خبراتكم فى التشطيب

[midoabdeen]

السلام عليكم ورحمة الله وبركاته

في شوية حاجات كده في التشطيب محتار فيها

واكيد عايز استفيد من خبرات اللى سبقوني في التشطيب

1- السباكه

عندي الصرف طالع تحت الشباك وانا عايز احط القاعده فى جنب تاني
السباك قال لازم الصرف يترحل من برا والمشكله انه هيدخل علي عمود فلازم يبقي برا العمود لان مش هينفع نكسر فيه طبعا وقالي انه يبقي يتعمل عليه سيراميك وهيبقي بارز حوالي 20 سم عن الحيطه
هل هيبقي شكله كويس ولا لا

2- الخشب

انا هجيب الشبابيك كلها الوميتال
ايه هو احسن نوع زجاج يستر الشقه ويكون شكله كويس العاكس ولا المصنفر

وكمان باب الحمام هل اعمله خشب ولا الوميتال انا حاسس ان الخشب اشيك وكمان ممكن اركب ليه شريحه استانلس من تحت علشان المياه هل هيبقي عملي زي الالوميتال لاني مش بحب شكل الالوميتال فى الابواب

3- المحاره

هل بيوت النور (علبه حرف l ساده من غير فورم) هيبقي شكلها كويس ولا الكرانيش بس لان الفرق بينهم كبير شويه فى الفلوس

[Amr_MO]

موضوع السباكة مقدرش احكم عليه لأن الشكل مش قدامي

موضوع الأبواب للغرف فالخشب افضل واشيك بس توديه لحد نضيف وعنده ضمير يعملهولك دهان استر على وش ورنيش هيبقى تمام، باب الحمام في ناس بتفضل يكون الوميتال علشان المية وممكن تعمله بنفس لون باقي ابواب الغرف الخشب، ولو هتعمله خشب اعمله شريحة من تحت عشان المية ونصحية عاملة بخصوص الوميتال الشبابيك اعمله قطاع الماني اسمه ps ده بيبقى امتن وبيعيش غير باقي قطاعات الالوميتال التانية

الزجاج عليك بالمسنفر علشان يحجب الي في الاوض عن الخارج لأن العاكس ملهوش لزمة بالليل هيكشف كل حاجة

المحارة وموضوع بيوت النور دي ازواق في الاول والاخر في ناس بتحبها وفي ناس بتحب تعمل كرانيش ويخلي النقاش يعمله فيها تجزيعة رخام بتبان في الاخر كان الكرانيش قطعة رخام مش جبس وفي الاخر دي كلها ازواق

[midoabdeen]

انا فعلا عامل الشبابيك ps
والابواب الخشب بفكر اعملها كلها شريحه استانلس من تحت علشان المياه بس مش عارف هيبقي شكلها حلو ولا لا

[طارق _عبد السلام]

طيب مايظبط مواسير القاعده على سقوط السقف

يعنى يمشيها على الارض ويبعد عن العمود ووضوع السيراميك ده مش هيكون عاطفى اصلا ... اى حمام معمول له سقوط فى السقف علشان تمشى المواسير على الارض عادى انا عندى قاعده الحمام بعيد عن مواسير الصرف الرئيسيه

من ناحيه الزجاج طبعا المسنفر لكن العاكس مع اضاءه شقتك من الداخل هيكون بيتك بالكامل عند الجيران


باب الحمام مش مهم يكون خشب ..........الوميتال عادى وخليه بلون الخشب لكن ابواب الغرف خليها خشب وادهنها استر مش لاكيه

[midoabdeen]

طيب مايظبط مواسير القاعده على سقوط السقف

يعنى يمشيها على الارض ويبعد عن العمود ووضوع السيراميك ده مش هيكون عاطفى اصلا ... اى حمام معمول له سقوط فى السقف علشان تمشى المواسير على الارض عادى انا عندى قاعده الحمام بعيد عن مواسير الصرف الرئيسيه

من ناحيه الزجاج طبعا المسنفر لكن العاكس مع اضاءه شقتك من الداخل هيكون بيتك بالكامل عند الجيران


باب الحمام مش مهم يكون خشب ..........الوميتال عادى وخليه بلون الخشب لكن ابواب الغرف خليها خشب وادهنها استر مش لاكيه

متهيئلي صعب انه يمشي الماسوره تحت السيراميك علي الارض لان الماسوره علي حسب كلامه حوالي 20 سم هتبقي كتير اوي اني اطلع بالسيراميك دا كله ولا دا عادي

اصل العاكس حاسس ان شكله مش شيك اوي وكمان هو ليه وجهين واحد خشن والتاني ناعم ياتري انهي يبقي جوه اللى شوفته كان الخشن جوا كان شكله وحش اوي

هو انا اصلا عايزه خشب بس خايف من المياه

[midoabdeen]

ايه يا جماعه فين الآراء

[swimmer25]

بالنسبة للشبابيك أنا حاس إن العاكس أفضل لأنك الصبح هتقدر تشوف برا بس محدش يشوفك من برا و لازم تركب ستائر عشان الليل وبالتالى هتقدر تفتح الشباك أو تقفله
في المخربش مفيش رؤية خالص طول ما هو مقفول ولا من الداخل ولا الخارج
وبالليل لو عايز تفتح الشباك بردو هتحتاج ستارة
ومادام كدا كدا هتحتاج ستارة يبقى العاكس أفضل

[amr011111]

بالنسبه للسباكه كده كده ناس كتير بتبنى ورا القاعده جلسه طوب بارتفاع القاعده بحيث تضع عليها اى حاجه كشامبوهات او اى ادوات والجلسه ديه بتبقى عباره عن حيطه طوب مبنيه قدام اليطه علطول وعادى مشى فيها ماسورة صرف الحمام
بالنسبه لباب الحمام يفضل الوميتال علشان المياه الا لو الحمام واسع فساعتها متقلقش اوى على الباب
بالنسبه للمحاره طبعاً يالكرانيش أشيك