موضوع مضايقني ومحتاج رأيكم

[punisher]

الموضوع ببساطه اني خاطب ويعتبر جواز صالونات وخال خطيبتي هو اللي عرفني عليها... لقيته بيكلمني امبارح وبيقولي ايه رأيك ف بنت اخويا لأخوك.. بصراحه انا شفتها ف الخطوبه ومرتاحتلهاش ورفضت بأسلوب لطيف ان هيا طويله واخويا قصير ف هوا مش هيوافق... المهم خالها طلب مني اسأل خطيبتي واشوف رأيها ف الموضوع... كان ردها عليا ان هيا في حد ف دماغها وكمان مش هيكونوا متوافقين.. بصراحه لقيت الكلام تمام خصوصا ان انا كمان شايف كده... لقيتها بتكلمني انهارده وتقولي ده في كلام بيتقال ان اخوك معجب ببنت خالي واتقدملها وهيا رفضته عشان فرق السن كبير وهي مش معجبه بيه خالص... بصراحه انا زهلت لما سمعت الكلام ده واضايقت جدا بس هي طلبت مني الكلام ده يكون سر بينا وانا بصراحه عايز احكي لأخويا اللي حصل لانه حوارات اتعملت واخويا نفسه ميعرفش حاجه!!!

وبجمله النرفزه قلت لخطيبتي أن متطلبش مني اتجمع مع اي حد من عيلتها وان اهلا وسهلا بيهم ف اي وقت لما نتجوز ف بيتنا بس انا مش رايح ف اي مناسبات

[kaza]

سيدي الفاضل دي حوارات ناس فاضية ....سيبك....واضح ان اخوك مرتاح ماديا وانكم فرصة للعالم دي ...انا اسف علي اسلوبي بس دي حقيقة ومش هترتاح بعد الجواز

[KemozTanta]

مشكلتنا في كلمة سمعت دي !
تلاقي ام البنت قالت كدا لام خطيبتك ان بنتها اللي رفضته وام خطيبتك قالت لبنتها وخطيبتك قالتلك سمعت انها رفضته عشان اكبر منها !
نقل الكلام هو المشكلة وعموما ميضركش ولا يزعلك .. مين رفض مين طالما اخوك لا راح ولا اتقدم رسمي ولا كلم حد عشانها والموضوع كله كلام * كلام
لما تيجي مناسبة والموضوع يتفتح ابقي فكرهم بخال خطيبتك اللي طلب منك بنت اخته لاخوك

[A.Saad]

من غير ما تضايق
اتاكد انك مش هتعيش بعد الجواز فى مشاكل وحوارات مع خطيبتك او اهلها

[punisher]

ليه مش هرتاح بعد الجواز ؟

انا اللي مضايقني فعلا الحوارات دي لأن اخويا نفسه ميعرفش حاجه... وبقي معجب واتقدم واترفض كمان!!!

ودي مش اول مره بردوا قبل كده لقيت خطيبتي بتقولي انتا هتسافر من غير ما تقولي... انا بطبيعه شغلي السفر بره مصر كل فتره بس انا لا كنت بحضر للسفر ولا كان في نيه اني اسافر اصلا... جبتي الاخبار دي منين... خالو قال ل خالتي...

انا جبتهلها امبارح من الاخر مش عايز اتعامل مع حد من اهلك ولا هروح عزومات ولا ف اي مناسبات ولا هكون موجود ف اي تجمع عائلي وللي حابب يزورك اهلا وسهلا ولو حابه تروحي لحد هتروحي لوحدك وهديتك معاكي بس انا مش هيكون في اختلاط بيني وبين اي حد

[punisher]

ع فكره والدتها متوفيه وعايشه مع ابوها واخوها الصغير لسه ف اعدادي بس هيا من النوع اللي مختلط اوي مع العيله حتي انها بتزور خاله مامتها بأستمرار وخاله مامتها دي نفسها كانت عايزه تجوزها لأبنها.... بصراحه انا قرفت من الجواز

[mmohamed15]

بص يا باشا انا هرد في نقطتين
النقطه الاولي انه فعلا ان الناس دي ممكن تكون شايفه اخوك فرصه و عريس ممتاز و غالبا متزعلش مني الموضوع بيبقي من الناحيه الماديه اكثر من النواحي الاخري لأن الاهل دلوقت بيبحثوا عن البنك اللي هتقعد بنتهم تتشرط و تطلب منه بعد الجواز و هو زي الحمار يروح يشتري و يدور في الساقيه و يجيب فلوس علشان يشتري تاني و هكذا رغم ان كل اللي بيطلب تفاهات و كماليات ملهاش لازمه لكن تلاقي مراتك عايزه زي جارتكم زي بنت خالتها و هكذا
النقطه التانيه انه لو حتي لو كان اتقدم و اترفض فده معيبهوش رغم اني عارف انها في بعض الاحيان بتبقي تزعل شويه ( عن تجربه ) خصوصا لو اللي رفضوك دول ناس يعني انت كنت عاصر علي نفسك لمونه و انت اللي متقدم لهم و لكن في الاخر الموضوع عادي و مفيهوش اي عيبه في اخوك
فالخلاصه انك متشيلش في دماغك الموضوع ده بس زي ما الاخوه قالوا ابدء قيم خطيبتك و اسرتها من جديد و بص ليهم نظره من بره الصندوق علشان تشوف هترتاح مع الناس دي و لا لأ

[medosalah]

الموضوع ببساطه اني خاطب ويعتبر جواز صالونات وخال خطيبتي هو اللي عرفني عليها... لقيته بيكلمني امبارح وبيقولي ايه رأيك ف بنت اخويا لأخوك.. بصراحه انا شفتها ف الخطوبه ومرتاحتلهاش ورفضت بأسلوب لطيف ان هيا طويله واخويا قصير ف هوا مش هيوافق... المهم خالها طلب مني اسأل خطيبتي واشوف رأيها ف الموضوع... كان ردها عليا ان هيا في حد ف دماغها وكمان مش هيكونوا متوافقين.. بصراحه لقيت الكلام تمام خصوصا ان انا كمان شايف كده... لقيتها بتكلمني انهارده وتقولي ده في كلام بيتقال ان اخوك معجب ببنت خالي واتقدملها وهيا رفضته عشان فرق السن كبير وهي مش معجبه بيه خالص... بصراحه انا زهلت لما سمعت الكلام ده واضايقت جدا بس هي طلبت مني الكلام ده يكون سر بينا وانا بصراحه عايز احكي لأخويا اللي حصل لانه حوارات اتعملت واخويا نفسه ميعرفش حاجه!!!

وبجمله النرفزه قلت لخطيبتي أن متطلبش مني اتجمع مع اي حد من عيلتها وان اهلا وسهلا بيهم ف اي وقت لما نتجوز ف بيتنا بس انا مش رايح ف اي مناسبات

باشا .. انا هقولك الخلاصه

هل خطيبتك دي تستاهل بجد

يعني لو هي انسانه محترمه.. متدينه ... جميله... تعليمها كويس ....
وحضرتك حاسس بارتياح نفسي معاها وانك تتمني انها تكون مراتك وشريكه حياتك وام لاولادك في المستقبل
وان اهلاها ناس محترمين في التعامل وبيراعوا ربنا

لو كده يبقي حط حدود للغبطه دي وحدود للتعامل مع الاهل وان كلامك يبقي مع شخص واحد محدد وما تبقاش الدنيا بظرميت

لكن لو الكلام ده كله مش موجود وحضرتك مش مقتنع بخطيبتك ميه في الميه
وخاصه لو لسه سنك مش كبير وقدراتك الماديه معقوله

يبقي نفكك من العيله الملغبطه دي وتفركشششششش


يا راجل ده انت بتقول انك كرهت الجواز وانت لسا خاطب.. اومال هتعمل ايه بعد الجواز

بس في نقطه.. لو في دهب( شبكه) وحضرتك خايف انها تضيع عليك يبقي تغور الشبكه وما تقعش الواقعه دي

حياتك اهم

[أحمد كمال]

مش هترتاح لانهم عيلة كثيري الكلام و اللت و العجن

و هتلاقي حواراتك بتلف عالعيلة و بيتحور عليها

و اي حاجة في بيتك هتلاقيها بتلف بيوت العيلة للتعليق عليها الخ الخ الخ


و موضوع التحوير ان اخوك اتقدم و اترفض ده شغل نقص لان انت اللي رفضت فكده هما شايفين تبقى عيبة فبيقولوا لك لا احنا اللي رافضين اساسا (مع ان هما اللي عرضوا اصلا) ...... شغل نقص و حركات مايعة من نسوان صايصة


نصيحة ...... اخلع .....

[Bassem Youssef]

تلبيخ و نقل كلام و حوارات حريم -_-

[punisher]

هما أكيد باصين للحاله الماديه لان الحمد لله احنا مرتاحين ماديا وفي نفس الوقت من البيت للشغل والعكس .. انا عندى 28 سنه وخطيبتي 19 سنه .. بصراحه هى طيبه ومؤدبه وعلاقتها كويسه مع والدتى ... ابوها بردوا ماديا كويس جدا لانه مهندس بترول واغلب شغله كان فى الخليج بس هوا حقنه شويه :) ... انا اللي بيضايقني بجد انى احس بتطفل ف حياتي وحتى خطيبتي نفس الوضع بس بلاقى ان كل وجع الدماغ جى من ناحيه عيلتها .. وعلي فكره البنت اللى بيتقال انها رفضت اخويا دى اصلا كانوا بيفكروا يعرضوها عليا ف الاول والكلام ده عرفته من خطيبتي .. وف اول الخطوبه خاله مامتها تقول ده هوا مش مرتاح معاها ومش هيكملوا ... وبعد كده الاقى اخبارى منتشره عندهم بفضل خالها ( هوا انسان طيب جدا بس للأسف مبيتبلش ف بوؤه فوله ) على طول بيتكلم ...

انا اصلا بطبيعتي مش اجتماعى اوى وخجول جدا ف حتى لو العلاقه مع عيلتها كانت مثاليه بردوا انا مكنتش هكون دائم التواجد معاهم ف اى مناسبه ... بس لما لقيت ان انا بعيد ومش متدخل مع حد ويحصل وجع الدماغ ده امال لو اندمجت معاهم هيحصل ايه

السؤال دلوقتي هل اعرف اخويا ووالدتى اللي حصل ؟؟
هل اتكلم مع خالها ف الكلام اللي اتقال ده ؟؟
ازاى اتجنب التعامل مع العيله دى وف نفس الوقت مدخلش معاهم ف عداوه ؟

[بحار]

شوف حضرتك .. انا كنت مفكر الحكاية دى حصلت معايا بس ولا يمكن تتكرر مع حد لغرابتها وبجاحتها الشديدة .. ان حد يدعى عليك انك اتقدمت لخطبه بنته ..
بس انا طلعو كرما معايا ومرفضونيش .. طب هيكمل الموضوع ازاى لوحده مش عارف ..يبدو انه بيبقى موضوع نفسى ..ازاى ..
كل حد شايف ان بنته فى وقت مناسب للزواج وماحدش بيتقدملها بيشوف هوه مين مناسب قريب منه ويدعى عليه الحكايه دى..
منه يعرف الناس ان بنته عليها الطلب ومنه يلفت ليها النظر ومنه كمان يريح بنته نفسيا ومش مهم الشخص اللى ادعى عليه لانه غالبا مفيش امل انه يتقدم ( رافض الموضوع اصلا زى حالتكم )
رأيى فى الموضوع ده .. انساه تماما ولا كأنه حصل وكبر دماغك ..كتر الكلام فيه بيحقق الغرض للى قاله
ثانيا ابعد عن القيل والقال فى العيلة ومتخلش المشاكل دى تأثر على علاقتك بخطيبتك هيا مالهاش زنب .
ثالثا عود نفسك كل عيله علاقتها والقرب منها سبب للمشاكل ومتقدرش تعيش لوحدك ..
ساير امورك وحاول توازن بين علاقتك بالناس والابتعاد عن مسببات المشاكل .. ربنا يوفقك .

[zrzr1]

الموضوع انتهي حاول معتش تفتحة تاني ومتجيبش سيرتة ولاكانة ليه لازمة

[احمد المصرى]

الموضوع بسيط جدا انت رفض ودا من حقك طبعا احتمال يكون الكلام دا من باب تجميل صوره البنت هيا ال رفضت مش الراجل ال رفضها واحتمال يكون كل دا كلام ستات وخلاص


من خبره 5 سنوات جواز كبر دماغك علشان ترتاح مواضيع كلها هايفه وبسيطه وهتقابلك كتير مع البنت دى او غيرها اهم حاجه ان خطيبتك تكون كويسه ومريحه وبعد الجواز انت هتقابل خالها كل فين فين اساسا

[kono]

يا باشا متركزش في الحوارات دي
ياما بيحصل ..ومتسمعش كلام حد يقوك اخلع
بس لازم تحط حدود للعلاقة مع عائلتها عشان التدخلات
والتدخلات دي طبيعي بتحصل عشان والدتها متوفية
بعد الجواز الكلام ده كله هيتلغي