الشيكات بتكون محددة بمدة ؟

[Samah AbdAllah]

السلام عليكم ورحمة الله وبركاته

عندى استفسار صغير
هل صرف اى شيك بيبقا متربط بمدة معينة لو تخطاها يبقا خلاص ؟
لان والدتى شيك الشغل بتاعها فات على تاريخه شهر وصاحبتها قالتلها مش هينفع تصرفيه لان انهاردة كان اخر يوم
هل الكلام ده صحيح ؟

[mk3]

متابع

[midoabdeen]

لا طبعا مش صحيح ممكن تصرفيه عادي

[AboELsoud]

لا الكلام ده غلط طبعا

الصحيح انه ممكن اصرف الشيك في ميعاده او بعده في اي وقت من غير صلاحيه او مده معينه

اللي مينفعش اني اصرفه قبل ميعاده

بس النقطه الفاصله هنا الحساب اللي طالع عليه الشيك فيه رصيد ولا لأ

بس بما انه حضرتك بتقولي انه تبع شغل معين يعني حساب شركات فأكيد هيبقى فيه رصيد مش زي حساب فرد يعني ( ممكن يطلع شيك و مفيش رصيد في حسابه )

[Samah AbdAllah]

شكرا ليكم جميعا هروح معاها البنك الصبح تصرفه وربنا يسهل

[zrzr1]

اللي اعرفه ان الشيك بيصرف قبل تاريخة عادي ولكن لا يصرف بعد تاريخه اذا مر عليه 6 أشهر,, والله أعلم

[abou-yahia]

لو الوالده ليها حساب في اي بنك

ممكن تودع الشيك للتحصيل في حسابها

والبنك حياخد عموله من غير صداع

لو جه عليه رفض حيكون رسمي

تحياتي

[Batman372]

النظام المصرفى المصرى :
الشيك لا يصرف الا عند تاريخه او بعده طبعا ... بدون اى حد اقصى للمده ...
ان شاء الله عشرون سنه ...
و الدليل ان فى حاله تقسيط بنكى بضمان العربيه و حفظ ملكيه لصالح البنك ... البنك بيمضى العميل على شيكات ... و فيه بنوك بتقسط حتى ٧ سنوات ... يعنى الشيكات مازالت ساريه ...
و انا عن نفسى فى عملى بصرف شيكات بعد شهور من تاريخها بسبب السفر المتكرر او بسبب ان العميل بيماطل و معندهوش رصيد ...
تحياتى ...

[Batman372]

اللي اعرفه ان الشيك بيصرف قبل تاريخة عادي ولكن لا يصرف بعد تاريخه اذا مر عليه 6 أشهر,, والله أعلم

مش فى مصر النظام ده :)
هما كانو عايزين يعدلو القوانين المصرفيه ان يتصرف بمجرد كتابته بغض النظر عن تاريخه ... و لكن بدون حد اقصى للمده ... لان ده بيعتبر حفاظ على حق العميل الى الشيك لصالحه ...
تحياتى ...

[dede_dodo88]

صلاحية أي شيك بتكون 3 سنوات و 6 شهور, يعني لما شيك يعدي المدة دي هيترفض حتى لو الشيك فيه رصيد..
في شيكات بتبقى الجهة اللي مطلعة الشيك محددة فترة صلاحية الشيك, يعني 3 شهور مثلاً, و الشيك بيبقى مكتوب عليه كده صراحة..
أي شيك مش متسطر ينفع يتصرف قبل ميعاده عادي, لكن لو متسطر يبقى لازم في تاريخه أو بعده و يودع في حساب ميتصرفش نقداً..
أي شيك عدى على تاريخه 6 شهور و فيه رصيد هيتصرف عادي , لكن لو الرصيد غير كافي الشيك بيترفض وسبب الرفض لازم يكون "يلزم تجديد تاريخ الشيك..
بالنسبة لشيكات الأقساط فهي بتكون مكتوبة أصلاً بتواريخ لاحقة على حسب ميعاد كل قسط..

[Samah AbdAllah]

لو الوالده ليها حساب في اي بنك

ممكن تودع الشيك للتحصيل في حسابها

والبنك حياخد عموله من غير صداع

لو جه عليه رفض حيكون رسمي

تحياتي

هى بتعمل كده فعلا :)
الحمدلله رحت معاها وعملنا ايداع للشيك للتحصيل في حسابها وخلاص
الغريب ان البنك كان تقريبا بينش مفيش غيرنا
ودى سابقة من نوعها
مش عارفة دى تبقا حاجة كويسة ولا وحشة

[حسام الغرباوي]

مع احترامي للجميع وللتوضيح فقط وبصفتي محاسب


1 - اي شيك بيكون لية مدة وبتختلف حسب قوانين البنك المركزي للدولة ...هنا في المملكة 6 أشهر ..واعتقد في مصر نفس المدة ( مع العلم ان البنك ممكن يصرفة بعد المدة دي وفقا لسياسات البنك ما لم يخطر صاحب الحاسب البنك بغير ذلك )

2 - الشيك يعتبر ورقة دفع ..ويحق للمستفيد صرف الشيك حتى وان كان تاريخة لم يأتِ بعد ...طالما توافر رصيد لدى المسحوب عليه ...يتم صرف الشيك ...إلا إذا تم إبلاغ البنك بعد الصرف من صاحب الحساب ...