مقابلة الشيراتون ودعوه خالصه لتصفية النفوس فى الأزهر بارك

[jimmy]

السلام عليكم

انا أسف لعدم تواجدى معكم منذ اسبوع تقريبا

المهم يوم الجمعه اللى فاتت بشمهندس كامل كلمنى على الموبايل وقالى انه فى شيراتون

هو بشمهندس آمر وبشمهندس عبد الرحمن وكمان جنيدى جاى فى الطريق

انا ساعتها كنت على كوبرى المطار بتهوى قلتله هجيلك حالاً يا كامل

وعنها وخت بعضى ورحت ولقيتهم امام النساجون الشرقيون نزلت سلمت عليهم كامل وآمر وعبد الرحمن وجنيدى كان لسه فى الطريق

استأذنتهم أوصل الناس اللى معايا وارجع

المهم رجعت ليهم وكان جنيدى وصل سلمنا على بعض وسهرنا فى كافيه فى شيراتون مش فاكر اسمه واتفقت مع آمر وجنيدى وكامل على مقابله الجمعه القادمه فى الأزهر بارك الساعه 6

وبشمهندس عبد الرحمن قال هيكتب هو الدعوه على المنتدى بس دورت دلوقتى مش لاقيها

واتكلمنا مع بعض فى كل الخلافات الأخيره وطلعت بالنتائج التاليه

1/ مقابله يوم الجمعه الساعه 6 فى الأزهر بارك*لكل الناس مش الأسبيرانزاويه فقط*

2/ لازم ولابد وحتما واكيد انشاء الله حضور التالى أسمائهم

*الأستاذ/ بايـــــــــــــــو
*بشمهندس / وائل ابو نورا
*الأستاذ/ وائل عطيه
*الأستاذ شريف المصرى *عدو الصينى *
*/الأستاذ/ ابو عبدالله
*/الدكتور / ايهاب
*/ الأستاذ كريم منير
*/ الأستاذ كماتشو
وفى نجوم تانيه انا أسف ناسيها دلوقتى بس لازم يحضروا

3/ بجد بجد هتكون مقابله لتصفيه النفوس وده انا حسيته من آمر و جنيدى

4/ احنا فى شهر رجب كل عام وأنتم بخير يعنى رمضان على الأبواب وعشان صيامنا يقبل
ولا مش هنفطر مع بعض فى رمضان* ويعرض هذا ويعرض هذا وخيركم من يبدأ بالسلام*
* مثل المؤمنين فى توادهم وتراحمهم كمثل الجسد الواحد اذا اشتكى منه عضو تداعى له سائر الجسد بالسهر والحمى**

العالم كله اتحد علينا واحنا بنتفرق * كده ينفع * احنا هانت علينا انفسنا فعشان كده هنا على الناس

يا ريت الدعوه تلقى بالقبول ويارب الناس كلها تحضر ودى اهم مقابله عشان كلنا هناخد فيها ثواب انشاء الله واعتقد ان المكان جميل وجديد واللى هيحضر بجد يكتب انه هيحضر

وأسف للأطاله

[معاذ الشرباصى]

ايه يا جيمى الحلاوة دى :)

ربنا يسهل و احاول اجى طبعا

[kamatchodj]

يا جمالك ياجيمى

والله انت راجل محترم ومتمكن

الدعوه دى ممتازه

انا جاى ان شاء الله

[محمدايهاب]

أنا هحاول أحضر و حمد الله على السلامة أستاذ جنيدي

[Karim_Monir]

رغم اني عندي ارتباطات غدا وزي ما نتم شايفين اني قريت الدعوة قبل صلاة الفجر بشوية الا اني هاحاول اجي ان شاء الله

[معاذ الشرباصى]

انا للاسف مش هقدر اجى :(

بس مستنين نعرف الاخبار و التطورات

[معاذ الشرباصى]

ايه اللى حصل فى المقابلة دى يا جماعة؟!

[Abonora]

انا كمان عايز اعرف ايه اللي حصل انا بلغت جمال (صاحب الدعوة) اني عايز احضر بس كنت مستني تاكيد ياتري المقابلة تمت ولا لاء

[Dr Ahmed]

عدم كتابة الأحداث حتى الآن تثير القلق ، فى العادة عندما تكون المقابلة ناجحة يسرع الجميع فى الكتابة عنها وتتوالى التعليقات .. فماذا حدث ياترى؟

[hazem_khidr]

بالمنظر دا اعتقد ان المقابله ما حصلتش .
لو كانت حصلت امبارح كان الشباب رجع كتب علي طول و لو كانت دون المستوي كانو كتبو برضه متاخر انما لحد دلوقتي كده مفيش اخبار يبقي اكيد ما حصلش حاجه
NO NEWS GOOD NEWS :)

[خالدابوالنجا]

بغض النظر عن حدوث الاجتماع من عدمه او حصول نتائج من الاجتماع من عدمه . فمجرد انه ما يزال بيننا من يحرص على لم الشمل وازالة الخلاف والسعى الى اصلاح ذات البين بين الناس
اعتقد ان ذلك فى حد ذاته مكسب كبير للمنتدى ممن قام به.
شكرا لك يا جمى واكثر الله من امثالك وارجو ان يكلل الله الاجتماع بالنجاح.