكش في البيزنس فهقولك ربنا يتولاك :))))

[3mr Farrag]

اسأل كويس علي ايرلندا
سهله عن معظم اوروبا انك تاخد اقامه لو اشتريت بيت او عملت مشروع و المشروع الدوله بتدخل معاك شريكه فتره
طبعا في تفاصيل كتير مهمه لازم انت تدور عليها بنفسك لأني مش عارفها و ماكملتش تدوير في الموضوع ده

[Pukka]

ربنا يوفقك البلد اصبحت لا تطاق

[Ahmed Anwer]

نيوزيلندا

[khaled_sabry]

نيوزيلندا

حسب معلومات ان نيوزيلندا هى هى استراليا بس على اصغر شويه
لكن نفس الظروف الاقتصاديه و المعيشيه و حتى كمان المهاجر لاستراليا يحق ليه التنقل بين استراليا و نيوزيلندا

اسأل كويس علي ايرلندا
سهله عن معظم اوروبا انك تاخد اقامه لو اشتريت بيت او عملت مشروع و المشروع الدوله بتدخل معاك شريكه فتره

جديد موضوع ايرلندا ده - بس زى ماقولتلك انا الاهم بالنسبالى انى اروح بلد يكون فيها فرص عمل كويسه فى مجالى - للاسف الجزئيه دى كانت موجوده فى كندا و كانت اكتر حاجه مشجعانى

[3mr Farrag]

جديد موضوع ايرلندا ده - بس زى ماقولتلك انا الاهم بالنسبالى انى اروح بلد يكون فيها فرص عمل كويسه فى مجالى - للاسف الجزئيه دى كانت موجوده فى كندا و كانت اكتر حاجه مشجعانى

اللي انا عرفته ان ايرلندا كويسه في موضوع السوفت وير و اي حاجه ليها علاقه بالكومبيوتر
واحد قريبي عنده شركه هنا في مصر تسويق الكتروني و سافر قبل كده ايرلندا في مسابقه و دخل باسم شركته و قابل ناس من ضمنهم عمده دوبلن العاصمه و كان مرحب جدا ان اي حد يجي ايرلندا و ياخد اقامه و يسهلوا ليه الدنيا من اجراءات

[MTAK]

http://www.citizensinformation.ie/en/categorytree.html

[zorg]

ياجدعان مش عايزين فتى اللى عنده معلومات مؤكدة يقولها
ولازم صاحب الموضوع يحدد هو عايز ايه بالضبط هيروح شغل ولا استثمار و المبلغ اللى معاه كام يعنى
اولا عشان الفتى الكتير دول الاتحاد الاوروبى وخصوصا غرب اوروبا كلها متشابهة وصعبة من ناحية الهجرة و الاستثمار يعنى مش هتفرق رايح فرنسا من النمسا الخ- وفى الغالب دول الاتحاد الاوروبى مفيهاش هجرة بالمعنى المتعارف عليه ده الواحد بيشوف طريقة ياخد اقامة بيها ويروح يقعد كام سنة لحد ماياخد الاقامة الدائمة و الجنسية
وبرضه استراليا وكندا ونيزلندا تقريبا نفس الشروط المعقدة المعروفة اما استثمار الملايين او وظيفته تبقى مطلوبة هناك ويقدم هجرة او اذا كان يروح عقد عمل
طيب كده خلصنا من الرخى عن الدول المعروفة اللى العالم كله عايز يهاجر لها كندا واستراليا وغرب اوروبا
----
طيب اسيا نفكر فيها بس فعلا لو صاحب الموضوع بيدور على وظيفة مش هيبقى له مكان لان اللى عايز يروح هناك يروح استثمار طبعا جايز الاستثمار هيبقى ارخص من اوروبا بس محتاجة بحث اكتر اسيا لو حد عنده معلومات اكيد هينفعنا
---
نيجى لصديقنا باسم يوسف اللى فاضحنا فى الفضائيات
افريقيا من الاخر مش مضمونة ومتصلحش للهجرة العائلية ده غير الامراض و الايبولا الخ
عندى صديق ليا قالى انه برغم انه شغال هناك بقاله فترة كبيرة بس عمره مافكر يهاجر لهناك او يجيب عيلته عشان المستوى برضه مش متقدم ده غير الايبولا
طيب بالنسبة لاستونيا ومعظم بلاد شرق اوروبا اللى ضمن الاتحاد الاوروبى هتبقى اسهل نسبيا بس مش هتبقى بجودة الحياة فى اوروبا الغربية و المعظم بياخدها كمعبر بس للاسف المعلومات عن الدول دى غامضة شوية بس وبصراحة المعلومات اللى انا دورت فيها كانت عن تاسيس الشركات مش الشغل
وللاسف انا دورت فى المناطق دى ملقيتش غير ليتوانيا هى البلد اللى ممكن اروحها انا وعيلتى بس هنضطر ندفع 5000 يورو ضرايب فى السنة ومعرفش هفتح ايه و الدخل كام الخ يعنى لازم نجمع بعض كناس عايزين نهاجر ونطلع ناخد جولة فى الدول ونشوف هنختار ايه
بس انا صراحة واقع على الاخر فلو جاتلى اى حاجة فى اوروبا هروح وش بس للاسف معنديش خبرة كبيرة فى الاستثمارات ومش عارف هفتح ايه و دخل المشروع هيجيب مصاريف المعيشة هناك ولا هشحت
--
طيب نرجع لصديقنا عمر فراج
دول اوروبا سهلة وجميلة لو معاك فلوس قبرص و اليونان لو اشتريت عقار بقيمة 300 الف يورو تاخد الاقامة تقريبا
لاتفيا 72 الف يورو تقريبا (مع انها دولة واقعة)
فياترى ايرلندا بجلالتها هتبقى اسهل من الدول الواقعة؟
---------
بعد الكلام ده كله نلاحظ اننا لسة مش عارفين هنروح فين :)
ياجدعان حد يقولنا نروح فين
تقريبا صاحب الموضوع عايز يروح شغل فلازم يشوف بقى ومش عارف اذا عرف يجيب مثلا عقد عمل وياخد تاشيرة عمل هل ممكن يروح هو واسرته والبلد اللى يروحها يبقى يقدم بقى من هناك على اقامة
؟
-
وبدل مانفتح موضوع تانى الناس اللى مش هتنفع تشتغل برة اصلا بسبب طبيعة شغلها وشهادتها مش هيبقى قدامها غير الاستثمار ومن الواضح ان الفئة دى اللى انا منهم مش عارفين نروح فين او نستثمر فى ايه بس هو بالتخمين كده اما هتبقى فى دول اسيوية زى ماليزيا (ودى ممكنة فى ظروفى لو انى شفت وقريت حاجات كتير كرهتنى فيها بس لو ملقيتش غيرها هطلع اجرب) و الدول دى او شرق اوروبا
ياريت لو حد بقى يشوف الفئة دى ويفكرنا برة الصندوق ايه يارجالة محدش مثلا راح اى حتة فى اى حاجة لقاها كويسة عشان احنا تعبنا من البحث إن شاء الله لو فى دول فى اوروبا الشرقية محترمة ومتكونش تبع الاتحاد الاوروبى
اى حاجة العبد لله واقع على الاخر اصلا وكتير معايا
(سر: الواحد قلبه فى اوروبا مش عارف ليه)

[zorg]

مينفعش يارجالة يبقى اخرى انى افتح خريطة العالم كل ساعتين ادور على حتة اروحها

[3mr Farrag]

حضرتك ممكن تجرب تاخد ميعاد مع سفاره ايرلندا و تفهم منهم كل التفاصيل
انا قولت اللي اعرفه من واقع تجربه واحد قريبي مش اكثر
الموضوع مش فتي و خلاص

[zorg]

حضرتك ممكن تجرب تاخد ميعاد مع سفاره ايرلندا و تفهم منهم كل التفاصيل
انا قولت اللي اعرفه من واقع تجربه واحد قريبي مش اكثر
الموضوع مش فتي و خلاص

عارف انا اتصلت بكام سفارة لحد دلوقتى ياصديقى؟
انا كل سفارة اتصل بيها ترد عليا واحدة بايخة تقولى شوف على النت اقولها طيب بس النت مش موضح تقولى شوف على النت ولا حياة لمن تنادى كانى بشحت
مع ان اما بتكلم مع الاصدقاء الاجانب يقولولى روح السفارة وهما هيفهموك ويرحبوا بيك الخ اجى اتصل الاقيهم بيقولولى دور على النت ريحت دماغى ومبقتش اتصل بدور على النت عيطول :)