حاجه غريبه في البنوك

[DreAmO]

اكيد حضرتك اصدق

الحد الاقصى للسفر في مطارات اوروبا 10000 يورو لمنع غسيل الاموال
الحد الاقصى للسفر من مصر 10000 دولار

كلام سليم

الحد الادني زي ماقلت لو حد اقصي في مطارات في اوروبا بتاخد نسبة من الاموال ال انت طالع بيها
لو اكتر لازم تملي استمارة توضيح او حاجة declerationللضرايب لو معملتش كدة و طلعت اي دولة في اوروبا بياخد 10 - 12 % من الفلوس ال انت شايلها و لو عايزهم لازم محكمة
في مصر تقريبا اخرك 10000 $

حضرتك عندك مشكله في تعريف مفهوم ( الحد الأدني , الحد الأقصى ) .. ولا احنا اللي فاهمين غلط !

[DreAmO]

على فكرة انا فاتح حساب في بنك مصر من زمان .. وبستقبل عليه حوالات خارجيه بالدولار وبتتحول للجنيه المصري تلقائي في حسابي " بناءً على طلب قدمته لتحويل العمله للحوالات "
ومفيش أي مشكله .. وبطاقتي مكتوب فيها المؤهل الدراسي في خانة المهنه
وبقدر استخرج كروت فيزا من اي بنك عادي
وبكتب في الاستماره في خانة المهنه " عمل خاص "

ماعتقدش ان لازم يكون لك مهنه علشان تفتح حساب بنكي .. حتى لو القرار جديد طازه زي ماناس بتقول
لأن في فئات كتير ملهاش مهنه في البطاقه .. وملهاش اثبات دخل

ربات البيوت على سبيل المثال , الطلبه , سواقين التوك توك , صنايعيه على باب الله بيكسبوا تمام اوي .. اصحاب محلات بسيطه " بقال ,بتاع موبايلات , سنترال مكالمات , ورشة تصليح .. الخ "

ناس كتير شغلها عن طريق الإنترنت في مجالات كتير ..

وأعتقد هما دول النسبه الأكبر في شراء شهادات إستثمار قناة السويس الجديده .

وفي النهايه البنك هدفه الربح والربح والربح .. يعني معاك فلوس أهلاً وسهلاً بيك ويا الف مليون مرحب بيك عميل عندنا .. ولما يبقى يجي بلاغ او جهة نيابيه تسأل عنك نبقى نطلعلهم تقارير حسابك .

أعتقد البنك هيكون تصرفه كده .. الا لو كان في حدود معينه للحوالات الخارجيه .. أقصى حاجه ممكن يعملها لو الحواله فوق الحد الاقصى ( لو في حد أقصى يعني ) انه يرفضها وترجع للمصدر .. لكن البنك هيحقق معاك بتاع ايه .

وبعدين انت رايح تعمل ايداع فلوس .. هو ماله انت جايبهم منين .. هو أكل ولا بحلقه


كمان في اكتر من طريقه لإستقبال الحوالات الخارجيه بدون الحاجه لبنك وحساب اصلاً
وفي طرق كتير تحوش بيها فلوسك بدون بنك بردو .


يبقى البنك مش من مصلحته يرفض فلوس جياله .. وهو عارف ان في طرق بديله ومش هينوبه غير خصارة عميل وفلوس .


يا اخي ده انا لو معايا ملايين جايبها من المخدراات ورايح احوطهم ف البنك ومزاجي اشيلهم في بنك والبنك مصمم يعرف مصدرهم ودماغه قافله على الغباء ده

خليني انا اتعامل مع غبائه ده بأسلوب أغبى بردو

هروح اشتري بيهم ارض وابيعها تاني واخد عقد البيع كمصدر دخل والبنك هيدخلني مكتب المدير ويجبولي مشروب اناناس بالعجوه .

[dede_dodo88]

البنك المركزي جزء من الحكومة عندنا و مش جهة رقابية ولا حاجة. و حركة الصرافة الأخيرة بينت بوضوح ان البنك المركزي ملوش اي قيمة في مصر. مجرد اسم و خلاص. فحكاية ان البنك بيراقب و ينظم دا مش صحيح. البنك زيه زي اي جهة اخرى في مصر, بتخضع للاهواء السياسية و مزاج الدولة العام. ومش بيصدر تقارير بشفافية واضحة عن المشاكل الحقيقية للسوق المصرفي, و مش بيصدر تقارير حقيقية عن سوء قرارات الحكومة و تبعاتها على الاقتصاد.


النقطة الأهم ان موضوع كل دول العالم دا. انت في اي دولة ببطاقة هوية تقدر تفتح حساب في البنك بدون مشاكل. ممكن الرخصة او البطاقة الشخصية. و بتمضي على اقرار و خلاص. في مصر الاجراءات بقت معقدة اكتر بكتير. و المشكلة ان بتخلي موظف بنك يشتغل وكيل نيابة دا مش شغله. انا معنديش اي مشكلة في ا لرقابة. عندي مشكلة في كيفية تنفيذ الرقابة دي(؟). و هل هي رقابة حقيقية ولا مظاهر للرقابة بدون مردود حقيقي على الدولة و اقتصادها و أمنها ؟

انا مدرك تماما أهمية الرقابة لكن حضرتك اللي مش متخيل ان ممكن ان واحد زيي يكون فاهم اكتر من اللي بيحطوا السياسات النقدية وعارف ازاي اخلق مناخ جاذب للاستثمار مش طارد, لكن المشكلة ان في بلدنا كل حاجة ماشية بالعكس, و ان كل واحد في منصب أعلى وصله بالواسطة و الفساد فاكر نفسه نصف اله لا يأتيه الباطل من بين يديه و بيشرّع و يحط قوانين و هو مش مدرك تماما عواقبها.

مع كامل أحترامي لرأيك, بس أحنا كده مقدرناش نتفق في أي حاجة..
سامحني لو قلتلك أن مفيش أي حاجة من اللي أتقالت فوق تمت لعلم الأقتصاد بصلة..

بس هو عموماً, مش معنى أنك كنت ممشي أمورك غلط في شيء ما أنك كده تكمل على الغلط ده طول الطريق, فمعتقدش ان حد يقدر يعيب على حاجة صح أبتدت تتعمل دلوقتي كانت المفروض تتعمل من زمان..

يبقى البنك مش من مصلحته يرفض فلوس جياله .. وهو عارف ان في طرق بديله ومش هينوبه غير خصارة عميل وفلوس .

هروح اشتري بيهم ارض وابيعها تاني واخد عقد البيع كمصدر دخل والبنك هيدخلني مكتب المدير ويجبولي مشروب اناناس بالعجوه .

البنك مش من مصلحته يفتح حساب يجيله من وراه أي مشاكل, فهو في حالة لو عميل مشكوك فيه أو حتى مصدر فلوسه غير واضح فبالتأكيد البنك مش هيكون خسر عميل زي ده بالعكس هيكون كسب راحة باله..
البنك اللي رفض عميل معاه كام مليون و أعتبر ان دي خسارة فأكيد ده بنك واقع أوي, هو عموماً فلوس الأيداعات في البنوك دي بتعبر تكلفة على البنوك لأنه بيتدفع عليها Cost of Fund للبنك المركزي,, فلو عميل حط مليون جنيه في البنك و في المقابل البنك معرفش يطلع المليون ده في صورة قرض فهو البنك كده عمال يخسر بصورة يومية..

تاني حاجة, هو الأجراء السليم انك يكون السؤال عن أصل مصدر الفلوس, يعني حتى لو لفيت و اشتريت أرض و بعتها و اشتريت عقار و بيعته تاني فهو في الأخر أنت أزاي وصلت أنك تشتري الأرض أو العقار ده من الأساس و أنت مثلاً وظيفتك في البطاقة موظف أو محاسب..

[هيثم مجدي]

مع كامل أحترامي لرأيك, بس أحنا كده مقدرناش نتفق في أي حاجة..
سامحني لو قلتلك أن مفيش أي حاجة من اللي أتقالت فوق تمت لعلم الأقتصاد بصلة..

يا راجل اسامحك على ايه بس هو الكلام بفلوس ؟
قول اللي انت عاوزة اهو كلام حد هيراقب وراك مثلا ؟
البلد كلها بتتكلم في الهوا وتلاقي اي واحد بيقول اي حاجة و يدّعي العلم من غير ما يقول كلمة فيها ريحة العلم.

تاني حاجة, هو الأجراء السليم انك يكون السؤال عن أصل مصدر الفلوس, يعني حتى لو لفيت و اشتريت أرض و بعتها و اشتريت عقار و بيعته تاني فهو في الأخر أنت أزاي وصلت أنك تشتري الأرض أو العقار ده من الأساس و أنت مثلاً وظيفتك في البطاقة موظف أو محاسب..

فعلا, دا الاجراء السليم الموظف يقولك ايه اصل الفلوس ؟
و لو انت فشلت تجاوب لموظف البنك انت جبت الفلوس دي منين, يحبسك اربع ايام على ذمة التحقيق في مخزن البنك. ويراعى التجديد في الميعاد. و يخلي الأمن بتاع البنك يعذبك لحد لما تعترف :b4_611:

[S O P H O S]

جديد الموضوع ده
وياتري هيعملوا كده فالبريد بردوا

[pioneerahmed]

الناس عايزة تعمل الى هي عايزاة و لما يبقي في روابط و اجرائات تحفظ الحقوق يزعلوا و يبقي مش عاجبهم
و بعد كدة يقولولك اصل البلد بايظة و مش نافعة!!!!!

و الله المشكلة في الشعب مش في البلد كلة عايز يتحايل و يعمل فيها ناصح

[د.محمود صلاح]

توقع الأسوء ... مثل ضريبة على المودعين

البنوك بتاخد رسوم سنوية للحساب 35 جنيه او 5 دولار تقريبا بخلاف رسوم كارت البنك ورسوم كشف الحساب ورسوم لتخطي النزول عن الحد الأدنى للحساب

[MaZaGAngeE]

كده بقي البنوك شكرا مش هتلاقي عملا .................

[minicooper20]

طيب سوال انا بطاقتى اختصاصى تسويق بالخارج دى تفتح حساب و لا هيعملى فيلم

[pioneerahmed]

يا باشا تفتح حساب عادي بس مش بمليون جنية يعني

[hugan]

طيب سوال انا بطاقتى اختصاصى تسويق بالخارج دى تفتح حساب و لا هيعملى فيلم

طالما مكتوب وظيفه في البطاقه
ماعندهمش مشكله

[ahmedfathi]

طب انا روحت البنك الاهلى المصرى فرع النزهه الجديده ومعايا 40 الف جنيه كنت قبضتهم فى جمعيه وقولت

افتح حساب وواحطهم فيه اهو الارباح بتاعتهم يسندوا شويه فى المصاريف

الموظف قالى بطاقتك لو سمحت .قولتله اتفضل . البطاقه مكتوب فيها الوظيفه كيميائى .قالى مش هينفع تفتح

حساب .قولتله ليه .قالى عشان مكتوب فى البطاقه كيميائى بس .قولتله مش فاهم حضرتك انا معايا بكالوريوس

علوم كيمياء وبشتغل فى شركة ادويه .قالى لازم يبقى مكتوب فى البطاقه كيميائى بشركة كذا .قولتله انا شغال فى

قطاع خاص يعنى النهارده فى الشركه الفلانيه بكره هابقى فى الشركه العلانيه بعدو ممكن ابقى قاعد فى البيت وهكذا

.قالى مش هينفع والله يا فندم لازم تجيب من الشركه ما يفيد انك شغال عندهم وتجيب كمان افرادات مرتب .قمت سايبه وماشى وراجع بالفلوس تانى البيت وهابقى اروح اشوف اى بنك خاص

او اشوف البوسطه .

[lanos2004]

لا عادى صحبى طالب ولسه عاملها فى بنك خاص والبنوك الحكوميه رفضت زى الاهلى مثلا

[hugan]

قرار غبي زي معظم القرارات الحكوميه
قال يعني البنوك عندها سيوله والدنيا منتعشه

[mahmoudysf]

والله عال....يعني لو موظف مرتبة بسيط وعمل جمعية على 30 شهر ب 30000 الف جنية...ممكن البنك في الحالة دي يبلغ الجهات الرقابية وتحقق معاه ازاي انت موظف كحيان ومعاك 30 الف جنية....بس في الحالة دي هينفع يجيب 2 شهود من اللي معاه في الجمعية ولا يجيب اللي ماسك الجمعية نفسه يشهد معاه.....طيب لي اقارب ابوهم مات وكان سايب مبلغ محترم تحت البلاطة...منهم الموظف ومنهم اللي عاطل ومنهم اللي اعمال حرة ...على كدة مينفعش اي حد فيهم يحط فلوس في البنك لانه معاهوش مستند يثبت مصدرها....في الحالة دي يخلو الفلوس مدفيه تحت البلاطة بلا وجع دماغ...حسبي الله ونعم الوكيل محدش مطلع للغلبان ..ههههههه...وسلملي على المركزي....