مساعدة فى مكان شهر العسل

[eng/muhamad]

السلام عليكم
اخوكم هيتجوز فى شهر 3 الجاى ان شاء الله
انا بشتغل بره مصر متغرب و متبهدل الحمد لله
هنزل قبل الفرح بايام قليله و عاوز بعد الفرح اقضى كام يوم كده استجمااااااااااااااااااااااااام
عاوز احس ان انا فى مكان جديد فى مكان طبيعى اعيش فيه وقت حلو
مكان هادى و جميل عاوز اقتراحات باماكن و نخلى شرم و الغردقه فى اخر الليستة عشان عاوز حاجه جديدة
انا اسمع عن الجونة بس معرفش عنها حاجه فياريت اسمع اقتراحتكو و لو فى حد شغال فى شركه سياحه و يقدر يساعد بالسعار يبقى كتر خيره
اتمنى الاقتراحات تكون عن تجربة
لازم الموضوع يكون داخل مصر عشان الماديات مش هتسمح

[أحمد كمال]

ميزانيتك كام

و العروسة هتعيش معاك في قطر و لا هتسيبها فترة في مصر؟

[eng/muhamad]

هسيبها فتره فى مصر و بعدينابعت لها
الميزانيه 6000

[boomboomzoro]

السلام عليكم
سمعت كتير عن مرسي علم منطقه بكر و بها مطار دولي
أنا لم أقم بزيارتها من قبل
مجرد ترشيح يحتاج من حضرتك بعض التدقيق
ربنا يتمم لحضرتك علي خير و بالرفاء والبنين
جزاكم الله خيرا

[mohamed_selim]

روح تركيا ارخص من لو هتروح مرسى علم !
تذكرة مرسى علم اقل حاجه ١٨٠٠ للفرد رايح جاى

[medo_2060]

الاماكن الحلوه داخل مصر اغلي من سفريه لتركيا مثلا
لو جوه مصر شوف سهل حشيش او سومه باي المكانين دول تحفه شوف ارخص عروض من الفنادق الي بس صدقني لو ظبطت عرض حلو هتلاقيه زي سفريه صغيره لتركيا ودي رأي احلي بكتير

[eng/muhamad]

لا احبز السفر خارج مصر
و انا معنديش علم بالاماكن السياحيه الكويسه اللى فصر
عشان كده سالتكوا

[Hobgoblin]

سهل حشيش

[Gelgel2004]

منطقه دهب فندق المريديان يليه سويس ان
هدوء - جمال - طبيعه - راحة و استجمام
ادخل على الروابط بتاعتهم
بس هدوء موش دوشه - رحلات جبل - عشاء بدوى بالصحراء بجد موش الهلس بتاع شركات السياحة اللى فى شرم
وممكن تروح شرم يوم و ترجع اخر النهار وصدقنى هتتبسط جدا

و انا اشتغلت هناك و بروح بصفة مستمرة سنويا مرتين
ومككن اساعد حضرتك
تحياتى و فكر تانى :) فى موضوع الجواز ده هههه
لا بجد الف مبروك و ربنا يكرمك

[Never_Mind]

بتعتمد انت عايز تقضى كام يوم؟
دماغك ودمااغ العروسة عاملة ازاى؟ هدوء وطبيعة ورومانسية ولا فسح وخروجات ولا شوية كده وشوية كده؟
اخوك هيتجوز فى شهر 2 إن شاء الله والموضوع شاغل تفكيرى ولسه مستقرتش .. بس انا حابب أستمتع بهدوء وطبيعة حلوة ووقت ما أحب أتفسح واخرج ألاقى مكان أروحه عشان محسش بملل
استبعدت السفر للخارج لأن الحاجات اللى هتوفرلى ده حراقة .. وتركيا السياحة اللى فيها يغلب عليها الطابع الأثرى ودى شئ مش مستهوينى وبصراحة بحس اسطنبول من التقارير زى القاهرة والاسكندرية بس على نضيف شوية
تفكيرى فى مصر حالياً :
1- دهب يومين هدوء وطبيعة وبعدها شرم الشيخ 4 أيام فسح ورحلات
2- الجونة حلوة وهادية وفيها خروجات وسهل تنزل الغردقة فى أى وقت وبعدها نايل كروز من الأقصر لأسوان

مرسى علم وسهل حشيش حلوين بس هدوء تام ومفيش حاجة تتعمل غير أنشطة بحرية فلو الفترة طويلة هتمل

[ahmedfathi]

مرسى علم او طابا

[eng/muhamad]

فى حدود 6ايام

[eng/muhamad]

ان شاء الله هتسقر على الجونة
بس عاوز اعرف راى الناس اللى راحت ؟
و لو حد عنده اقتراحات بفندق معين
و الاسعار

[هيثم مجدي]

مبروك مقدما وربنا يبارك في حياتكم
شيراتون و موفينبيك ممتازين, ال 5 ليالي بحوالي 3500 او 4000 بالفطار
و تطلب غرفة على البحيرات, و تقولهم انك honeymooner عشان يظبطوك
يليهم شتينجبرجر, 5 ليالي بحوالي 2200 بالفطار كانوا عاملين عرض على booking, برضه مستواه ممتاز و مكانه ممتاز و الستاف بتاعه كويس جدا حسب اراء ناس راحو قبل كدا

الحجز لو ملقتش حد في شركة سياحية يظبطك بسعر كويس و معاه انتقالات يبقى احجز من Booking من دلوقتي وفيه امكانية انك تحجز و تلغي الحجز قبل اقامتك بأسبوع لو عايز. يعني لو في اي وقت نزل عرض ارخص او غيرت ممكن تلغي الحجز و تحجز من جديد فمتقلقش من انك تحجز بدري كدا, المهم يكون اختيارك لاي حجز مكتوب جمبه (الغاء مجاني).

[eng/muhamad]

شكرا بس الاسعار اغلى من كده بكتير على بوكيينج