عاوز اروح شرم (خليج القرش)

[ah-elgendy]

انا بفكر اروح شرم الشيخ 4 ايام/3ليالى انا والمدام بس مش عارف احجز فى فندق ايه يكون 4 نجوم او 5 سعره كويس (خليج القرش علشان قريب من ميدان سوهو سكوير )
مش عارف مكتب كويس احجز معاه انا سئلت فى الماكتب اللى فى ميدان التحرير بس فنادق 4 نجوم بحثت عنها ع النت لقتها مش كويسه ( فاكون استار & شرم هيلودى & تروبيكانا رزيتا ) مش عارف الكلام صح ولا لأ
بردو لو انا جبت رقم فندق اكلمهم احجز بالتليفون واحجز الباص واروح ع هناك ولا الحجز بيكون غير كده لازم تبع مكتب سياحى

[هيثم مجدي]

لو بتعرف تمشي في البلد مع نفسك. انصحك احجز عن طريق Booking.com و هتلاقي اسعار متفاوته. اليوم ممكن يبقى 500 جنيه في تلات او اربع نجوم على بعد نص كيلو (5 دقايق مشي) من سوهو سكوير, و بتوصل ل 1500 في سافوي اللي جنب سوهو على طول.
الحجز بالتليفون هيكون أغلى شوية . و ممكن لما توصل هناك تلاقي حاجة غير اللي اتفقت عليها

عشان توصل شرم الموضوع بسيط, جو باص ليهم كذا موقف تقدر تركب منه لشرم الشيخ و فيه مواعيد مختلفة. والتذكرة ب 85 جنيه.

في كل الاحوال لازم تبقى عارف ازاي تاخد حقك لأن اللي شغالين في السياحة هناك من اسوأ ما يمكن و بيبصوا للمصري انه كائن من العصر الحجري اول مرة يجي مدينة الحضارة والجمال شرم الشيخ. بالرغم ان السوق واقف و هم بيشحتوا لكن اللي فيه طبع مش بيغيره.

لو عاوز مرشد في كل خطواتك هتبقى مضطر تحجز عن طريق شركة سياحة و هي لها ايجابيات و سلبيات. بس برضه لازم تعرف حقوقك كويس لان فيه مصاريف مخفية كتير مع شركات السياحة و انت اكيد عارف دا كويس.

[kazamodia]

احسن حاجة تحجز عن طريق booking.com ده افضل موقع للحجز بتشوف صور الفندق واهم حاجة تقرأ تعليقات الناس اللي حجزت هناك هتلاقيها مكتوبة عشان تعرف الفندق ايه نظامه
احسن لك السكن في خليج نعمة دي فيها كل حاجة ولو عايز تروح اي حته في شرم من هناك الميكروباص بيروح كل مكان في شرم