مشورتكم في الاختيار الأفضل لبنتي

[إنسانة]

السلام عليكم

بنتي كملت 4 سنين و بعد تفكير قررت إني ادخلها مدرسة انترناشونال ولكن لما جيت أبحث عن مدرسة مناسبة لقيت عدد من الخيارات ودا بعد بحث شهور

1- مدارس راقية جدا - اسعارها بتبدأ من 34 ألف ريال KG2 وبتزيد كل سنة بتوصل في G9 و G10 و G11 و G12 ل 46,750 ريال رسوم كل Grade
أو مدرسة أخرى بتزيد لحد ماتوصل ل Grade12 برسوم 61 ألف ريال ودول أرقى مستوى موجود وتبع القنصلية الأمريكية أو مدرسين أمريكان
دا غير مصاريف تانية كتير
الميزة إن التعليم فيها راقي جدا يعني الطفل هيعيش تجربة جميلة جدا وهيتعلم كويس وهيكون نفسيا بيحب المدرسة والتعليم
يعني بنتي هتقضي 14 سنة من حياتها لحد ماتوصل سن 18 سنة عايشة في مستوى تعليمي فخم و عندها ذكريات جميلة و اخدت علم بجد

العيب إني وقت الجامعة مش هقدر أدخلها جامعة من أفضل الجامعات و يمكن مش هقدر على تخصصات معينة
لإني هكون صرفت كل الميزانية على تعليمها لحد الثانوية
هأقدر أسفرها تدرس برا بس المصاريف مش هتغطي تكاليف تخصصات قوية جدا وفي جامعات قمة ولو هتغطي أول سنتين في أفضل الجامعات وأرقاها هحتاج أستلف أو اقترض عشان أكمل بقيت السنوات
فيمكن دا هيخليني أختار جامعة ذات مستوى متوسط عشان المصاريف تكفيها لآخر الدراسة
فبتالي إكتسابها لتعليم قوي وتجربة جميلة في المدارس بحس إنه هيضيع لو جيت في النهاية ومكملتش بنفس المستوى في الجامعة


العيب التاني إني كدا هصرف كل الميزانية على تعليمها ومصاريف دراستها ومش هعملها أي انجاز

العيب التالت إني هحطها في مستوى إجتماعي وسط ناس بتصيف كل سنة في أوروبا ومش هقدر أعيشها بنفس طريقة زمايلها فممكن تحس رغم كل المصاريف اللي هدفعها إنها أقل منهم

كمان دا هيأثر على الجانب الترفيهي يعني هوفر بعض الكماليات عشان أقدر أصرف على تعليمها فبتالي هتكون حياتها كلها دراسة والجانب الترفيهي مش بالدرجة المطلوبة "وبقصد هنا ترفيه سنوي" لكن ممكن اخدها سياحة كل 3 أو 4 سنين مثلا

الخيار التاني

إني أدرسها في مستوى مدارس جيد و مصاريفها أقل يعني في السنة 20 ألف ومش بيزيد كتير لحد ماتتخرج والمصاريف التانية محدودة
عيوبها كتير
طقم التدريس هنود وعرب وفلبينيين مفيش أمريكان
الفصل فيه 18 أو 20 طالب المدارس الراقية الفصل فيه 7 طلاب فقط
المدارس ناشفة شوية مش نفس نظام المدارس الراقية بتكون فيها أساليب أفضل بكتير في التدريس والترفيه
الطلاب فيما بينهم بيتكلموا لغاتهم - في المدارس الراقية من أول ماتدخل لحد ماتطلع بتتكلم إنجليزي "فقط حصة العربي بيتكلموا عربي"
وكتير فروقات بين المستويين فيما يتعلق بالتعليم نفسه و حالة التلميذ النفسية

ولكن هقدر أعملها مبلغ محترم تدخل بيه أي تخصص لو جابت مجموع كويس في أي جامعة من أقوى الجامعات في أي دولة يغطي كل سنواتها الدراسية وكل مصاريفها لحد ماتتخرج
بالإضافة إني هقدر أحطلها برنامج ترفيهي كويس لحدا ما اسبوعي وسنوي
ولكن هتعيش 14 سنة من حياتها بدون انطباع جميل عن فترة الدراسة أو يمكن فترة هتعدي بدون ماتترك أي بصمة في نفسيتها لا حلوة ولا وحشة سنوات وعدت وخلاص

أنا محتارة بجد بين الخيارين من رأيكم وخبرتكم الأفضل إيه لبنتي

[Bassem Youssef]

انا شايف انك تدخلي بنتك مدرسه "معقوله" حاليا عشان تعرف تخش جامعه "راقيه" في المستقبل

[Yasser Farid]

انا شايف ان انتي نفسك لازم تغيري تفكيرك
ف احد الموضوعات هنا لشخص ملحد كتبتي كومنت يعبر عن عدم ايمانك بالله
اظن كل اللي ف المنتدي فاكرينه

[naser_56]

اختاري لها الافضل دلوقتي وفي المستقبل محدش عارف هيحصل ايه

[fares_311]

2nd choice

[Imhotep]

من الناحية النفسية أفضل للبنت أن مدرستها تبقى قريبة من مستوى معيشتها... و بالذات من ناحية موضوع الاصحاب اللي من المهم يكون مستواهم قريب منها لأنه في وقت من الأوقات هيبقى فيه ضغط جامد من اللى بيسموه peer pressure او ضغوط شلة الأصدقاء... اما فى الجامعة فساعتها ستكون شخصيتها قد اكتملت تقريبا و يمكنها ان تظل مستقلة عن الضغوط المحيطة

[amr011111]

بلاش المستوى العالى اوى علشان متبقاش البنت فى مجتمع منفتح اوى فخليها فى مستوى متوسط يعنى مدارس انترناشيونال بس نظام اللى بيدخلها بيدخلها من مرتبه

[إنسانة]

انا شايف انك تدخلي بنتك مدرسه "معقوله" حاليا عشان تعرف تخش جامعه "راقيه" في المستقبل

ياريت كنت أقدر آخد قرار بالسرعة دي

خايفة افضل أجرب في المدارس وأنقلها من مكان لمكان وأنا عارفة مدى سوء الحكاية دي على نفسية الطفل لإني جربتها قبل كدا

والمدارس دي بتكون فيها عيوب جوهرية زي طريقة نطق المعلمين للكلمات لما روحت مدرسة من المدارس المعقولة مديرة المدرسة كانت بتتكلم بشكل محترف ولكن لما روحتها يوم تاني لقيت المعلمة نطقها للحروف مشوه جدا بتتكلم إنجليزي بالهندي ^^

فكمان الخيار دا هيأثر على دراستها الجامعية فيما بعد وهتتعب بس لو لقيت مدرسة معقولة وهيكون العائد على بنتي مقبول نوعا ما هدخلها اكيد

[إنسانة]

اختاري لها الافضل دلوقتي وفي المستقبل محدش عارف هيحصل ايه

أنا ميالة جدا للافضل حاليا لاني ممكن بعدين مرتبي يزيد أو والدها يساهم أو اقدر اشتغل فترة تانية فممكن اعوض مسألة النقص في مبلغ الدراسة
ولكن مش ضامنة طبعا اي حاجة

[إنسانة]

من الناحية النفسية أفضل للبنت أن مدرستها تبقى قريبة من مستوى معيشتها... و بالذات من ناحية موضوع الاصحاب اللي من المهم يكون مستواهم قريب منها لأنه في وقت من الأوقات هيبقى فيه ضغط جامد من اللى بيسموه peer pressure او ضغوط شلة الأصدقاء... اما فى الجامعة فساعتها ستكون شخصيتها قد اكتملت تقريبا و يمكنها ان تظل مستقلة عن الضغوط المحيطة

طبعا الكلام دا اكتر حاجة مقلقة من المدارس الغالية بس هل تفتكر حضرتك ممكن اعلمها على القناعة وتبقى متقبلة كل المستويات الإجتماعية لإنها كدا كدا هتشوف ناس أكيد مستواهم المادي أفضل في حياتها فلو اتعلمت تقيم الاشخاص بحسب نوعية مستواهم دي هتكون حاجة سيئة جدا
كمان هل ممكن اخلي حياتها الدراسية مقتصرة على المدرسة يعني لا تزور حد ولا حد يزورها من زمايلها في المدرسة و احاول اعملها جو صداقات برا المدرسة ؟ هل دا هيغطي العيب دا ويخليها تشوف طبقات متعددة وتحكم على الشخصية نفسها ؟

[إنسانة]

بلاش المستوى العالى اوى علشان متبقاش البنت فى مجتمع منفتح اوى فخليها فى مستوى متوسط يعنى مدارس انترناشيونال بس نظام اللى بيدخلها بيدخلها من مرتبه

يمكن الوضع دا كان زمان لكن أنا ملاحظة إن المدارس دي فيها نظام صارم جدا في التعليم والتربية
يعني مش مسموح بتجاوزات وعندهم لوائح قوانين وعقوبات قوية في حالة المخالفة تصل لإصال الطفل لبيته مع المشرفة أو لو كبير الفصل النهائي وبيتحملوا المسؤولية كاملة عن أخطائهم ودا شيء مش موجود في المدارس العادية فيمكن دي نقطة في صالح المدارس الغالية أكتر من العادي لإن المدارس دي بتعتمد بشكل كبير على سمعتها

[إنسانة]

انا شايف ان انتي نفسك لازم تغيري تفكيرك
ف احد الموضوعات هنا لشخص ملحد كتبتي كومنت يعبر عن عدم ايمانك بالله
اظن كل اللي ف المنتدي فاكرينه

كنت ناوية كالعادة أتجاهل المستوى دا من الردود ولكن مفيش سبب يخليني امتنع عن التوضيح طالما عندي وقت للرد وعندي كلام حابة اوضحه وأتمنى دا ميغيرش مسار موضوعي الأهم طبعا من الحوار دا

يا سيد ياسر
لما تيجي تنصح حد لغرض النصحية حاول تتحلى بالمصداقية وتنصحه بنوع من الإخلاص
عشان على أقل تقدير نصحيتك وإن رُفضت تُحترم

لكن تبقى داخل تتقول كلام زائف و تصف وصف أبعد مايكون عن المصداقية في صورة إنك بتنصح دا يدل على انسان مش سوي وغرضه كمان مش نبيل

أولا في موضوع الملحد كان ليا رد واحد فقط و كان متعلق بالوضع اللي هو وصفه عن نفسه
شخص داخل يطلب النصيحة بيطلبها من مجموعة من البشر الراشدين البالغين العقلاء
وطالبها في موضوع محدد الطبيعي يكون الرد على النصيحة على النقطة اللي عايز يتكلم فيها وبس
ولو عايز تنصحه أو عندك القدرة اللي بيها تفتحها معاه نقاش توصل من خلاله فكرتك بوضوح
يبقى بأسلوب محبب للنفس و فيه إحترام لعقل الشخص المقابل ودي أبسط حاجة عشان يتقبلك ويتقبل كلامك وأبسط حاجة من حقوقه

و كان ردي على وضعه وفيما يتعلق بيه هو فقط مكنش فيه أي كلمة عن نفسي أو عن إيماني
فقط إحترمت ماهو عليه و إحترمت خياراته ودا صميم حقه في الحياة

بالمناسبة ترويجك لإيمان الشخص من عدمه على إنه "تهمة" أو "سوء تفكير" دا بحد ذاته يحتاج منك لإعادة تقييم لحجات كتير تخص معنى الإيمان نفسه

[tkamal]

انا فى السعوديه ونفس المشكله بعانى منها جدا الفرق ان عندى ولدين g2 ,g5

اسعار المدارس حاجه تحرق الدم
والمتوسط تعبان جدا

المتوسط ده يعنى تقريبا 40 الف جنيه مصرى :)

[dongol123]

انا فى السعوديه ونفس المشكله بعانى منها جدا الفرق ان عندى ولدين g2 ,g5

اسعار المدارس حاجه تحرق الدم
والمتوسط تعبان جدا

المتوسط ده يعنى تقريبا 40 الف جنيه مصرى :)

اللي حضرتك بتقول عليه يحرق الدم ده يعتبر نعمة بالنسبة للامارات

انا بنتي عندها سنة و نص و بحاول احسب من دلوقتي هل هينفع اكمل في الامارات لما تدخل المدرسة و لا انزل انا و هي مصر احسن.

[abdulkhaleq]

بعد سنوات التعليم والشغل و..و..و...
بكل ثقه اقدر اقوللك المهم شهادة الجامعه
مش معنى كده ان المدرسه تتركن على جنب لان هي دي اللي بتأسس اصلا
لكن المبالغ دي كتير قوي وانتي قلتي انه صعب تكمل في نفس المستوى في الجامعه
لأ يبقى مستوى المدارس ينزل شويه املا في اسم جامعي قوي جدا ان شاء الله في المستقبل سواء كان هناك او هنا في مصر