موقع الحجز للعلاج بعقار سوفالدى داخليا بلجان الكبد فى هيئة التأمين الصحى

[Samah AbdAllah]

السلام عليكم ورحمة الله وبركاته

للمهتمين او اللى عندهم حد مصاب فيرس سى شافاهم الله جميعا ان شاء الله
الاول كان التقديم عبر موقع خاص بوزارة الصحة ومكنش العلاج متوفر في التامين الصحى
دلوقتى خرجوا كل الناس اللى ليها تأمين صحى واستبعدوهم من العلاج بالمستشفيات العامة اللى بتوفر خدمة العلاج بعقار سوفالدى
وطلبوا ان كل اللى له تامين صحى يرجع يقدم طلب تانى من خلال موقع الهيئة ويحجز موعد جديد ويبدا الرحلة من اولها تانى
حتى لو كنت قدمت و حجزت قبل كده في لجنة علاج فيرس سى ورحت وقدمت تحاليلك و طلبوا منك تحاليل غيرها وواخدت موعد تانى
كل ده هتنساه خالص وتبدا من اول وجديد تقدم عالموقع التابع لهيئة التامين الصحى وتاخد معاك التحاليل المطلوبة
وربنا يجعله خير ان شاء الله

دى صورة من الوقع للتحاليل المطلوبة



ودى صورة للبيانات المطلوبة عند التسجيل



ده لينك الموقع

http://www.hio.gov.eg/ar/pages/sof.aspx

في اسكندرية المواعيد على نص فبراير الجاى ان شاء الله

[أحمد كمال]

و اللي ما عندوش بطاقة تامين صحي؟

[Samah AbdAllah]

بيحجز من هنا

اللجنة القومية لمكافحة الفيروسات الكبدية - الحجز

[Samah AbdAllah]

و اللي ما عندوش بطاقة تامين صحي؟

الاول العلاج كان لكل الناس اللى ليها تامين واللى مالهاش في نفس المكان لان العلاج مكنش نزل في التامين الصحى
وبعد ما الناس حجزت وراحت قدمت تحاليلها ومشت في الاجراءات العلاج نزل في التامين الصحى
فنزل قرار بخروجهم من المساشفيات التابعة لللجنة القومية لمكافحة الفيروسات
ويرجعوا يقدموا من الاول في التامين الصحى
يعنى انا قدمت لماما في شهر 10 تقريبا واخدت ميعاد في شهر 11 في مستشفى شرق المدينة تبع اللجنة دى وبعد ما قدمت التحاليل الاولية طلبوا تحليل تانية واخدت ميعاد تانى في شهر 12 وبعد ما راحا بالتحليل التانية امبارح قالوا لا نزل قرار اللى ليهم تامين ميتابعوش هنا ويروحوا يعيدوا من الاول تبع التامين
وبحاول احجز دلوقتى من الموقع واول موعد بعد 8/2/2015 اللى لسة هيكون اول موعد وبعديها كذا موعد والروتين والاجراءات المعتادة

[Samah AbdAllah]

لو حد حجز عن طريق موقع هيئة التامين الصحى ياريت يقولى ظهرلوا النموذج اللى هيطبعه ولا
عشان مش عارفة انا كده سجلت ولا
لان مش بيظهرلى ولما بعمل استعلام مش بيطلعلى اى حاجة
بس كل مرة بحاول بلاقى العدد زاد للى حاجزين في اليوم ده بعدد محاولاتى
فمش عارفة كده حجزت ولا

[Bassem Youssef]

يا رب بس فعلا المرضي يخدوا العلاج بسهوله بدون تعنت و يجيب نتيجه فعاله بدون اثار جانبيه
ان شاء الله بالشفاء العاجل لكل مريض

[hobiko]

ربنا يشفى مرضانا جميعا يا رب

و شكرا على الموضوع

[Samah AbdAllah]

الشكر لله
الموضوع عملته عشان الناس اللى حاجزة دور تبع لجنة مكافحة الفيروسات ولسة قدامهم شهر مثلا او اكتر او اقل
ميستنوش عالفاضى لانهم لما يروحوا هيقولولهم الكلام ده لانهم مش بيبلغوا الناس باتصال تليفونى او حتى اعلان تليفزيونى حتى ومش بس كده دولل كمان بعد ما تروح وتستنى دورك تلاقيهم بيقولوا لا خد ورقك وروح مستشفى التامين اللى انت تبعها وهم هناك يدولك اسم الموقع اللى تقدم فيه
وفعلا انا معرفتش اوصل للينك الموقع عن طريق البحث خالص
لقيت موقع هيئة التامين الصحى نفسه اللى هو الينك الرئيسى لكن داخل الموقع مفيش اى حاجة توصلك لمكان التسجيل لانهم مستنيين الناس تروح لحد عندهم ولما يسالوا يبقوا يدوهولهم كنوع من استهلاك الوقت

[midooo_119]

شكرا لمجهودك و يجعله فميزان حسناتك و ربنا يشفى كل مريض

[Samah AbdAllah]

الشكر لله
بس ياريت لو حد سجل يقولى طبع الورقة ولا مظهرتش عندكم برضه
لان لحد دلوقتى مش عارفة اذا كنت حجزت فعلا ولا

[digicron]

حضرتك انا اعرف شخص ليه تامين صحي لكنه خلص ورقه تبع المستشفيات العامة غير التامين و اخد علاجه منالتامين الصحي عادي طالما انه استكمل اجراءاته قبل 14 ديسمبر الحالي و لم يبدا من الاول كما تشدد حضرتك في الموضوع
و الخبر ده يؤكد كلامي تحت عنوان تعليمات المريض

http://www.vetogate.com/1355725

[Samah AbdAllah]

حضرتك انا اعرف شخص ليه تامين صحي لكنه خلص ورقه تبع المستشفيات العامة غير التامين و اخد علاجه منالتامين الصحي عادي طالما انه استكمل اجراءاته قبل 14 ديسمبر الحالي و لم يبدا من الاول كما تشدد حضرتك في الموضوع
و الخبر ده يؤكد كلامي تحت عنوان تعليمات المريض
بوابة فيتو: هيئة التأمين الصحي تبدأ العلاج بـ«سوفالدي».. توفير العقار لـ260 مريضا في 8 محافظات اليوم.. موقع إلكتروني لتسجيل المرضى الجدد.. ور

حضرتك تاكيدى كان على ان الناس اللى مستكملتش اجراءتها ولم يصدر قرار علاجها
يعنى الناس اللى قدمت تحاليلها وطلب منها استكمالها بعدد اخر من التحاليل ولم يصدر قرار العلاج بعد
دول هيبدأوا من جديد وده مش مجرد كلام دى تجربة مع والدتى
وكلام حضرتك مظبوط الناس اللى تم اقرار علاجها بالفعل تبع المستشفيات العامة هتاخد علاجها في التامين

[Samah AbdAllah]

لكن الجزء ده مش صح للاسف

وأضاف أن المريض الذي لم ينتهِ من تقييم حالته الطبية سوف يستكمل إجراءات التقييم داخل مركز اللجنة القومية ثم يبدأ الصرف داخل مراكز التأمين الصحي طبقا لدوره.

لان في تانى موعد لما رحنا بالتحاليل المطلوب استكمالها رفضوا وقالوا طالما لها تامين تروح تحجز من على موقع التامين الصحى وتبدا هناك من تانى