تركيب adsl ومشكلة الاسلاك ؟

[MRBEBO]

رايح اركب adsl لواحد صحبي

المشكله انه لسه مشطب شقته ومكلفها حلو

وليه مشكلة ؟ لان الاسبليتر محتاج يتحط على السلك الرئيسي

السلك اللي جاي من البوكس

فهطر اني اثبت الاسبليتر بره الحيطه وامد سلك

فطبعا ده هيخلي شكل المكان زفت وهيبقى فيه سلك طالع من اول فيشه على الاسبليتر ومن الاسبليتر للتليفونات والتاني للروتر

فهل فيه اي فكرة لاخفاء الاسبليتر والسلك الممدود

لأنه حرام نبهدل شكل الشقه كده

[DreAmO]

انا عملت حساب الموضوع ده وانا بشطب الشقه
على كل حال ليها حل طبعاً

حضرتك سلك التليفون اللي جي من الشارع داخل على فيشه ومن الفيشه دي متاخد توصيله للفيشه اللي بعدها .. وهكذا الحراره واصله لكل الفيش في الشقه .. ده الوضع الحالي .

الوضع ده هيفضل زي ماهو .. وهنعمل تعديل بسيط على اول فيشه

1- هنعزل اول فيشه عن باقي الفيش .. ونكتفي بسلك التليفون اللي من الشارع عليها فقط وماتديش فيش تانيه منها

2- هتركب في نفس علبة فيشة التليفون دي فيشة تليفون تاني جنبها ( داخل نفس العلبه وتضحي بأي فيشه تانيه زي كهربا او دش واخده مكان داخل نفس العلبه لو مفيش مكان )

" كده عندنا 2 فيشة تليفون لازقين في بعض داخل علبه واحده .. منهم فيشه متوصل عليها السلك الخارجي الرئيسي "

4- الفيشه التانيه الجديده .. توصلها على باقي فيش الشقه بديله للاولى اللي عزلناها

5- وصلة تليفون عاديه جاهزه " فيها طرفين كلبس عادي " توصل طرف بالفيشه الرئيسيه والطرف التاني بمدخل الاسبليتر ( يعني كأنك واخد سلك الشارع على الاسبليتر عدل )

6- وصله تليفون تانيه بردو عاديه جاهزه .. توصل طرف من مخرج الفون في الاسبليتر بالفيشه التانيه اللي ركبناها جنب الرئيسيه بنفس العلبه .

"كده حراره التليفون شغاله في كل فيش الشقه عادي .. ومنفصله عن ال dsl عن طريق الاسبليتر "

7- وصلة تليفون تالته عاديه جاهزه .. توصل طرف بمخرج ال dsl في الاسبليتر والطرف التاني في الراوتر

هنا بقى نقف شويه

الراوتر كده ممكن يكون في مكان والكمبيوتر في مكان تاني بعيد في الشقه .. ايه العمل !

في حالة ان مش عامل فيش نيتورك زي التليفون هيكون في حلين

الحل الاول : انك تحوط الراوتر جنب الكمبيوتر في اي مكان في الشقه .. بالقرب من فيشة تليفون
وتمد سلك تليفون من مخرج ال dsl في الاسبليتر داخل خراطيم التليفون في الحيطه بسوسته كهربائي .. لحد ماتوصل بالسلك ده للفيشه اللي جنب الراوتر .. وتعمل فيشه جنبها تاخد منها مخرج للراوتر بوصله عاديه

او تمد سلك نيتورك من الراوتر بدل سلك التليفون والراوتر يبقى جنب الاسبليتر بعيد عن الكمبيوتر

الحل الثاني : الراوتر يفضل في مكانه ويشتغل ويرليس " عن طريق الراوتر نفسه او يتوصل بأكسيس بوينت "

طبعا .. الاسبليتر هيكون خارج الحيطه لكن جنب فيشة التليفون بسنيمترات ... ممكن تفكرله في اي طريقه شياكه لتثبيته .. ولو علبة التليفون واسعه .. ممكن تخفيه جواها .

يارب يكون الموضوع مفهوم لحضرتك .

[Mu7ammeD]

الاخ DreAmO

ياريت تفهمنا عملت حسابك ازاي وانت بتشطب الشقه ؟!

يعني ايه اللي مفروض يتعمل

[MRBEBO]

طيب لو كنت تسمع يا باشا عن فلاتر التليفون هل دي ممكن تبقى حل ؟؟

يعني بيتوصل الاسبليتر باي فيشه تليفون ومنه على الراوتر وبعد كده كل تليفون عليه فلتر

هل عندك فكرة عن الموضوع ده ؟؟؟

[DreAmO]

الاخ dreamo

ياريت تفهمنا عملت حسابك ازاي وانت بتشطب الشقه ؟!

يعني ايه اللي مفروض يتعمل

عملت اول فيشة تليفون اللي داخل عليها سلك الشارع في ركن ( انا مخطط ان في الركن ده هحوط الراوتر والسويتش والاكسيس والليله دي ) ( انا جايبلهم ترابيزه حلوه صغيره كده في الركن .. وممكن يتثبتوا في الحيطه)

وجنب الفيشه دي فيشه تانيه ( داخل نفس علبة التليفون ) دي هتوصل لباقي فيش الشقه حراره تليفون

وفي نفس الركن .. عملت فيش نيتورك بنفس عدد فيش النيتورك اللي هتتوزع داخل الشقه
( يعني الغرفه الفلانيه فيها فيشتين نيتورك .. يقابلهم فيشتين نيتورك عند الراوتر في الركن اياه )

اخدت سلك الشارع داخل خرطوم ماشي تحت السيراميك وطالع برا عالشارع يدي على اول فيشه عادي

واخد من اول فيشه على الاسبليتر ومنه للراوتر .. والراوتر للسويتش ومن السويتش كبل نيتورك نص متر على فيشة النيتورك اللي يقابلها فيشه في الغرفه البعيده .. ومن فيشة النيتورك في الحيطه في الغرفه البعيده على الكمبيوتر

والتليفون من مخرج الاسبليتر على الفيشه التانيه اللي مديه لباقي فيش الشقه .. بس كده

مفيش اي كبلات ولا سلوك برا الحيطه .. هي الهوسه كلها في الركن ايااه ومعموله بشياكه ونظام .

[DreAmO]

طيب لو كنت تسمع يا باشا عن فلاتر التليفون هل دي ممكن تبقى حل ؟؟

يعني بيتوصل الاسبليتر باي فيشه تليفون ومنه على الراوتر وبعد كده كل تليفون عليه فلتر

هل عندك فكرة عن الموضوع ده ؟؟؟

الفلتر ده لا يغني عن الاسبليتر ... الاسبليتر اساسي مفهوش كلام

وظيفة الفيلتر انه بيقلل التشويش في صوت سماعة التليفون .. لو في تشويش
لكن 99% محدش بيستخدمه ومحدش لاحظ فرق بإستخدامه او عدم استخدامه

الطريقه اللي قولتلك عليها سهله جداً على فكره

انت تستعين بكهربائي .. وتقوله عايز اعدي السلك ده مابين الفيشتين دول جوه الحيطه

وتحددله الفيشتين .. وتخليه يركب فيشتين تليفون مابينهم زي اللي راكبين في الشقه

الخط ده هتعدي فيه ال dsl علشان مايشتركش مع فيش تانيه .. بس

وممكن يمدلك سلوك اضافيه احتياطيه لكل فيشه يحتمل انه ينقل الكمبيوتر عندها

ولما ينقل الكمبيوتر في غرفه تانيه يبقى يفصل السلك القديم ويوصل الجديد .

[MRBEBO]

باذن الله هحاول انفذ كلام حضرتك ويارب اعرف اطبقه صح

[DreAmO]

ده توضيح سريع للي عايز يعمل حسابه وهو بيشطب الشقه

ملحوظه : عندي مش هتشوف سلك راجع من الاسبليتر لفيشة التليفون التانيه

علشان انا عندي خطين تليفون .. مخصص واحد للنت فقط والتاني للتليفون .. ومش مركب سبليتر .
لو استغنيت عن خط هركب الاسبليتر واخد مخرج للتليفون على الفيشه التانيه


ده الركن اللي فيه اول فيشة تليفون والسويتش والراوتر والكركبه دي ( كل واحد يرصهم بطريقته بقى )




وهنا الكمبيوتر في غرفه بعيده خالص






الموضوع سهل جداً على فكره وبيحل ازمة السلوك .. وفيشة النيتورك بحوالي عشرة جنيه ( كل فيشة نيتورك يقابلها فيشه الناحيه التانيه وبينهم كبل نيتورك داخل الحيط او تحت السيراميك في خراطيم كهربا )

بالتوفيق

[MRBEBO]

طب وحدة الاسبليتر نفسه هتتحط فين ؟؟؟ يعني هنخفيها فين

[DreAmO]

طب وحدة الاسبليتر نفسه هتتحط فين ؟؟؟ يعني هنخفيها فين

علبة الاسبليتر الصغيره دي .. يا هتسبها متعلقه في الهوا جنب فيشة التليفون ( ممكن تخلي السلك اللي بينها وبين الفيشه 5 سم ) .. يا هتلزقها في الحيطه ( في ضهر العلبه ماده تلزق بيها العلبه في الحيطه )

يا تعمل التوصيلات من داخل علبه التليفون والاسبليتر يبقى جوه العلبه دي ( لو علبة التليفون تتسع لكده )

اقعد مع نفسك وتخيل الفكره وارسمها على ورقه وان شاء الله هتيجي معاك وهتلاقيها سهله جداً

انا بس اللي شرحت بالتفصيل الممل .