يا أصدقاء محتاج رأيكم .. شغل في الكويت

[ياسر مصطفي]

صباحكم شريف ..

واحد صحبي كنت مكلمة على شغل لان الدنيا زي الزفت معايا لدرجة الانتحار . _ متخفوش انا مؤمن بالله _

وغيره وغيره والدنيا بردوا بايظة جدًا لدرجة اني نت رافض اني اشتغل في شرم والغردقة والكلام ده فقولت مفيش الا المجال ده

وبردوا الموضوع متيسرش ., إختصارًا


لاقيت واحد صحبي بيقولي تسافر الكويت ..

الموضوع ايه بقي ..

واحد يعرفه مسافر الكويت بيشتغل في شركة عطور
هياخد 35 الف جنية . وهيشغلني في الشركة اللي هوا شغال فيها
بمقابل اني هاخد راتب شهري .. كااااااااااااام ... 900 دينار

طيب ازاي الراجل ده بيشتغلني ولا نصب ولا ده كلام معقول
اللي مخوفني انه مش شركة مثلا الراجل هيقلي هات ورق كذا وكذا وهياخد الفلوس وهسافرله
وهوا هيشغلني في الشركة الشغل ايه بالظبط اكيد مش اي منصب اداري خالص

هل في المرتبات دي _ ولا ده نصب _ ولا ايه . صديقي ده بيقولي انا ضامنه وواثق فيه لانه صاحب اخوه من زمان _ وهوا مرديش يروح عشان مش معاه المبلغ ده وكمان هوا لسه في الجيش ...


ارجوكم ردوا عليا .........

[بحار]

الله اعلم .. بس النصب كتير خد بالك .. اعرض عليه تدفع المبلغ بشرط توقيعه على شيك بالمبلغ حتى استلام العمل لمدة 3 شهور .. وبعدها ياخد الشيك .. لو وافق تمام . ربنا يوفقك .

[Hunting_Eagle]

بالنسبة للمرتب .. فهو على حسب هتشتغل ايه

في وظايف مرتباتها 200 دينار و اقل و وظائف تاني مرتباتها 10,000 دينار و اعلى ..

المهم انت هتشتغل ايه

و موضوع انك تدفع فلوس علشان تسافر الكويت فده شائع جدا .. بس الغريب ان الناس بتدفع فلوس لواحد كويتي علشان يجبلك وظيفة و اقامة - شكلية - بس ده هياخد منك الفلوس ليه و علشان يديها لمين .. انا مش فاهم

ممكن بردو يكون بيقولك ده المرتب مع الحوافز و البونص الخ .. لازم انت تعرف ايه التفاصيل بالظبط

[Pukka]

كن حريص يا ابن عمي ومترميش فلوسك في الهوا
رواتب المدرسين هناك تعتبر ممتازة ومش بتزيد عن 450 دينار

[amoor89]

كن حريص يا ابن عمي ومترميش فلوسك في الهوا
رواتب المدرسين هناك تعتبر ممتازة ومش بتزيد عن 450 دينار

الراتب عالى جدا على انك لسه رايح تبتدى ومش معاك خبرة فى مجال الشغل
الطبيعى بيبقى 200 الى 250 دينار فى الاول

[Mohamed Zeid]

خليك حذر وحاول تمضيه على شيك بالمبلغ وياخد نص المبلغ والنص التانى بعد ما تستلم الشغل وتتأكد من الراتب وعدد ساعات العمل
الراتب دا مبالغ فية شويتين خلى باللك وربنا يسترها معاك النصب كتيير اليومين دوول وخاصة فى مواضيع السفر

[Mohamed Zeid]

الراتب عالى جدا على انك لسه رايح تبتدى ومش معاك خبرة فى مجال الشغل
الطبيعى بيبقى 200 الى 250 دينار فى الاول

كلام مظبوط

[Dr_Smart]

فعلا الراتب عالي .. انا مش عارف طبيعة العمل ايه بس غالبا sales. او مندوب او محاسب

يبقى في كل الاحوال المرتب عالي .. اعرف ناس بقالها سنين طويله هناك ومرتبها ما وصلش للمبلغ ده ولا حتى نصه !

غالبا هتكون الشغلانه بمرتب اقل لكن بيقول كده جر رجل وغالبا الموضوع عن طريق حد تاني ( كويتي غالبا ) واخو صاحبك مش بيضحك عليك لكن ده الكلام اللي اتقاله

يعني لو نويت اعمل حسابك ان الراتب ٣٠٠ - ٤٠٠ دينار على اقصى تقدير وده في رأيي مبلغ مناسب لواحد أعزب وغير مناسب لأسره عشان الايجارات عاليه ووو

ربنا يعملك اللي فيه الخير

[Imhotep]

المرتب زى ما الاخوة قالوا مبالغ فيه و ده غالبا لاغراءك بالمجازفة و دفع الفلوس
بس انا عندى لك فكرة احسن من دفع فلوس مقدما
انت قولهم انا هديكم المبلغ اللى انتوا عايزينه من مرتب اول شهرين. . . اول شهر 700 دينار و تانى شهر 700
لو وافقوا يبقى خير و بركة لانهم كده هيبقوا صدقوا فى موضوع المرتب الكبير و تاخد انت الباقى منه و تمشى بيه حالك اول شهرين و تقضيهم بالطول و العرض
لكن لو موافقوش يبقى اغلب الظن دى نصباية. . . و على فكرة نظام استقطاع نسبة من راتبك لحد جابلك شغل ده مش غريب يعنى متعارف عليه برضه

[zorg]

انا ماليش خبرة فى الكويت بس من البحث على النت انتا بتتكلم فى مرتب خرافى هناك فى الغالب هتاخد 200 دينار ولا حاجة
وانصحك تبعت تسال فى صفحة اساحبى فى الكويت - بيعيطوا هناك :)

[SGH]

زى ما قالوا الاخوه نصب لان الرقم ده هلامى بالنسبة للشغل فى مبيعات العطور و غالبا الرواتب فى الموضوع ده لا تزيد عن 300 دينار فالفرق شاسع

[hesham fawzy h]

انا حاسس ان المبلغ مبالغ فيييية
هو حضرتك خريج اية و معاك كورسات ولا لأ

و تابعنا بالجدييييد

بالتوفيق

[mr_vampire]

مبلغ كبير جدا بالنسبة لمجال العمل.

لو الموضوع تمام خليه يبعتلك عقد عمل وروح اتاكد من صحته فالسفارة او القنصلية.

[حسام الغرباوي]

الموضوع فاكس بكل المقاييس

انا كنت في الكويت

الرواتب مش كدا خالص

راتب المدرس الوافد ( ورواتب المدرسين تعتبر ممتازة ) 550 دينار ...وراتب المدرس الكويتي حوالي 800 دينار او 900 تقريبا

راتب المحاسب الخبرة سنتين او تلاتة بيكون في حدود 300 ال400 دينار

راتب المبيعات بيكون من 250 ل 300 وليك نسبة من المبيعات

مستحيل اصلا شركة تكون بتدي راتب 900 دينار ومنزلتش اعلان بشكل مباشر ومحتاجة وسيط يجبلها موظف ...اصل راتب زي دا في وظيفة مبيعات , الشركة تشغل واحد كويتي اصلا لان عارف اللهجة والطريقة واللبس و و و و ؟؟؟

[tarekmomo]

مافيش حد بيبتدى فى الكويت بالمرتبدة كبيرك 250 300 دينار