عندك شقة يابني ؟؟؟؟ لا معنديش والله

[eslam atia]

السلام عليكم ورحمه الله وبركاتة
اخوكم كل ما ينوي علي موضوع الزواج ويكلم اصحابة ومعارفة علي الموضوع ولما يتلاقوا ناس ويقولولهم علي المقدمات فالأب يسأل قبل كل شئ ((((((((((معاه شقة)))))))))) يقولوا لأ
يقوم يصرف نظر علي طول
اصل بنتي لسه بتكمل تعليم
اصل بنتي صغيرة
اصل بنتي بخاف اوي عليها ،، هو انا هاكلها مثلا
وبالمناسبة انا شغال سائق ومعايا بكالوريوس
وبرضة في عائلات رفضت السائق
انا زنبي ايه في دولة موفرتش لينا شقق ولا وظايف مناسبة
وبعدين تعالي قولي
الشقة تسوي كام الوقتي ازا كان اسكان الشباب المتر فيه علي المحارة معدي 3500
لا احنا شغالين في الجمرك ولا في المستورد ولا في البودرة ولا في الاعلام
احنا بنشتغل بدراعنا ويحرم علينا اللقمة الحرام تدخل بيوتنا
احنا كدا نروح فين ونيجي منين
لنا الله
الحمد لله علي كل حال
مجرد فضفضة وليس شكوي
الشكوي لغير الله مزلة

[هيثم مجدي]

عليكم السلام ورحمة الله وبركاته
اللي بيسأل معاه شقة ولا لأ الطبيعي يكون مستواه اعلى منك

فيه ناس كتير بيقبلوا بشقة إيجارو امكانيات متواضعة وبيبحثوا عن الستر
مش بيبصوا للماديات فقط.
حاول تغير طريقة البحث وربنا يكرمك و يعفك.

[amr_8800]

يا عم هدي نفسك بس وصلي على النبي مستعجل على الحواز اوي متقلقش نصيبك لسه مجاش

[ENG.MaRk]

ماتقلقش نصيبك هيصيبك ... ماتيأسش و دوّر كويس و هتلاقي اللي تحبك بعيوبك

[الاستاذ]

المفترض انك تكون معاك شقة وانت بتتقدم سواء تمليك او ايجار
عشان تجوز فى خلال سنة مثلا او اتنين حسب بردوا اهل العروسة متعرفش ظروفهم
اما موضوع المهنة دة سيبك منه دة عالم مبتفهمش

[zillo]

سبحان الله هو تعقيد وخلاص ,سألك عندك شقه ,قوله ايوه وتكون ايجار
الراجل عاوز يطمن بنته في سكن مناسب وان العريس جدي مش هزؤ
كمان انت شغال سواق ,واجع دماغك ليه ان حد يشوفلك عروسة ,استلقط انت بنفسك .الخلايق بيعدوا عليك رايح جاي

[sherif4004]

طيب هوا ايه حوار ان معمار المرشدى عامل الشفه ب 100000 في دجله بالمز

[devil_storm]

ما طبيعي يا باشا لازم يكون عندك شقه علشان تتجوز! امال حتتجوز فين؟ لازم شقه تمليك صغيره او شقه ايجار قانون قديم و دي مشكله كل الشباب اللي عايز يتجوز مش انت لوحدك
البديل يكون اتنين بيحبوا بعض و البنت تقنع اهلها بشقه ايجار لحد ما الظروف تتحسن و ان شاء الله تلاقي بنت الحلال و مبروك مقدما

[Curbis]

انا زنبي ايه في دولة موفرتش لينا شقق ولا وظايف مناسبة
وبعدين تعالي قولي
الشقة تسوي كام الوقتي ازا كان اسكان الشباب المتر فيه علي المحارة معدي 3500

مفيش حد في العالم كله بيشتري شقق تمليك أصلا إلا في مصر ومفيش دولة في العالم مطلوب منها انها توفر شقة تمليك لكل شاب لأن ده مستحيل ومش هيحصل ومفيش دولة تقدر على كده

بالإضافة ان شقة ٧٠ متر مثلا دي تعتبر كبيرة برة أصلا

الدنيا كلها برة يا إما إيجار يا إما رهن عقاري (مختلف عن اللي عندنا)

للاسف المصريين بس بيحبوا يعقدوها ويصعبوا كل حاجة على نفسهم

[eslam atia]

اللي عاوز شقة عاوزها تمليك وليس ايجار
ويستشهد بحال الناس اللي مأجرين انهم مهددين في اي وقت
جزاكم الله خيرا علي تفاعلكم

[1000 مبروك]

أكيد ده أول سؤال
عندك شقة ؟
أجب ب :ـ
نعم تمليك
أو
نعم إيجار
بس

لكن تقول لأ
يبقى لما تلاقي شقة تعالى

وفي ناس بتقبل بالإيجار
دور وخلي الواسطة اللي بينكم يأكد على النقطة دي قبل أي كلام
الشقة هتكون إيجار في المكان الفلاني مثلاً

[طارق _عبد السلام]

مهو لو اجر شقه ايجار جديد لزوم الشروط واتمام الخطوبه على مايتجوز وييجى ميعاد الدخله هيكون مده الايجار خلصت ...؟!!!!!!!!!!

حضرتك تدور على بنت حلال تكون نفس الظروف كده ويكونوا ممكن ساكنين بردوا ومش مهم عندهم املاك ..... لتقدير الظروف لاغير

وربنا يرزقك بمن تقر عينك

[eslam atia]

انا فعلا بقول في إيجار بس بلاقي الرفض علي طول لانها ايجار
يا اخونا بورسعيد احتلت المرتبة الاولي في ارتفاع اسعار الشقق بطريقة جنونية
تخيل ان شقة في الحرفيين مساحتها 65 م2 تعمل من 270 - 300 الف لو متوضبة
والحرفيين دي من اسوأ المناطق في بورسعيد
لو في بورفؤاد مكان اقامتي في ابراج معدية المليون وشوية
وانا الحمد لله معتمد علي الله ثم نفسي اعتماد كلي في تجهيز نفسي يعني مش هاخد جنية واحد من الحاج ربنا يباركلي فيه يارب
بس الارتفاع المفاجئ في اسعار الشقق هو اللي عمل كدا
من 10 سنيين فاتوا محدش كان راضي يسكن في بورفؤاد علشان المعدية وانها جزيرة وأغلب المصالح في بورسعيد
وكانت اتخن شقة متعديش 80 الف اه والله
انما بعد الثورة والانفلات الامني في محافظات مصر كلها
بورفؤاد كانت معزولة عن كل دا
والناس فكرت فيها علشان الامن والامان
والناس تيجي من القاهرة والاسكندرية يشتروا الفلل القديمة في شارع الجمهورية ومدرسة امون يطلعوا ابراج فخمة والمتر ماسك 5500 - 6000 وانت تشطب وناس كتيييييييييييير باعت في بورسعيد واجت بورفؤاد
ومعتش في اراضي للبني ولا شقق فاضية واللي بيبيع كأنة بيبيع في ألماظ او ياقوت مش عاوز يفرط فية
بس رغم كل دا
في ناس بترضي بالقليل ومش بيتأمروا وعارفين ظروف الشباب المكافح اللي عاوز يأسس أسرة بجد ويكون هدفة الاستقرار والامان بل وبتساعدة
وناس تانية انا بعذرها من اللي شافتة في جوازات بناتها الكبيرة من المفروش وقرفة
الحمد لله علي كل حال
قل لن يصيبنا الا ما كتب الله لنا

[mk3]

دى عدت القاهره الجديده..متغير محل اقامتك بكلمك بجد

[mohamed_selim]

ايه ده ... انا عندى شقه عند مدرسة الصنايع حوالى ١٠٠ متر ... تشطيب عادى ... لو حبيت ابيعها تجيب كام اليومين دول على كده !
هى حاليا متاجرة بس لو فضيت هقولك لو حابب تاجرها