مشكلة في الإقتناع والرضا بالرزق المقدر !!!

[Mahmoud Naguib]

أنا بصراحة عندي مشكلة مضايقاني جدا ومنغصة عليا حياتي !!

أنا دلوقت مخلص كلية وجيش ودورت على شغل ولقيت الحمد لله شغل ف شركة تأمين ودلوقت ف مرحلة التدريب !!

المشكلة بالرغم من إن سني صغير إلا إني عايز يبقى معايا فلوس بسرعة بمعنى إنه مش عندي فكرة إن الفلوس بتيجي واحدة واحدة !
وبقول لنفسي طب مهو في ناس أدي وأصغر وعايشينها بالطول والعرض سواء ورث بقى أو مستوى إجتماعي معين أو غيره !
بس برجع أقول لنفسي طب إي اللي فارقني عنهم !!

المشكلة الأكبر بقى هي إني حتى لما بفكر عكس كدة وبقول عادي واحدة واحده هكبر بفضل أفكر لو بقى معايا كذا هجيب إي وبالرغم من اني موفرتش المبلغ أصلا بفكر ف حاجة أعلى أو حاجات تانية أجيبها !
وبعدين بقول لنفسي طب هو أنا هشتري شقة ازاي ف مكان كويس أكيد محتاجة فلوس كتير جدا وبعدين أقول برضه طب مهو بفلوس الشقة دي أجيب شقتين ف مكان أقل شوية وأجرهم وهكذا !

ممكن كلامي ميبقاش مفهوم شوية لأنه إحساس مش عارف أقوله بس الفكرة ف إني دايما بفكر ف الأعلى مع إن الأقل مش عندي أصلا !!!

أنا عارف انها مسألة رزق وممكن أفضل زي ما انا وممكن كمان يبقى معايا ف وقت قليل !

بس نفسي بجد أرتاح وأرضى باللي أنا فيه خصوصا إن مستوايا يعتبر متوسط وأحسن من كتير !!!!

[amr011111]

الرزق مش فى المال فقط الرزق فى الصحه وفى نعم تانيه كتير
ممكن ربنا يرزقك بزوجه تكون عجباك وتوافق على شقه على اد امكانياتك وده رزق برضه وهكذا
وبالتوفيق

[مصطفى-حسن]

اللى انت بتتكلم فية دة اسمة طموح

انك تحلم بحاجة بسيطة تحققها وبعدين فى نفس الحلم تحلم بحاجة اكبر
انت لسة فى بداية حياتك العملية فعشان كدة الحماس واخدك ودى حاجة كويسة

لكن طالما مش وارث ورث او عندك رصيد فى البنك او مبلغ احتياطى يبقى طبيعى انك تاخد حياتك واحدة واحدة

عايز ترتاح اعمل حاجتين:

وانت طالع سلم بيتكم او شقتكم حاول تاخد السلم كلة فى قفزة واحدة صعودا

ولو معرفتش دور على حد حواليك ظروفة اصعب من ظروفك وحط نفسك مكانة وتعايش مع حياتة الصعبة

ولو معرفتش يبقى قوم اتوضى وصلى ركعتين شكر لله

[Secret-Man]

لو ده تفكيرك هتفضل تعبان طول حياتك ومش هتحقق حاجه

[lolnk]

انا كنت زيك بس فى مرحلة اوحش من كده كمان كنت بفكر ازاى اكون مبسوط وارتقى بمستوايا المادى مع اننا فى مستوى مادى متوسط بس الفكرة انا عايز احقق لنفسى شىء واعتمد على نفسى وليه ميكونش عندى عربية او عندى فلوس خاصة بيا بالاعتماد على نفسى او ابقى زى باقية الناس اللى شايفها كنت امشى مثلا على البحر عربيات رايحه وجايه واقول ليه انا مكنش زيهم كنت حاسس بنقص كبير بس مرحلة التفكير دى كانت فى سنة تانية كلية كان عاندى 20 سنة وقتها بس المووضع مالوش علاقة بالاقتناع او شىء كان طموح ومكنتش عارف ازاى احققه قعدت سنة اروح الكلية ما احضر كل اللى بيسويه هو التفكير فقط وكنت بخرج على البحر بما انى كنت فى حقوق اسكندرية وكنت دايما اقعد على الصخور اللى عند الشاطبى واشوف الناس حواليا واتحسر على حالى ليه مكنش زيهم انا اقل منهم فى ايه وطول السنة كنت دايما اعيط على حالى وربنا كان عالم بحالى واصدقاء ليا قالولى ليه بتعمل فى نفسك كده انت عايش كويس ومستواك كويس ولاكن انا مش مقتنع بشىء مش مقتنع غير اللى باللى فيا انى عايز اغير حياتى واعتمد على حالى فكرت كتير علشان اصل لطريق احقق بيه طموحى ما لاقيت وكانت نفسيتى مدمرة ووقتها قررت السفر واتفقت مع اهلى على السفر وكنت ناوى على انجلترا سياحة واهرب وفى الاجازة اشتريت كمبيوتر وظبت النت وسويت بحث على جوجل اكسب فلوس من الانترنت دى كانت البداية اللى ربنا انعم عليا بيها كانت عن طريق حاجة اسمها المواقع الربحية اشتغلت فيها وفهمتها وقعدت فيها 3 شهور وكان الشغل فيها كاه نصب يمكن تتعب نفسك شهر علشان 10 دولار هههههههههههه تخيل وفى الاخر الشركة بتنصب وكلها نصب لحد ما كنت اعرف واحد من المنصورة قالى فى حاجة اسمها الفوركس بتكسب فلوس حلوة هبقى اشوف الكتاب بتعها وابعتهولك هو قالى كده ما استنيته نزلت الكتاب وفاكر لحد دلوقتى اليوم قعدت اقرى فيه من الساعة 4 الفجر لحد الساعة 8 الصبح ولما قريت الكتاب مكنتش اعرف انه هدية من ربنا لى وان ربنا لطف بيا واعطنى الطريق والامل فى الحياه اللى بيه اقدر اوصل للى عايزة كان فى ارداة كبيرة اوى لما قريت الكتاب وفهمت كل شىء فيه وبالادراة دى قعدت سنين فى دراسة وشغل وتدريب لحد ما ربنا كرمنى وبقيت متميز جدا فى شغلى ودلوقتى الحمد لله والشكر لله على ما وصلت اليه وسيبك من اللى وصلت اليه يكفى انى معايا كنز انا جو عقلى كنز وطريقة اجيب بيه فلوس فى اى وقت انا عايزة بايدى اقدر اغير مستقبل ناس كتير وبايدى اقدر اسعد نفسى
لانى بالارادة اللى كانت جوايا وصلتنى انى اكون متميز جدا

بعض ما وصلت اليه انى دلوقتى فى ناس تقولك على ال 30 الف جنية فلوس ومبلغ بالنسبة ليا ومن اللى وصلت اليه ان ال30 الف جنية دى ولا شىء لان سقف طموحى وصل لما هو ابعد وعارف ان 30 الف جنية دى سهل جدا اجبها من شغلى فى يوم ولا يومين تفرق على حسب المبلغ اللى شغال بيه

عايز اقولك كمان لما كنت بدرس كنت دايما اجيب ورقة وقلم واله حاسبة وافضل ادرس واعمل حسابات كتير وكل واحد يشوفنى يضحك عليا ويتريق حتى اهلى ماكنا مصدقين شىء وكانوا بيتريقوا عليا وكمان كانوا بيقفوا ضدى لانى اهملت الدراسة لان عارف ان الدراسة مالها اى لازمة مجرد شهاده وهتترمى اهملت الدراسة وركزت على شغلى ودراستى انا بكتب لك الحين وانا مازلت فى الكلية بقالى 12 سنة وحاليا متوقف قيدى علشان الجيش والسنة الجاية هكمل تعليمى وهدخل فى سنة 3 حقوق تخيل انت بقى كمية الاهمال للدراسة


بعد ما نجحت واهلى شاف انى بجيب فلوس خد بقى موقف كل واحد

ابويا اللى كان قرفنى علشان الدراسة وكان بيوقف ضدى وما يقعدنى على الكمبيوتر وكل يوم زعيق وقرف بعد ما شاف انى بجيب فلوس من شغلى اللى كان بيتريق عليه بعدها ولا بيزعق ولا نيلة ولا حتى بيقولى امتحاناتك امتى وبعد ما عملت مبالغ بقى يخاف يكلمنى يقولى بتعمل ايه

جيرانى اللى كانوا بيشوفنى اهبل وبيتريقوا عليا ويضخكوا عليا تعالى دلوقتى شوفهم وهما مهبولين ونفسهم يكونوا زى واللى نفسه اعمله وادله على الطريق واللى يكملنى يقولى شغلى فلوسى والناس كبار السن اللى بقوا يسالونى ونفسهم يتعلموا وانا منفض للناس كلهم اللى عايز يتعلم يبدا زى ما انا بدات واتبهدلت

اصدقائى اللى كانوا فى الجامعه معايا تعالى شوفهم اللى شغال مع محامى ومش معاه 100 جنية فى جيبه ولا اللى شغال على تاكسى ولا ولا وحاليا كلهم نفسهم يتعلموا ويكونوا زى

شوفت اللى حصل ايه

من يوم ما الناس دى كلها كانوا واقفين ضدى وبيتريقوا عليا وقتها هما مكنوش عارفين قيمة اللى انا وصلت اليه انا بس اللى ادركت ده وعرفت قيمتة كويس وكانت كل ارادتى انى اكون متميز جدا فيه والحمد لله ربنا اكرمنى

انا كنت بمسك فلوس بالعبيط فى ايدى وبصرفها والله العظيم ما اعرف الفلوس دى كانت بتروح فين تخيل انى صرفت حوالى 50 الف جنية فى مده حوالى 3 شهور وما اعرفش الفلوس دى راحت فين وبعدها بدات بقى اتعلم انى لازم احوش واظبت امورى

وحاليا الحمد لله ما امتكله حوالى مليون جنية متجمدين فى ارض

وفلوس اتنصب عليا فيها حوالى 300 الف جنية


وفلوس كانت فى ايدى وطمعت فيها وخاطرت بيها حوالى مليون جنية

وكل ده ولا فى دماغى تعرف ليه

علشان الطريق او المفتاح فى دماغى فى اى وقت اقدر اعمل اللى ابيه

وصللت لمرحلة ان 30 او 50 الف جنية دى والله ما فلوس انا شوفت فلوس كتير اوى


كنت باخد 5 جنية مصروف وانا رايح الجامعه اة والله 5 جنية باركب ب 3 جنية مواصلات و2 جنية اعمل بيهم اى حاجة تخيل انت بقى

لحد ما ربنا اكرمنى ووصلت للى انا فيه دلوقتى وبقيت افضل كتير من اى حد مش بالفلوس لاء بقيمة نفسى واعتمادى على نفسى

امى فى مرة بكلمها بقولها ان شاء الله هكون مليونير بس ربنا يكرم

ردت عليا قالتلى يا ابنى مفيش حد بينط السلم مرة واحده لازم تبدا واحده واحده

رديت عليها وقولتها انا بقى هنطه مرة واحده والحمد لله نطته مرة واحده

الناس كلها بقيت تتكلم ازاى ده بقى كده

اخر حاجة عايز انهى بيها كلامى

انا حلمى بينى وبينه وقت قصير جدا ومكسل انى اوصله تخيل

هديك مثال لما حد يقولك امشى من الاسكندرية لحد طنطا وهتحقق هدفك وقتها طبعا انت شايف ان الطريق صعب وطويل علشان كده بتجد فيه

ام بقى لو حد قالك امشى من محطة الرمل لحد سيدى جابر وهتحقق هدفك هتلاقى نفسك مكسل ولا فى دماغك لان انت عارف انه سهل الوصول اليه

انا بقى النوع التانى اللى المفروض امشى من محطة الرمل الى سيدى جابر

قسما بربى انى اقدر اشتغل بمبلغ 5 الف دولار يعنى حوالى 40 الف جنية واقدر اوصلهم الى مليون دولار يعنى 8 مليون جنية فى حوالى 25 يوم تخيل انت بقى

اقدر اغير مستقبل ناس كتير وغيرت قبل كده مستقبل 2 اشتغلت معاهم

اقدر اخلى مصروفك الشهرى 100 الف جنية

وبالرغم من كده ما بحب انى اشتغل مع مصريين لانى اخاف عليهم لان القرش عندهم صعب مو سهل الا بقى لما كان شخص مستواه المادى كويس

انا بس حبيت احكى لك قصتى علشان اقولك اهم شىء الارداة هى اللى بتصنع اى شىء وهى اللى هتوصلك لاى شىء انت محتاجه لو عندك ارادة فعلا يبقى لا تشيل هم شىء فقط ابدا وكافح من اجل حلمك او من اجل تحقيق الاراده

لو سنك صغير او عندك وقت فراغ كبير يبقى انصحك بالفوركس ابدا واتعلم واشتغل واتدرب هتعب فى سنة او سنتين وبعدها هترتاح جدا

لا تهتم بكلام الناس صدقنى كلام الناس فى ناس كتير هتحبطك وفى ناس كتير مش هتتمنى لك النجاح وفى ناس قليلين اللى فعلا هيقوفوا جنبك وهيكونوا همهم مصلحتك ونجاحك

وانا حكيت لك عن جيرانى واصدقائى واهلى كمان وموقفهم وبالرغم من ده كله انا سبتنى من كل الناس دى واعتمدت على حالى فى كل شىء لحد الحين

لو تبى اى مساعده فى الفوركس اقدر افيدك لو عندك مجال وصدقنى مفيش فى مصر اى شىء يقدر يحققلك اللى تبيه غير الفوركس

فى امان الله

[FAR!D]

.... لحد الحين

لو تبى اى مساعده ... اللى تبيه غير الفوركس

سؤال فرعي
هوا حضرتك مصري ؟

[lolnk]

سؤال فرعي
هوا حضرتك مصري ؟

ايوة يا بااشا مصرى ومن كفر الدوار كمان

[dr_click]

لو الدنيا سهلة اوي كده مكنس حد غلب

[Mahmoud Naguib]

ZARIF شكرا لحضرتك بس الطموح أعتقد بيبقى إنك تحط هدف وتعمل علشانه مش تحطه وتفضل تكبره وانت مكانك !!

lolnk تسلم على ردك الجميل ده وإن شاء الله ربنا يكرمك ويوفقك أكتر

أنا بالصدفة لقيت مجال التأمين قدامي وشفت اني ممكن أعمل منه فلوس وممكن معملش خالص !!
يعني ممكن أءمن ع حد بمليون جنيه وممكن حد تاني ب 5000 وطبعا شوف عمولتي هتبقى فرقها كام بين ال2 وبرضه بنفس المجهود !!

ياريت لو تدلني على أسماء كتب أتعلم منها الفوركس كبداية يبقى شكرا جزيلا لحضرتك ؟!

[lolnk]

ZARIF شكرا لحضرتك بس الطموح أعتقد بيبقى إنك تحط هدف وتعمل علشانه مش تحطه وتفضل تكبره وانت مكانك !!

lolnk تسلم على ردك الجميل ده وإن شاء الله ربنا يكرمك ويوفقك أكتر

أنا بالصدفة لقيت مجال التأمين قدامي وشفت اني ممكن أعمل منه فلوس وممكن معملش خالص !!
يعني ممكن أءمن ع حد بمليون جنيه وممكن حد تاني ب 5000 وطبعا شوف عمولتي هتبقى فرقها كام بين ال2 وبرضه بنفس المجهود !!

ياريت لو تدلني على أسماء كتب أتعلم منها الفوركس كبداية يبقى شكرا جزيلا لحضرتك ؟!

مجال التامين خليك فيه علشان تقدر تظبط امورك ومنه شغل ليك

بالنسبة للفوركس هديلك رابط تحمل منه الكتاب واقراه ولو مافهمت شىء ارمى الكتاب على جنبك وراح اشرح لك كل شىء فى خلال نصف ساعة بالكتير

بس بردوا اقرى الكتاب علشان فى معلومات عامة

وده رابط الكتاب
فوركس للعرب - Download - 4shared - a7med wagih

وصدقنى الفوركس افضل مجال موجود يحقق لك كل اللى تبيه

[طارق _عبد السلام]

تقريبا كده انا كنت زيك بالظبط وممكن اقل ونظرا لظروف وفاه الوالد وانا عمرى سنه واحده فقط...... ووصلت لسنك.. وتقريبا ظروفك احسن من ظروفى لكن كنت مقتنع جدا برزقى واتجهت للقطاع الخاص .. وكل طموحى انى احترف عملى واتقنه جدا ومن فضل الله اصبحت الافضل بشهاده الجميع لدرجه ان اكبر شركه المانيه فى صناعه ماكينات النسيج اخدونى لالمانيا واخدت دوره مجانيه بسكن ومصروف...... والحمد لله رب العالمين على جميع نعمه

الاهم الرضى

ثانيا اتقان العمل

ثالثا عند الضيق انظر لمن هم ادنى منك فى المستوى ليزول ضيقك... وبعدها استمر فى العمل وانت فى شبابك واستغل الفتره دى كويس جدا لانها فتره الصحه..

وربنا يرزقك من حيث لاتحتسب ويبارك لك فى رزقك ان شاء الله

[mastr_n]

تعالى على واحد متجوز ومادياتة تعبانة جداا يدوبك ماشية ومقضيها سلف وجمعيات وقولة تبقى غنى معاك عربية غالية وفيلا مثلا فى احسن منطقة فى مصر ورصيد فى البنك بس مايكونش عندك عيال وشوف هايقولك اية
اكيد هايقولك النظرة فى وش حد من ولادة بالدنيا وما فيها طبعا
بص الرزق مش فلوس بس الرزق دة صحة وسعادة وخلفة وراحة بال وحاجات تانية كتير وربنا موزعهم بالتساوى وبالعدل وارض بما قسمة اللة لك تكن اغنى الناس

[reda elgohary]

السلام عليكم

اللى انت بتتكلم فية دة اسمة طموح

انك تحلم بحاجة بسيطة تحققها وبعدين فى نفس الحلم تحلم بحاجة اكبر
انت لسة فى بداية حياتك العملية فعشان كدة الحماس واخدك ودى حاجة كويسة

لكن طالما مش وارث ورث او عندك رصيد فى البنك او مبلغ احتياطى يبقى طبيعى انك تاخد حياتك واحدة واحدة

عايز ترتاح اعمل حاجتين:

وانت طالع سلم بيتكم او شقتكم حاول تاخد السلم كلة فى قفزة واحدة صعودا

ولو معرفتش دور على حد حواليك ظروفة اصعب من ظروفك وحط نفسك مكانة وتعايش مع حياتة الصعبة

ولو معرفتش يبقى قوم اتوضى وصلى ركعتين شكر لله

أبدعت ،، قلت اللى عاوز أكتبه ، الله عليك .

[sherifahmed]

اتفرج على فيلم
pursuit of happiness

[naser_56]

سؤال فرعي
هوا حضرتك مصري ؟

قصدك علي كلمه (تبيه )
هو اكيد في الكويت او السعوديه