Tweet
كلنا بنسمع عن حوادث وناس بتروح ضحايا بس لما تشوفها بعنيك ديه بتفرق كتير
الموضوع ده حصل من 3 أيام فى زهراء مدينة نصر ومتكلمتش عنه لانى كنت فى حالة دمار نفسى
أنا كنت فى شقتى وفاتحة الشباك وسمعت صوت خبط وتكسير بصييت لقيت فى أخر الشارع عربية 128 متدمره وواحد مرمى جنبها بجانب صندوق قمامة كبير ناديت بكل ما أستطعت من قوة على الأمن بس محدش سامعنى رحت لبست وقلت أنزل وبصيت عليه تانى لقيت شباب جايين جرى من بعيد بيتصلوا بالأسعاف قلت الحمد لله الناس شافتوا وهيلحقوه وهنا أبتدت صدمتى محدش راضى يقرب من الراجل كلهم يقربوا شويه ويرجعوا ... قلت يمكن هما عشان بجانبه شايفين أكتر منى وتأكدوا من وفاته بس ليه ميبعدوهوش عن الزباله ليه مش بيغطوه ؟ الوقت يمر والأسعاف لا تاتى أبداً سريعاً عندما نكون فى أشد الاحتياج لها والدقائق تمر كالجبال .....
ووسسط كل هذا تحرك الرجل يعنى هو طول الوقت ده مماتش وأحنا بنتفرج عليه يا لها من مصيبة أصابت ضمائرنا ونخوتنا أنا لاأصدق أننا تركناه
لقد رأيت الرجل بمنتهى الوضوح وهو يهتز كلياً فى أشاره لا تخفى على أحد تدل على خروج الروح بالرغم من انى أول مره فى حياتى أرى انسان فى سكرات الموت وهذا المشهد الذى لازمنى خلال الأيام الماضية ومازال ولا أدرى ان كنت أستطيع التخلص منه ام لا
الوحيد اللى شفته قرب منه بعد وفاته واحد صاحب عربه كاروا بيبيع سمك قرب منه وشال راسه من الزبالة .......... ليه محدش غطاه ليه سبتوه فى الزبالة ليه محدش همس فى أذنه بالشهادة ليه مفتكرناش كلنا أننا فى حضرة ملك الموت
وطبعاً فضل على كده لحد ما الأسعاف جت وغطوه
أنا معملتش الموضوع ده الا عشان أعبر بيه عن رفضى لسلبيتنا وان أحنا نحاول نصلح من أنفسنا ونتكاتف جميعاً فى شدائدنا ففى القصة التى ذكرتها لا مجال فيها للخوف من تحمل المسئولية لان هناك الكثير من الشهود
أنا سألت زوجى وقلت له لو حدث لى شىء كهذا هل سيتركونى هكذا فقد اكون عاريه وقد أكون وأكون ..... فكانت الأجابه الصمت التام فهنا دعوت الله من أعمق خلية بداخلى أن أموت على فراشى وتمنيت الستر لنا جميعاً فى الدنيا والأخرة
Mrs_ NYSMA
Comment