حارج الزمن

[john55]

موضوعي خارج اطار العربيات بس الواحد وهو قاعد سرحان في الزمن افتكر فتره الثمانيات واوائل التسعينات كان زمن جميل كانت بدايه الاخترعات اللي واحد كان بشتاق انه يشفها يعني مثلا الانتقال من التليفزيون الابيض والاسود الي الالوان كان نقله كبيره في حياه الناس وظهور الفيديو واللمه اللي بتجمع الناس علشان يشوفوا الافلام الهنديه اللي كانت مكسره الدنيا ايامها وظهور الوكمان واللي كان الواحد بيتباها لما كان يشتريه والاتاري اللي كان اعجوبه للكبار والصغار كانت بيلم الكل والعربيات المرسيدس الزلمكه اللي كان الكل بيحب يتصور جنبها لكن دلوقتي تحس ان الاخترعات كتير بس الكل متفرق كل واحد ماسك الموبايل والعالم كله تحت ايده متلاقيش الالفه بتاعت زمان تحس كل واحدبقي مع نفسه ومبقاش في البهجه مع ظهور اخترعات جديده كل يوم اختراع جديد لكن تحس ملهوش طعم زي زمان احلي فتره الواحد كان بيحبها عن نفسي الثمانيات علي فكره انا عمري 35 سنه بس الواحد مبقاش سعيدزي زمان انا بحس الزمن بيجري زي الصاروخ لكن من غير طعم القديم وشكرا

[nagy wassef]

عندك حق يا استاذ جون
مفيش حاجة ليها طعم دلوقتى
الواحد حتى مبقاش يضحك من قلبه
يمكن علشان ظروف الحياة الصعبة مابقتش تخلينا نستمتع بحاجة
بالمناسبة انا 35 سنة بردوا
غالبا الدفعة ديه مكتئبة كلها :)

[rotanamasoud]

وانا زيكم بس 33
من مقولات هتلر نحن نحب الماضى لانه ذهب ولو عاد لكرهناه
تفتكرو المقوله دى صح

[monamize4]

انا بكره فكرة (prisoners of the past) اللى منتشرة اوى ف مصر
و حقيقى اجمل رأى ف الموضوع دا هو رأى د/ابراهيم الفقى عن فكرة (تنظيف الماضى)
ف كتاب ايقظ قدراتك و اصنع مستقبلك


عموما دا رأى الشخصى ف موضوع مشابه

لكن لو بتتكلم عن ال Nostalgia ,, فالصراحة انا مش مؤيد للفكرة دى
لانى مؤمن بشدة بمقولة ((نحن نحب الماضى لانه ذهب و لو عاد لكرهناه))

يافندم الحنين للماضى دا نوع من الهروب من الواقع
الحقيقة ان الماضى كان فيه حاجات كتيييير مؤلمه و ياما اتبهدلنا فيه

احنا دلوقتى ف الماضى بتاع بكره و رغم ان الناس بقت بتسخط على الايام اللى احنا فيها دى
الا ان كمان 10-15 سنه نفس الناس دول هيحكوا لولادهم على وقتنا دا ان كان ذكريات جميلة
و ايام بركة و الحاجة كانت رخيصة و كان فى امان ف البلد و و و

بلاش نعيش ف كل مرحلة على زكريات المرحلة اللى قبلها
الاحسن اننا نتبسط بكل وقت بنعيشة

تصدقنى ياباشا لو قلتلك انك مش هتتبسط لو رجعت زمان
و حتى لو رجعت لايام زمان التسعينات مثلا هتلاقى ناس بتقول فين ايام السبعينات و هكذا

[ramymechanics]

33 سنة والدى كان بيقول محدش ياكل لوحده كلنا نستنى بعض
دلوقتى تلاقى كل واحد فالمطعم بياكل و ماسك التابلت او الموبايل و محدش بيكلم حد

بفتكر كلمة "عيب" و " حضرتك" و " آسف"

بفتكر اما كنت بقوم لأى حد كبير فى المترو وانا رايح الجامعة

بفتكر اما كان فيلم "النوم فى العسل" للكبار فقط والدخول بالبطاقة

بفتكر اما كنت اسمع حكيم وبابا يقوللى دة فن هابط و اسفاف

بفتكر كنت بسلم على بنت بايدى فالكلية مرة و وشها احمر من الكسوف

على قد ما بحمد ربنا على نعمة الاطفال لكن ساعات بندم انى جبتهم فى الزمن دة

[horas3000]

32 سنه و نفس القصه
و اللي انا شبه متاكد منه ان الماضي دايما اجمل لان الحال متجهة الي الاسوء
فمش بعيد بعد 10-15 سنه تانيين ان ربنا ادانا عمر نفتكر الايام اللي احنا فيها و نتحسر برضه

[Forever.Leo]

طبيعي ان يفتقد الانسان الماضي .. كان في رعاية من الاهل .. دون مسؤوليات .. محاط بأصحاب تجمعهم الصداقة .. لا يجمعهم المصلحة او الوجه المزيف .. بس بجانب ده .. مصر فعلا اتغيرت .. كان فيه ايمان و اخلاق بشكل فطري غير مصطنع او متكلف .. حتى اللي معندوش دين و لا اخلاق كان بيعمل حساب للأصول و الاعراف .. كان الكبير كبير و صغير صغير و كل واحد و ليه مقامه .. كان الاكل طبيعي له طعم و لون ! .. كان التعليم بجد و الشهادة ليها وزن و كيان .. كان حب البلد و الانتماء بديهي و جوه القلوب .. كانت الناس في معظمها شبه بعض و ما كنش فيه التفاوت الطبقي الموجود دلوقتي .. كانت القناعة و الاستمتاع بالقليل موجود عند معظم الناس قبل ما يتحول معظمنا للآلات استهلاكية شغالة طول الوقت .. كانت الحياة ببساطة .. ابسط و اروق .

[Imhotep]

في اسباب شخصية و اسباب موضوعية بتسبب الاحساس ده
الاسباب الشخصية هي الهموم اللي محدش حياته خالية منها و اللي بتزودها متطلبات حياتنا التي تزداد تعقيدا بمرور الوقت

الاسباب الموضوعية هي ان نوعية حياتنا نفسها اتغيرت... انفتحت الدنيا بشكل غبي في كل حاجة و بقي في حاجات زي الفضائيات بتقتحم خصوصية الناس و تفرض عليهم حاجات كانت قبل كده محظور الخوض فيها
اضف لكده التكنولوجيا اللي الناس فاكرين إنها تزيد التواصل بينهم لكنها في الحقيقة بتخلق لكل واحد عالم إفتراضي يعيش فيه و ينعزل عمن حوله

طيب ايه الحل

الحل هو عدم الاستسلام و ال fighting back
ازاي
التكنولوجيا لازم الواحد يحطها في حجمها و لا يستسلم لتأثيرها السلبي على حياته و وقته لانها ببساطة بتشفطهم
اما الهموم الشخصية و متطلبات الحياة فدي ربنا يقدرنا جميعا عليها بس برضة الإنسان لازم يتعلم يروض تطلعاته و رغباته لأنها ممكن تعذبه و تفسد عليه حياته في الحاضر

في الحقيقة احنا لا نملك من حياتنا الا الآن... الا اللحظة الحالية... الماضي راح لحاله بأفراحه و اتراحه... و المستقبل لا نملك من امره شئ... اللي هيحاول يعيش طبقا للقاعدة دي ممكن يلاقي بعض الراحة في حياته... القاعدة دي انا بحاول اصورها لنفسي بشكل ان حياتنا دي عبارة عن شريط سينمائي بيمر علينا و احنا بنتفرج عليه... و الشريط السينمائي ده بطله الحقيقى مش احنا... احنا المتفرجين... اما البطل الحقيقى فهو الزمن... الزمن اللي بيعدي علينا و ياخدنا من مرحلة لمرحلة

[Imhotep]

فى الدراما من اكتر الناس اللى كانوا مدركين اوى لاحساس الغربة فى الزمن ده و اجادوا كتابته و التعبير عنه كان اسامة انور عكاشة الله يرحمه
و مسلسل كامل زى ارابيسك بيدور حول النقطة دى بالتحديد. . . و قصة بطله حسن ارابيسك هى صراعه المستمر مع ما كان له معنى و قيمة فى حياته سابقا وبين واقعه الذى اصبح قبيحا فى كثير من جوانبه
حتى اللى كتب اغنية تتر المسلسل ادرك بعبقرية ان ده لب المسلسل و كتب اغنية جميلة مطلعها انا فاكره كويس:
و ينفلت من بين ايدينا الزمان. . . كأنه سحبة قوس فى اوتار كمان

حلوين شوية الفلسفة دول؟ يمكن عشان انا اكبر سيكة من المشاركين فى الموضوع حتى الان و اطرق ابواب الاربعين :-)

[lena jo]

انا ايضا بفكر كثيرا في الماضي البعيد.الدنيا كانت فعلا اجمل. اتفق مع صاحب الموضوع في كل كلامه.مع الاختيارات الاقل كانت فعلا الحياة اجمل. و كان الواحد بيسعد باي حاجة جديدة او خروج لكن كل حاجة اتغيرت . الجديد لا يسعد و كل حاجة بقت عادية حتي لو قيمة. كمان حال البلد و الفوضي اللي بقينا فيها بتخليني نفسي جدا ارجع تاني.مش عارفة ابدا اتأقلم مع الوضع الحالي

[طارق _عبد السلام]

كان كل شىء له طعم خاص لانه نادر وليس بالوفره الموجوده الان.. وطفره التكنولجيا الرهيبه لدرجه ان كل شىء مطوع لخدمتك............

شىء طبيعى على رأى سيده الغناء..قول للزمان ارجع يازمان :)......... حتى رمضان والاعياد الفرحه اختلفت

كل واحد منا مر بهذه التجارب وانت فى الحضانه نفسى فى المدرسه الحكوميه وبعدين الابتدائى متطلع ومشتاق للاعدادى . وياسلام امتى اكون فى ثانوى .. وبعدها ياسلام الكليه والانفتاح... وبعدين نفسى اخلص جيش... وهتجنن واتجوز ... وبعدها اكبر ندم.... ونفسى فى اول طفل وياريت نخاويه والفرحه بدخوله المدرسه وهكذا

وفى كل مرحله من عمرنا دائما نقول ما مضى افضل لاننا عشناه ولكن الحاضر كله مسئوليات والمستقبل مقلق لاننا لم نعشه... هذه سنه الحياه...

[nagy wassef]

انا مش نفسى ارجع اعدادى انا نفسى ارجع قبل الجواز بيوم :)

[monamize4]

الماضى وهم غير موجود الا فى عقلك , خد منه ما يفيدك ف حياتك و مايسعدك
و ألق بالباقى فى اقرب صندوق قمامة و لا تفكر فيه ابدا
عش الحاضر و استمتع به لان فيه حياتك الحقيقية

شريف عرفة (كتاب ان تكون نفسك)

[Ahmed abdkarim]

انا 25 سنة يعنى عشت فترة التسعينات .

زمان كانت الحاجة بتاخد وقتها علشان نستمتع بيها .

انما دلوقتى مش بنلحق كل شوية جديد يعنى زمان مكنش فى قنوات غير اربع خمس قنوات والواحد كان بيستمتع جدا بالفرجه على التلفزيون دلوقتى فى حوالى 900 قناة و بعدى بالريموت مش لاقى حاجه اتفرج عليها

اول برضه لما نزلت الموبايلات فى اواخر التسعينات كل موبايل كان بياخد فتره حوالى سنة و بعدين ينزل الجديد شركة نوكيا كانت بتنزل موبايل واحد بس . دلوقتى مثلا سامسونج او سونى بتنزل كل 4 شهور 5 او 6 موبايلات مفيش فرق جوهرى بينهم فى الامكانيات و تقريبا بنفس الفئه السعرية حتى انواع العربيات كترت اوى عن زمان

[M!SHO]

انا بقالي اكتر من سنه عايش في الماضي ومش عارف اخرج منه

عارف ان ده غلط بس غصب عني