أفضل طريقة لتفادي التثبيت وانت ماشي على رجليك عن تجربه

[Anaslbda]

متقاومش.

اخويا لسا واخد غزّيتن بمطوه في الطوب الرملي امبارح الساعه 1 الفجر.. طلع عليه اتنين, واحد ضخم من ورا كمّمه وغمى عنيه.. والتاني بيفتش في جيوبه. بيحاول يقاوم سمع الأوّلاني بيقول للتاني غُزه غزّه..
صاحبنا عمل فيها بطل وقال لو هموت مش هتاخدوا مني حاجه وفضل يرفّس يمين وشمال.. والنتيجة اتضرب غزّتين بطريقة عشوائة كان ممكن تموّت لولا ستر الله
الخساير موبايل ومحفظة فيها مبلغ كبير.

اجمل حاجه بيكلم النجده.. قالوا في التليفون انت غلطان ايه اللي يمشّيك هناك الساعه واحده بالليل؟ كنت راجع من فين وبتعمل ايه؟

الحمدلله.

[فتح الباب]

انا عن نفسى ما فهمتش حاجه او هى ايه افضل طريقه لتفادى التثبيتولا انت قصدك عدم المقاومه لو كده قولى مكانك فين علشان اجى اثبتك طالما مش هاتقاوم

[engineer_Amr]

حمدلله على سلامته والحمد لله إنها جت على قد كده
ربنا يسترها علينا جميعاً

[hugan]

فعلا عدم المقاومه نهائي الحل اﻻسلم
في لحظه ممكن الحياه تروح

[accord]

في الاول الواحد يعمل اللي عليه يعني ميمشيش في حتت مقطوعة في اوقات متاخرة ولو حكمت الظروف ميشيلش فلوس كبيرة او اشياء قيمة وطبعا يفضل عدم مواجهة هذه المخلوقات لانها بتكون مغيبة بفعل البرشام والحشيش والقطران اللي بيتعاطوه الا بقى لو واثق انك هتتغلب عليهم سواء بسلاح او غيره وفي النهاية احنا عايشين في غابة ومحدش فاضي لحد حتى الشرطة زي ما ذكر الاخ الفاضل وربك يسترها

[afndina]

الحمد لله علي سلامته
الموقف اللي زي دي لازم تطلع منها باقل خسائر , لو انت اعزل ومعكش سلاح فمينفعش تقولي حقاوم وتعمل عنتر واللي يقلك انا لو مكانه كنت حعمل واسوي دا فنجري بوق . حالة واحدة دونها الموت الدفاع عن الشرف والحياة
الهدف من الموضوع السرقة فلو الخسارة شويه فلوس وماديات في داهية طالما انت واهلك بخير .

بالنسبة بقي للشرطة
افتكر مره سمعت حوار لاحد الظباط من القاهرة بيشتكي انه عربيته اتسرقت لما كان في اسكندرية وراح لقسم الشرطة هناك, الظابط قاله اتفاهم مع الحرامية

[أبو آسر]

في ظل دولة الفوضى وغياب القانون والشرطة اللي غيرت المهنة وبقوا شغالين مشخصاتية وسماسرة للتوسط بين قطاع الطرق والمواطنين فعلا أسلم حل هو عدم المقاومة وتسلم أمرك لله علشان لو حاولت تعمل فيها راجل هتاخد طلقة أو طعنة تنهي حياتك وملكش دية عندهم ومحدش هيجيبلك حقك
إلا بقى لو معاك سلاح واللي قدامك اضعف منك ومش معاهم سلاح يبقى الحل تفرغ فيهم الخزنة وتجري وملهمش دية

[wawamoha]

لا بصراحه الشرطه محترمه - حققوا معاه عن ايه سبب نزوله هناك - حفاظا عل روحه طبعا و تجنيبا للمشاكل ..

[ENG.MaRk]

أولاً حمداً لله علي سلامة أخو حضرتك ثانياً البلد دلوقتي مش أمان و هو أكيد عارف كدة كويس فبلاش يغامر بحياته و يمشي لوحده متأخر ... الصح فعلاً ماكنش يقاوم لأنه بدل ما يتاخد منه الحاجة بس اتضرب كمان و كان ممكن يروح فيها لا قدر الله ... للأسف البلد بقت ماشية بالبلطجة و الناس بقت تغلط و تبجح كمان لدرجة إن واحد ممكن يكسر عليك و تنبهه يشتمك ... نصيحة صغيرة بلاش حد يمشي اليومين دول من غير سلاح حتي لو اليكتريك بسيط

[أبو آسر]

أولاً حمداً لله علي سلامة أخو حضرتك ثانياً البلد دلوقتي مش أمان و هو أكيد عارف كدة كويس فبلاش يغامر بحياته و يمشي لوحده متأخر ... الصح فعلاً ماكنش يقاوم لأنه بدل ما يتاخد منه الحاجة بس اتضرب كمان و كان ممكن يروح فيها لا قدر الله ... للأسف البلد بقت ماشية بالبلطجة و الناس بقت تغلط و تبجح كمان لدرجة إن واحد ممكن يكسر عليك و تنبهه يشتمك ... نصيحة صغيرة بلاش حد يمشي اليومين دول من غير سلاح حتي لو اليكتريك بسيط

الجميل بقى إن الشرطة هنا بتفتكر انها شرطة وكده وبتشوف شغلها وممكن تحبس اللي ماسك إليكتريك أو مسدس صوت وتعرضه على النيابة لحد ما النيابة تقرر تحبسه وتعمله قضية سلاح أو تطلعه

[Anaslbda]

تحديث: كلمنا بوابين العماير هناك ووصلنا لمعلّم مخدرات كبير قعدنا معاه على قهوة وبلغناه اوصاف العيال وعرفهم على طول.. عيال سلّام ولا علّام حاجه كده,
المهم قال هيكلّم ابوهم وهيتفاوض على الموبايل والمحفظة بالكارنيهات اللي فيها مقابل الفلوس اللي سرقوها..
طيّب لو مرضيوش يا معلم؟ روح اعمل محضر ربنا معاك.

اكتر حد صعب عليّا جوز خالتي.. استاذ جامعي وقاعد على قهوة بيتفاوض مع شمحطجي ويقوله يا باشا ويا ريّس.
المضحك المبكي

[Secret-Man]

اتدرب Self defense

https://www.facebook.com/robert.paturel/videos/298165659927/

[ali ashraf]

مسدس الصوت

الجميل بقى إن الشرطة هنا بتفتكر انها شرطة وكده وبتشوف شغلها وممكن تحبس اللي ماسك إليكتريك أو مسدس صوت وتعرضه على النيابة لحد ما النيابة تقرر تحبسه وتعمله قضية سلاح أو تطلعه :e_braces[1]:

هو مسدس الصوت ممنوع و تتعمل له قضية؟ انا فاهم انه يجوز حمله بأعتبار انه مش سلاح؟

[Ah.Farid]

هى فين منطقة الطوب الرملى دة ؟ واية ظروفها

[lolnk]

والله بتكلم بجد وعن تجربة كمان

افضل الطرق هى تعليم رياضة قتالية وارشحلك المواى تاى واللى ما يعرفش المواى تاى هى افضل الالعاب القتالية المناسبة لقتال الشوارع بتعلب بكل جسمك ايدك ورجلك وكوعك وركبتك
انا لعبت مواى تاى 4 شهور ومن اول شهر مش قادر اوصفلك الثقة اللى بتكون فيك بتبقى ماشى مش همك حد لانك ببساطة بتعلم اقوى لعب واعنف لعبه قتالية تمارينك كلها عبارة عن فايت فمن خلال التمرين بتكتسب الثقة وايضا القوة

بتتعلم امور كتير اوى