اللي عاوز يضحي في العيد ..... ممكن يعمل كدة

[aif]

السلام عليكم ورحمة الله وبركاته ..... كان فيه موضوع مفتوح زميل كان بيسأل عن اسعار الاضاحي ......
لعموم الفائدة للزملاء
- اولا سعر الاضاحي الضأن بيتراوح حول 25 جنية للكيلو قائم حسب النوع والمرعى والحجم والمكان اللي انت فيه
- سعر العجول الجاموسي 17 جنيه قائم
- سعر العجول البقري 19 قائم
( قائم يعني يوزن العجل وهو حي قبل الذبح )
والعجول البقري والجاموسي بتصفي لحم ( مشفي بدون عظم ) حوالي 60% من الوزن قائم ده غير الكرش والارجل والرأس والجلد والدهون و الحوايا مثل الفشة والممبار والطحال
وافضل وزن للعجول 320 الي 370 كجم بحد اقصي 400 كيلو .... كدة العجل برمي اكبر نسبة من اللحم
اما الخراف الضأن ف بيكون من 50 - 60 % لكن بيكون اللحم بالعظم لأن الضاني مش بيتشفى من العظم
اللي يحب يشتري اضاحي عجول العجل ممكن يشترك فيه 7 اشخاص بحد اقصي ... وغالبا بيبقو 6 اشخاص او 4
انا سبق اني اشتريت من مزرعة في طريق بلبيس الصحراوي ( بعد مدينة السلام شمال حوالي 15 كيلو ) والاسعار زي ما انا كتبت 17 جاموسي و 19 بقري
بتدفع عربون وتحدد وزن العجل اللي انت عاوزة تقريبا .... و تدفع الباقي عند الاستلام حسب الوزن .... وفي المزرعة بيكون موجود اكتر من 30 طقم جزارين ( ذبح وسلخ وتشفية وتنظيف الكرش والرأس والارجل ) واسعارهم معقولة جدا
تليفوناتهم 0105599991 / 0103135555 اسمها مزرعة البيان
طبعا ده بيوفر عليك القلق بتاع الذبح في البيت او الشارع او عند الجزار ....
بتروح الصبح تستلم العجل و تدفع باقي الثمن و الجزارين ياخدوه يدبحوه قدامك ويبقى ومعاك اكياس كفاية و اطباق بلاستك كبيرة ( طشط ) و يراعى ان تأخذ معاك اكياس كبيرة للكرش والرأس و الارجل ( الكوارع )
وبترجع بيتك معزز مكرم من غير ما بيتك بيقى فيه اي آثار للذبح
لكن لازم تبقي واخد بالك من حاجتك منعا لأي تلاعب والمفروض طبعا ما يبقاش واحد رايح لوحده ... المفروض يكون اكتر من واحد عشان عينهم تبقي علي حاجتهم .....
لو اكتر من واحد مشتركين في الأضحية .... يبقي لازم يكون معاك ميزان وسكاكين عشان تقسيم الانصبة ودي طبعا لازم يتولاها حد من اصحاب الاضحية ويكون عنده فكرة عشان الجميع يأخذو من جميع اجزاء الذبيحة مش واحد ياخد الفخد وواحد ياخد البطن .... لازم كل الاجزاء تتقسم بالميزان

............................................

طيب لو حد مش بيفهم في الموضوع ده وما لوش في الذبح والشراء والدوشة بتاعت التوزيع والتقسيم يعمل ايييييه ؟
ممكن يروح جمعية الزكاة بتاعت مسجد رابعة العدوية بمدينة نصر ... ميدان رابعة العدوية .... عند تقاطع ش الطيران و طريق النصر .... اشهر من النار علي العلم
دول بيعملو كل سنة مشروع الاضاحي الجماعية .... بيبقي الذبح عجول جاموسي ... وكل عجل بيقسم علي 7انصبه ......الجمعية بتقوم بالشراء والكشف الطبي والذبح والتشفية والتقطيع .... وبيأخذو ثلث النصيب لتوزيعه علي الاسر الفقيرة المسجلة لدي الجمعية و بيعطو صاحب النصيب الثلثين .... وممكن لو طلبت تأخذ 2 كيلو من الثلث اللي هما بيوزعوه علشان توزعه انت بمعرفتك ... وكمان بتاخذ نصيب من الكوارع ولحمة الرأس و الممبار والكرش والفشة حسب طلبك .....
الثلثين في المرات اللي ذبحت هناك كانو حوالي 16 او 17 كيلو .... يعني النصيب كله 25 كيلو تقريبا .... هما بياخدو 8 للتوزيع و يدولك 16 + 2 كيلو + كارع او لحمة رأس او ممبار
انا اتصلت بهم لقيتهم بدأو فعلا في الحجز .... النصيب ب 950 جنية و هما بيحددو لك المعاد اللي تيجي فية تستلم نصيبك .... وممكن التوزيع يمتد لثاني يوم العيد لأنهم بيذبحو مئات الذبائح و اول يوم مش بيكفي ....لو عاوز اول يوم يبقى تروح من اليوم
لما تروح برضه لازم يكون معاك اكياس كفاية .....
مشروع الاضاحي بيبقى مناسب اكتر للناس اللي ما يعرفوش حد يوزعو عليه لحمة .... بيبقي افضل ان اللحمة تروح لأيتام واسر الجمعية اللي معروف انهم مستحقين ... بدل توزيعها علي الناس اللي في الشارع وانت ما تعرفش هما مستحقين ولا لأ ....
فيه ناس بيسيبو النصيب بالكامل للتوزيع عن طريق الجمعية .... وناس بياخدو اكتر من نصيب ....كل واحد حسب مقدرته
جمعية الزكاة بمسجد رابعة العدوية 24034025 أو 24015958 مواعيدهم من 10 صباحا الي 8 مساء
وممكن تروح بدري تشاهد عملية الذبح لو اردت
-
.........................
ملاحظات مهمة
- الذبح يجب ان يكون بعد صلاة العيد وليس قبل الصلاة لقول الله تعالى: فصل لربك وانحر
- يجب مراعاة ان تكون الاضحية خالية من العيوب الظاهرة ( تكون جسمها سليم ... مش بتعرج او ودنها مقطوعة او القرن مكسور الخ )
- لو انت اللي ح تدبح خروف مثلا ... السنة انك انت اللي تذبح لو بتعرف .... لو مش بتعرف حاول تشارك بانك تمسك مع الجزار مثلا لو استطعت .....او تشهد الذبح علي الاقل
-تسقي الذبيحة قبل ذبحها بان تعرض عليها الماء .... ولا تسن السكينه علي مرأى من الحيوان ..... وتسمي الله وتكبر ..... و توضع الذبيحة علي جانبها الايسر و وجهها في اتجاه القبلة ..... لو اكتر من ذبيحة .... لا تذبح امام باقي الحيوانات ....
.......
اخيرا كل عام وانتم جميعا بخير
و يارب .... العيد القادم نكون بندبح الاضاحي في الحج .... في منى ....
انا وانتم و جميع المشتاقين ......آآآمين

[islamnabil]

جزاك الله خيرا على المعلومات و الافكار المفيدة
و كل عام و انتم بخير
ويارب السنة الجاية في الحج

[ahmedfd]

جزاكم الله كل خير و كل عام و كل الإخوة طيبين...

[medo55]

جزاك الله خيرا يا حج احمد وكل عام وانتم بالف خير

وبفكركم ياريت كلنا نستحضر النيه دايما وانها تكون خالصه لله

[MTAK]

جزاك الله خيرا
و جعلك الله سباق الى الخير دائما

[Hassan Khalil]

تسلم ايدك يا حاج احمد ..
ربنا يتقبل دعائك الطيب ..
و ينفع بيك .. و بالكلام اللي حضرتك كاتبه ..
:)

[علي66]

بارك الله فيك أخي الفاضل

[Moh.Abdelbaset]

جزاك الله خيرا
وكل عام وانتم بالف خير

[Dr.A.Nabil]

بارك الله فيك

ربنا يتقبل ان شاء الله

[Ghamrawy]

بارك الله فيك يا أحمد باشا

[Karim_Monir]

احمد باشا حبيبي
نفعنا الله واياك بما اردت به منفعة الناس وجزاك الله كل خير

[marsguy]

موضوع أكثر من رائع

جزاك الله خيراً على المجهود والحرص على نشر المعلومات.

أنا هابعت الكلام ده في رسائل لكل الناس اللي أعرفهم.

[ehabradwan]

شكرا يا باشا على الموضوع وجزاك الله خيرا

بس انت ماقولتش اللي عايز يدبح خرفان ايه احس مكان يجيب منه ؟ يكون امين ومضمون ؟

عشان انا جبت مرة من واحد طلع مديني انثى على ما اتذكر او السن كان صغير حاجة كده يعني والبواب هو اللي اكتشفه

[aif]

نورتوني بمروركم الكريم وكل عام وانتم بخير ...
ايهاب باشا
انا بصراحة بقالي سنين مش بأضحي بخرفان .... لكن عندنا واحد مأجر جراج جنبنا هو اللي بيجيب الخرفان لمعظم المنطقة .... وهو اللي بيدبح ومعاة طقم جزارين ومساعدين .... وبصراحة خرفانه كويسة .... انا جربته في عقيقة ابراهيم ابني و الخرفان كانت زي الفل
اما الخرفان اللي بترعى في الشارع دي سيبك منها تماما .... دي بيبقي طعم لحمها زي الكرتون و بيبقو مأكلينها قماش وورق وحاجات غريبة عشان توزن اكتر ....
مرة من كام سنة لقينا شوال في بطن الخروف بعد ما ذبحناه ..... تخيل مدي الألم اللي الحيوان كان بيشعر بيه و جوة بطنه شوااااال ..... وكل ده عشان واحد منعدم الضمير يكسب كام جنية زيادة بالغش .
نصيحة اتعامل مع حد مجرب .... ولازم يكون سبق التعامل معه من ناحية حد تعرفة

[aif]

السلام عليكم
انا كنت عاوز اذكر نفسي واذكركم بفضل الايام العشر الأوائل من ذي الحجة والتي ستبدأ بعد ساعات قليلة
هذة الايام يقول عنها النبي صلي الله عليه وسلم :
عن ابن عباس – رضي الله عنهما – أنه قال : يقول رسول الله صلى الله عليه وسلم : " ما من أيامٍ العمل الصالح فيها أحبُّ إلى الله من هذه الأيامِ ( يعني أيامَ العشر ) . قالوا : يا رسول الله ، ولا الجهادُ في سبيل الله ؟ قال : ولا الجهادُ في سبيل الله إلا رجلٌ خرج بنفسه وماله فلم يرجعْ من ذلك بشيء " ( أبو داود ، الحديث رقم 2438 ، ص 370 ) .
احبائي في الله
اذا كنت تريد رضوان الله تعالي فأكثر من عمل الخير في هذه الايام
الذكر
الصلاة علي النبي
الزكاة
الصدقات
الصيام
النوافل
صلة الرحم
العفو والتسامح
التبسم في وجه اخيك
....

كل عام وانتم بخير