لو كنت مكاني هتعمل اية مع البنت دي ؟ قرار مصيري

[mohamedFTW]

أنا كنت بحب زملتي معايا في الجامعة و احنا في سنة 2 كلية ... المهم انا كنت قريب منها اوي في فترة معينة بس كان كل الكلام علي الفيس .. هي بنت جميلة و محترمة و ملهاش اختلاط بشباب في الجامعة علشان كدة دخلت دماغي اكتر .. انا زعلان علشان هي كانت بتهتم بيا في فترة و كانت بتسأل عليا كتير و انا كنت مهتم بيها برضوووو و بزيادة شوية .. كان كلمنا تقريبا كل يوم .. و دلوقتي مفيش كلام خالص مع بعض .. المشكلة هنا انا عرفت انها كانت محجبة في ثانوي و بعدين قلعت الحجاب في الجامعة و تاني حاجة .. انها قرارت مرة واحدة انها تشيل كل الصور بتاعتها من علي الفيس بوك ... وفجأة قرارت انها ترجعهم تاني ؟ السؤا ل هنا ... اتقدم للبنت دي السنة الجاية مع اني في قبول في البيت عندي انا الولاد الوحيد و مفيش جيش و الشقة موجودة الحمد لله ؟؟؟؟؟؟؟؟؟؟

[sasatony]

اولا ربنا يهديك للصواب
تاني حاجة هو مين قالك ان مشكلة الجواز الشقة بالعكس في مشاكل اهم بكتير زي ازاي تختار البنت واهلها وربنا يكرمك وتختار الزوجة الصالحة لان انت بخطوتك باذن الله هتدمج عائلتين في بعض
المهم انت اتكلم مع البنت وسيبك من جو الفيس والنت عامة عشان تقدر تقيم انسان كويس لازم تتكلم معاه وجها لوجه وتشوف اسلوبها وطريقتها واسئلها ايه السبب الي خلاها تقلع الحجاب باذن الله بعد ماتعمل كده انت هتقدر تقرر انت عاوز ايه
وربنا يكرمك باذن الله

[ali ashraf]

النت له حدود

أولا و قبل كل شئ ربنا يوفقك للخير, و ياريت متزعلش منى لما اقول لك راى بصراحة .....انت دخلت النت فى حاجات مش مفروض تبقى على النت.....يعتى مثلا نتكلم عن السيارات , مشاكل اقتصادية, انقطاع التيار الخخخخخ, و فيه حاجات متنفعش تبحث مشاعة على النت و مش هقول اكثر من كده رجاء بدون زعل بس ده راى الشخصى و يحتمل الخطأ
3856

[misry]

كل واحد له طريقة تفكير ... بس انا مش هاتجوز واحدة قبلت انها تكلمني على النت

واللي هاتجوزها لازم تكون متدينة , علشان هتبقى عارفة حقوقها وواجباتها كويس جدا وعمرها ما هتظلمني

بالتوفيق

[samyyousef]

العلاقات الانسانية لا يوجد فيها ابيض و اسود.......كلها رمادية اللون و تتداخل فيها الالوان
الواقعتين اللي مزعلينك بتوع انها كانت محجبة في ثانوي ثم خلعت الحجاب او موضوع الصور...لا اظنهما هما الفاصلتين في الموضوع
تتدبر امرك اولا....العمل و الكسب و القدرة على اقامة بيت و تحمل مسئولية و تربية اطفال...ثم تقدم لخطبتها لو كنت تحبها
و اعتصم بمبدأ اظفر بذات الدين

[A.Saad]

اسالها عملتى كدة ليه

[Mahmoud Naguib]

أولا يعني اللي بيقول انا مقبلش أكلم بنت قبلت تكلمني ع النت او غيره !
هتتجوز واحدة كلمت غيرك !!

مش المشكلة ف كدة المشكلة إنك بتقول انكم مبقيتوش تتكلموا خالص !
في مراحل للإعجاب ومراحل للحب واللي ظاهر ده مجرد إعجاب كل واحد فيكم خلص الكلام الجميل اللي عنده والصفات الحلوة اللي بيحطها ف نفسه قدام الطرف التاني

ومبقاش في حاجة تتحكي غير كلمات الحب المعروفة واللي مبقتش تأثر هي كمان ف الغالب !!

الحب مش كدة خالص لو في حب بجد مش هيبقى في انقطاع أبدا وهتبقى الرغبة ف انكم تتقابلوا أو تتكلموا بتزيد مبتقلش !!

يمكن دي علشان أول تجربة من نوعها فانت صنفتها كعلاقة حب بس هي إعجاب بس وهتلاقي من ده كتير بس الحب انت نفسك هتحسه لوحدك وهتتأكد ان ده كان إعجاب !!

متحطش ف دماغك أفكار زي انها كانت محجبة وقلعت الحجاب أو شالت صورها وحطيتها تاني مع اني مختلف 180 درجة مع اللي عملته وف انه مينفعش
بس هو ف البداية مفيش حب أصلا علشان تفكر ف الأمر ده بجدية !!

أنصحك بحاجة
حاول تقف معاها وتقنعها تتحجب تاني وتشيل صور الفيس
ومتتكلمش ف حب خالص أو ارتباط معاها عاملها كزميلة بس
وعاملها بالظبط نفس المعاملة بتاعتها ف البعد والقرب والتقل وكدة
لو فضلتوا محافظين على العلاقة بنفس المستوى لمدة أكتر من 6 شهور يبقى خد خطوة واتقدم على طول !!

[tasaka]

اولا مفيش حب و اختيار لزوجه تعيش معاك طول العمر .. بالمراسله و النت .. ده سلاح ذو حدين

اذا كانت هى ابتعدت بدون سبب .. تأكد انه مفيش حد دخل حياتها فى الفتره الاخيره ( كل شيئ وارد )

لابد ان تفهم منها سبب تركها للحجاب .. على ان تكون صبورا فى الاستماع و تقدير الظروف المحيطه بها عندما فعلت ذلك ( بدون ان توضح لها مسبقا اهميه الحجاب بالنسبه لك )

ان لم يكن هناك احد فى حياتها و مشاعرك لها صادقه و قويه و متأكد من اخلاقها .. تستطيع التعرف اليها اكثر من خلال ابداء الرغبه فى الارتباط ( و ليس الخطوبه ) .. و تستطيع زبارتها فى بيت اهلها و التحدث معها ليتأكد الطرفين من صدق المشاعر .. وارد جدا بعد اللقاء ان احد الطرقين يغير رأيه انت او هى

و قبل الخطبه لابد من حسم موضوع الحجاب بصوره نهائيه ( بدون كلام عايم ) .. و هذا سيكون اكبر اختبار يبين لك مدى صدق مشاعرها .. و يفضل ان يكون هذا قبل زيارتها فى بيت اهلها .. فأن رفضت اتركها

و رأيى الشخصى .. بين لها اهتمامك بها ( بدون زياده ة لكن بكلام واضح ) .. ثم اتركها فأن عاودت الاتصال فأبدأ خطواتك بحذر ( مع الاخذ فى الاعتبار انها اما متردده او فى حد فى حياتها .. و ده واضح جدا من ابتعادها ) .. و لا تفترض منها اشياء لم تخرج على لسانها .. و السكوت موش علامه الرضا فى كل الاحوال ( و الاغلب انه تأجيل للمواجهه فى الموضوع المسكوت عنه )

و رأيى الشخصى ايضا انها شبه حسمت امرك فى تفكيرها .. و قررت الابتعاد لسبب او لاخر ( قد يكون بسبب بعض تصرفاتك او مؤثر خارجى طرأعلى حياتها ) .. و الانثى بصفه عامه لا تواجه .. و لكن تعطي اشارات سلبيه لكى تبتعد ( سواء لطبيعتها كأنثى او ضغوط من الاهل ) .. فان كنت ساذجا او ليست لديك خبره فلن تفهم هذه المؤشرات .. و قد تستمر فى الموضوع ( بالرغم من كل ما تتلقاه من مؤشرات سلبيه ) و يحدث زواج .. ثم ما لا يحمد عقباه

و نصيحتى لك .. لو ثبت لك انها متردده بخصوصك ( بعد كل هذا الوقت و ما عرفته عنك ) .. نصيحتى انك تحسم هذا التردد فى ذهنها .. و تتخذ قرارك و تبتعد عنها نهائيا حتى لو حاولت هى الاقتراب لاحقا .. و السبب ان الانثى تختار شريكها الذى تعيش معه طول العمر قى لحظه و احيانا اثناء زياره العريس تكون قد حسمت امرها بالقبول او الرقض .. و هذا على عكس الرجل الذى لا يستطيع اتخاذ مثل هذا القرار بهذه السرعه و هذا الوضوح فى الرؤيه

و ربنا يوفقك للخير و بنت الحلال

[4fun14]

بالظبط كدة,انا مش مركز خالص ف موضوع انها قلعت الحجاب والفيسبوك والكلام ده..
انتو بطلتوا تتكلموا ليه؟دى اشاره سلبية
لو بتحبك دووس وش وسيبك من هلوسه الفيسبوك والشغل الفاضي ده

[samyyousef]

العلاقات الانسانية لا يوجد فيها ابيض و اسود.......كلها رمادية اللون و تتداخل فيها الالوان
الواقعتين اللي مزعلينك بتوع انها كانت محجبة في ثانوي ثم خلعت الحجاب او موضوع الصور...لا اظنهما هما الفاصلتين في الموضوع
تتدبر امرك اولا....العمل و الكسب و القدرة على اقامة بيت و تحمل مسئولية و تربية اطفال...ثم تقدم لخطبتها لو كنت تحبها
و اعتصم بمبدأ اظفر بذات الدين

استكمالا لمداخلتي
لو قررت لك انها خلعت الحجاب لانها غير مقتنعة بالحجاب او انه ليس فرض و انها لا تنوي الحجاب و عبارات من هذا القبيل.....فانصحك بعدم الاستمرار....و الله اعلم

[أحمد كمال]

بصراحة و من غير زعل و اعتبرني اخوك الكبير


ده شغل لعب عيال سواء منك او منها و مشاعر مراهقة

بكرة تكبر و تقول انا كنت مغفلون على راي عبد المنعم مدبولي الله يرحمه

[ESO101]

حجاب أهون من مشاكل في أصل العقيدة
إحمد ربنا
المشاعر دي بتتعب الإنسان وتشقلب كيانه
ماتخدش أي قرار وإنتا عاطفي وخليك عقلاني بقدر الإمكان وقت إتخاذ القرار
والسن دا الواحد بيكون مش مستقر نفسيًا وقراراته بتبقى سريعة
أنا تزوجت في سنك وإنفصلنا بعدها بسنتين
مش لعيب فيها أو فيا ولكن قرارنا كان متسرع و مكنش سليم
والحمدلله كنا ( مأجلين الخلفة ) فمكنش فيه أطفال
لكن لو تزوجت وبقي فيه طفل خلاص إنسى حياتك مش هتبقى ملكك
وعمومًا لو هتكمل ومتأكد من مشاعر
تناقش معاها لنفسها هيا قبل مايكون لنفسك .. وحاول تقنعها
ربنا يهدي

[Bassem Youssef]

تااااااااااااااااني ؟؟؟

يعني لما تقابل ابوها و يسألك

مؤهلك ايه ؟؟؟ انا لسه في كليه يا حاج

بتشتغل ايه ؟؟؟ لا مش بشتغل حاجه

انت فاكر ان الموضوع كله شقه و خلاص ؟؟؟

الشقه دي مجرد مطب من مليون مطب

عشان تفتح بيت محتاج مش اقل من 3000 جنيه شهريا

منين و انت مش شغال ؟؟؟

لازم تكون حاطط رجلك علي ارض صلبه الاول

قبل ما تفكر في خطوه الجواز