عاوز أخس

[ENGLISH MAN]

السلام عليكم
ببساطة كدا عاوز أخس
بس مش عاوز اروح لدكتور تخسيس ومش عاوز امشي علي رجيم
هل في طرق متجربه انك تقدر بيها تنزل الكرش
سمعت ان ناس بتنصح ان الواحد يلغي وجبة العشا وناس تقول امشي ساعة يوميا وناس تقول كل زبادي كل يوم دا بيساعد علي حرق الدهون
ياتري فيه نصيحة متجربة ساعدتكم انكم تنزلوا الكرش بسهولة ؟

وشكرا لكم

[Specialist]

ألعب جيم 3 أيام و ريّح يوم + قلل وجبة العشاء علي قد ما تقدر + قلل بس السكريات الزيادة (الشكولاتات - المياة الغازية) ..

هتخس بشكل تلقائي و جسمك هيشّد ..

[mikho83]

والمشي على فكرة مهم جدا، حاول تقلل كمية الأكل في كل وجبة، شوية شوية هاتتعود (كل كل اللي نفسك فيه بس قلل الكميات وامشي يوميا)

[yasserelgohary]

زى ما الاعضاء ذكروا المشي والتقليل فى الاكل ولعب الرياضة هيفرق معاك كتير
ولو عايز برنامج تخسيس أندرويد اتفضل هيفيدك (النسخة البرو)
Zippyshare.com - My_Diet_Coach_-_Pro_2.4.3.apk
ودى صغحتة على الفيس بوك

https://www.facebook.com/pages/My-Diet-Coach/201157516589686

ولو انت آيفون ادخل على صفحة البرنامج الرئيسية واختار نسختك
My Diet Coach

[dede_dodo88]

اشرب ماية كتير و لو بتحب الشاي الاخضر كتر منه..
امنع تماماً الفاست فوود و المشروبات الغازية و قلل على قد ما تقدر المعجنات و الحلويات..
اظبط مواعيد اكلك و انتظم عليها كل يوم, و ابعد عن الاكل متأخر بليل..
الرياضة شيء اساسي, على الاقل جري مرتين تلاتة في الاسبوع..

[omaranes77]

احترامي لحضراتكم
طب انا عايز اتخن شوية

[ENGLISH MAN]

احترامي لحضراتكم
طب انا عايز اتخن شوية

سهلة اعمل عكس اللي فوق

[omaranes77]

سهلة اعمل عكس اللي فوق
:e_braces[1]:

هههههههه
انا عايز اتخن التخن الرياضي الي هو جسم رياضي
بمعني ان انا بجري كل اسبو مرة مع لعب رباضة
يعني مش تخن الكرش وكدة ...

[ENGLISH MAN]

ألعب جيم 3 أيام و ريّح يوم + قلل وجبة العشاء علي قد ما تقدر + قلل بس السكريات الزيادة (الشكولاتات - المياة الغازية) ..

هتخس بشكل تلقائي و جسمك هيشّد ..

متشكر لحضرتك بس الجيم هيبقي صعب لظروف العمل

[omaranes77]

متشكر لحضرتك بس الجيم هيبقي صعب لظروف العمل

الجري مفيد وعلي فكرة مش مهم المسافة الي جريتها المهم الجري الصح لو امكن لحضرتك تجري يوم اة ويوم لﻷ
او تجري ثلاثة ايام متتالية بعني خميس جمعة سبت كدة

[mohamed2002]

امشي كتير وكل سلطة كتير واتعشي سلطة

[sherif222]

أهم حاجة فى رأيى البعد عن الثلاثى الرهيب : البطاطس - الرز - المكرونة

[mk3]

قلل الرز امنع المكرونه قلل السكريات اشرب شاى اخضر

[amr011111]

متابع

[corolladestroyer]

انا خسيت الفترة اللي فاتت 11 كيلو
1- مشي
2- الغاء العشاء تماما
3- افطر كويس اوي( شوفان بيض وفول جبنه قريش بالطماطم )
4- ابتعد تماما عن الرز والمقليات ابعد عن الدهون اهم من الكربوهيدرات ( النشويات)
هتخس جامد فعلا اوزن نفسك كل اسبوع وتابع ومتيأسش...
الغدا فراخ مشويه او تونه او سمك مشوي او لحم مشوي ومرتين في الاسبوع مثلا بدل الغدا قضيها فواكه وسلطه...
كوك دور وجباته الدايت جميله..
في مطعم اسمه دايت هاوس لذيذ برضو
او مطاعم المشويات بتأدي برضو...