في حالة ترك العمل

[matrix_it]

سؤال للاتش ارجية و الموظفين في حالة ترك العمل عشان اروح شركة تانية هل ملزم اني اقول قبلها للاتش ار ولا ممكن مقولش ؟
طيب في حالة اني مقولتش و لعبتها خرسة معاهم هههههه ايه اللي هيحصلي ؟
وبالنسبة للشركات هل ممكن بعد ما امضي الاوفر و ابدأ شغل معاهم ممكن يمشوني بسبب اني في التأمينات مفصول عن العمل في الشركة اللي قبلها ؟

[Batman372]

انا حاجاوبك لانى صاحب عمل ...
الموضوع بيختلف من شركه و اداره و اصحاب عمل من شركه لاخرى ... و مدى اهميه الموظف من عدمه ...
يعنى انا مثلا لو جالى اى موظف و عايز يمشى ... حقولو مع السلامه واتمنى له التوفيق و امضيه على استماره ٦ و الغى تاميناته عندى ...
حضرتك مفيش احسن من الدوغرى و البساطه ... قدم على استقاله غير مسببه و غالبا حتتقبل :)
بخصوص الشركه الجديده لكى تامن عليك عندها لازم تطلع الاول باستماره ٦ من الشركه القديمه و يكون معاك صورتها ... و لو الشركه القديمه عايزه تغلس عليك مش حتديلك استماره ٦ لكن فى المقابل حتفضل تدفعلك تاميناتك ... و عمليا مفيش شركه بتعمل كده لا لو الموظف عامل مشاكل و عليه التزامات و عهده نقديه مثلا لم يسددها ....الخ
التامينات ملهاش دعوه سبب الفصل او الاستقاله ... بتدخل باستماره ١ و تخرج باستماره ٦ ....
ارجو ان اكون افدتك ...
تحياتى ...

[matrix_it]

يعني التأمينات مش هتتكتب اني منقطع عن العمل ؟؟ اصلي لو جالي فرصة تانية مش هسيب مهلة للشركة القديمة اكتر من اسبوع!
بس هل ممكن اطلب من الشركة التانية متأمنش عليا ؟ ولا اي شركة مجبرة انها تأمن علي موظفيها؟ مع العلم ان الشركة القديمة كبيرة و فيها مكتب اتش ار

[minicooper20]

قدم استقاله و امشى من عندهم بروفيشنل و هما غلبا هيسبوك
الا لو انتا حد كفء جدا فا ممكن يدوك اوفر افضل علشان تفضل

[matrix_it]

ماهو انا هكتب استقالة بس وارد انه يقولي لازم تستني فترة شهر مثلا ! و الشركة التانية ممكن ماتستناش شهر ، فهل يقدر يأذيني باستمارة 6
انا احب اعرف الموضوع ماشي ازاي مع الناس

[أحمد كمال]

انت زعلان انه هيقول لك استنى شهر عشان الشغل يتسلم نضيف لزميل تاني

في حين لو الشركة مرة جت في يوم قالت لك اخر يوم النهاردة ماتجيش بكرة و ما اداكش مهلة توفق وضعك مش هتزعل؟


عامل ربنا ...... لو العقد بتاعك فيه مدة بعد الاستقالة التزم بيها ....... خليك بروفشنال ....... السوق صغير و اللي مش هتحتاج وشه النهاردة بكرة تحتاج قفاه ....... و امشي نضيف و من غير مشاكل ...... ما تضمنش ....... تحتاج ترجع لهم في يوم ...... تحتاج خطاب توصية ....... او الالعن ...... تيجي تروح شركة تالتة تلاقي واحد نقل للتالتة من الاولانية و يقول لهم عاللي انت عملته فماتتعينش ....... او يتصلوا بالاولانية يسالوا عليك ......


امشي على نضافة و خلي العلاقات كويسة مع اي مكان انت ماشي منه ....... ماتعرفش هتحتاجهم تاني و لا لأ صدقني

[matrix_it]

انت زعلان انه هيقول لك استنى شهر عشان الشغل يتسلم نضيف لزميل تاني

في حين لو الشركة مرة جت في يوم قالت لك اخر يوم النهاردة ماتجيش بكرة و ما اداكش مهلة توفق وضعك مش هتزعل؟


عامل ربنا ...... لو العقد بتاعك فيه مدة بعد الاستقالة التزم بيها ....... خليك بروفشنال ....... السوق صغير و اللي مش هتحتاج وشه النهاردة بكرة تحتاج قفاه ....... و امشي نضيف و من غير مشاكل ...... ما تضمنش ....... تحتاج ترجع لهم في يوم ...... تحتاج خطاب توصية ....... او الالعن ...... تيجي تروح شركة تالتة تلاقي واحد نقل للتالتة من الاولانية و يقول لهم عاللي انت عملته فماتتعينش ....... او يتصلوا بالاولانية يسالوا عليك ......


امشي على نضافة و خلي العلاقات كويسة مع اي مكان انت ماشي منه ....... ماتعرفش هتحتاجهم تاني و لا لأ صدقني

مش زعلان انا بستفسر
طيب هل حصلت ان حد قدم استقالته ولما راح المكان الجديد قالوله لا خلاص جبنا موظف تاني ؟ والشركة لما بتدي كلمة و تمضي الاوفر ممكن بعدها ترجع في كلامها ؟

[dede_dodo88]

كل الأشغال بيبقوا عارفين أن في حاجة أسمها Notice Period قبل ما تستقيل من شغلك و دي بتكون في حدود شهر أو شهرين, أزيد أو أقل حسب حاجة العمل.. متقلقش يعني مهياش أفتكاسة أو غلاسة من شغلك..