مخنوق و محتاج افضفض شويه و مش عارف العيب فيا ولا ايه

[engmody32]

انا النهارده يا شباب خرجت مع ناس صحابي كلهم متجوزين و انا مش متجوز
المهم قعدوا حسسوني اني فيا حاجه غلط و اني انا اللي مقصر و طالب طلبات رهيبه في العروسه مع اني تقريبا مش حاطط اي مواصفات غير ان شكلها يبقي مقبول و تبقي محترمه و متدينه هو ده يعتبر مواصفات وهميه
و اللي يقولي انت لو اتجوزت دلوقت و خلفت علي طول ابنك لما يجي يدخ المدرسه هتبقي 40 سنه يعني خلاص متعرفش تلعب معاه و لا تجاريه و لا يحس انك صاحبه
و اللي يقولي انت كبرت و من الصعب تلاقي واحده تعجبك و تلاقيها موافقها عليك علشان سنك كبير
و اللي يقولي انت مأخر نفسك و هتندم
الواقع يا جماعه انا رجعت مكتئب جدا اكثر ما انا متضايق
لو حد قرا فيكم مواضيعي هيلاقيني بشتكي اني مش عارف الاقي عروسه و دايره معارفي محدوده جدا و تقريبا مبقاش يعترض عليا عرايس كاني بقيت باير
و جه النهارده و كمل عليا
اسف اني صدعتكم بس حبيت ا فضفض شويه

[M_samii]

فكك منهم و مترميش ودانك للناس و ادعي ربنا كتيير و ان شاء الله هيرزقك بالزوجه الصالحه

[foxhonda2008]

عايز تتجوز هههههههه

[a7med ezz 20]

اللي ربنا كتبهولك اكيد هتشوفه

[zangry]

بيحقدوا عليك عشان تبقي عارف :d

[Mostafa Bedo]

طيب ما تحاول تشوف واحده من قرايبك تسأل اصحابك علي واحدة من قرايب زوجاتهم بالمواصفات اللي انت عايزها وربنا يوفقك ويكرمك ويرزقك بالذرية الصالحة وللعلم مفيش حاجة اسمها انت كبرت ومش هتقدر تلعب مع ابنك انا اخويا عنده 9 سنين ووالدي عنده 47 سنة ووالدي بيلعب معاه كل حاجة وبيلعب معاه بﻻيستيشن عمرها ما كانت بالعمر علي فكرة

[amr_8800]

يا عم انت مكبر الموضوع ليه لما نصيبك يجي هتلاقي نفسك متجوز من غير متحس سيبها على الله

[طارق _عبد السلام]

اتجوز لما انت تحب تتجوز

ثانيا لو لقيت بنت الحلال وخطفت اهتمامك اشتبك على طول ........................

[marwanragab]

أكيد بيحسدوك
ربنا يرزقك الزوجة الصاحة

[J A G U A R]

انت فى نعمه يا راجل

[msenosy]

ياريت تكون جد شويه وتنوى الزواج بجد وخللى نيتك خير عشان ربنا يوفقك ان شاء الله
لو ماديا تقدر على الزواج يبقى بلاش تتاخر اكتر من كده وصحابك عندهم حق انهم يشجعوك على الجواز بس من غير ما تتنازل عن شروطك لانها من حقك
المهم انك تنوى وربنا حيوفقك ان شاء الله

[naser_56]

عادي يعني مفيهاش مشكله لو انته وصلت 40 وابنك لسه داخل المدرسه
في البعض بيوصلو ال 60 وال 70 وممكن يموتو وميخلفوش اصلا دي حاجه بأراده ربنا

وبعدين مين الي قال انك لو وصلت ال 40 مش هتعرف تلعب مع ابنك بالعكس ده الانسان كل ما بيكبر كل ما محبته لاطفاله الصغار بتزيد اكتر

[4fun14]

متخرجش مع صحابك دول تاني.. دي صحاب تجيب الواحد ورا
المفترض يدعموك مش يكئبوك

[boomboomzoro]

السلام عليكم
الزواج ده رزق و نصيب و تأكد حضرتك إنك لو لقيت اللي مكتوبالك مش هتفوق إلا و إنت متجوز...لأن كل المواضيع اللي قبل الزواج من إتفاقات و تجهيزات هتبقي ذكريات حلوه بعدين

أفضل في دائره البحث الأقارب و الجيران ثم ترشيحات الأقارب و الأصدقاء
جرب تاخد كورسات كمبيوتر أو لغه و ده بيبقي فيه فرصه حلوه إن حضرتك تقابل بنات محترمات أنهوا تعليمهم و منتظرين إبن الحلال

لو المواضيع مقفله جامد أوي ...أرشح لحضرت موقع Qiran أو ما شابهه
بس لازم حضرتك تكون داخل بنيه الجديه و تكون حريص جدا في التعامل مع الأخذ بكافه الإحتياطات و الأسباب

جزاكم الله خيرا و بالتوفيق

[أحمد كمال]

قلة الجواز احسن ما تتجوز واحدة مش عاجباك 100%