ايه رأيكم في المشروع الفاخر ده "محطة مياة مقطرة"

[elpilot]

السلام عليكم
لو سمحتم يا شباب محتاج اخد رأيكم في مشروع انا ناوي اعمله ان شاء الله فقلت استشير الناس لو حد عنده خبرة يفيدني
انا بفكر اعمل محطة ميه مقطرة ومفلترة عندي في البيت هعمل سيستم مثلا مبدئيا بيفلتر 1000 لتر في اليوم ولو الموضوع فتح معايا وربنا رزقني ومشي هكبر المشروع
المشروع هيكون عبارة عن اني اخد المية البايظة من الحنفية وافلترها وانقيها علي اعلي مستوي في السيستم بتاعي وبعدين اعبيها في جراكب وقارورات وابيع للناس تقريبا الجركن بيتباع ب3جنية وهعمل عرض كمان الجركنين ب5جنية خلي الغلابة تشرب
ولو المشروع كبر معايا ممكن اجيب تروسيكل واشغل عليه واحد يوزع علي البيوت بدل ما يتعبوا نفسهم وييجوا ياخدوا من البيت عندي
التكلفة المبدئية للمشروع ده هيكلفني حوالي6000جنية
تكلفة التشغيل والصيانة الشهرية هيكلفني بتاع250 جنية
المكسب المتوقع لو ربنا اكرمنا ورزقنا وبعنا جزء كبير من الانتاج هبيع مثلا 20 جركن في اليوم ونفرض ان عليهم العرض بتاعي يعني ال2ب5 يبقي ال20هيجيبوا في اليوم 50جنية في الشهر بتاع1500
يعني تقريبا مكسب حوالي 1000جنية قابله للذيادة ربنا يكرمنا ونكبر المشروع لو نجح واعمل محطه تغذي مصر
حابب اعرف ارائكم في الموضوع ده
هل فيه اي حاجه فيه غير قانونية وناس ممكن تشتكيني
اي هي مخاطر المشروع واضرارة
اي حد عنده اي اقتراحات ياريت يفيدني بيها عشان انا بجمع فكرة شاملة وهبدأ انفذ المشروع اول السنة ان شاءالله لو اقتنعت بيه
شكرا ليكم

[speed_magnum]

ربنا يرزقنا ويرزقك بالحلال

[Karim Alaa]

حسبت تكلفه المياه ؟؟ و المكان و الضرايب و خلافه اصل عشان تبيع و تكبر و محدش يجى يفرض عليك اتاوه هتحتاج شويه تعب مش مجرد مكان و انت تشتغل منه

[exelence]

المشروع ده اتعمل كتير و المهم الاستمرارية
ربنا يوفقك و يوفقنا جميعا"

[احمد المصرى]

اعتقد تكلفه المحطه اكتر من كدا بشويه مش 6000 جنيه

[amr011111]

لو انت عارف ان المكان اللى هتعمل فيه المشروع ده الناس محتاجه تشترى مياه يبقى اعمل المشروع

[MTAK]

اخر سعر سمعته لمحطه RO بتطلع 600متر3/يوم بنسبه ملوحه تصل الي 50 ppm كانت ب 45 الف دولار

[ahmedwagdy03]

إنت أكيد بتهزر و فعلا بتهزر

لازم تدفع علشان تجيب ترخيص و المياة حتتحسبلك تجارى و الكهرباء تجارى و بعد كل ده فين تصريح وزارة الصحة (ده لوحدة حيكلفك شوية مئات ......من الألوف طبعا ) و الأمن الصناعى و التموين و سجل تجارى و تأمينات و رشاوى و إتاوات .

غير كدة حتعرف تشتغل حلاوة فى الأول لكن لما مباحث التموين تتكعبل فيك صدفة أو عن قصد حيبقى مصير مشروع عبارة عن خبر فى اليوم السابع تحت عنوان ضبط مصنع للمياة المعبأة المغشوشة و لو إنت حظك حلو يبقى خبر فى اليوم السابع مع حتى من وائل الإبراشى لمناقشة مافيا بير السلم

[abdulkhaleq]

انت عندك عداد مايه لوحدك ؟ (ده بعد كل ملاحظات الاخوه طبعا)

[احمد المصرى]

عندنا فى الشغل محطه مايه صغيره مش كبيره بتعمل حوالى 1000 لتر يوميا بحوالى 13 الف جنيه مش غاليه بس خلى بالك من ملاحظات الاخوه الاعضاء

[Mecha]

ازاي ب 6000 جنيه فقط هتنتح ميه مقطره يعني مفهاش املاح ميه بس ودي طعمها غير مستساغ ,حتي لو هتبيع مقطر ايا كان
6000 مش كفايه للعده
كمان لو هتشتغل مظبوط هتحتاج سجل تجاري وبطاقه ضريبيه وموافقه الصحه عشان نشاط غذائي والمكان يجهز بامن صناعي
وبالتوفيق

[almohaor]

اهم حاجة طبعا موضوع الصحة وراح يتسحب منك عينات دورية كل شهر او اقل كمان ده لو فيه موافقة على حاجة زى كده عموما نرجو لك التوفيق ولكن اسال الجهات الرسمية الاول حتى لاتقع فى مشاكل قانونية سواء سجل ضريبى وصحة وضرائب الخ