مكتب محاسبة ولا كول سنتر ؟

[matrix_it]

انا خريج تجارة انجليش 2013 اشتغلت فى كول سنتر و دلوقتي بدور علي شغل
قدامي فرصة اني اشتغل كول سنتر في القاهرة او اني اشتغل في مكتب محاسبة في اسكندرية
مع العلم ان مرتب مكتب المحاسبة 350 جنيه
فا سؤالي هل المحاسبة بتاكل عيش ولا اخودها من قاصرها و ادور علي مجال تاني
و شكرا

Sent from my Nexus 5 using Forum Runner

[abou-yahia]

كول سنتر بتضيع عمرك حتبقه ايه في الاخر
لما يكون عندك 40 سنه شايف نفسك حتكون مدير ايه ؟

لاكن الميزه عائد معقول في البدايه

مكتب استثمار في نفسك

عائد قليل في الاول لاكن بيزيد مع الوقت

Sent from my SM-N900 using Forum Runner

[Medo.Malek]

لو مكتب محاسبة يبقى لازم تتعب و تصبر سنة او سنتين تاخد خبرة محترمة و تحاول يكون معاك كورسات حلوة و ان شاء الله العائد هيكون كويس جدا ((((((((( برة مصر ))))))) جوة مصر انت و نصيبك :)
كول سنتر دى مرحلة انتقالية ما ينفعش تبقى هيا حياتك

[Mo Dayem]

ربنا يوفقك

[Bassem Youssef]

350 جنيه ؟ دول ما يكفوا مواصلاتك او بنزينك لو معاك عربيه

خد كورس mba يساعدك و لو تقدر تخلع منها اخلع بدل وجع الدماغ

[Mr.Lawyer]

بص انا ف بدايه حياتى اشتغلت ف المحاماه وكنت بتدرب ببلاش بالعكس كنت بدفع من جيبى وقعدت اكتر من سنه ع هذا الحال ولما الشيطان لعب ف دماغى خلانى سبتها ولفيت على مليون شغلانه بديله منها الكول سنتر ف اكبر الشركات منها رايه فى بروجيكت اتصالات الامارات وبرده اشتغلت ف شركه ايكو ف بروجيكت موبايلى وفودافون ،،، الخ ولكن الصراحه لقيتها مجرد شغلانه سبوبه تجيب منها قرشين ف بدايه حياتك ولكن عمرك ما هتعرف تعمل حاجه طول ما انت ليلك نهارك وشفتات متغيره ، الخ ، واخيراً خدت القرار انى ارجع للمحاماه تانى والحمد لله استمريت واصريت انجح ف مجالى لحد ما الحمد لله اصبح بيدر عليا عائد مقبول الى حد ما ، اه مش اللى هو بس الحمد لله احسن من غيرى وان شاء الله اجتهد اكتر هيزيد اكتر وهكذاا

فنصيحه يا بن الحلال ، اقعد مع نفسك وفكر كويس اوى وخطط كويس لمستقبلك ، حدد ان كنت هتكمل ف مجالك ولا هتشوف مجال تانى تكمل فيه ، وايا كان الطريق اللى هتختاره استمر فيه واستحمل واجتهد واوعى تسيبه مهما حصل عشان ميضعش مجهودك ع الفاضى وان شاء الله ربك مش هيضيع مجهودك ع الفاضى وانا ارجح لك مجالك لان اى مجال تانى هتبقى فيه زى الغريب

[hesham fawzy h]

زى ما الرجالة قالت كول سنتر حاجة تجيب منها فلوس لو مزنوق بس

و لكن مكتب محاسبة هتقعد سنة سنتين بالكتير اوى و هيكون معاك خبرة جبارة
و خد كورسات مع مكتب المحاسبة لما تفهم كل حاجة الاول

[tkamal]

الكول سنتر حلو قوى لو فى اجازة الكليه غير كدة مش شغلانه واحج معاه بكالوريوس

روح اتعلم sap fico بالاضافه الى مكتب المحاسبه لمدة سنه او اتنين وانت ان شاء الله هتدعيلى من كل قلبك

[Khaled Online]

فيه حل وسط رائع جدا
حضرتك تبتدي شغلانة الكوول سنتر وعيش فيها سنة أو اتنين اعمل فلوس. الفلوس دي هتستثمرها في نفسك وتاخد بيها كورسات محاسبة
من بعد ما تشتغل بشهرين تلاتة في الكوول سنتر وتكون عرفت مواعيدك (حتى لو نظام night shift) هتقدرتنظم مواعيد محاضراتك إن كنت هتحضر أو مذاكرتك لو بتعرف تذاكر لوحدك
تاخد كورساتك واحد أو اتنين بالكتير قوي. عشان كتر الكورسات من غير شغل في نفس المجال نقطة ضعف وهتبقى over-qualified على شغلانة محاسب مبتدئ Junior Accountant
وكورسات المحاسبة أكتر من الهم عالقلب هههههههه هتلاقي في AmCham وهتلاقي في كليتك نفسها وهتلاقي في الAUC
اجتهدت وخدت كورساتك؟ ابتدي دور على شغل محاسبة بشروط تناسبك انت مش ب350 عفريت أما يركبوهم عالصبح! ههههههههههه ودمتم!

[Ladawy]

مع احترامى لآراء الجميع ،، Mr.Lawyer جاب من الآخر


انت خريج 2013 ، يعنى السنة اللى فاتت
و دى تقريبا الفترة أو الفرصة الوحيدة اللى لو ما اشتغلتش فيها بشهادتك مش هاتشتغل بشهادتك لباقى العمر

دوس فى مجال المحاسبة ، و اشتغل فى مكتب المحاسبة حتى لو هاتصرف من جيبك ، خد خبرة و اعرف الامور ماشية ازاى
حاول تخلى صاحب المكتب يسجلك معاه ، علشان بعد فترة الخبرة تبقى محاسب قانونى و تقدر تفتح مكتب محاسبة باسمك

بعد كدا عاوز تسافر هاتسافر ، و بعقود بمبالغ محترمة ...... و احتمال وقتها كمان فرص السفر تبقى قدامك و انت اللى ترفضها و يكون شغلك هنا بيدر عائد محترم .

لكن كول سنتر ... بعدها بكام سنة هاتزهق و تشوف شغلانة تانية فى الغالب محاسب فى اى مصنع او شركة وظيفته جمع و مراجعة دفاتر و خلاص ... بعدها تختلف مع الادارة و تسيبلهم الشغل و تروح تفتح محل بلاى ستيشن .... الخ
الخلاصة انك هاتبقى متخبط و مش مستقر على شغلانة

لكن مثلا ممكن تبقى فى مكتب محاسبة و تفتح جنبها محل لو تحب .. تتاجر أو تستثمر فى العقارات أو اراضى و خلافه ... سمسرة كمان لو تحب
هاتلاقى المجال اتفتح قدامك و هاتختار منه اللى يناسبك لو عاوز تزود دخلك .

لكن غير مجال المحاسبة ، هاتبقى صفتك " من حملة المؤهلات العليا " اللى هى بقت تعادل الثانوية فى زماننا ده

و اسال مجرب ،، انا كلية تجارة لكنى الآن " من حملة المؤهلات العليا " :\
و شغال فى وظيفة القدام اللى معايا فيها من الدبلومات .

[ZAMTRANS]

من وجهة نظرة الأفضل تشتغل في مكتب محاسبة بس ده لوحده مش كفاية لازم تحاول تذاكر وتاخد شهادات مهنية معتمدة زي acca وكمان cpa وغيرها ساعتها هتطور نفسك ومرتبك يعلى ولو عايز تسافر هتلاقي فرص كتيرة وبمرتبات كويسة ف افضل الشركات

[moody_687]

بعد اذن صاحب الموضوع كنت عايز اخد رأي الناس اللي اتكلموا فالموضوع
انا معايا ماستر فالقانون وشغال محامي وبعمل فالشئون القانونية بالهيئة الحكومية وعندي 27 سنة ومرتبي ضعيف 1000 ج واخر ترقية لوظيفتي انى اكون مدير الشئون القانونية لمنطقة غرب الدلتا
فكنت عايز رأيكم هل انا كده بضيع عمرى ف وظيفة ؟؟!! مع العلم اني مش بحب المحاماه الحرة وكانت امنيتي اكون وكيل نيابة بس الواسطة بقى مخلتش اللي يعوز حاجة بينولها
هل وظيفتي كويسة وشرف لي وليها مستقبل

[sasatony]

روح شغلانة المحاسبة وخد كورسات وربنا هيكرمك باذن الله

[zorg]

الكول سنتر حلو قوى لو فى اجازة الكليه غير كدة مش شغلانه واحج معاه بكالوريوس

روح اتعلم sap fico بالاضافه الى مكتب المحاسبه لمدة سنه او اتنين وانت ان شاء الله هتدعيلى من كل قلبك

ده عبارة عن ايه

[matrix_it]

ممكن اعرف الكورسات اللى لازم اخدها