خبر عاجل الغاء بنزين 80 و رفع اسعار 92 و 95

[ali ashraf]

الخبر نشر اليوم على البوابة نيوز و الاسعار الجديدة غالبا بعد عيد الفطر ال80 هيلغى و هيبقى 85 طبعا بسعر اعلى و 92 و 95 برضه هيرتفع نسبة الزيادة 40% , بالنسبة لأعضاء المنتدى فكر كويس قبل ما تشترى سيارة ذات محرك بمعامل انضغاط اكثر من 10:1 ,

[حسام الغرباوي]

الخبر دا اتنفي من رئيس الوزراء وقال مفيش زيادة علي الاقل لاخر السنة دي

معرفش صحة الخبر صراحة ....لكن شخصيا ياريت يشيلو الدعم عن البنزين + وبرضو يشيلو الجمارك عن السيارات في مقابل عمل شبكة مواصلات عامة جيدة وطرق جيدة ...وبكدا مشاكل الزحام هتتحل

[tasaka]

هى دى عيديه العيد ؟؟
سعر برميل البترول انخفض بقى له فتره .. موش قادر افهم سبب الزياده

[بحار]

اشاعااااااااات

[misry]

زي كل سنة ,,, ناس هتقول اشاعات وناس هتقول حقيقة والحكومة عاملة ودن من طين وودن من عجين

واعتقادي الشخصي ان البنزين هيغلى لأنه للاسف فكر الحكومة في تزويد الايرادات منصب على زيادة

الضرائب والاسعار

[afndina]

هى دى عيديه العيد ؟؟
سعر برميل البترول انخفض بقى له فتره .. موش قادر افهم سبب الزياده

حضرتك مش بتتحاسب علي السعر الحقيقي للبرميل
ولا عمرك اتحاسبت بيه وحتي بعد الزيادة برضوا مش حتتحاسب بيه
الحكومة بتديك دعم عن السعر الحقيقي للبرميل
انا بقي اللي مش فاهم لغاية الان الحكومة بتدعم البنزين والطاقة ليه

[ali ashraf]

نفى الخبر من 10 دقائق

على قناة صدى البلد برنامج صالة التحرير اعلن المتحدث الرسمى لوزارة البترول عدم صحة الاخبار برفع اسعار المشتقات البترولية و جريدة البوابة نيوز تؤكد صحة الخبر و تزعم تراجع الوزارة عن قرارها....... انتهى الخبر من مجريات الاحداث و بعد موضوع ما عرف بضريبة البورصة و كم الخسائر الفادحة اللى جلبها التسرع فى هذا القانون , أعتقد ان الحكومة هتعمل حاجة زى نشر خبر و ترجع تكذبه و دى حيلة معروفة منها تكون بالون اختبار يجس نبض الشارع ومنها تجهيز الناس للارتفاع المتوقع ........أخيرا ارجو التفرقة بين النقد و الانتقاد .....انا كتبت فى المنتدى من 3 اسابيع عن موضوع ضريبة الارباح على الشركات ( البورصة المصرية رايحة فين) و توقعت الغاء هذه الضريبة و كتبت بالحرف مش علشان 150 مليون جنية نخسر 40 مليار و تم تأجيل القانون سنتين .....تفكير الدولة بتعظيم الاموال اللزمة للميزانية عن طريق الجباية و رفع الاسعار اسلوب الفاشلين على العكس تماما تخفيض الصرائب معناه اموال و استثمارات اكثر و انتعاش اقتصادى اكبر ......لا جدال ان وزارة المالية و التخطيط ايضا فيهما مشكلة......انا سعيد ان البورصة بدأت تستعيد نشاطها و اكيد سأكون سعيد لما الاقتصاد المصرى يستعيد قوته علشان كده نفكر مع بعض و ننقد الامور و لا ننتقدها.

[مُصْطٓفٓى]

بالونة اختبار
بالإضافة إن الحكومة ليها سابقة في موضوع رفع سعر البنزين

[mk3]

الخبر اللى انتشر
بنزين 92 هيبقى ب 3 جنيه

[Karim Alaa]

«البترول» تنفي إلغاء بنزين 80 و ارتفاع أسعار الوقود

[ali ashraf]

الخبر انتشر و بعد 8 ساعات جاء النفى

الحقيقة مش عارف ما هو برضه الصحفى اللى كتب الخبر مش معقول ينشره من نفسه اكيد من مصدر معتبر و هنقل لكم الخبر كما نشر بطريقة كوبى بست ...... الثلاثاء 19-05-2015| 02:02ص إيناس العدوى العنوان :خطة حكومية تدخل حيّز التنفيذ فى يوليو
انفراد.. إلغاء "بنزين 80" ورفع الأسعار 40 %........الخبر كشفت مصادر بالهيئة العامة للبترول أن الحكومة قررت إلغاء «بنزين 80»، خلال الفترة المقبلة، مع رفع أسعار المواد البترولية 40٪ بداية من المالى العام المقبل.
وأوضحت المصادر أن هذه الزيادة في الأسعار تأتى في إطار سياسة الدولة الإصلاحية، وسعى الحكومة لترشيد النفقات، ومنع إهدار المواد البترولية بدءًا من العام المالى 2016/2015.
وأضافت المصادر أن هذه الزيادة ستطبق على جميع أنواع المواد البترولية السائلة، وهى البنزين 92، والسولار، ويتم رفع رقم «الأوكتان» لبنزين 80، ليصبح 85، مشيرة إلى أن أسعار هذه المنتجات بعد الزيادة الجديدة قد تصل إلى السعر العالمي. أنتهى النقل
و بعد 8 ساعات تم نفى الخبر ......حاجة تحير فعلا ....بس مش معقول صحفى يخترع موضوع خطير زى ده.

[Bassem Youssef]

السيسي قال بعضمه لسانه ان الدعم هيتشال خلال 5 سنين بالتدريج

[tasaka]

حضرتك مش بتتحاسب علي السعر الحقيقي للبرميل
ولا عمرك اتحاسبت بيه وحتي بعد الزيادة برضوا مش حتتحاسب بيه
الحكومة بتديك دعم عن السعر الحقيقي للبرميل
انا بقي اللي مش فاهم لغاية الان الحكومة بتدعم البنزين والطاقة ليه

لما الاجور و متوسط دخل الفرد يبقى زى اوروبا و امريكا و المعدلات العالميه ( ما اعتقدتش اننا وصلنا حتى 20% من هذا الرقم ) .. يبقى فعلا لا يحق لاحد الحصول على الدعم

[M!SHO]

حضرتك مش بتتحاسب علي السعر الحقيقي للبرميل
ولا عمرك اتحاسبت بيه وحتي بعد الزيادة برضوا مش حتتحاسب بيه
الحكومة بتديك دعم عن السعر الحقيقي للبرميل
انا بقي اللي مش فاهم لغاية الان الحكومة بتدعم البنزين والطاقة ليه

جميل شيل الدعم خالص بس في نفس الوقت ارفع المرتبات او على الاقل مواصلات عامه بسعر معقول

انا مرتبي من فتره كان ١٢٠٠ جنيه وبستهلك بنزين بس ب ٨٠٠ جنيه ، لولا ان الحمدلله مرتاح وعايش في خير ابويا لسه كان زماني بشحت

[ali ashraf]

فى الهم مدعية و فى الفرح منسية

لما الاجور و متوسط دخل الفرد يبقى زى اوروبا و امريكا و المعدلات العالميه ( ما اعتقدتش اننا وصلنا حتى 20% من هذا الرقم ) .. يبقى فعلا لا يحق لاحد الحصول على الدعم

موضوع الاجور و الاسعار العالمية تنطبق تمام الانطباق على المثل الشعبى و كما يقال الامثال حكمة و تاريخ الشعوب اى انها تتعدى كونها فلكور شعبى لتكون نبض الشارع و حكمة التاريخ , لما تتكلم عن الخدمات الصحية و جودة التعليم و جودة الطرق الخ......يأتيك الرد معلش احنا دولة لسه على بداية الطريق من العالم الثالث و لما تتكلم عن الاسعار و الضرائب ....يجيلك الرد مقارن بأمريكا و انجلترا و المانيا.....طب اشمعنى..... مش معقول ان لسه فى ناس بتقبض ( فى الدولة) مرتبات مئات الالوف و ناس مش لاقية تأكل , و الله صحيح فى الهم مدعية و فى الفرح منسية.