تسكن ف حته راقيه وﻻ تأمن مستقبل اوﻻدك ؟؟

[Mostafa Bedo]

السﻻم عليكم ورحمة الله و بركاته
طبعا الموضوع باين من عنوانه والموضوع ده بيفكر في ناس كتير بس ف الاخر بيوصلو ﻻيه ده اللي انا عايز اعرفة
وباختصار كده احنا ساكنين ف عين شمس في شارع رئيسي واحنا 3 اخوات صبيان ووالدي ووالدتي ووالدي عايز يامن مستقبلنا والكﻻم اللي كلكم عارفينه بانه يجيب لكل واحد فينا شقه عشان انشاء الله لما نتجوز نﻻقي مكان نقعد فيه بس هو لو عمل كدة احنا هنفضل قاعدين ف عين شمس وانا مش بقول انها وحشة بس في امكانية اننا نسكن ف مكان كويس كالتجمع الخامس او مدينة نصر او اي حي راقي لو مشتراش الشقق مع العلم انه جاب شقه واحدة ف منطقه كويسه في 6 أكتوبر غير اللي احنا قاعدين فيها فانتو ايه رأيكم يكمل ويجيب كمان شقتين وﻻ ننتقل في حي راقي بمساحة اكبر من اللي احنا قاعدين فيها وللعلم احنا 3 اخوات (3جامعة+2 ثانوي+4 ابتدائي) وانا اللي ف 2 ثانوي
فأنتو ايه رأيكم خصوصا ان انا واخواتي عايزين نقعد ف منطقة راقيه

[matrix_it]

انا رأي تسكنوا في منطقة راقية

[ENG.MaRk]

بص انت و أخوك الصغير لسة صغيرين و قدامكممش أقل من 8 سنين عشان تفكر في الجواز و أخوك الأكبر لما يتجوز يبقي يقعد في الشقة التانية اللي في أكتوبر ... من رأيي تقعدوا في حتة راقية دلوقتي و لما تيجي تتجوز يبقي يحلها حلّال :)

[طارق _عبد السلام]

الافضل منطقه جيرانك يكونوا كويسين ..... والمستقبل بيد الله .. كل يوم هو فى شأن

[Mohamed.Ramah]

من راى تشترى كمان شقتين لان بكرة تغلى وهى استثمار على المدى الطويل تقدر تبيعها تستثمر فيها تاجرها وفى الاخر بتاعتك لان الظروف مش مستقرة دايماً + انت لما تتجوز تقعد فيها ويبقى بيت عين شمس بيت العيلة وتقدرو تبيعوة او تأجروة لو تمليك ويتقسم ثمنة فى اى وقت فيما بعد متبصش انك فى الوقت الحالى فين انت بكرة تقول انا شقتى فى المنطقة كويسة ولو ممكن تشترو الشقق وتشطبو واحدة منهم وتقعدو فيها لحد لما ربنا يسهل وحد يتجوز فيها تكون الشقتين الثانين واحدة منهم اتشطبت وينقلو فيها... لما تنقلو كلكم فى شقة واحدة بمنطقة راقية هيبقى عندكم شقتين واحدة اخ الاكبر هيتجوز فيها وواحدة ليك طب على المدى البعيد لما تحب تشترى شقة كمان علشان اخوك هتعملو اية ؟!

[speed_magnum]

لو جيرانكم كويسين وانتم متاقلمين مع الوضع
اشتروا لكل واحد شقه الاول

[Mostafa Bedo]

متشكر لكل الاراء

[Mostafa Bedo]

لو جيرانكم كويسين وانتم متاقلمين مع الوضع
اشتروا لكل واحد شقه الاول

والله كل واحد ف حالو بس المشكلة في المدارس ف المنطقة بالنسبة ليا انا قضيت سنتين تعليم ف بلجيكا و دخلت مدرسة هنا من 1 اعدادي وانطباعي عنها مش كويس والناس اللي فيها كطﻻب اخﻻقهم مش كويسة فانا خايف علي اخويا ﻻخﻻقه تبوظ لكن بالنسبة للمكان فهو عادي هو شارع ابراهيم عبد الرازق فهي المشكلة ف المدارس بس وبرده لما تبقي ساكن ف منطقة راقيه اكيد احسن برده من الحته اللي احنا فيها حاليا بس علي النقيض بفكر لما اكبر واكون ف بداية حياتي هسكن فين ﻻننا لو خدنا شقة راقية هتجوز انا ف اللي ف عين شمس واخويا ف 6 أكتوبر ولكن علي النقيض هبقي مطمن ان في مكان هقعد فيه بتاعي غير ان والدي لو فضلنا ف مكاننا هيجيب لكل واحد عربية لما اخلص 3 ثانوي فهي حيرة الصراحة
يعني تفضل قاعد ف عين شمس ويبقي عندك شقة وعربية وﻻ تقعد ف حته راقية ومش عارف في عربية ليك وﻻ ﻻ ولما تتجوز هتقعد ف عين شمس تاني

[eng.m7md.ali]

انا ساكن زيك في عين شمس ويوم ماخدت شقة خدتها في العبور .. حي راقي

لكن انا انصحك انك تجيب احسن شقتين لان منطقة زي مدينة نصر او التجمع اصبحت شعبية غير الاول يعني في المستقبل مش هتعتبر حي راقي زي دلوقتي

وكمان الشقق اللي هتجيبها دي تقدر توضبها وتأجرها قانون جديد مثلا او تبيعها ساعتها لو حابب هتكون سعرها زاد اكيد