طلب مشورة ونصيحة بخصوص فتح مشروع شركة برمجيات

[أبو آسر]

السلام عليكم ورحمة الله
إخواني الكرام أعضاء بيتنا التاني نايل موتورز
لأني بعتبركم إخوة لي وبستفيد جدا من نصايحكم وتعليقاتكم حبيت أشارككم موضوع شاغل بالي بقاله فترة واليومين دول بالذات سيطر عليا تماما بس متردد جدا في اتخاذ أي خطوة بشأنه
أنا -زي ما بعضكم يعرف- بشتغل في تصميم مواقع الإنترنت والتسويق الإلكتروني بس بشتغل freelancer يعني حر نفسي مش بشتغل في شركة
طبعا مهما كان الواحد بيشتغل لوحده مش هيقدر ينجز حاجات كتير وفعلا الفترة اللي فاتت بقى يجيلي شغل تصميم مواقع كتير وأرفضه لعدم التفرغ لأني بحاول أركز شوية في حوار التسويق الإلكتروني لأني ماسك شغل لعدة شركات عقارات والحمد لله الدخل معقول بيغطي تكاليف المعيشة ومصاريف المدارس وما شابه وقرفه أهون من قرف تصميم المواقع بشوية لأنك بتصمم الموقع وتاخد فلوسه وتصرفها ويتبقالك قرف الموقع اللي لسة شغال وصاحبه عايز كل شوية يعدل حاجة أو يضيف صفحة أو الموقع مش شغال وهكذا وطبعا الدخل الإضافي من ورا الكلام ده ملاليم بمعنى الكلمة يعني مش جايبة همها فقلت أتفرغ للتسويق الإلكتروني ورفضت شغل تصميم كتير ودي طبعا خسارة ومحدش بيجيله فرصة شغل ويضيعها بس فعلا مش هقدر أجمع بين أكتر من مجال خاصة موضوع التصميم بياخد وقت طويل ومتعاملتش مع حد أقدر أثق فيه بحيث يقوم بالشغل نيابة عني وأبقى مطمئن إنه مش هيصغرني قدام الشخص اللي طلب مني الموقع
الحاجة التانية ان الدخل على الأد يعني يادوب مصاريف الشهر وطبعا مفيش أي توفير والواحد عايز يعمل حاجة لقدام خاصة إني بفكر في حوار السفر وطبعا السفر علشان تبقى مستريح محتاج مبلغ مش قليل على الأقل يعيشك سنة كاملة بمصاريفها مش حامل هم حاجة لحد ما ربنا يكرم وتلاقي شغلانة كويسة ، ده غير الأولاد بيكبروا ومصاريفهم بتزيد والدنيا بتغلى كل يوم عن الأول وأنا بحاول أوفرلهم جو نضيف ومحترم يعيشوا فيه بعيد عن القرف اللي في البلد ، أخيرا حتى لو ربنا كرمني وسافرت برة أكيد هكون استفدت من خبرة فتح الشركة وممكن ربنا يوفقني وأفتح فرع تاني ليها في البلد اللي هسافرها ومش هحمل هم الشركة اللي في مصر لأني هكون بباشرها باستمرار وممكن أخلي أخويا يمسك إدارتها نيابة عني يعني مش هقفلها حتى لو سافرت
من هنا جاتلي فكرة أفتح شركة برمجيات في نفس مجالي بس هتوسع فيها وأحاول أشتغل في كل ما يتعلق بالمجال حتى لو مكنتش بفهم فيه شخصيا بس هستعين بحد بيفهم طبعا ، منها أزود الدخل ومنها هتنفعني في حاجات كتير زي مثلا إني بحاول أوصل إني أبقى شريك لجوجل Google Partner في برنامج التسويق Google Adwords وده أعتقد لازم أكون شركة مش فرد عادي ، وغير جوجل فأنا عايز أتوسع في مجالي في التسويق وأوصل للشركات الكبيرة اللي بتصرف مبالغ ضخمة للدعاية بس دي طبعا لازم يكون تعاملي معاهم بناء على شركة لها مقر وسجل تجاري وبينا أوراق وعقود وكتير جالي شغل وكانت الناس تسألني فين المكان ونضمن منين إنك واحد ثقة نقدر نتعامل معاه في فلوس وكده وطبعا ده حقهم
بس المشكلة إني مش بحب أعمل حاجة ناقصة أو نص نص وبعدين تبقى تكبر أو بمعنى آخر مش مقتنع بمبدأ ابدأ من الصفر وابدأ صغير وبكرة تكبر لأن حتى لو عملت كده فالموضوع هياخد وقت طويل ومحدش عارف الظروف وكمان أنا مش من النوع الصبور شوية فعلشان آخد خطوة زي دي هحتاج إني أفتح شركة مش صغيرة ومش كبيرة برده يعني على الأقل يكون شغال فيها 6 موظفين وأأجر شقة في مكان معقول مش شعبي وهجهزها تجهيزات محترمة يعني هصرف كتير ومحتاج رأس مال كبير وأنا حاليا لا أملك إلا حوالي 70 ألف جنيه شغالين في العقارات وممكن أحاول أوصلهم ل100 مثلا بالعافية
فهل المبلغ ده هيكفي إني أفتح مشروع زي ده وأبدأه صح ؟ هل هيغطيني مصاريف لمدة 6 شهور على الأقل اللي هي الفترة اللي هحتاج أقعد أصرف من غير ما أنتظر مقابل لحد ما أحط رجلي في السوق وأعرف الخبايا وأعرف أجيب زبون وأشتغل كويس وفي مرتبات موظفين مش قليلة وإيجار مكان ومصاريف تجهيزات وأجهزة كمبيوتر وخلافه ؟
هل أقوم بالخطوة دي وأخاطر بالمبلغ اللي معايا وشغال بيجيب فلوس ممكن مش كتير بس اسمه شغال مش واقف ؟
هل حال البلد حاليا يسمح بإني أعمل المشروع ده وممكن أكسب منه في ظروف البلد دي ؟
ولأهل الخبرة في المجال ده واللي مروا بتجربة فتح شركة برمجيات أو حاجة قريبة من المجال ده: أبدأ منين وأعمل إيه بالضبط ؟ أجيب كام موظف ويكون تخصصاتهم إيه وهياخدوا كام ؟ أأجر مكان فين ويكون سعره معقول ومنطقة كويسة ؟
يا ريت تفيدوني وتطلعوني من الحيرة دي وآسف على الإطالة في السرد
جزاكم الله خيرا

[مُصْطٓفٓى]

في البداية هنالك أكثر من نصيحة أستطيع تقديمها لك
الكثير من الشركات بدأت تنتقل من حيز صناعة البرمجيات للغير إلى حيز صناعة البرمجيات لنفسها
وتندرج المواقع وتطبيقات الهواتف وغيرها تحت تصنيف هذه البرمجيات
وأمثال تلك الشركات شركة LinkDev والتي تقدم خدمة تطوير المواقع وفي الوقت نفسه تمتلك العديد من المواقع الناجحة
ومن ثم تعتمد هذه المواقع على الإعلانات العادية وإعلانات الرعاية وأظن أن لك خبرة ليست بالقليلة في ذلك الأمر

النصيحة الثانية أن تمتلك شركة للحصول على مشاريع صغيرة أو كبيرة من خلال مواقع الـ Freelancers
ويلزمك في ذلك شخص يجيد الانجليزية ومتخصصون في بعض المجالات إن شاء الله
وتعمد في هذه الشركة الحصول على المشاريع التي تستطيع انجازها بدرجة 100% وبتكلفة أقل من المنافسين في بادئ الأمر
قد تستهدف مشاريع برمجة تطبيقات الهاتف او إدارة السيرفرات وغيرها من التخصصات غير المتشعبة

النصيحة الثالثة واكب العصر كما يقولون فليس من العقل أن تبدأ في تعلم الخط العربي
في الوقت الذي انتشرت فيه تصميمات الجرافيك والطباعة
في الوقت الحالي أصبح من الصعب إقناع الكثير من المواقع بتصميم موقع لهم
في الوقت الذي يستطيعون فيه إنشاء صفحة على الفيس بوك وإثراءها بما يريدون من محتويات
وعليه فعليك اختيار المجال الذي له سوق في الوقت الحالى وفي الأيام القادمة إن شاء الله

موضوعك يتسع لنصائح أخرى كثيرة حاولت قدر المستطاع اختصارها في هذه الثلاث نقاط

ربنا يوفقك

[amr011111]

الخطوه المهمه ان انت تشوف الشغل اللى بيجيلك وكمية الشغل اللى بترفضها مثلا بتعمل دخل اد ايه
وهل الدخل ده هيكفى انك تصرف على المشروع اول سنه لان غالباً أول سنه هتلاقى فى نص السنه الاولانى ان الربح بيروح فى مرتبات وايجار شقه والنصف التانى ان انت بتكسب بسيط وهكذا لحد ما يجيلك شغل كتير
وأنصحك انك تبدأ ان شاء الله
وبالتوفيق ان شاء الله

[Secret-Man]

منصحكش .....

[sherif4004]

في البداية هنالك أكثر من نصيحة أستطيع تقديمها لك
الكثير من الشركات بدأت تنتقل من حيز صناعة البرمجيات للغير إلى حيز صناعة البرمجيات لنفسها
وتندرج المواقع وتطبيقات الهواتف وغيرها تحت تصنيف هذه البرمجيات
وأمثال تلك الشركات شركة linkdev والتي تقدم خدمة تطوير المواقع وفي الوقت نفسه تمتلك العديد من المواقع الناجحة
ومن ثم تعتمد هذه المواقع على الإعلانات العادية وإعلانات الرعاية وأظن أن لك خبرة ليست بالقليلة في ذلك الأمر

النصيحة الثانية أن تمتلك شركة للحصول على مشاريع صغيرة أو كبيرة من خلال مواقع الـ freelancers
ويلزمك في ذلك شخص يجيد الانجليزية ومتخصصون في بعض المجالات إن شاء الله
وتعمد في هذه الشركة الحصول على المشاريع التي تستطيع انجازها بدرجة 100% وبتكلفة أقل من المنافسين في بادئ الأمر
قد تستهدف مشاريع برمجة تطبيقات الهاتف او إدارة السيرفرات وغيرها من التخصصات غير المتشعبة

النصيحة الثالثة واكب العصر كما يقولون فليس من العقل أن تبدأ في تعلم الخط العربي
في الوقت الذي انتشرت فيه تصميمات الجرافيك والطباعة
في الوقت الحالي أصبح من الصعب إقناع الكثير من المواقع بتصميم موقع لهم
في الوقت الذي يستطيعون فيه إنشاء صفحة على الفيس بوك وإثراءها بما يريدون من محتويات
وعليه فعليك اختيار المجال الذي له سوق في الوقت الحالى وفي الأيام القادمة إن شاء الله

موضوعك يتسع لنصائح أخرى كثيرة حاولت قدر المستطاع اختصارها في هذه الثلاث نقاط

ربنا يوفقك

دا كلام جميل ..
انا اشتعلت فى شركه برمجه فى القتره من 2007 الى 2012
وكان الشغل فى مصر تبع برامج منح اوربيه

الوقتى الشغل كله فى السوق الخليجى ولازم يكون هناك ليك مسوقين هناك

يعنى كل الشغل بقى اوت سورس فى الخليج او نسبه قليله فى السوق العالمي

والباقي خدمات ويب وموبايل ابليكشن

[SeiffoZ]

ربنا يوفقك ... انا كمان بفكر اعمل حاجة لنفسي.

بس انا شايف ان المبلغ اللى معاك هيخليك تبدأ صغير عامة.

[أبو آسر]

في البداية هنالك أكثر من نصيحة أستطيع تقديمها لك
الكثير من الشركات بدأت تنتقل من حيز صناعة البرمجيات للغير إلى حيز صناعة البرمجيات لنفسها
وتندرج المواقع وتطبيقات الهواتف وغيرها تحت تصنيف هذه البرمجيات
وأمثال تلك الشركات شركة linkdev والتي تقدم خدمة تطوير المواقع وفي الوقت نفسه تمتلك العديد من المواقع الناجحة
ومن ثم تعتمد هذه المواقع على الإعلانات العادية وإعلانات الرعاية وأظن أن لك خبرة ليست بالقليلة في ذلك الأمر

النصيحة الثانية أن تمتلك شركة للحصول على مشاريع صغيرة أو كبيرة من خلال مواقع الـ freelancers
ويلزمك في ذلك شخص يجيد الانجليزية ومتخصصون في بعض المجالات إن شاء الله
وتعمد في هذه الشركة الحصول على المشاريع التي تستطيع انجازها بدرجة 100% وبتكلفة أقل من المنافسين في بادئ الأمر
قد تستهدف مشاريع برمجة تطبيقات الهاتف او إدارة السيرفرات وغيرها من التخصصات غير المتشعبة

النصيحة الثالثة واكب العصر كما يقولون فليس من العقل أن تبدأ في تعلم الخط العربي
في الوقت الذي انتشرت فيه تصميمات الجرافيك والطباعة
في الوقت الحالي أصبح من الصعب إقناع الكثير من المواقع بتصميم موقع لهم
في الوقت الذي يستطيعون فيه إنشاء صفحة على الفيس بوك وإثراءها بما يريدون من محتويات
وعليه فعليك اختيار المجال الذي له سوق في الوقت الحالى وفي الأيام القادمة إن شاء الله

موضوعك يتسع لنصائح أخرى كثيرة حاولت قدر المستطاع اختصارها في هذه الثلاث نقاط

ربنا يوفقك

ألف شكر لحضرتك
كله ده تمام ومفيهوش مشكلة وإن شاء الله أنا ناوي أشتغل في أي حاجة متعلقة بالمجال وعليها طلب وإقبال بس محتاج أبدأ الأول وبعدين هقدر أدرس السوق على الطبيعة وأعرف إيه المطلوب وأبدأ آخد الإجراءات وأشغل ناس متخصصة في المجالات المطلوبة لكن برده تصميم المواقع والتسويق الإلكتروني لا يزال له الأولوية عندي لأن الناس مش هتبطل تصمم مواقع مهما انتشرت تطبيقات الموبايل أو صفحات الفيس بوك فلا غنى عن المواقع الإلكترونية أبدا وأي شركة أو مصنع أو محل أو تجارة أول حاجة بيفكر فيها إنه يصمم موقع يحط فيه كل التفاصيل اللي مش هيغني عنها صفحة فيس بوك أو تطبيق موبايل وأيضا التسويق الإلكتروني لن يغني عنه أي شيء آخر والمجال ده كل يوم في الطالع وبينافس بقوة وسائل الدعاية التقليدية الأخرى

الخطوه المهمه ان انت تشوف الشغل اللى بيجيلك وكمية الشغل اللى بترفضها مثلا بتعمل دخل اد ايه
وهل الدخل ده هيكفى انك تصرف على المشروع اول سنه لان غالباً أول سنه هتلاقى فى نص السنه الاولانى ان الربح بيروح فى مرتبات وايجار شقه والنصف التانى ان انت بتكسب بسيط وهكذا لحد ما يجيلك شغل كتير
وأنصحك انك تبدأ ان شاء الله
وبالتوفيق ان شاء الله

الشغل اللي بيجيلي حاليا مش هيديني الصورة الكافية عن الشغل اللي ممكن يجيلي لما أفتح شركة لأني بشتغل تقريبا من غير أي وسائل دعاية أروج بيها لنفسي لكن لما هفتح الشركة هخصص جزء من الميزانية للتسويق وبالتالي هيجيلي - إن شاء الله - شغل أكتر بكتير من اللي بيجيلي حاليا وكمان هيكون ليا مقر فبالتالي الثقة هتزيد عن لما أكون شغال لوحدي بدون مكان

منصحكش .....

طيب إيه السبب بالضبط ؟
عايز شوية تفصيل سواء أنصحك أو منصحكش علشان لما آخد القرار أكون مقتنع بيه ودرسته صح من كافة الجوانب وبالتالي مندمش عليه بعد كده وأقول ياريتني عملت أو معملتش

ربنا يوفقك ... انا كمان بفكر اعمل حاجة لنفسي.

بس انا شايف ان المبلغ اللى معاك هيخليك تبدأ صغير عامة.

طيب إيه المبلغ الكويس اللي ممكن يخليني أبدأ كويس مش صغير وتفنيطة المبلغ ده إيه يعني هحتاجه في إيه وإيه وإيه

[Karim Alaa]

بما انى فى نفس المجال و برضه فرى لانسر منصحكش تماما تتولى المسؤليه دى هترمى مبلغ كبير فعلا على الارض و المجال مش مضمون و مطلوب اوى كده يعنى ده غير ان فعلا حال البلد مش مستقر و المنافسه فى كل مكان انا فكرت افتح مكتب صغير للتصميم و مع الوقت اقتنعت انها هتبقى بس مصاريف اضافيه مش هتكسبنى شىء زياده

بالنبسه للجوجل ليا واحد صاحبى بارتنر و معتقدش عنده شركه هو وكيل كاش يو هنا هساله خدها ازاى و ارد عليك باذن الله

[Secret-Man]

منصحكش لاسباب كتير اوى يطول شرحها بصراحه بس هقول نقاط صغيره بحكم عملى فى مجال it 10 سنين ودراستى للتسويق الدولى والبيزنس المهم ...

1- ازدياد يومى لشركات التسويق الالكترونى وتصميم المواقع
2- توقع تشبع السوق فى فتره قريبه جدا وده واضح فى اخر سنتين
3- عدم وعى وثقافه الشركات الصغيره والمتوسطة
4-لازم دراسه كامله للسوق قبل ماتصرف اى حاجه مينفعش تعتمد على معلوماتتك كفرى لانسر
5-الشركات الكبيره مابين امرين ( اما ليهم اداراه متخصصه وفيها فريق متخصص متعين هناك للمشاريع وشغل الشركه - او العقود الاحتكاريه مع الشركات الاعلانيه الكبيره فى مصر زى كونكت ادز - برومو ميديا - وشركه رينبو اجينسى ) وغيرهم كتير فانت علشان تتخطى المووضوع ده محتاج علاقات كويسه اوى نظام التسويق التقليدى مش هينفع فى الحالات ديه علشان تقول عملت عقد محترم يسد معاك على الاقل 6 شهور

ديه نقط مبسطه بس الموضوع زى ماقولتلك اكبر من كده وفيه تفاصيل كتير

اطلع على دراسات جدوى وكيس استدى كتير للموضوع وانت وتفكيرك برضه فى الاخر ديه حاجه ترجعلك

لو حابب تعمل مشروع فعلا لشركه برمجيات محترمه وتتحاسب بالساعه وبالدولار ديه بقا قصه تانيه وليها شغل وتيم تانى خالص بس بعيد عن قصه المواقع والموبايل ابليكشن والكلام ده لان دلوقتى ناس كتير اوى شغاله فيه والاسعار بقت بتسبب مشاكل للشركات والزبون دايما بيسترخص بالاخص فى مصر لانه مش فاهم ولا عارف الفرق

بالمناسبه جوجل اى حد عادى يكون بارتنتر بمجرد نجاحه فى امتحانين من 3 المجانين وبتحصل على علامه البارتنر ملهاش علاقه بشركات ولا حاجه
الى بتحتاج شركه وفيها تميز فعلا كبيزنس هو الفيس بوك لو انت برتنر فيس بوك بتفرق اوى فى السوق جدا لتوثيق الصفحات واداراه الاعلانات والمراسلات مع الاداراه للفيس فى دبى وهكذا

[dongol123]

انا رايي لا
خد بالك من الضرايب لأنهم مش هيسيبوك في حالك وفي ناس كتير قفلت شركاتهم بالسبب ده

[TIGER@21]

اخى ابو اسر نسأل الله رب العرش العظيم يصلح لك الاحوال با الخير

[أبو آسر]

انا رايي لا
خد بالك من الضرايب لأنهم مش هيسيبوك في حالك وفي ناس كتير قفلت شركاتهم بالسبب ده

أنا أعرف إن في فترة سماح ضريبي 5 سنين وأعتقد دي فترة كافية يكون الواحد وقف فيها على رجله وبعدين يقدر يدفع الضرايب اللي بتبقى جزء من الأرباح

اخى ابو اسر نسأل الله رب العرش العظيم يصلح لك الاحوال با الخير

اللهم آمين

[minicooper20]

انا مم وجه نظرى طلما انتا فاهم فى الموضوع و شغال فيه بقالك فتره
يبقا خش و جمد قلبك
و طول منتا عندك ايمان بالنجاح
هتلاقى الرزق جاى من كل اتجاه
بمجرد مبتلاقى نفسك فاتح بيوت
١٠٠ الف مش قليل خالص
و انا اه محتكتش بالفيلد ده بس ليا اصدقاء كتير فى الفيلد و ممكن يفيدوك
و بالتوفيق

[misry]

انا مليش خبرة في الموضوع ده بس اللي هقوله بناء على اللي سمعته من ناس شغالين في المجال ده ......

هو الحلو في المجال ده انه غير مقيد بالبلد لذلك هو غير قابل للتشبع لأني اعرف شركات شغالة على العملاء

الخليجيين أكتر من المصريين ...

بس عيوبها في الموظفين والعملاء ,,, لأن الموظفين بيزهقوا بسرعة من ضغطك عليهم والعملاء طلباتهم لا تنتهي ...

والافضل انك تفتح شركة في الاقاليم مش القاهرة لأن الشركة اللي اعرفها كانت في القاهرة ومكاسبها قليلة بسبب ارتفاع التكاليف (ماء - كهرباء - ايجار - موظفين ) فقاموا فتحوا فرع في طنطا وعينوا موظفين بمرتبات اقل بكتير وبعد ما الشركة اتعرفت قفلوا اللي في القاهرة وبقوا في طنطا بس ....... ففي رأيي الاقاليم افضل

حاجة اخيرة ... شوف لك شريك تثق فيه وكبر رأس المال


بالتوفيق

[MTAK]

اخى الكريم
انا شايف ان الافضل لو انت ناوى على فتح الشركة تخلى الشركة virtual
اكيد من شغلك عرغت مطور يين و مبرمجين جامدين

واحد فى السودان و التانى فى ليبيا و التالت فى الامارات و هكذا

ايه المانع تتواصلوا و بالبلدى الفاضى يكب على المليان

و الشغل كله و انت قاعد فى بيتك و لا حد يغلس عليك و لا حاجه

و كمان هايبقى نشاطك اوسع

و ممكن تشوف شركات شغاله فعلا و تدخل معاهام بنسبه

ابو اياس (اعتقد انك تعرفه-من السودان ) جرب كده معاه