إتصالات مصر مش شركة خطوط موبايلات

[amrgamal100]

سألت ناس كتير قبل ما اشترى خط للموبايل ولقيت فيه شبه إجماع على إن إتصالات مصر اختيار مناسب
بعد معاناة الناس من سرقة فودافون ورداءة شبكة موبينيل
وبعد تجربة لفترة طويلة فعلا اتأكدت إن إتصالات مش ممكن تكون شركة خطوط موبايلات
وبعد عدة صدامات مع خدمة العملاء كرهت الموبايل والتعامل معاه
يعنى على سبيل المثال من شهور لقيتهم شغلوا خدمة الاحتفاظ بالمكالمات مجانا .. كتر خيرهم
وبعدها بشوية اتفاجئت إن الناس اللى بتتصل بيا بيديلهم التليفون مغلق
كلمت خدمة العملاء .. فيه ايه اخوانا ؟؟؟ بعد كام مكالمة على ما واحد فاهم قال لى بسبب خدمة الاحتفاظ بالمكالمات .. قولتله الغيها انتم بتدونى حاجة ببلاش عشان تقرفونى .
وبعد كام شهر حبيت اشترك فى خدمة الاحتفاظ بالمكالمات بفلوس قولت يمكن بفلوس غير اللى ببلاش
اشتركت فى الخدمة واخترت اللغة العربى ألاقى الرسايل بتيجى بالانجليزى .. ايه يا اخوانا
فين وفين على ما تلاقى حد فاهم حاجة فى الشركة دى .. ويقولك الحقيقة إن السيستم فيه مشكلة
دى عينة من المشاكل معاهم ..
اللى أنا مستغرب له .. دولة زى الامارات بالتكنولوجيا العالية اللى فيها يوم ما تفكر تعمل فرع لشركتهم فى مصر يطلع بالهبل ده .. واختيار خدمة عملاء يكون هو الأسوأ بين الشركات الثلاثة .. الناس دى بتفكر ازاى ؟؟؟

[أبو آسر]

فودافون على عيوبها تعتبر أحسن الوحشين من ناحية جودة الشبكة وخدمة العملاء
كذا مشكلة حصلتلي قبل كده وبتصل بيهم بيهتموا ويتابعوا ويرجعولي فلوسي كلها كمان
اتصالات أيوة إماراتية بس تقريبا كل دولة على أد فلوسها بقى
وفعلا خدمة العملاء عندهم سيئة جدا وتحس ان كل الموظفين حافظين مش فاهمين صعب تتكعبل في حد عنده خبرة كده تحس انهم بيوفروا فبيعينوا شباب صغير كله تحت التمرين
موبينيل دي بقى مفروض تشهر إفلاسها أساسا شركة ملهاش أي لازمة في الحياة

[Mahmoud Naguib]

بالعكس خالص !
موبينيل معايا من ٧ سنين لو عديت المشاكل اللي حصلت معايا طول الفترة دي هلاقيهم حاجات بسيطة جدا !
غير إن شبكتها مغطية مصر كلها وبقوة والكل يشهد بكده
مشكلتها إنها بتبدأ تستعبط يعني ف موضوع باقة النت ده كانت عاملة نظام ١٠ ف الشهرة وبعدين خلته ٢٠ وبعدين ٢٥ !
ومن فترة برضه مبقتش بتنزل عروض كويسة زي الأول فودافون حاليا أقوى ف العروض !!
بس أنا سألظل عاشق لهذه الشبكة عامة ولو حبيت أجيب كمان خط هجيب فودافون فليكس بس مش هغير موبينيل أبدا !!

[jackson_75]

فودافون فعلا احسن الوحشين وبيهتموا وبيردوا وبيتابعوا ،، كتير جدا كنت بتصل بخدمة عملاء اتصالات ألأقيهم يفتحوا الخط ويخصموا رسوم المكالمة وبعدين يقفلوا بدون ما أتواصل مع أى حد من خدمة العملاء وأتكرر الموضوع ده أكتر من مرة لحد ما لغيت الخط ورميته ..

[حسام الغرباوي]

عن تجربة فودافون افضلهم بمراحل كمان

خدمة عملاء فودافون محترفة جدا جدا ..في اكتر من موقف يثبتولي انهم اكثر احترافية من موبينيل واتصالات ...

في مرة مثلا اشتركت في باقة النت وجاتلي رسالة ان تم الاشتراك بنجاح ..تاني يوم بدخل حسابي اكتشفت ان في رصيد اتسحب على النت وقت ما اشتركت

يعني بعد ما اشتركت وجاتلي رسالة تم الاشتراك وبدات اشتغل نت ...في ساعتين او تلاتة بعد الاشتراك مكنش بيسحب من الباقة كان بيسحب من رصيدي ...واكتشفت الموضوع دا بعدها بيوم او اتنين

طبعا اتصلت بهدلت الدنيا ...والسوبر فيوزر اتصل بيا


1 - رجعي رصيدي بالكامل في الاول
2 - اشتركلي في الباقة مجانا
3 - رجعلي تمن الاتصالات على 888 ( لاني اتصلت اكتر من مرة وكان يحصل مشكلة وتفصل ) هههههههههه

[د.أبونضال]

يا راجل ده أنا مره شحنت 50 جنيه فودافون علشان خط النت، قام ساحب نص جنيه فالرصيد أصبح أقل من 50 جنيه وطبعا ما رضيش يجدد الباقة .. أنا ما كنتش فاهم إن دي ضريبة الدمغة وكده ...فكلمت خدمة العملا وقلت له فيه 50 قرش اتسحبت من الرصيد من غير سبب . وأنا مش عارف أجدد الباقة علشان كده ... راح ضايف لي جنيه رصيد من عنده على السيستم وقمت مجدد الباقة ... الشهر اللي بعديه حصلت معايا الحكاية ثاني فجيت أكرر العملية قام خدمة العملا قالي دي ضريبة الدمغة روح اشحن كارت علشان تعرف تجدد ... ساعتها عرفت إن الراجل بتاع الشهر اللي قبليه كان زوق زوق زوق الصراحة.

[AboELsoud]

من واقع تجربتي مع خط موبينيل معايا من اكتر من 5 سنين
و خط فودافون معايا من سنه تقريبا

موبينيل فعلا مشاكلها اقل بس عيبها التغطيه

فودافون احسن تغطيه للشبكه في معظم انحاء مصر و احسن من موبينيل بكتير

فودافون اكثر احترافيه في خدمه العملاء من واقع عملي في خدمه عملاء فودافون من فتره قريبه
( كنا بنتدرب بطريقه احترافيه رهيبه و كان بيتعمل لنا امتحان كل اسبوع في فتره التدريب و اللي مكنش بيعدي كان بيبتدي من اول و جديد و يكفي انه احنا ابتدينا مع بعض ندرب كنا 64 فرد ......... بعد التدريب و وقت ابتداء الشغل كنا صفينا على 24 فرد فقط !!! )

[amrgamal100]

( اتصالات أيوة إماراتية بس تقريبا كل دولة على أد فلوسها بقى ) !!!

وهى فلوس الإمارات شوية يا عزيزى .. أمال عاملين واى فاى فى شوارعهم وبذخ غير طبيعى
وجايين هنا يوفروا فلوسهم .. ده حتى مش كويس عشان سمعة الشركة .

[misry]

بتفرق على جسب المحافظة وكمان على حسب مدينتك ...

يعني في طنطا فودافون انترنت زبالة واتصالات كويسة جدا

موبينيل اقوى شبكة يليها فودافون وبعدين اتصالات

[Mohamed.Ramah]

اسوأ خدمة عملاء حتلاقيها فى اتصالات خاصة التابعين لشركة اتصال اختيار عشوائى للناس وعدم فهم

[أبو آسر]

( اتصالات أيوة إماراتية بس تقريبا كل دولة على أد فلوسها بقى ) !!!

وهى فلوس الإمارات شوية يا عزيزى .. أمال عاملين واى فاى فى شوارعهم وبذخ غير طبيعى
وجايين هنا يوفروا فلوسهم .. ده حتى مش كويس عشان سمعة الشركة .

بلدهم يعملوا فيها زي ما هم عايزين
لكن انت هنا في دولة عالم تالت والشعب عايز يتكلم 24 ساعة ببلاش فلازم يديك خدمة على أد فلوسك
هي مش جمعية خيرية أو منظمة غير ربحية ؛ دي شركة استثمارية خاصة عايزة تكسب فلازم توفر علشان تكسب فتجيب موظفين صغيرين بدون خبرة ياخدله 2000 جنيه ويبقى طاير في السما ويقولك كفاية إن اسمي شغال في اتصالات وتجيب أبراج إرسال وتقوية مستعملة أو حتى تشترك مع شركة تانية في نفس البرج ، لكن لو قدمتلك خدمة جودة عالية وواي فاي ببلاش وفي المقابل مفيش عائد يبقى تقفل أحسنلها وتدور على بلد تانية

[د.محمود صلاح]

مالك خط فودافون من 15 سنة ، شركة مححترمة طوال ال 15 سنة اللي فاتت اي خطأ او سحب مبالغ بدون بالخطأ كانو بيرجعوهالي ودائما لما اتصل بهم سواء خدمة العملاء بالتليفون او بالايميل اجد الرد سريعا .

مرة سحبو مني الخط وانا مسافر برة واتصلت قالو سحبناه وطرحناه للبيع ، كتبت لهم ايميل اطلب منهم عودة الخط لانه ملكي من 15 سنة وبالفعل رجعوه ورجعولي 50 جنيه رصيد كانت فيه

[hon]

فعلاخدمة العملاء فى اتصالات تحس انك بتتصل بفرن عيش فينو مش شركة اتصالات محترمة
كان ليا تجربة فى خط الداتا الى معايا ودنتنى اكتر من نصف ساعة على المشكلة اتحلت وتحولت بين 4 موظفين
واضح ان معايير اختيار الموظفين اى كلام تحياتى

[هيثم مجدي]

انا جربت كل انظمة خدمة العملاء في مصر. فكرة خدمة العملاء مش موجوده, تقريبا هم فاهمين خدمة العملاء يعني ازاي توفر للشركة وقت وفلوس. وبيترقوا بناءا على كدا. لان الخدمات كلها مشاكل. فدورك في خدمة العملاء انك تشتغل العميل على قد ما تقدر. لو منفعش تديه للمدير بتاعك يكمل الاشتغالات. المهم الشركة تبقى تمام
الكلام دا في كل القطاعات, اتصالات, بنوك, محلات أكل, كلهم عندهم مشكلة في ال concept