استشارة في بند المحارة في التشطيب

[مُصْطٓفٓى]

السلام عليكم ورحمة الله وبركاته
اتفقت مع المقاول على استلام الشقة نصف تشطيب على المحارة
يعني المقاول متكفل بالاتفاق مع الصنايعية اللي حيشتغلوا محارة
دلوقتي انا طلبت من الصنايعية انهم يشتغلوا بنظام أوتار وبؤج في الحوائط والأسقف ويركبوا شبك في الأماكن اللي ممكن يحصل فيها ترييح

ايه فرق المصنعية اللي ممكن يطلبوه ان شاء الله ؟ بعيدا عن فرق المونة اللي ممكن يحتاجوها
علما بأن مساحة الشقة تقريبا 150 متر او 125 متر صافي
انا حاولت امتر الحوائط والاسقف بنفسي لقيتها 330 متر مربع تقريبا

شكرا لكم

[Abo_Mazen]

والله حضرتك بتقول كلام فني ..ياريت لو تقول الكلام ده بالعامي ..إيه بقى الأوتار والبؤج دي؟؟؟!!!!

[Amr_MO]

سعر متر المحارة البؤج والأوتر يفرق عن المحارة البلدي ده حسب الاتفاق، يعني انا عامل شقتي محارة بلدي بس مظبوطة سعر المتر كان 9 جنيه والبؤج والاوتار ممكن توصل ل 13 او 15 جنيه وكمان حسب المنطقة الي فيها الشقة وخلي بالك ده منفصل عن سعر الكرانيش الي لازم تعمل حسابها اذا كنت هتجيب كرانيش جاهزة او هتعمل كرانيش سحب ( يدوي)

بس نصيحة اقف على ايد الصنايعي وهو شغال في المحارة لأنها لو مطلعتش مظبوطة هتشوه منظر الخيطة في النهاية بعد الدهان، وهتلاقي فيها مطبات، وخليه يظبط تخميير الاسمنت يعني ميزودش الرمل علشان يوفرلك في الاسمنت وكل ما يخلص حيطة اتاكد انها مظبوطة بالمسطرة والزوايا وان مفيش فيها مطبات وخلافه وبرضه خليك في نوعية اسمنت كويسة افضلها ال iPro سواء حلوان او طرة

وبالتوفيق

[مُصْطٓفٓى]

شكرا لرد حضرتك المفصل
يعني لو اتفقت معاه على 5 جنيه للمتر مقابل الفرق بين المحارة البلدي والبؤج وأوتار
وصممت على المبلغ ده هل ده مقبول حتى لو المنطقة عالية والشقة سعرها عالي

وهل ضروري اني اعمل تربيع للغرف ولا لا ؟ يعني هل التربيع مهمته السيراميك
فقط ؟

[مُصْطٓفٓى]

والله حضرتك بتقول كلام فني ..ياريت لو تقول الكلام ده بالعامي ..إيه بقى الأوتار والبؤج دي؟؟؟!!!!

على فكرة الكلام عامي جدا والصنايعية بيقولوا كده عليه
الفكرة انك بتعمل خطوط افقية على الحائط بالمونة والخطوط ده بتكون مظبوطة بالميزان
وبعدها بيمحر على الاوتار ده وبيستخدمها كدليل

[Amr_MO]

شكرا لرد حضرتك المفصل
يعني لو اتفقت معاه على 5 جنيه للمتر مقابل الفرق بين المحارة البلدي والبؤج وأوتار
وصممت على المبلغ ده هل ده مقبول حتى لو المنطقة عالية والشقة سعرها عالي

وهل ضروري اني اعمل تربيع للغرف ولا لا ؟ يعني هل التربيع مهمته السيراميك
فقط ؟

المفروض انك بتتفق معاه على حسب السعر السائد في االمنطقة عندك لو حضرتك من القاهرة او من محافظة تانية، لكن 5 جنيه للمتر ده بصراحة مسمعتش عنه قبل كدة اعتبره قليل جدا لو انت في القاهرة، بس اي كان الي هتتفق عليه مع الصنايعي يبقى تنبه عليه انه يسلمك شغل مظبوط مش يكروتلك الشغل ويحملك محارة مش مظبوطة واي كلام عشان دي هتشوه منظر الشقة بالكامل في النهاية بعد الدهان

ونفس الشيئ برضه بالنسبة لمصيص السقف يخليه كله مسطرة مفهوش انحناءات ولا مطبات ولا غيره

موضوع التربيع ده على حسب مانت شايف ايه وضع الحوائط ودرجة ميلها بالنسبة للأسقف عندك لو الحوائط مظبوطة والزوايا تمام ودرجة الميل قائمة يبقى مفيش داعي للتربيع لكن عموما هو بيعتمد على الوضع عندك او على حسب رؤية الصنايعي

[احمد فهمى]

الشغل الصح لازم يكون بؤج واوتار وبنفس السعر والشغل العادى ده محدش بيعملو حتى فى العشوائيات ومعظمو بيكون يوميات مش بالمتر

[HeMa_LanCeR]

لو هتتفق علي اوتار وبؤج
يبقي تستلم البؤج والأوتار قبل ما يشتغل
يعني تستلمها في الشقة كلها ناشفة وبعدين تستلم المحارة عليها

[amr011111]

بؤج وأوتار طبعاً

[مُصْطٓفٓى]

الـ 5 جنيه ده حتكون فرق بين مصنعية المحارة البلدي اللي اصلا المقاول شايلها
وبين نظام البؤج والأوتار
يعني لو المقاول مثلا متفق معاه على 4 جنيه للمتر انا حزودله 5 جنيه فوقهم ان شاء الله

بالإضافة اني مش حطلب منه كرانيش في السقف عشان احتمال اعمل جبسون بورد بإذن الله تعالى

فهل الـ 5 جنيه مقبولة ؟

[hugan]

اﻻهم اوعي تدخل جبس مصيص في المونه
كبيره شيكاره واحده للبوئج

[مُصْطٓفٓى]

طلبت منه ميحطش جبس في الحواف عشان ميخلهاش تمسك بسرعة
قالي مبندخلش جبس إطلاقا في الشغل ولو لقيت شيكارة جبس واحدة يبقي ليا الكلام

[HeMa_LanCeR]

طلبت منه ميحطش جبس في الحواف عشان ميخلهاش تمسك بسرعة
قالي مبندخلش جبس إطلاقا في الشغل ولو لقيت شيكارة جبس واحدة يبقي ليا الكلام

بالنسبة للحواف في بقي زاوية سلك بتتباع عند الموان هاتها يحطها علي حواف العمدان
بس هاتها للعمدان اللي في حتة ممكن تتخبط بس