استفسار بخصوص تكسير فى حيطة

[amr00000]

السلام عليكم ورحمه الله وبركاتة
معلش يا جماعة على كتر استفساراتى علشان بس داخل فى موال مش مفروض ادخل فية بس اهو نصيبى
نظرا لان الشقة بعض تقسيمتها الداخلية مش عجبانى فبعيد بعد تقسميتها من تانى اكسر حيطة وابنيها تانى فى مكان تانى اوسع حاجة اضيق حاجة وكدة المهم يعنى علشان مش اطول عليكم الى كسر ليا الحيطة كسر ليا 2 حيطة كل واحدة 4 متر بالعرض فى تلاتة متر بالطول
كنت عاوز اعرف اديلة كام لان هو معرفة بس قالى اقل واحد لو جة ياخد منك فى تكسير الاتنين دول الف جنية وانا قولتة 500 متكلمش بس حسيتة مضايق وانى جاي علية اوى فمش عاوز اكون ظالمه ولا ظالم نفسى فياريت لو حد يعرف مفروض كام يقولى اكون شاكر ليكم

[أبو آسر]

وعليكم السلام ورحمة الله وبركاته
ألف جنيه ؟!!!!!! ليه هو هيكسرها ويبنيها تاني ولا هيكسرها بس ؟ أو هيكسرها ويشيلك الردش يرميه ويجيب ونش وعربية وكده من ضمن الألف جنيه ؟
لو تكسير بس يبقى حرامي طبعا ، ده تديله 200 : 300 جنيه ويبوس ايده وش وضهر

[amr011111]

اخره 300 جنيه وتبقى عامل معاه واجب تمام لان الحيطتين دول بمرزبه تكسيرهم ميخدش ساعة زمن

[wallace]

ال 500 كتير شوية علي الشغل ,اظن 300 - 400 بالكتير بس مادمت اديتهوملة يبقا رزقة وخلاص ,لو كان نحات الي عملك الشغل مع كام صنايعي تاني عشان يشيل طبقة المحارة بس ودي اصعب شوية عشان عايزة دقة مش هياخد اكتر من 500 في نفس الحيطين بتوعك

[naser_56]

معرفه وعاوز الف هههههههههه امال لو مش معرفه كان هياخد كام؟؟؟
كتيره!! ذي ما قالو لك الشباب 200 او 300 وانته اديته 500 علي كده المفروض هو الي يطلع يحكي لاصحابه ويقول اخدت 500 علشان الراجل معرفه هههههه

[hugan]

تكسير بس
وﻻ تكسير وتنزيل وتشوين علي عربيه نقل

[A.Saad]

النحاتين اللى فو السوق بيكسروا حوائط شوية نصابين وعالم #$%^%$#%^%$%^&

فاول ما هييجوا يقولوا 1000 و 2000
لكن 500 كويس اوى
وكتير كمان
هو اتضايق فاكر هياخد ال 1000

[Land_Cruiser]

علشان ما تظلمش نفسك و لا تظلمه هات عامل تاني و اسأله ياخد كام في الموضوع ده بعد ما تقوله علي كل التفاصيل بتاعه اللي عايز تعمله و حسب اللي هيقولهولك تقدر تحكم . في جميع الاحوال اختار الارخص لان الموضوع مفيهوش فن و اي حد ممكن يعمله