قصتى مع نادى وادى دجله

[Abo Hur]

من حوالى 6 أشهر أشتركت فى نادى وادى دجله بعد محاولات مستميته من فريق التسويق تبعهم لإقناعى بالإشتراك فى هذا النادى الملعون،ولما سألت عن تقسيط العضويه فهمت إن التقسيط بيبقى مع النادى لمدة خمس سنوات بعد دفع مبلغ مقدم وقدره 8600 جنيه،لما روحت أمضى عقد الإشتراك أكتشفت انه قرض بنكى وإن البنك هو اللى بيمول العضويه وبعد كده أسدد مع البنك،أنا ترددت شويه (خصوصا غنى مش بحب أتعامل مع البنوك)،وتم إقناعى من مندوب التسويق إنى لو حبيت ألغى ألأشتراك مع النادى ومدفعتش لمدة 3 أشهر متتاليه سيتم سداد القرض من النادى (لأنه ضامن)وسيتم إلغاء العضويه،وبالفعل ده اللى عملته بعد ما دفعت المقدم وأستعوضت ربنا فى المبلغ،أنا فى الحقيقه قررت ألغى العضويه لسببين:-
1-مش عاوز أخد قرض من بنك عشان أشترك فى نادى.
2-الكدب والتدليس والخداع اللى شوفتهم من مندوب التسويق ومن إدارة النادى نفسها وخصوصا بعد رفضهم إعطائى نسخه من عقد القرض بتاع البنك (بعد ما وعدنى مندوب التسويق انى هحصل على نسخه من العقد وأنا بستلم الكارنيهات).
إتصل بيا واحد من شركة مصر للتأمين وقالى إنى المفروض أدفع باقى مبلغ القرض وقدره حوالى 63000 جنيه للشركه عشان النادى أخدهم من مصر للتأمين.
أنا لما عملت الإشتراك محدش من النادى جابلى سيرة مصر للتأمين وأنا أصلا مش ماضى على ورقه بتقول إن مصر للتأمين ليها حق الرجوع ليا لو مدفعتش الأقساط.
أنا مش عارف دلوقتى إيه موقفى القانونى لو شركة مصر للتأمين رفعت قضيه عليا فى المحكمه وأنا مش ماضى أى ورقه رسميه فيها ذكر لأسم مصر للتأمين.
وياريت لو حد معاه نسخة عقد الإشتراك بتاع النادى يبعتهالى أو على الأقل يأكدلى أن العقد مفيهوش أى ذكر لشركة مصر للتأمين.

[amr011111]

متابع وفعلا صورة العقد هى اللى هتوضح ان كان فيه بند تبع مصر للتأمين ام لا

[الاسد المهاجر]

متهيئلي اي بنك كده نظام القسط برده نادي المقاولين نظام القسط قروض مع البنك فمتهيئلي مفيش نصب لان اعرف ناس مشتركه في وادي دجله
بس قسط مصر للتامين الله واعلم

[mk3]

يمكن مصر للتأمين داخله كتأمين للبنك فى حاله عدم الدفع وبيحاولوا معاك لانهم شالوا

[esam_refaat]

انت من حقك تلغى الاشتراك بس هتخسر اللى دفعته والنادى هيرجع مبلغ القرض كاملا للبنك بس هيستفيد الجزء اللى حضرتك دفعته هيستولى عليه النادى

[Abo Hur]

انت من حقك تلغى الاشتراك بس هتخسر اللى دفعته والنادى هيرجع مبلغ القرض كاملا للبنك بس هيستفيد الجزء اللى حضرتك دفعته هيستولى عليه النادى

ده الطبيعى،بس اللى حصل معايا إن النادى أستولى على المقدم اللى دفعته وكمان سلط عليا مصر للتأمين ياخدو منى باقى مبلغ العضويه (وانا أصلا مش عاوز أكمل فى عضوية النادى).

[Abo Hur]

يمكن مصر للتأمين داخله كتأمين للبنك فى حاله عدم الدفع وبيحاولوا معاك لانهم شالوا

ده بالظبط اللى حصل ومش عارف أتعامل معاهم إزاى خصوصا إنهم عاوزين يعملولى قضيه.

[Abo Hur]

متابع وفعلا صورة العقد هى اللى هتوضح ان كان فيه بند تبع مصر للتأمين ام لا

النصب فى الموضوع إن المندوب بتاعهم مقاليش إن شركة مصر للتأمين هتطالبنى بالمبلغ لو مكملتش فى العضويه،وإنهم رفضوا يدونى صوره من عقد الإشتراك.

[homme49]

اصبحت ظاهرة غريبة ان معظم التعاملات فى البلد يشوبها النصب و الإحتيال
كما لو كان التعامل بما يرضى الله غير مربح

[mk3]

اصبحت ظاهرة غريبة ان معظم التعاملات فى البلد يشوبها النصب و الإحتيال
كما لو كان التعامل بما يرضى الله غير مربح

للاسف خلوا مرتب الشاب تارجت يعملوا عشان يقبض وللاسف الشاب بيعمل التارجت باى صورة

[wawamoha]

بص ياباشا مش هااقولك انك غلطان انك مضيت من غير ما تقرى - بس ده رقم واحد
رقم اتنين فعلا مندوبين النادي - زي اي سيلز في مصر - بيبقم عبيد عندك للاسف لحد اما تمضي و بعدين تشوف الوش الوحش
رقم تلاته مش عارف ليه حضرتك لغيت العضويه .. هو نادي كويس بصراحه و شمش علشان السيلز وحش يبقى كلهم وحشين فكر كده لان النشاطط الرياضبي و امكانات النادي كبيره مش وحشه خالص
اخيرا عل ما عتقد ان من ضمن الاوراق اللي بتمضي عليها - طبقا لقانون البنك المركزي - ان اي قرض لازم يكون فيه شركه تامين - مثلا في حاله وفاه المقرض لاقدر الله التامين بيدفع للبنك .... و هكدا
المهم ان نصيحتي - توكل محامي فااااااااااااهم - و تخليه يشوف القصه ايه مع شركه التامين
و كمان تقدر تروح المبيعات بتاع وادي دجله و تعمل شكوى في المندوب - و صدقني هيتفاعلم معاك جدا - روح مثلا مبيعات التجمع او المعادي

[طارق محمد نبيل]

الي السيد الفاضل صاحب المشكلة،
الموضوع وما فية ان النادي يبيع لحضرتك العضوية في النادي ، من خلال بيعها للبنك ومن ثم قيام سيادتك بالسداد بالاجل ( علي أقساط ) للبنك .
ومن ضمن عقد هذا البيع ( اشتراك النادي ) عمل وثيقة تامين ضد كافة مخاطر عدم سداد العميل ( حضرتك) بحيث عند تراكم عدد أقساط معينة وليكن ثلاث أقساط يقوم البنك بمخاطبة شركة التامين لاستيداء مستحقاته وامداد شركة التامين ببيانات العميل المتعثر لقيام شركة التامين بدورها بالتتبع لاستيداء الدين بالتبعية .
واري ان الأصل في الموضوع هو مدي اقتناع حضرتك بالاتي :
1- جدوي عضويتك في النادي المذكور.
2- مدي قناعتك في التعامل مع البنك بهذه الصورة والتي تعتبر في حدود علمي المحدود معاملة إسلاميةت سمي بيع منفعة من البنك باجل او باقساط وهي غير محرمة.
فضلا عن :
ظروف حضرتك وقدرتك المادية علي السداد .
وفي النهاية نصيحة لك يا اخي اتصل مباشرة بالنادي لتصويب وضعك والاستفادة من الاشتراك وكذا التسوية باقل الخسائر الممكنة ويفضل الاستعانه بمحام للاستشارة عند اللزوم لان وضعك بهذة الطريقة يجعلك متعاثر ( ناكل عن السداد) أي متعمد عدم الالتزام وهذه وفقا للتعاملات القانونية والالتزام الذي ابرمته مع كافة الجهات.
متمنيا لك حل المشكلة باذن الله

[Ayamohamed30]

انا عندي نفس المشكلة حاليا وعايزة الغي القرض ياريت اللي عنده معلومه يقول