دروس مستفادة بعد شراء راوتر ماركة مشهورة من محل تحت السلم !

[أبو آسر]

السلام عليكم
القصة باختصار هي اني كنت محتاج أغير الراوتر اللي عندي وهو D-Link N150 براوتر آخر يكون مداه أكبر علشان الإشارة مش بتغطي كل الشقة وفشلت في توصيل أكسس بوينت أكتر من مرة فقلت أجيب راوتر أفضل مرة واحدة وأريح دماغي
نزلت سوق العصر في روكسي ولفيت فلقيت محل اسمه Go Net أول طرقة شمال بعد مدخل المول جنب شركة Maximum Hardware ، محل صغير بس عنده أنواع كتير لأن المحل شبه متخصص في الراوترات والأكسسات ففضلت محتار شوية بين الأنواع وبعدين دخلتله وشرحتله طلبي فقالي D-Link مشاكله كتير خليك في Linksys أو NetGear
طبعا أنا أسمع إن الماركتين دول من أفضل الماركات في السوق وأغلاها كمان
قلتله طيب رشحلي حاجة سعرها معقول فرشحلي NetGear N300 تمنه 450 جنيه ، اشتريته واداني الفاتورة ومشيت
فتحت الراوتر ووصلته وحاولت أستبه معرفتش فاتصلت بـ Tedata والموظف فضل معايا على التليفون أكتر من 20 دقيقة بدون أي فايدة الراوتر مش عايز يلقط نت ، قلتله شكرا لتعبك معايا أنا هجرب تاني لوحدي كده وأشوف
عملت رستارت للكمبيوتر وعملت الـ setup من جديد وبعد عدة محاولات اشتغل أخيرا .. بس في مشكلة !
أنا سرعة النت عندي 4 ميجا والـ D-Link كان بيقراها كلها عادي ولما بعمل اختبار للسرعة على موقع Speedtest.net بيقرا الدونلود حوالي 3.38 ميجا في الثانية وده الطبيعي في مصر انه مش بيديك كل السرعة كاملة ، المهم بصيت في اعدادات الراوتر الـ NetGear لقيته قاري السرعة أقل من 3 ميجا بشوية ! قلت يمكن كده بيقراها صح والـ D-Link كان بيشتغلني مثلا فقلت أجرب أعمل speedtest فلقيته مديني الدونلود حوالي 2.34 !! يعني أقل برده ميجا كاملة عن سرعة D-Link ، طبعا رسترت الراوتر أكتر من مرة وحدثت الfirmware لآخر إصدار وغيرت الDNS ولعبت في كل الإعدادات وبدون أي فايدة !
قلت يمكن العيب من شركة النت ! شيلته وركبت الـ D-Link تاني لقيته شغال تمام والسرعة مظبوطة ! يبقى كده مش عيب شركة دي عيب راوتر
طبعا غير الموضوع ده اكتشفت ان السيجنال برده نفس الرينج بتاع الـ D-Link برده يعني مش مغطية الشقة كلها ! كده يبقى الـ D-Link برقبته لأنه شغال تمام وبيغطي نفس المساحة وبيقرا السرعة كاملة
رجعت كل حاجة في الكرتونة وقلت أنزل بعد كام يوم أرجعه سواء أبدله بحاجة أكبر أو آخد فلوسي أو أجيب Range Extender ممكن يحل مشكلة التغطية وأشتغل على الراوتر القديم
نزلت امبارح بالليل وروحت للراجل وشرحتله المشكلة فابتسم ابتسامة صفرا كده فيها بعض السخرية وبيقولي: ترجعه ازاي يعني ؟ دي مش مشكلة اللي انت بتقول عليها دي ! ممكن تكون مش عارف تشغله كويس ! فتحت الموبايل وطلعت الصور وكنت مصور السرعة مع الـ D-Link والراوتر قدام الشاشة وصورة تانية صورت السرعة والـ NetGear قدام الشاشة برده ، كنت عامل حسابي لحاجة زي كده ، بص في الصور وعمل نفسه مش فاهم وبعد ما فهمته قالي بس أنا مش هينفع أرجعه برده انت تروح للوكيل وتشوفه هيقولك إيه !
قلتله بس أنا من حقي أرجعه خلال 15 يوم ومليش دعوة بالوكيل ، يقولي أنا مش معترف بالعيب ده ! هاتهولي مقفول وأنا أرجعهولك !! أقوله ازاي راوتر مش بيقرا السرعة كاملة وميبقاش عيب يقولي هاتهولي قولي مش شغال خالص مبينطقش وأنا أخده منك ! ومن هنا لهنا وبعد محاولات عديدة مني للإصرار على الإرجاع أو الاستبدال في مقابل إصرار منه على التنصل من المسئولية وتحميل الوكيل المشكلة كلها والابتسامة الصفرا اتبدلت بتكشيرة ؛ مشيت من عنده وأنا ناوي أكلم الوكيل أشوفه هيقول إيه مع إني عارف الرد مقدما وبعدين هقوم مقدم بلاغ في الاتنين عند جهاز حماية المستهلك أملا في إني آخد حقي منهم .

الدروس المستفادة:
1- مش كل الماركات الغالية والمشهورة بتبقى تمام ، ياما ماركات مش مشهورة وملهاش حظ في السوق ورخيصة وبتشتغل أحسن وأفضل من الماركات الغالية ، مش قاعدة عامة طبعا بس بتحصل كتير خاصة في مجال التكنولوجيا والإلكترونيات.
2- متشتريش حاجة من محل تحت السلم حتى لو أرخص من برة لأن مع أقرب مشكلة هيبيعك ويقولك معرفكش على عكس المحلات الكبيرة المحترمة حتى لو غالية شوية بس هتضمن إنك هتاخد حقك منهم لأنهم بيمشوا قانوني وصح وكمان بيخافوا على سمعتهم والموظف مش هيخسر حاجة لما يبدلك الجهاز لأنه مش محل أبوه ده مجرد موظف وبينفذ التعليمات وكمان المحلات دي تقدر تتعامل مع الوكلاء بقلب جامد ويرجعوا أتخن جهاز بدون أي مشكلة على عكس محلات تحت السلم اللي بيريح نفسه من المعافرة مع الوكيل ويورطك انت معاهم عشان يخلع هو ويريح دماغه ، وشخصيا كان ليا تجربة مشابهة مع كمبيوتر شوب اشتريت منه أكسس بوينت من فترة ومشتغلش يمكن بسببي أنا مكنتش عارف أشغله فرجعته بعدها بيوم أو اتنين وخدت فلوسي فورا وبدون أي مماطلة .
حسبي الله ونعم الوكيل

[د.محمود صلاح]

D- link اشتريته في عمان وفعلا اعطاله كثير جدا ورجعته اكثر من 3 مرات

linksys اللي هو تبع cisco والله كان خربان من اول يوم جبته

انا مرتاح جدا مع هواوي زي اللي بيوزعوه TE data شغال له 4 سنوات بدون مشاكل

[mastr_n]

منتظر اية من وكلاء بيستوردوا ارخص منتجات من الصين ودرجة تانية بهدف الربح ومش مهم المستهلك يخبط دماغة فى الحيطة

ماتسيبش حقك

يعنى اشترى اى نوع لانى عايز اغير الراوتر مش عارف انا شغال برواتر فودافون وتعبان جدااا

[أبو آسر]

D- link اشتريته في عمان وفعلا اعطاله كثير جدا ورجعته اكثر من 3 مرات

linksys اللي هو تبع cisco والله كان خربان من اول يوم جبته

انا مرتاح جدا مع هواوي زي اللي بيوزعوه TE data شغال له 4 سنوات بدون مشاكل

والله معايا بقاله سنين وشغال 24 ساعة ومشتكاش ومحسيتش بقيمته غير لما جبت الخردة اللي اسمه NetGear ده

منتظر اية من وكلاء بيستوردوا ارخص منتجات من الصين ودرجة تانية بهدف الربح ومش مهم المستهلك يخبط دماغة فى الحيطة

ماتسيبش حقك

يعنى اشترى اى نوع لانى عايز اغير الراوتر مش عارف انا شغال برواتر فودافون وتعبان جدااا

توكل على الله وهات D-Link محدش بيشتكي منه فعلا وقرأت ريفيو لناس أجانب بينصحوا بيه

[Bassem Youssef]

مفيش حد بيتعلم ببلاش

[naser_56]

كان غيرت المودليشن وهيقرا معاك السرعه مظبوطه او تسيبه علي الاوتو وهو هيختار المودليشن الافضل وحتي قوه الوايرلس المفروض انك تسيبه شويه لغايه ما يجمع قناه فاضيه معليهاش تشويش وبكده الوايرلس هيكون افضل معاك او برضه ممكن تختار قناه براحتك بس تكون عامل سكان حواليك وشايف القنوات الموجوده وتختار واحده فاضيه
خلاصه الكلام الراوتر المفروض تسيبه يوم ولا حاجه لغايه ما يستقر وحتي اغلب الاجهزه كده ال ios او الاندرويد مثلا يحتاج يوم ولا اتنين لغايه ما يستقر ويديك افضل اداء واستهلاك قليل للبطاريه
وبعدين طالما الماركه كويسه يبقي مش هتفرق محل تحت السلم ولا محل علي الناصيه
مش معقول مثلا نت جير ولا لينكسس تعمل حاجات سيئه لمصر مخصوص مثلا وبعدين مصر سوق كبير ويهم اي شركه انها تاخد حصه فيه

[أحمد كمال]

فيه حاجة غلط في الستنجز اكيد ........

[mk3]

محل فى سوق العصر يبقى تحت السلم ؟؟!@@
عيبنا ان احنا عايزين كل حاجه يعنى انت محتاج اكسس بوينت يزودلك مدى الروتر الدى لينك..تقوم تجيب روتر بالمره ..ومهو مفيش حاجه اسمها بالمره فى انا محتاج ايه ومهما اسنغليت انت مش محتاج روتر ولو جبت السيسكو ابو 600 جنيه برضه انت مش محتاج روتر !!

[Elawany13]

مهو احنا قولنا لحضرتك قبل كده ديه مش مشكلة راوتر وانت اللى مصمم تشترى

Sent from my GT-S6500D using Forum Runner

[أبو آسر]

مفيش حد بيتعلم ببلاش

أكيد

كان غيرت المودليشن وهيقرا معاك السرعه مظبوطه او تسيبه علي الاوتو وهو هيختار المودليشن الافضل وحتي قوه الوايرلس المفروض انك تسيبه شويه لغايه ما يجمع قناه فاضيه معليهاش تشويش وبكده الوايرلس هيكون افضل معاك او برضه ممكن تختار قناه براحتك بس تكون عامل سكان حواليك وشايف القنوات الموجوده وتختار واحده فاضيه
خلاصه الكلام الراوتر المفروض تسيبه يوم ولا حاجه لغايه ما يستقر وحتي اغلب الاجهزه كده ال ios او الاندرويد مثلا يحتاج يوم ولا اتنين لغايه ما يستقر ويديك افضل اداء واستهلاك قليل للبطاريه
وبعدين طالما الماركه كويسه يبقي مش هتفرق محل تحت السلم ولا محل علي الناصيه
مش معقول مثلا نت جير ولا لينكسس تعمل حاجات سيئه لمصر مخصوص مثلا وبعدين مصر سوق كبير ويهم اي شركه انها تاخد حصه فيه

مش عارف موضوع المودليشن ده ايه ممرش عليا وأنا بجرب الاعدادات عموما هشغله تاني واشوف
لكن طبعا بتفرق انت بتشتري الجهاز منين لأني لو كنت شاريه من كمبيو مي مثلا كان زمانهم رجعوه معملوش زي محل تحت السلم ده

فيه حاجة غلط في الستنجز اكيد ........

مظنش لأني جربت كل حاجة ولو في غلط في الاعدادات كان مفروض مشتغلش اصلا لكن مش هيشتغل بناقص 1 ميجا !
عموما هجرب تاني

محل فى سوق العصر يبقى تحت السلم ؟؟!@@
عيبنا ان احنا عايزين كل حاجه يعنى انت محتاج اكسس بوينت يزودلك مدى الروتر الدى لينك..تقوم تجيب روتر بالمره ..ومهو مفيش حاجه اسمها بالمره فى انا محتاج ايه ومهما اسنغليت انت مش محتاج روتر ولو جبت السيسكو ابو 600 جنيه برضه انت مش محتاج روتر !!

وايه المشكلة لما أحتاج كل حاجة طالما بدفع فلوس وفي أكتر من أوبشن كل حاجة بتمن ؟ يعني اللي بيدفع 150 جنيه في راوتر مفروض ياخد نفس اللي بيدفع 1000 جنيه ؟! ولا هو لازم أروح أشتري راوتر وأشتري سويتش وأشتري أكسس بوينت وأشتري رينج اكستندر وأشتري كابل كات 6 علشان أغطي شقة ؟!
وإيه المشكلة لما المحل يكون في سوق العصر ويكون تحت السلم ؟ هو سوق العصر ده كله توكيلات معتمدة يعني ؟ حضرتك عمرك سمعت بس عن اسم المحل اللي أنا بشتكي منه ده ؟ وطالما بيتهرب من مسئولية مفروض من حقي قانونا آخدها يبقى محل تحت السلم طبعا

مهو احنا قولنا لحضرتك قبل كده ديه مش مشكلة راوتر وانت اللى مصمم تشترى

الراوترات بتفرق من نوع للتاني في مدى الإشارة حتى النت جير ده نفسه في منه موديل أعلى شوية كاتبين مدى الاشارة بتاعه أكبر من اللي كاتبينه في ده فأنا قولت أريح دماغي وأجيب راوتر يغطي الشقة بدل حوار الأكسس اللي مش لاقيله حل

[MRBEBO]

مش كل الماركات المشهورة حلوة انا كان ليا تجربه زفت مع لينكسيس في الوايرلس

الافضل من تجربتي الشخصيه 3com بس غالي شويه

[أبو آسر]

مش كل الماركات المشهورة حلوة انا كان ليا تجربه زفت مع لينكسيس في الوايرلس

الافضل من تجربتي الشخصيه 3com بس غالي شويه

حضرتك مش أول واحد أسمعه يشتكي من لينكسس على الرغم من الشهرة الرهيبة بتاعته اللي المفروض ان هو رقم 1 في الراوترات !
3com أعتقد مش موجود أصلا ! دي ماركة قديمة من الماركات المحترمة النادرة واتوقف إصدارها تقريبا

[MRBEBO]

هي اتش بي اشترت الشركه ومن حوالي سنتين شفت راوتر كان بحوالي 700 لكن بقالي فترة كبيرة مش متابع السوق للاسف

[أبو آسر]

هي اتش بي اشترت الشركه ومن حوالي سنتين شفت راوتر كان بحوالي 700 لكن بقالي فترة كبيرة مش متابع السوق للاسف

السوق المصري كله مفيهوش راوترات ثري كوم جديدة خالص ودورت على أمازون برده ملقيتش فممكن تكون hp بتنزله تحت مسمى تاني أو وقفت إصداره خالص الله أعلم

----------------------

دي عينة من التقييمات اللي على الراوتر NetGear واخد تقييمات سلبية كتيرة جدا ودي عينة منها
Amazon.com: Customer Reviews: Netgear N300 Wireless ADSL2+ Modem Router (DGN2200)

[أبو آسر]

ده واحد بيحكي نفس مشكلتي وجربت الاقتراح الأخير محلش المشكلة برده
Slow Speed on DGN2200 - NETGEAR Forums