محل قمصان وبنطلونات كلاسيك

[Mahmoud Naguib]

أنا محتاج أشتري لبس كلاسيك شوية
يعني أقل من البدل بدرجة
فمحتاج أبعد شوية عن التيشيرتات والجينزات

يعني محتاج بنطلونات جبردين وقماش قوي
وقمصان كلاسيك وكاجوال بس خامات كويسة

أنا مبفهمش ف الخامات ومعرفش اي الجيد واي اللي مش حلو
فياريت حد يقولي عليهم ويقولي اللي محتاج كوي فيهم أو اللي شيك أكتر أو اللي لياقته واقفة أو نايمة !!
أسئلة غريبة أنا عارف !!

ياريت محل ف حدود بالكتير150 للبنطلون أو القميص ويكون عنده تشكييله حلوة

[Mahmoud Naguib]

لي محدش جاوبني !
هو الاستايل ده محدش بيلبسه ولآ إي !!

[eslamrace]

ا/ محمود بالنسبه للمحلات فى القاهره مش حقدر ادلك بس الاستايل اللى بتتكلم فيه اللى هو سيمى كلاسيك هتلاقيه موجود فى محلات الكاجوال حتلاقى البنطلونات موديلات كتير جدا والقمصان بتبقى يا ساده او مقلم او كاروهات صغيره خالص وعليها علامات لماركات عالميه "polo /u.s.polo/fred perry/guess وهكذا" والحزام بيكون سليم وعليه برضه ماركه منهم ولو عندك مشوار جامد يبقى عليهم بليزر كاجوال وتبقى كده تمام
اما بالنسبه للخامات فدى بحرها كبير ومش اى حد بيفرقها الا الخبير او اللى شغال فى التصنيع ده اصحاب المحلات احيانا بيتلخبطوا ويتخموا فى الخامات فطالما بتشترى من محل كويس وموديل عاجبك وملمس القميص فيه نسبه قطن عاليه يبقى تمام وتوكل على الله .
تحياتى .

[Mahmoud Naguib]

شكرا يا اسلام

بس أنا محتاج منك تسألي كدة على أفضل المحلات ف القاهرة أنا عارف انك ف اليكس بس انت ف الموضوع ده وسهل تعرف

تاني حاجة هو لما يكون فيه نسبة قطن عالية بيبقى افضل ولآ لما بيكون مخلط !؟؟؟

[eslamrace]

شكرا يا اسلام

بس أنا محتاج منك تسألي كدة على أفضل المحلات ف القاهرة أنا عارف انك ف اليكس بس انت ف الموضوع ده وسهل تعرف

تاني حاجة هو لما يكون فيه نسبة قطن عالية بيبقى افضل ولآ لما بيكون مخلط !؟؟؟

انا فعلا معرفش محلات فى القاهره انا كل تعاملى فى القاهره مع تجار جمله فللاسف مش حقدر افيدك ولا فى محلات ولا فى رنجات اسعار لان الموضوع فى كلام كتير انت ممكن تلاقى حاجه فى محل فى مول برقم وتلاقيها موجوده فى محل بره هى هى بسعر مختلف تماما فلازم يكون حد فى القاهره مهتم بالموضوع وعنده خبره يفيدك
وبالنسبه للقطن قطعا القطن احسن وكل ميزيد القطن بيزيد السعر والراحه والافضل يكون قطن وفيه نسبه ليكرا لو حتى قليله خالص وكمان خللى بالك كل نسبه القطن متزيد الحاجه بتكش شويه فى الغسيل فخد بالك من النقطه دى وانت بتشتري كل القطن ميزيد الحاجه تكش اكتر وكل تقل الحاجه مش بتكش .

تحياتى,

[فتح الباب]

متابع لانى مش بلاقى بنطلونات محترمه بسهولهلدرجة انى فكرت افصل عند ترزى للاسف

[sas5]

نصيحه منى لاتشترى من المحلات واذهب الى منافذ البيع بتاعه المصانع
تيدلاموند به بنطلونات تبدا من 80 جنيها وجيده جدا وبها قمصان جيده جدا
تيدلاموند السادس من اكتوبر لسه منزل عرض اشترى وخد الخصم وكذلك 25% خصم على اجمالى المشتريات

[A_H_M_A_D]

نصيحه منى لاتشترى من المحلات واذهب الى منافذ البيع بتاعه المصانع
تيدلاموند به بنطلونات تبدا من 80 جنيها وجيده جدا وبها قمصان جيده جدا
تيدلاموند السادس من اكتوبر لسه منزل عرض اشترى وخد الخصم وكذلك 25% خصم على اجمالى المشتريات

انا برضه كنت هارشحلك تيد لاموند عشان علطول بشتري منه

ولو مش عايز تضرب مشوار 6 اكتوبر ( انا مش عارف بعيد عنك ولا لأ) ممكن تروح فرعهم اللي جنب كارفور المعادي هناك فيه جزء outlet بيبيع بتخفيضات كبيرة على موديلات السنة اللي فاتت , بس في الكلاسيك مش هايفرق الموديل و انت اولى بالتخفيض

[Mahmoud Naguib]

sas5
A_H_M_A_D

شكرا ليكم

على فكرة لتيدلاموند فرع ف جنينة مول هروحه أشوف اي الأخبار هناك وهاجي أنقلها هنا ان شاء الله

[esam_refaat]

تيد لاموند بلبس منه من عشرين سنة مريح ورخيص

[طارق _عبد السلام]

نصيحه وانت بتشترى البنطلون هات النوعيه بالليكرا(فيها مطاطيه) ودى هتجربها انك تشد القماش بايدك هتلاقيها اتمط ورجع تانى هيريحك جدا جدا فى الجلوس والحركه

ومن ناحيه القمصان افضل اختبار لقماش القميص اذا كان قطن او بوليستر

وانت بتشوف القميص امسك القماش من اى حته واقبض عليه بيد واحد كأنك بتكرمش حاجه فى ايدك وسيبه اذا لقيته اتكسر برسمه ايدك ومحتاج مكواه بعد كده ده قطن 100%(مريح جدا )
ولو لقيت الكرمشه موجوده بس بسيطه ده مخلوط قطن وبوليستر (مريح بنسبه كبيره ومحافظ على مظهره)

ولو رجع زى الاول بدون كشكشه ده بوليستر صافى اوعى تشتريه لو ببلاش

[fepsceasar]

جولدن مان هاوس عنده حاجات كويسة للاستخدام اليومي