ذكريات الطفوله ( اول ما وعيت عالدنيا )

[Amr Nasir]

وسط القرف الي عايشين فيه ده حبيت اعمل موضوع عن ذكريات الطفوله ايام زمان الجميله


ياليت الشباب يعود يوما فاحكي له عما فعل بي المشيب


كل واحد حابب يشارك يقلنا اول ما وعي عالدنيا كان في ايه كانت الدنيا عامله ازاي ... كان في ايه لسه ظاهر جديد و كان في بيختفي و بيقدم

[marwanragab]

اللبان السحري :)

[adelghanem]

انا راجل كبير فى السن دلوقتى
فاكر السيارات اللعبه فى الطفوله كانت
تصنع من الصاج وكانت تتربط بفتله والواحد
يشدها وراه !!!!كانت متعه.
ولما اخترعوا العربيه ام زنبلك ياسلام على
الاختراع المدهش ده!!!!!
وكان الواحد ينام والعربيه فى حضنه..
ايام

[mesaharaty]

مازلت أذكر المسدس أبو فلة وفتلة .
تحط الفلة فى فتحة المسدس وبتبقى مربوطة بفتلة وتضرب تقوم الفلة مندفعة بس مابترحش بعيد عن المسدس .
الموضوع ده مش رايح من بالى أبدا بقاله سنييييييييييييين طويلة .
كنت باحب اللعبة دى جدا لدرجة إن زمان كان فيه شلن ورق كده ومرسوم عليه عامل وفلاح وجندى فكنت أحب أبص للمسدس اللى فى الصورة جدا وكانت أسعد لحظاتى وأنا بالعب بيه .

(أوعى أكون مريض نفسيا بالعنف ولا حاجة ..... أنا غلبان قوى وفى حالى والله العظيم)

كل سنة والكل بألف خير

[Sherifmt]

شكرا علي الموضوع انا فاكر واحنا صغيرين مواسم الالعاب ...... كل فترة في السنه وليها العاب خاصة بيها في الشارع طبعا من سن 6 سنين وانت طالع يعني في موسم المشمش كنا بنلعب بالنواه يتاعة المشمش وفي موسم بلي وموسم النحلة الخشب والقطان وموسم الكازوز والسبع طوبات وشبر شبرين وتريك تراك والنبلة والاولي وصيدين السمك وسباقات الجري حوالين مربع بيوت وزينة رمضان كنا بنشتغل فيها من قبل رمضاب باسابيع خصوصا لما رمضان بيكون في الصيف ومش هنسي الاحترام الشديد والرهبه من المدرس او المدرسه لدرجه ان لو واحد فينا شاف زميله بيلعب بعد المدرسة كان كفايه انه يحذره انه هيقول للأستاذ بتاعه !!! وكان في مقوله مشهورة ان اللي يجيب للمدرس عصايه هو اول واحد بينضرب بيها (: وكمان كان تأجير العجل قبل المرسة او بعد المدرسة وكان كل ده بيخلي الواحد فينا يعرف 100% من كل الاطفال اللي تقريبا من عمره مش بس في الشارع اللي ساكن فيه لكن المنطقه كلها !!! موقف حصل وعمري ما هنساه وانا سني 12 سنه كنا في جنينه الحيوانات في العيد وكان فيه شد ما بيني وبين وواحد غريب مع مجموعه في رحله من محافظه تانيه واول ما قلت اسم الشارع بتاعي في الجيزة ولاد المنطقه كلها طلعوا من تحت الارض وكانو واقفين في ضهري !!!! كان كفايه حد ينده ان في واحد من منطقتنا بيتخانق ولم نص الجنينه بجد ساعتها كنت فخور قوي باللمه بتاعتنا طبعا الموضوع خلص علي خير علشان الكبار ادخلوا وكان الاحترام موجود بين كل الناس وعدت الحكايه وفضلنا نتكلم عليها ونفتكر ونضحك .....وبمناسبه الضحك حد ملاحظ ان الضحك كان زمان اسهل وتلقائي والي حد الدموع فعلا ...... وبالرغم من بساطة حالنا جدا وانا صغير الا ان عمري ما حسيت ان في حاجه ناقصاني او ان في حد عايش احسن مني في شيء واللي احيانا كان بيغظني اني قصير لكن اول يوم رحت المدرسة كان معايا في الفصل كتير اقصر مني ومن ساعتها الموضوع اتلغي من تفكيري علشان كنت بالنسبه لغيري واحد من الطوال (:

[TAMER2020]

حد فاكر المسدس ده

[adelghanem]

اذكر حادثه طريفه حصلت وانا صغير
كل ما اتذكرها اضحك وهى
كان فى الاعياد الاولاد من الارياف
ياتون الى مدينتى وياجرون العجل(الدراجات)
وكان هناك شارعان متقاطعان
على شكل حرفt..
الشارع الاول منحدر بدرجه كبيره وامام هذا
الانحدار يقع مباشرتا محل للكبايات الزجاج
والصينى وخلافه.
فى اليوم ده ارى واحد من الاولاد دول مأجر عجله
ونازل الشارع المنحدر بأقصى سرعه
وليس معه فرامل ...
وهوه نازل بالسرعه العجيبه دى
وحيلبس فى محل الزجاج
ينادى من بعيد على صاحب المحل اللى قاعد
امام محله باعلى صوت...اقفل...اقفل
واحنا من المنظر والمناديه
مذهولين لغايه ما لبس فى صاحب المحل...
وهوه على الارض بعد ما وقع
يقول لصاحب المحل مش قلت لك اقفل..
هههههههه

[S O P H O S]

كل ما ذكر واكتر بيفكرني
والاجمل ان الناس غير الناس والدنيا كانت اسرة جوا اسرة

[canner]

اكتر لعبة كنا بنلعبها فى المدرسة هى الاقلام و هى كل واحد يحط قلمه و الفايز اللى يوقع اقلام التانين و القلم بتاعه ما يقعشى

[ramymechanics]

اول شريط كاسيت اشتريته ب 6 جنيه و ربع عامر منيب "الله يرحمه" اسمه يا قلب تانى و عمرو دياب شريط "متخافيش"

كنت باخد مصروف نص جنيه فى ثانوى ... اجيب ببريزة رغيفين و اروح للراجل يحط لى عالغيف طعميتين ببريزة و سلطة و اجيب ب 30 قرش ازازة كوكاكولا

[mr_vampire]

اول شريط كاسيت اشتريته ب 6 جنيه و ربع عامر منيب "الله يرحمه" اسمه يا قلب تانى و عمرو دياب شريط "متخافيش"

كنت باخد مصروف نص جنيه فى ثانوى ... اجيب ببريزة رغيفين و اروح للراجل يحط لى عالغيف طعميتين ببريزة و سلطة و اجيب ب 30 قرش ازازة كوكاكولا

معلم. ده بالظبط اللي كنت بعمله.

انما الشرايط عمري ماشتريت شرايط. كنت بكتب في ورقة تلاتين اغنية واروح لبتاع الكاسيتات يعملي كوكتيل .

[adelghanem]

اول شريط كاسيت اشتريته ب 6 جنيه و ربع عامر منيب "الله يرحمه" اسمه يا قلب تانى و عمرو دياب شريط "متخافيش"

كنت باخد مصروف نص جنيه فى ثانوى ... اجيب ببريزة رغيفين و اروح للراجل يحط لى عالغيف طعميتين ببريزة و سلطة و اجيب ب 30 قرش ازازة كوكاكولا

اول شريط كاسيت جبته
كان ب2 جنيه وربع...!!!!
كان فيه اغنيه لندا... لندا .لفرقه لبنانيه
اما اول ماحوشت فلوس اشتريت كاسيت
صغير ب30 جنيه يابانى..!!!!!
كنت ماسكه على طول زى الموبايل
دلوقتى......
والله انت فكرتنى بايام حلوه.
انا باشكرك.
تحياتى.

[ramymechanics]

معلم. ده بالظبط اللي كنت بعمله. :ta_clap[1]:

انما الشرايط عمري ماشتريت شرايط. كنت بكتب في ورقة تلاتين اغنية واروح لبتاع الكاسيتات يعملي كوكتيل .

يا باشا اساسى الكوكتيل كان فيه شريطين 60 دقيقة ب 9 جنيه وال 90 دقيقة ب 12 جنيه و كنا نحشر فيه شعبى على رومانسى على حزاينى والراجل لو لقى حتة فاضية يكملها موسيقى سمير سرور كمان ههههههههههههههههههههههه

[khaled_sabry]

انا اتربيت فى اسيوط "المدينه"
اذكر ان المدينه نفسها و انا صغير كان معظم الشوارع تقريبا مليانه شجر - الشجر ده دلوقتى تقريبا اختفى
و كان وسيله التنقل الرسميه ليا هى العجله
العجله دى كان عجله عاديه و انا فى اعدادى قررت انى احولها لعجله سباق و اشتريت لها مجموعه التروس و منظومة عجل السباق
و استغرق تركيب المنظومه اسبوع تقريبا
و رغم بساطه الموضوع - الا ان الحكايه دى عملتها و انا فى اوى او ثانيه اعدادى يعنى 13 او 14 سنه تقريبا و علشان كده والدى كان متأكد فى الاول انى حفشل و انبهر لما ركبتها صح ووزنت الطاره مع التروس الجديده
و كانت صيانه العجله دى بالكامل بعملها فى البيت

عرق الميكانيكا فيا من صغرى لأن تقريبا ده اللى بعمله دلوقتى مع عربيتي ههههههههههههههه

[YahiaAshraf]

افتكر كويس اوى لما كنت اشترى كيس شيبسى ابو نص جنيه وافتحه
كنت الاقى جوه الكيس 3 اكياس كل كيس فى 3 عملات فئة ربع جنيه يعنى اجمالى 2 جنيه وربع هههههههه ايام بقى

افتكر كمان ايام شهر رمضان زمان لما كنت استنى بكار على افطار رمضان
ولا عالم سمسم اللى كان بيجى على التلفزيون المصرى هههههههه كانت المكافئه بتاعتى لو خلصت واجب المدرسة اتفرج عليه
الكوتشى اللى كان بينور يا سلام كان انجاز لما جبته
اختم بقى بالصورة دى


على فكرة انا 18 سنه وشوية بس كانت ايام برده