بجهز شقتي ومش عارف اجيب بانيوه

[MRBEBO]

انا بأذن الله بعمل المحارة وادخل على السباكة

والمفروض هجيب البانيوه علشان السباك يبني ليه مكان

هو اقترح اجيب 170 سم بس انا محتار

هل المقاس مناسب ؟ اجيب نوع ايه ؟ ماركته ايه ؟ لونه ايه ؟

انا بسئل عن اللون لاني هشتري البانيو بس لان ربنا مكرمش ببنت الحلال فمش عارف انا اساسا هشتري طقم وسيراميك لونه ايه وخايف اجيب بانيوه يبقى لونه شاذ او بلدي !!

ياريت تنصحوني انا في حيره

[mostafa3000]

خليك في الايديال ستاندرد الاكليريك
بص علي السيرف شكلة انسيابي وجميل
اللون حسب ذوقك
وان كان البرجمون هيمشي مع اغلب الوان السيراميك

[mk3]

ابيض !

[م أحمد]

كنت مأجر شقة فيها بانيو ولا كان ليه فائدة

دلوقتى انا الحمد لله فى شقة فيها حمامين وما جبتش بانيو

استهلاك مياه بلا داعى

يا جماعة اثيوبيا شغالة فى السد !!!

[أبو آسر]

هاته أبيض مهما كان النوع لأنه هيليق على أي لون تعمله في السيراميك أو طقم الحمامات
أنا جربت ديورافيت وكان ممتاز مجربتش ايديال ستاندارد بس ايديال ستاندارد معروف جودته لكن أعتقد هيبقى أغلى عن الديورافيت

[eslam atia]

بلاش تقول ربنا مكرمش ببنت الحلال
قول ربنا صرف عني واحده الله اعلم بحالها مستقبلا وعاين لي من هو افضل منها بأذن الله
خليك في اللون الابيض بيمشي علي كل الالوان

[طارق _عبد السلام]

ايديال .. ويكون سيرفو يمين او شمال حسب مكانه ممتاز ..... والابيض طبعا

[MRBEBO]

طب السباك بيقترح فرانك سامي الصاج مش الاكليريك رايكم ايه ؟؟؟

[Amr_MO]

انا لسة مشطب شقتي من 3 اشهر وهقولك على الي لاقيته

بغض النظر انت هتشتري ديورافيت ولا ايديال المهم نوع البانيو نفسه

البانيوهات الي في السوق نوعين وكل واحد فيهم ليه عيوب ومميزات:

أولا: الصاج

مميزاته: قوي في تحمل الصدمات يعني مثلا لو حاجة تقيلة شوية وقعت في البانيو متكسروش

عيوبه: البانيوهات الصاج بتبقى مغطاه بطبقى سيراميك، ودي مع الوقت والزمن الطويل بتتخدش وتتجرح خصوصا مع تنضيف ابانيو بسلك مواعين والكلام ده، فيبدا يبان لون اسود او لون غامق الي هو بطانة البانيو، يقال انها بتتصلح عن طريق الشركة ولكن معرفش مدى صحة الكلام ده

ثانيا: الاكليرك

مميزاته: بيتلافى عيوب طبقة السيراميك الموجودة في الصاج، يعني مش بيتخدش مع مرور الزمن او يتجرح وخلافه

عيوبه: عاوز صنايعي ابن حلال وعنده ضمير علشان يبطن البانيو رمل كويس من كل الجوانب ويكبسه رمل من تحت كويس، لان لو ساب فيه فراغات مش مبطنة، ممكن لو سماعة الدش وقعت في البانيو تكسره، فلازم الصنايعي يكون أمين في شغله جدا، وفي ناس بتعمل حركة في بانيوهات الاكليرك، انها قبل تركيب البانيو خالص بتقلبه على وشه على كرتونة مثلا، بعدها يخمر اسمنت وجبس ويبطن البانيو الاول بطبقة من الاسمنت من كل الجهات ويسبها يومين تنشف، بعدها يبدا يحط الرمل بتاعه ويبدا يقلب البانيو على بطانة الرمل فبكدا يكون ضمن تبطين البانيو كويس من كل الجهات

[M!SHO]

هو البانيو لازم يركب قبل السيراميك ؟

طب والكابين شاور نفس النظام ، وهل فيه بانيوهات منفصله بتركب بعد السيراميك ؟

[الاسد المهاجر]

انا لسة مشطب شقتي من 3 اشهر وهقولك على الي لاقيته

بغض النظر انت هتشتري ديورافيت ولا ايديال المهم نوع البانيو نفسه

البانيوهات الي في السوق نوعين وكل واحد فيهم ليه عيوب ومميزات:

أولا: الصاج

مميزاته: قوي في تحمل الصدمات يعني مثلا لو حاجة تقيلة شوية وقعت في البانيو متكسروش

عيوبه: البانيوهات الصاج بتبقى مغطاه بطبقى سيراميك، ودي مع الوقت والزمن الطويل بتتخدش وتتجرح خصوصا مع تنضيف ابانيو بسلك مواعين والكلام ده، فيبدا يبان لون اسود او لون غامق الي هو بطانة البانيو، يقال انها بتتصلح عن طريق الشركة ولكن معرفش مدى صحة الكلام ده

ثانيا: الاكليرك

مميزاته: بيتلافى عيوب طبقة السيراميك الموجودة في الصاج، يعني مش بيتخدش مع مرور الزمن او يتجرح وخلافهكك

عيوبه: عاوز صنايعي ابن حلال وعنده ضمير علشان يبطن البانيو رمل كويس من كل الجوانب ويكبسه رمل من تحت كويس، لان لو ساب فيه فراغات مش مبطنة، ممكن لو سماعة الدش وقعت في البانيو تكسره، فلازم الصنايعي يكون أمين في شغله جدا، وفي ناس بتعمل حركة في بانيوهات الاكليرك، انها قبل تركيب البانيو خالص بتقلبه على وشه على كرتونة مثلا، بعدها يخمر اسمنت وجبس ويبطن البانيو الاول بطبقة من الاسمنت من كل الجهات ويسبها يومين تنشف، بعدها يبدا يحط الرمل بتاعه ويبدا يقلب البانيو على بطانة الرمل فبكدا يكون ضمن تبطين البانيو كويس من كل الجهات

ولما روحت محل السيراميك البائع قالي
تجيب سلك شائك واسمنت وتلفه علي البانيو بطانه

[A.Saad]

البانيو ممكن يركب بعد السيراميك
بتشترى له اجناب فيبر
بس دى تمنها اكتر من تمنه

[zillo]

موضة قديمة واستهلاك للمكان

[M!SHO]

البانيو ممكن يركب بعد السيراميك
بتشترى له اجناب فيبر
بس دى تمنها اكتر من تمنه

والكابين شاور نفس النظام يا استاذ أحمد ؟

[A.Saad]

مش عندى فكرة عن تركيبها بالظبط