سافرت السخنة و رجعت و صور للدائرى الاقليمى

[mhoreya]

اولا كده يا جماعة احب اشكر العضو kar!m و AHMED12345678 المحترمين الى ساعدونى اروح من افضل طريق من المنصورة للسخنة من خلال مشاركتهم فى موضوعى http://www.nilemotors.net/Nile/44452...post3875787038
سافرت يوم السبت الى فات و لسة راجع النهاردة الخميس
اخدت طريق المنصورة - ميت غمر - الزقازيق - بلبيس - الدائرى الاقليمى - العين السخنة .
متوسط السرعة من المنصورة إلى اول الدائرى الاقليمى 100 / 120 و من الدائرى الاقليمى للسخنة متوسط السرعة 160
الطريق اخد حوالى 4 ساعات مع الوقوف للاستراحة حوالى 10 دقائق و الوصلة من الزقازيق الى بداية طريق بلبيس ( اخر طريق الاحرار ) اخدت حوالى نص ساعة عشان اعدى 500 متر
لما وصلت بلبيس و عديت بوابات طريق بلبيس القاهرة الصحراوى ب 500 متر طلعت على الدائرى الاقليمى و بصراحة الطريق تححححفة . 4 حارات فااااضى الرصف ممتاز لسه متبهدلش من النقل و المقطورات و يا رب يفضل على كده و هو حاليا افضل من طريق القاهرة السخنة .... من على الدائرى الاقليمى نزلت على طريق القاهرة العين السخنة بعد البوابات بحوالى 45 كيلو ( يعنى اول ما اخدت طريق السخنة باتجاه السخنة كانت اللوحات بتقول السخنة 75 كيلو و القاهرة الاتجاه التانى 45 كيلو
دفعت كارتة عند بوابات بلبيس الصحراوى 2 جنيه + 5 جنيه كارتة الدائرى الاقليمى + 5 جنيه القاهرة السخنة
الجو فى السخنة دلوقتى ممتااز بالنهار مش حر اوى و الشمس مش حارقة و بليل هوا جميل و نسمة برودة لذيذ
و دى صورة الطريق الدائرى الاقليمى ( هو حاليا شغال لغاية بلبيس و اخره يافطة يمين بلبيس و شمال بنها بس لسة واصلة بنها شغالين فيها )

[mohamed_selim]

الحمد لله على السلامه و شيئ لطيف انك تشكر اللى ساعدوك !

[brown-eyes]

حمد لله علي السلامة
معلومة في الطرق اللي ذي دي الحارة اللي في الشمال بتقبي لتخطي بس

[kar!m]

حمدا لله على سلامتك .. والعفو يا باشا تحت أمرك في أي وقت.
الحتة اللي في الزقازيق الزحمة دي عشان بيرصفوا الطريق .. و معظم الوقت بتكون فاضية ما عدا بس الصبح و وقت خروج الموظفين.
حمدا لله على سلامتك مره تانية.

[mo3tazanas]

هو الدائرى الاقليمى دة بيربط اية باية ....يعنى بيزدى منين علفين
وحمد لله على السلامة

[S O P H O S]

حمد الله علي السلامة

[AHMED12345678]

الحمدلله على سلامتك
واجازه سعيده
ولا شكر على واجب .... ومعلش على تعب وصله طريق الاحرار وإن شاء الله بعد انتهاء رصفها وإنشاء الكوبرى هتاخدها فى دقائق

[hesham fawzy h]

حمدا لله على السلامة

انا برضو مشيت على الطريق الاقليمى .. مكنش فى عربييات خالص :)

[Ahmed_Ramadan]

أنا مشيت عليه شم النسيم اللى فات و كنت ماشى 190 و ماشى لوحدي على الطريق خالص كان كل فترة كده أقابل تريللة و لا حاجة

[حسام الغرباوي]

طريق كويس مشيت عليه

لكن في مشاكل برضو زي المطبات الهوائية ...يعني فجأة وانا ماشي علي 180 مثلا تلاقي العربية نزلت فجأة في مطب هوائي

غير كدا مفروض يعملوا النزلات كل مثلا 10 كيلو ...لان وانا جاي مكنش فيه تقريبا نزلات كتير ...

مع العلم اني ماشي عليه يوم15 / 7 اللي فات

[drcobra]

ياريت الناس تحافظ علية

[mhoreya]

هو الدائرى الاقليمى دة بيربط اية باية ....يعنى بيزدى منين علفين
وحمد لله على السلامة

هو يعتبر دائرى حوالين الدائرى الحالى ... تقريبا اشتغل لحد حلوان من تحت و القوس الشرقى كله شغال لغاية بلبيس و على اخر 2015 هيشتغل لغاية بنها و لسة القوس الغربى عشان يبقى دائرى متكامل و هيقطع طريق اسكندرية الصحراوى

[A.Saad]

هل اشتغل من اسكندرية الصحاروى او الفيوم حتى طريق السخنة ؟؟

[mhoreya]

هل اشتغل من اسكندرية الصحاروى او الفيوم حتى طريق السخنة ؟؟

تقريبا لا ... القوس الشرقى هو الى شغال من اسفل حلوان لغاية بلبيس لسه القوص الغربى شغالين فيه بس معرفش هيشتغل امتى

[Dr_Smart]

حمد الله عالسلامه

المسافه من العاشر ( طريق الاسماعيليه ) لغاية طريق السخنه على الدائري الاقليمي قد ايه ؟

يعني عشان اروح السخنه من العبور .. في رأيكم .. الاحسن اخد الطريق ده ولا اخد الدائري العادي وانزل لطريق السخنه من أوله ؟