جواز الصالونات و الخداع

[mody1982]

انا كنت عامل موضوع من مده كده عن اني كنت بشوف عروستين في نفس الوقت
الحمد لله استقريت علي واحده و اتفقت مع اهلها اتكلم معاها في التليفون شويه قبل اي شئ رسمي
المهم كان معظم الكلام نقاشات او هزار بسيك و بعده قررت اني اتقدم رسمي و هنروح نتقدم ان شاء الله
بس مش عارف ليه مش قادر اطمن 100 100
شويه احس انها طيبه و علي نيتها و شويه احس انها ممثله بارعه
شويه احس انها غلبانه و شويه احس انها بتمثل الغلب
هو مقيش حاجه تخليني اتيقن انها بتمثل بس يعني الواحد دماغه بتلعب
معروف ان جواز الصالونات اللي حد بيدلك حد لا يعرفه و لا يعرفك ده بيبقي فيه خداع كتير
انا بفكر اعمل قرايه فتحه شهرين بحيث اني اتعامل معاها اكتر
بس الملاحظات هي انها كانت بتتكلم معايا فترات طويله سواء علي الماسنجر او التليفون بس كنت انا اللي ببدء الحديث طبعا
و ده خلاني اسأل نفسي هي متعوده علي كده ولا لأ
و كانت بتتكلم معايا علي طبيعتها و بدون تحفظ بس بأدب و من غير اي خروج علي الاخلاق
بس برضه الواحد يا جماعه مش قادر يطمن
و مش عارف بيتخدع و لا ايه
ضيف علي كده انه المفروض انهم ناس مش بلدي رغم ان الاب و الام قبل الجواز كانوا من منطقه شعبيه
بس الصوره اللي شفناها انهم مش بلدي
بس خايف يبقي تمثيل برضه و رسم
السؤال ازاي الواحد يكتشف لو في خداع و هل فتره قرايه الفاتحه كده مناسبه ولا نطولها شويه
من ضمن المشاكل اني حاسس ان البنت اتعلقت بيا شويه و ده برضه ممكن يبقي تمثيل بس هنفترض انه صحيح و ده مخليني قلقان اني لو اكتشفت حاجه و حبيت انفد بجلدي هبقي بسبب ليها اذي نفسي كبير
عموما محتاج نصايحكم مهما كانت قاسيه او ضدي مش شرط تبقي معايا يعني بس اي رأي مرحب بيه

[Secret-Man]

اعرض عليها مواضيع معينه وخد رايها وهتعرف وجهة نظرها وتفكيرها فى حاجات كتير وهيبان ده تمثيل ولا متوافق مع طبيعتها

[mk3]

يا عم دى بطيخه فى كل حاجه
متشغلش نفسك
بطيخه فى (كل حاجه)

[عﻻء سالمان]

بنات الناس مش لعبة

اﻻيام تدور بسرعة وبكرة بنتك يجيلها حد يدخل حياتها ويتكلم بنفس الطريقة ويحطك انت ومراتك تحت الميكرسكوب.. ودايما شكاك ونظرية المؤامرة والخداع .. وسواس على طول فى دماغة هتكون مبسوط بشخصية زى دى؟هتكون مطمن على بنتك لو كملت مع شخصية زى دى ..انت ليك حل من اتنين اﻻول انك تكون مع ربنا على طول وصادق النية ومتوكل يهديك للصواب ..والحل التانى انك محتاج تناسب اسرة تتنك عليك وتحسسك انك اقل منهم..وبنتهم تكون خبرة فى التقل والتناكة..سعتها يمكن اﻻمور تظبط.. كنت اعرف ولد وحيد وعلى قدر من الوسامة واتدلع كتير لحد ما اصبح شخصية تعتقد انها كتير على اى بنت..لحد ما اتعامل مع ناس اتنكت علية وفهمتة انة مش فارق معاهم ..لزق فيهم وبقى طوعهم وبقى يلبس اشيك ماعندة قبل ما يزورهم.. الزواج حلم كل فتاة .. لكن استحﻻل الكﻻم الخاص معاها قبل اﻻرتباط الرسمى امر يرفضة اى حد ملتزم..واحنا فى فترة كل شيء فيها واضح صفحة الفيس مثﻻ بتعكس كتير من شخصية صاحبها..السؤال على البنت فى الجامعة او مكان شغلها .. واخيرا لو البنت مش مالية عينك متكملش جايز ربنا كاتبلها واحد احسن منك وكاتبلك واحدة انسب منها او العكس.. ربنا يوفقك ومتظلمش غيرك وﻻ تظلم نفسك

[tasaka]

السؤال ازاي الواحد يكتشف لو في خداع و هل فتره قرايه الفاتحه كده مناسبه ولا نطولها شويه
من ضمن المشاكل اني حاسس ان البنت اتعلقت بيا شويه و ده برضه ممكن يبقي تمثيل بس هنفترض انه صحيح و ده مخليني قلقان اني لو اكتشفت حاجه و حبيت انفد بجلدي هبقي بسبب ليها اذي نفسي كبير
عموما محتاج نصايحكم مهما كانت قاسيه او ضدي مش شرط تبقي معايا يعني بس اي رأي مرحب بيه

اولا :
لازم لازم لازم .. كتب الكتاب لا يتم قبل اقل من سنه على الاقل .. دى اقل فتره ممكنه علشان تعرف تفكيرها و طباعها .. وعلشان هى كمان تعرفك وتفهم اللى جاى ايه و تقرر لنفسها

انعدام التوافق فى الفكر و المبادئ و الطباع .. نهايته محتومه .. الطلاق



ثانيا :
هام جدا جدا .. لا تتحدث كثيرا و لا تدعها تعرف تفكيرك او رأيك ازاء اشياء معينه تهمك .. و ستضطر هى لبدء الحديث لكسر الجمود .. و حينها اجعل ردودك مقتضبه و غير واضحه ( تحتمل الموافقه او الرفض ) .. هذه طريقه جيده تشجعها على ان تعبر عن اراءها الحقيقيه بصراحه ( ان هى كانت من النوع الحذر )

فتره سنه كافيه لانها لن تستطيع التصنع و الحذر طوال هذه الفتره .. و عندما ترغب فى معرفه رأيها فى امر فاصل بالنسبه لك .. يجب ان تصبر لفرصه مناسبه ثم توجه دفه الحديث عرضيا لهذا الموضوع ( بدون ان توضح لها اهتمامك او رأيك فيه )

و تذكر ما ساقوله لك الان جيدا .. الصمت لا يعنى القبول .. بل على الارجح هو تأجيل للمواجهه فى هذا موضوع النقاش لوقت آخر ( هو طبعا حتى اتمام الزواج او كتب الكتاب ) .. بمعنى ان الصمت هو اقرب كثيرا للرفض من القبول اثناء النقاش فى موضوع معين .. و انت يجب عليك حينها ان تبنى حساباتك على انها رافضه لهذا الموضوع ( حتى لو هى لم تقل ذلك صراحه ) .. و اتخذ قرارك



ثالثا :
خطأ فادح جدا جدا جدا .. ان تقرر الزواج من انسانه فقط لانك خايف انك تؤذى مشاعرها لما تسيبها لانك لا تريدها .. او مثلا الزواج منها رحمه بها

و انت بهذا تكون اخطأت فى حق نفسك اولا .. ثم فى حقها ثانيا لانك بدلا من ان تتركها ( مخطوبه سابقا ) .. ستتركها مطلقه و ربما يكون هناك اطفال و هنا تكون الطامه الكبرى

و لانك اصلا لا تحبها و لا تريدها .. فأنك بعد الزواج لن تتقبل اخطاءها ( لان المحبه و المشاعر هى التى تجعلك تتجاوز عن هذه الاشياء ) .. و حينها انت ستندم على تضحيتك التى لم تجد عرفانا بالجميل من زوجتك
و اصلا هى بعد الزواج ستحس و تعرف حقيقه مشاعرك نحوها ( انك لا تحبها ) مهما كانت معاملتك معها جيده
االنتيجه الطلاق ( و لن يكون هذا منك .. بل سيكون بطلبها و رغبتها هى ) ..

لا تقلق كثيرا على مشاعر الانثى .. هم اكثر عملانيه منا .. و ليسوا بالضعف الذى تتصوره
و ان كان الامر معكوسا .. لن تتردد المرأه لحظه واحده فى رفض العريس بغض النظر عن الايذاء النفسى له

رابعا :
و نصيحه لا تتزوج امرأه عنيده نهائيا .. مهما كانت ميزاتها او اخلاقها .. لا تلزمك ابدا .. و خصوصا لو كنت عصبى المزاج او غير صبور

[Abo_Mazen]

أنا ليه تحفظ ..معلش أصل أخوكم متخلف رجعي متشدد متزمت


يعني إيه أتكلم مع واحده في التليفون وعلى الماسنجر حتى لو بعلم أهلها ومفيش أي علاقة ذات صفه أصلا بيننا وبعدين في الآخر بقى بعد ما أكون إتكلمت وهي إتكلمت وكل واحد فينا طبعا أبرز أفضل ما عنده أبقى آخد قرار إذا كنت هخطبها ولا لأ ..وإزاي القرار ده هيكون مبنى على أسس عقليه ذات معنى حقيقي ..ده أنا ما أقعدتش مع خطيبتي ..اللي هي زوجتي حاليا وأم أولادي ..ما أقعدتش معاها لوحدنا غير بعد ما كتبت عليها ..وطول فترة الخطوبه كنا بنبقى قاعدين وحمايا ولا حماتي قاعدين وسطنا ...وكنت لما أخرج معاها لوحدنا وأنا كاتب عليها كان حمايا يتابعنا بالتليفون ..وصلتوا فين .؟؟..جايين إمتى ؟؟...متتأخروش ..حاولوا تيجوا بدري ..تعالو كملو خروجتكم في البيت هنا أحسن ...

معقولة الزمن إتغير بسرعة كده ..ده الكلام اللي أنا بقوله ده من 8 سنين بس ..سبحان الله يا أخي ..ما هو يا الأيام بتجري والزمن إتغير قوي ..يا إما أنا جاي من الأزمان الغابره

معلش أنا بفكر بصوت عالي مش أكتر

[عﻻء سالمان]

أنا ليه تحفظ ..معلش أصل أخوكم متخلف رجعي متشدد متزمت


يعني إيه أتكلم مع واحده في التليفون وعلى الماسنجر حتى لو بعلم أهلها ومفيش أي علاقة ذات صفه أصلا بيننا وبعدين في الآخر بقى بعد ما أكون إتكلمت وهي إتكلمت وكل واحد فينا طبعا أبرز أفضل ما عنده أبقى آخد قرار إذا كنت هخطبها ولا لأ ..وإزاي القرار ده هيكون مبنى على أسس عقليه ذات معنى حقيقي ..ده أنا ما أقعدتش مع خطيبتي ..اللي هي زوجتي حاليا وأم أولادي ..ما أقعدتش معاها لوحدنا غير بعد ما كتبت عليها ..وطول فترة الخطوبه كنا بنبقى قاعدين وحمايا ولا حماتي قاعدين وسطنا ...وكنت لما أخرج معاها لوحدنا وأنا كاتب عليها كان حمايا يتابعنا بالتليفون ..وصلتوا فين .؟؟..جايين إمتى ؟؟...متتأخروش ..حاولوا تيجوا بدري ..تعالو كملو خروجتكم في البيت هنا أحسن ...

معقولة الزمن إتغير بسرعة كده ..ده الكلام اللي أنا بقوله ده من 8 سنين بس ..سبحان الله يا أخي ..ما هو يا الأيام بتجري والزمن إتغير قوي ..يا إما أنا جاي من الأزمان الغابره
الله ينور وانا نفس النظام .. ومافيش اجمل من كدة
معلش أنا بفكر بصوت عالي مش أكتر

الله ينور وانا نفس النظام كمان ومن نفس الفترة تقريبا وهودة الى اتمناة لبنتى فى المستقبل مهما الزمن اتغير

[volociximab]

هى بطيخة
اتق الله و اسأله التوفيق

[dede_dodo88]

الواحد بيقرأ شوية آراء هنا بتحسسني بصدام حضارات رهيب. lol

عموماً, انا ضد فكرة جواز الصالونات لنفس الاسباب اللي بتتكلم فيها. خصوصاً ان البنات عندهن قدرة بارعة على التمثيل و اخفاء شخصياتهن الحقيقية, و اخص بالذكر المصريات بطبيعة المجتمع السطحي اللي بنعيش فيه اللي مبيهتمش غير بالمظاهر..

[mr_vampire]

مقوله قريتها وعجبتني فقولت اهديها لاصدقائي فالمنتدي خاصة وللشباب عامة يمكن تكون سبب لثواب او دعاء.

( لا تتلاعب بفتاه انحني ظهر ابيها في بناءها حتي تصل الي ماهي عليه الان. حتي لا ياتي من يهدم بناءا انحني ظهرك في بناؤه ).

ورمضان كريم عليكم جميعا.

[memoo305]

هو انت اصلا دحولك على موضوعين في نفس الوقت وعمل مقارنة بين بنتين بتشوفهم في نفس الوقت خطأ . انت يافندم مش بتشتري حاجة من السوبر ماركت. مش هقولك تخيلها بنتك او أختك .هقولك تخيل الوضع العكس أن بتتقدم لواحدة وهي بتفاضل ما بينك وبين واحد تاني منقدملها في نفس الوقت .أحساسك أيه....
تقبل مروري

[micromoud]

مقوله قريتها وعجبتني فقولت اهديها لاصدقائي فالمنتدي خاصة وللشباب عامة يمكن تكون سبب لثواب او دعاء.

( لا تتلاعب بفتاه انحني ظهر ابيها في بناءها حتي تصل الي ماهي عليه الان. حتي لا ياتي من يهدم بناءا انحني ظهرك في بناؤه ).

ورمضان كريم عليكم جميعا.

هو فى حد فى الزمان ده بيعرف يتلاعب بفتاة؟

[Dr_Smart]

هو فى حد فى الزمان ده بيعرف يتلاعب بفتاة؟

[Abo_Mazen]

آه فيه ..بنات الناس كتير ...

[mody1982]

في البدايه احب اشكر من رد عليا
ثانيا بالنسبه لموضوع التواصل بيني بينها من غير شئ رسمي انا عارف انه مش مقبول بمعايير كتير بس هو بقي حاجه كده من الاعراف اللي موجوده في جواز الصالونات و ظهرت من 4 سنين مثلا نتيجه نسبه الفشل في الجواز المرتفعه في المجتمع فالناس بقت تدي نفسها وقت للكلام و التعارف اكتر حتي قبل قرايه الفاتحه او الخطوبه
طبعا انا مش هتكلم عن كل الناس بس انا و ربنا يعلم بتكلم معاها كأني بتكلم مع واحد صاحبي
ثالثا للناس للي بتلومني علي قلقي يا جماعه انا خايف من الفشل في الزواج او اني ابقي اسأت الاختيار و اتخدعت في الناس اللي هناسبهم او ان البنت تكون بتمثل انها طيبه
اساسا اكتر حاجه قلقاني منها انها بتتناقش كتير ده قالقني انها تبقي عنيده او غير مطيعه بعد الجواز رغم ان كلامها ان هي شايفه ان الطاعه للزوج مفروضه عليها من ربنا
هي بتصلي و ملتزمه و متدينه بس دي اخلاقيات و تبقي الطباع هي اللي الواحد مش عارف يكتشفها
انا لا عايز العب بحد و لا بعمل حاجه تغضب ربنا انا عايز اتجوز و يبقي اختياري صح
و مطلوب مني اتجوز واحده لا اعرفها و لا اعرف اهلها خالص و لا اعرف اللي جايبنهم لينا بالظبط كأني مقابلهم في الشارع و بقولهم اتجوز بنتكم
و بالنسبه لموضوع الكلام الكتير انا اعتقد اني اتكلمت كتير فعلا ( مكنتش اعرف اني المفروض متكلمش )بس علشان اوضح
اللي انا متوقعه و الثوابت اللي عندي اللي متتغيرش
اخيرا يا جماعه انا كاتب الموضوع علشان الناس تساعدني بخبرتها في ازاي الانسان يكتشف اللي قدامه بيخدعه و لا لأ او ازاي يكتشف صفه الشخص ده بيحاول يخبيها علشان تبقي مقتنع بيه و بعدين تبقي بعد الجواز لبست و خلاص