أيها الإخوة الأعزاء ... أسألكم المشورة.

[أبو عبد الله***]

نظرا لأنني أولا أشعر بأننا أسرة واحدة و ثانيا لثقتي في عقلية الأخوة هنا أريد مشورتكم فيما سأقوم به مع بعض الزملاء في العمل و هو كالتالي:

نظرا لأرتفاع أسعارالشقق في الأسكندرية أرتفاع خرافي في الفترة الأخيرة (بدأنا نسمع 500 ألف و طالع في شقق متوسطة)

ففكرت أن أشترك مع بعض الزملاء (12) بأن يدفع كل من 200 ألف جنية. ليكون المبلغ الأجمالي 2.4 مليون.

ثم نقوم بشراء قطعه أرض 300 م في منطقة راقيه (سعر المتر حوالي 8ألاف جنيه)
و نتفق مع شركة عقارات أو مقاول (بشرط أن يكون ثقة جدا جدا) علي البناء (12 دور)
2 شقة بالدور مساحة كل شقة حوالي 140 م ( الشرط الأخر سننتظر تحسن الأحوال بالنسبة لأن المحافظ مكعبلها أوي )

يأخذ هو نصف عدد الشقق (12) و نحن النصف الأخر (12)
و نصف المحلات كمان . المحل أو أكثر نصيبنا نؤجره جديد و نصرف من ريعه علي صيانة و نظافة العمارة.

و بكدة تقف علينا الشقة ب 200 ألف و لو حبيت تشتريها خارج الموضوع ده لن تقل عن 400-500 ألف.بالأضافة لضمان جيران (12 جار علي الأقل) جيدين جدا وكلنا عارفين ممكن الجار يخلي الدنيا جنه أو نار .
و.. بس.

إيه رأيكم هل الموضوع يستاهل و لا وجع دماغ و صعب و بلاش منه .منظر ردودكم...

و دمتم سالمين

[إسلام شاهين]

هو بصراحه الموضوع جيد ويستاهل توكل على الله بس خلي بالك البنا محتاج مجهود جبار وخرافي ومتخليش اعتمادكو ( طبعا بعد الاعتماد على الله ) على المقاول بس لازم تكونوا معاه خطوه بخطوه .

[محمد المشد]

الاخ ابو عبد الله

السلام عليكم ورحمه الله وبركاته ...
اولاً الموضوع فكرة هايلة وياريت تعمل شىء اسمة اتحاد ملاك احسن ويكون قانونى علشان محدش عارف اية ظروف الاخوة جميعا( 12 فرد ) يعنى اختلاف افكار واذواق وخلافة ومن ثم القيام والاتفاق على البناء والشراء وكل ما يلزم العمارة
ثانيا : بالنسبة للمحافظ فلا ذنب له لان الرجل وهو اللواء عادل لبيب يرغب فى جعل الاسكندرية منطقة خالية من المخالفات للبناء وطبعا اصحاب الشقق رفعوا الاسعار علشان يجبروة على التراجع عن هدم المخالفات ولم يتراجع وللاسف من يمشى عدل هذه الايام يقولون انه معقد وهذا الرجل محترم ويكفى انه من انظف وانزة المحافظين فى مصر
وبالتوفيق بأذن الله

[osama]

رد

اعرض الموضوع علي محامي ولابد من وجود عقود

[أبو عبد الله***]

الاخ ابو عبد الله

ثانيا : بالنسبة للمحافظ فلا ذنب له لان الرجل وهو اللواء عادل لبيب يرغب فى جعل الاسكندرية منطقة خالية من المخالفات للبناء وطبعا اصحاب الشقق رفعوا الاسعار علشان يجبروة على التراجع عن هدم المخالفات ولم يتراجع وللاسف من يمشى عدل هذه الايام يقولون انه معقد وهذا الرجل محترم ويكفى انه من انظف وانزة المحافظين فى مصر
وبالتوفيق بأذن الله

شكرا لكل من قام بالرد

أخي الكريم محمد المشد
لا أعتراض علي تطبيق القانون -و إن كان لسه لا يطبق علي البعض- و لكن لا بد من إيجاد بديل فمش أمنع البناء إلا مرتين عرض الشارع مما يؤدي إلي قله المعروض أمام الطلب بحد كبير و أرتفاع خرافي في الأسعار ... ماشي طبق القانون لكن الناس لازم تسكن أوجد برضه البديل الصحيح و المناسب -يعني مش أقفل الحنفيه علشان ماتغرقش الدنيا و أسيب الناس تموت من العطش -

[Abonora]

فكره ممتازة وعبقرية ربنا يباركلكوا ان شاء الله بس زي ما قال الاخوة لازم يبقي فيه عقد بينك وبين المقاول يضمن حقوقك ولازم العقود اللي هتبقي بين المقاول والناس تبقي انت عارفها لان (عن تجربة) اللي بيحصل ان المقاول بيبيع ويسيب الناس تضرب في بعض عشان كده لازم تحدوا كل حاجة بينكوا الاول زي عدادات الميه والمرافق العامة تتم وانت حاضر (اعرف مقاول ركب الميه سرقة وساب السكان مع الشريك التاني يقاسوا ويلات الغرامات والمصالحات مع شركة الميه) يعني المهم تبقي فاهم ان المقاول مش باقي علي المكان وبيفكر دايما علي مدى مصالحة بس ، كمان لازم تحدد ملكية حاجات زي اوضة الغسيل والسطح طبعا وغرفة الاسنسير والبواب والمدخل ويفضل تكون مليكتها راجعة لشخص واحد

ربنا يوفقكوا ان شاء الله وياريت تستخير ربنا قبل ما تبدء

ابو نورا (نانا الزنانة)

[د.أحمد سمير]

خللي بالك مفيش مقاول بيدخل إلا بعد الترخيص ، وده معناه انكم هتتحملوا ترخيص البناء والرسم الهندسي ...الخ . فاعملوا حسابها في التكلفة .

ثاني حاجة لازم يتحدد في عقد المقاول انه مسئول عن أي اختلالات في البناء مسئولية قانونية لمدة 20 سنة على الأقل ، وحاول تخليها أكثر ، القانون حسب علمي بيحمل المقاول المسئولية عن أي خلل في البناء لمدة 10 سنين فقط ، وذلك حتى تضمن انه لن يستخدم أي مواد غير صالحة أو يغش فيها .
حاول كمان تخلي العمارة بمدخلين بمعنى وجود 2 أسانسير واتنين سلم ، يجعل العمارة فعلياً عمارتين حتى تهنأ بجيرتك ، وتبعد عن النصف الآخر اللي ما تعرفوش .
خللي بالك كمان من مواعيد التسليم المقاولين بيعتمدوا انهم يبيعوا الشقق أثناء البناء أو قبله ، فلو حصل وربنا ماوفقش المقاول في التسويق هيعطلكوا جامد .
تقبل خالص تمنياتي بالتوفيق

[AhmedElsayed]

فكرة ممتازة بس فعلا محتاجة عقود ومحتاج واحد يبقى متفرغلها لان المقاول ممكن بسهولة يسرقكم
لكن لو فى شركة مقاولات ممكن تبقى اغلى شوية بس حتبقى محترمة ومضمونة اكتر من المقاول

وربنا يوفقكم

[جندى مجند]

ربنا يوفقكو و يباركلكو فى الموضوع دة ... فعلاً أسعار الشقق فى اسكندرية بقت تجيب الضغط ... المشكلة الرئيسية اللى حتواجه حضرتك بالاضافة لكل التحذيرات و الاحتياطات اللى الاخوة قالوها هى الترخيص ... المقاولين دلوقت بيخافوا جداً انهم يعلوا الارتفاع عن الترخيص و هو دة اللى سبب ارتفاع الأسعار الشديد دة ... فطبعاً الأرض اللى حضرتك حتشتريها ممكن عرض الشارع ميسمحش انه يطلع عليها 10 أو 12 دور ... أنا أعرف واحد بانى عمارة واخدة ناصية شارع العيسوى (شوف شارع واسع أد ايه) مع شارع تانى و بنى 4 أدوار و واقف مش عارف يكمل و طبعاً مش عايز يبيع عشان مش عارف يجيب تكاليفه ... و الظاهر انه شكله كدة مستنى المحافظ يمشى و ييجى واحد تانى!

[total_n76]

سورى على المداخلة
بس هو من السهل كدة انك تلاقى 12 واحد حتة واحدة من اصحابك وكلهم معاهم نفس الرقم ال 200 الف دول
هى الفكرة جميلة بس مش عارف التنفيذ والتنسيق واتفاق الناس والمواعيد والرغبات كل دى معقولة هاتتفق
انا بس مع الفكرة الحلوة والعملية بس المهم التنفيذ

[AhmedElsayed]

مش فى اسكندرية بس والله يا جماعة
القاهرة برده الاسعار ولعت فى المدن الجديدة وغير الجديدة
والله اعرف مناطق السعر بقى الضعف فيها خلال سنة
ربنا يعين الشباب اللى عايز يتجوز وكجبش شقة لسه

دلوقتى فعلا احسن استثمار لاى حد ان يحط فلوس فى شقة او ارض
ولا تقولى بنوك ولا بورصة ولا اى حاجة

[أبو عبد الله***]

ربنا يوفقكو و يباركلكو فى الموضوع دة ... فعلاً أسعار الشقق فى اسكندرية بقت تجيب الضغط ... المشكلة الرئيسية اللى حتواجه حضرتك بالاضافة لكل التحذيرات و الاحتياطات اللى الاخوة قالوها هى الترخيص ... المقاولين دلوقت بيخافوا جداً انهم يعلوا الارتفاع عن الترخيص و هو دة اللى سبب ارتفاع الأسعار الشديد دة ... فطبعاً الأرض اللى حضرتك حتشتريها ممكن عرض الشارع ميسمحش انه يطلع عليها 10 أو 12 دور ... أنا أعرف واحد بانى عمارة واخدة ناصية شارع العيسوى (شوف شارع واسع أد ايه) مع شارع تانى و بنى 4 أدوار و واقف مش عارف يكمل و طبعاً مش عايز يبيع عشان مش عارف يجيب تكاليفه ... و الظاهر انه شكله كدة مستنى المحافظ يمشى و ييجى واحد تانى!

شكرا لردك ...
إحنا كمان هنستني تحسن الحال يا المحافظ يسمح بالأرتفاعات يا يمشي...


سورى على المداخلة
بس هو من السهل كدة انك تلاقى 12 واحد حتة واحدة من اصحابك وكلهم معاهم نفس الرقم ال 200 الف دول
هى الفكرة جميلة بس مش عارف التنفيذ والتنسيق واتفاق الناس والمواعيد والرغبات كل دى معقولة هاتتفق
انا بس مع الفكرة الحلوة والعملية بس المهم التنفيذ

و لا سوري و لا حاجه يا باشا :)
بص إحنا الـ 12 في شركة واحدة و ظروفنا تقريبا واحدة و بعدين أنا مختارهم علي الفرازة
أنا عارف إن الموضوع صعب سواء أتفاق الناس او المحافظ أو المقاول و مقدار مصداقيته
لكن أنا حسيت إننا بنتسرق لما الشقة تتباع بـ 400 ألف أو أكثر و هي متكلفة 150 ألف أو أقل
فقلت أحاول أكسر الدائرة دي ... و نجحت خير :) .. فشلت يكفيني شرف المحاولة :?