النهارده امريكا اكتشفت كوكب جديد و احنا لسه بنشتم في بعض بسبب الاهلي و الزمالك

[Bassem Youssef]

اكيد كلنا سمعنا عن الموضوع ده

بدون دخول في تفاصيل

امريكا من 200 سنه لم يكن لها وجود علي الخريطه اساسا و شوف وصلوا لايه

احنا كعرب و خصوصا مصر موجودين من الالاف السنين و في دول مننا قربت تتمسح من الخريطه

احنا كمصريين مش لاقيين ميه نضيفه في الحنفيه و بندور الضرب في بعض بسبب خلافات سياسيه تافهه او بسبب لعبه جوكر علي القهوه

هما اخدوا العلم اللي وصله العلماء المسلمين زمان و كملوا عليه و شوف وصلوا لايه و احنا وقفنا محلك سر و كل همنا الجنس و الرقص و التفحيط بالعربيات و تشجيع الكوره العربيه المقرفه و الشتيمه في بعض و خلاص

الحل هو ان الشباب اللي بيفهموا ياخدوا فرصه و العواجيز اللي قاعدين علي الكراسي ملهمش لزمه يمشوا

الحل هو تخصيص مبلغ كبير للبحث العلمي و الله مصر و الدول العربيه فيها نوابغ و علماء بس مش اخدين فرصتهم صح

الحل استغلال كل الموارد اللي عندك عشان تجيب فلوس ... الفلوس هي اللي هتخليك تنهض بجانب العلم و التكنولوجيا

[eng_amg]

طيب هو كوكب ايه الي اكتشفوه؟
وداخل المجموعة الشمسية ولا في المجرة ولا فين؟
ياريت معلومات علشان مش متابع غير رحلة نيوهاريزون اخر حاجة.

[wallace]

طيب هو كوكب ايه الي اكتشفوه؟
وداخل المجموعة الشمسية ولا في المجرة ولا فين؟
ياريت معلومات علشان مش متابع غير رحلة نيوهاريزون اخر حاجة.

دا كوكب بيقولوا ان طبيعتة تشبة الأرض لكن هما ميعرفوش اي معلومات لما يحتوية ,لكن هو في مجموعة شمسية تانية تتبع نجم أخر يشبة الشمس بس اكبر شوية من شمسنا ,وحتي الكوكب دا اكبر من الارض ب 60%

لو عايز تعرف معلومات اكتر ممكن تقرأها هنا (معرفش قوانين المنتدي تسمح ولا لا بس عذراً لو كانت متسمحش انا معرفش)

الباحثون السوريون - مهمة Kepler التابعة لـ NASA تؤكد اكتشاف أحد الأقرباء الأكبر حجما للأرض

[الاسد المهاجر]

مصر خسرت راجل ونعمه الراجل رجل الناسا الرجل الذي كان يعمل في الناس وخاف من الحسد وكدب الخبر

مصر المشكلة في شعبها لو كان شعبها موثقف فعلا مكنش تجار الدقون ضحكو عليه وخسروهم سنه

[dede_dodo88]

هل فعلاً ممكن تتواجد حياة في كوكب تاني ؟!
هممم,, موضوع يدعو الي التأمل..

[Karim Alaa]

مصر خسرت راجل ونعمه الراجل رجل الناسا الرجل الذي كان يعمل في الناس وخاف من الحسد وكدب الخبر

مصر المشكلة في شعبها لو كان شعبها موثقف فعلا مكنش تجار الدقون ضحكو عليه وخسروهم سنه

يا اخ مهاجر يالله عليك الرد ده ايه علاقته بالموضوع ؟ بالله عليك بلاش الردود الى بتحول مسار الموضوع و المفروض انى بكره الاخوان و مؤيد للجيش و النظام الحالى و الرد استفذنى ياريت عشان خاطر النبى بلاش رد حارج سياق الموضوع

[ahmed_eng2001]

coy from Shady abd el hafez page on facebook

بمناسبة إعلان ناسا عن وجود كوكب Kepler-452b اللي شبه الأرض خلونا نوضح كام نقطة قبل سيل التعليقات المهول:
1- الكوكب بيتصنف تحت عنوان "Exoplanet" , كوكب خارجي , ...يعني خارج المجموعة الشمسية, بيدور حوالين نجمة عمرها أكبر من الشمس ب 1.5 مليار سنة و المسافة بينا و بينها 1400 سنة ضوئية !!
.
2- السؤال التقليدي: ازاي ناسا قدرت تصور كوكب على المسافة دي كلها ؟ التلسكوب كيبلر راح هناك ؟
.
لأ طبعا مستحيل يروح هناك, و مستحيل نصوره , لكن بنشوفه, مش بعنينا لكن بقوانين الفيزيا, خلينا نتخيل ان فيه لمبة منورة اصفر في وشك , قوم بقا عدينا بلية حديد قدام اللمبة دي, هتحس ان ضوء اللمبة قل شوية, هوا ده التيكنيك اللي بنكتشف بيه الكواكب دي, لما ضوء النجم يتغير بنمط معين يبقا فيه كوكب بيعدي من قدامه, من هنا مش بس بنعرف ان فيه كوكب, كمان بنعرف حجمه اللي بيتناسب مع كمية الضوء دي, و كذلك نصف قطر مداره لما الكوكب بيعدي قدام النجم مرتين ورا بعض
.
لذلك: الصورة المنتشرة عن الكوكب ده تخيلية, و غالبا هتنتشر في الفيس بوك العربي على انها حقيقية, علشان اللايكات زي ما انتا عارف
.
إضافة : ده مش اول كوكب نكتشف وجوده بيدور حوالين نجم, لا فيه مئات, الميزة انو ده اقرب في مواصفاته من الارض و مدارها و و نجمه قريب من الشمس ..
.
3- هل بنعرف نشوف النجمة طيب؟ و ازاي بنعرف عمرها و كتلتها و هيا بعيدة جدا جدا كده؟
.
أي نجمة بتظهر في اي تلسكوب كنقطة, لكن علشان نعرف حرارة أو كتلة او نوع او عمر نجم ما فده برضك بنشوفه بقوانين الفيزيا, خلينا نتخيل ان الضوء اللي جاي من أي نجمة ده عبارة عن كتاب ضخم مليان معلومات عن النجمة دي, مش بنستقبله بعدسة و لا مراية بنستقبله بـ سبكترو سكوب , بيعطينا كم ضخم من المعلومات عن العناصر اللي ف النجم ده , يعني لو فيه هيدروجين كتير يبقا حديث السن, فيه هيليوم كتير يبقا الهيدروجين بتفاعل اندماجي تحول لهيليوم, فيه حديد يبقا بقاله كتير عايش لدرجة اننا وصلنا في خط التاحولات من الهيدروجين للحديد و هكذا, كذلك فيه خاصية للنجم اسمها الLuminosity او الضياء بالعربي , دور عليها لو تحب و توسّع
.
4- ايه الفايدة لما نعرف عن كوكب شبيه بالارض؟
و الله الفوايد كتير بالاضافة لاعطائنا قدرة اكبر على سبر اغوار المجهول و اعطاء ناسا قوة عظيمة ناعمة و غير ناعمة, على سبيل المثال لا الحصر ده ممكن يضيق دايرة بحثنا عن حياة عاقلة, كذلك بيعطينا فرصة أكبر لدراسة انظمة زي نظامنا , القوانين الفيزيائية مش بس بتمكنا من معرفة وجود الكوكب ده او لا, لكن كمان في بعض الاحيان ممكن تمكنا من معرفة لون الكوكب نفسه !
.
5- ممكن نسافر للكوكب ده؟
أه طبعا, بس هناخد حوالي 29 مليون سنة على ما المركبة توصل, لذلك خد أكل كفاية معاك و بامبرز علشان الولاد

[volociximab]

سبحن من خلق
كوكب على بعد 1400 سنة ضوئية
كوكب الارض بمن عليه مثل حبة رمل فى هذا الكون-وجودها كعدمها
فلينكسر المتكبرون

[Forever.Leo]

ناسا عماله تقول كلام كتير على الكوكب ده .. بس مطنشة المية .. هو من الآخر الكوكب ده في مية و لا لاء ؟!

[mr_vampire]

مصر خسرت راجل ونعمه الراجل رجل الناسا الرجل الذي كان يعمل في الناس وخاف من الحسد وكدب الخبر

مصر المشكلة في شعبها لو كان شعبها موثقف فعلا مكنش تجار الدقون ضحكو عليه وخسروهم سنه

ونرجع نقول الناس اللي مبتحبش مصر وبيدخلو يبوظو اي موضوع وده منتدي سيارات مش سياسة.

ههههههههههه ده الهسهس كتير اوي.

[Bassem Youssef]

المسافه بين كوكب الارض و كوكب كيبلر 29 مليون سنه

يدوب الحق احضر شنطتي :d

[ahmed_eng2001]

ركز اوى واقرأ بدون إحباط انا مش قاصد ازعلك:
مش هنروح كيبلر , لأ مش علشان الغرب بيكرهونا , وأحنا مالناش لازمة في الحياة والكلام ده , بس أحنا فعلا مش هنروح كيبلر ...على الأقل في الوقت الحالي , وأوقات تانية كتير جاية ..
من ساعات فاتت , أعلنت وكالة ناسا عن أكتشاف كوكب كيبلر 452b , وقالت ناسا ان الكوكب ده أقرب كوكب شبيه للأرض , حجمة بيزيد عن حجم الأرض بحوالي 60 % , يبعد مسافة عن شمسه تقريبا زيادة 10% بس عن المسافة اللي بيبعدها كوكب الأرض عن شمسنا والسنة عليه حوالي 385 يوم , ناسا قالت أن الكوكب بيتمتع بطقس مُعتدل وده بيزيد من أحتمال وجود المياه عليه , وهي العنصر الرئيسي في الحياة ..
الكلام كله كويس وجميل , ماعدا معلومة واحده وقفت عندها , وهي ان بعد الكوكب الجديد اللي كل الناس فرحانة بيه دلوقتي حوالي 1400 سنة ضوئية بس , وبس دي حط تحتها ألف خط ..
كلمة فقط اللي اتقالت في الاعلان بتاع ناسا , أظن انها جملة عادية , زي ما واحد بيروح يكتب شيك مثلا , فيكتب 5 الأف جنية مصري فقط لأ غير , علشان يحدد قيمة الرصيد ..
المصريين اللي شوفت تعليقاتهم , واللي لقيت منهم اللي بيجهز شنطة هدومه علشان يسافر , بيتعامل مع كلمة فقط , على أساس انه هيركب من موقف عبود بعد الفجر لو كانت متسحر , بحُكم اننا في أيام مفترجة يعني , فيوصل قبل الفطار ..
ميعرفش ان السنة الضوئية دي , وحدة أتعملت لما بدأ العلماء يعجزوا قدام المسافات الضخمة بين الكواكب وبعضها , فقرروا انهم يجيبوا وحده قياس كبيرة , تتناسب مع المسافات الكبيرة دي , فأختاروا يقيسوا المسافات عن طريق سرعة الضوء , أو بمعني أصح المسافة اللي بيقطعها الضوء في سنة واحدة ..
ده هيودينا لنقطة تانية الا وهي , سرعة الضوء حوالي 300 ألف كيلو متر في الثانية الواحدة , الضوء بيقطع 18 مليون كيلو متر في الدقيقة , وبيقطع في سنة واحدة , واعتذر عن بشاعة الرقم 9,460,730,472,580,800 متر , يعني حوالي 9.46 تريليون كيلومتر ..
نيجي بقي للنقطة اللي عايز اتكلم عنها بشكل أساسي , وهي زمن الرحلة من الأرض بتاعتنا للأرض الجديدة " كوكب كيبلر " ..
يذكر هنا أن كوكب كيبلر , اكتشف عن طريق مسبار كيبلر , وأحب أعرفك ان حمادة هلال مش شغال في وكالة ناسا ..
المسبار ده , ابتدي شغل مع ناسا من حوالي 6 سنين , بكلامهم أكتشف الأف الكواكب , كيبلر 452b , زي ما قولنا أقرب كوكب شبيه بأرضنا ولكن ..
كما جرت العادة وكما تعودنا وكما سمعنا من اساتذتنا في الثانوية العامة , او حتي في الكليات , ان الشمس اللي أحنا بنشوفها حاليا مش شمسنا فعلا , ولكن هي صورة عنها , متأخرة بحوالي 8 دقايق وهي زمن رحلة شعاع الشمس , من الشمس , للأرض ..
فاذا عرفنا , ان ضوء القمر بيوصلنا في خلال ثانية واحدة , و المسافة بين القمر والأرض حوالي 384,400 كم , وأن متوسط زمن الرحلات بين الأرض والقمر كانت حوالي 3 أيام ..
فابلقياس لو فكرنا نسافر للشمس اللي المسافة بينا وبينها 8 دقايق ضوئية فقط , هتستغرق مننا 3 أيام للثانية الواحدة , يعني 3 * 60 ثانية * 8 دقايق = 1440 يوم يعني الرحلة هتستغرق حوالي 4 سنين , علشان نروح للشمس اللي بتبعد عننا 8 دقايق ضوئية ..
وبالقياس للمرة التانية , هنحتاج حوالي 3 * 60ثانية * 60دقيقة * 24ساعة * 30 يوم *12 شهر * 1400 سنة = 130636800000سنة من بتوعنا , علشان نوصل للأرض الجديدة , ولكن دعوة للتفائل ..
أبحاث اينشتاين في النسبية , بتقول أن أقصي سرعة مُمكن جسم يتحرك بيها لن تتعدي سرعة الضوء , حتي لو كانت سرعة نسبية بين جسمين كل منهم بيتحرك بسرعة الضوء , فبرضو مجموع السرعتين طبقا للنظرية النسبية , لن يتعدي سرعة الضوء ..
وبناء عليه , لما يتطور العلم ان شاء الله مش هنحتاج 4354560000 سنة علشان نوصل لكيبلر , هنحتاج 1400 سنة بس علشان نوصل !!
وبناء عليه للمرة التانية , روح رجع هدومك تاني في دولابك , وبوس أيد أمك " الأرض " علشان لحد دلوقتي , ولحد أزمنه كتير جاية , أنت ملكش غيرها ..
الكلام منقول

[Bassem Youssef]

1400 سنه بس ؟؟؟ لا بسيطه :d

[kemoelord]

يا باشا احنا عمرنا ما هنكون زي الناس لا في ثقافتها ولا في علمها ولا فيه مستواها المعيشي والفكري ، احنا امة ضحكة من جهلها الامم، الناس دي بتفكر باسلوب مختلف لدرجة لما بشوف انجازتها مش بعرف بيبقى ايه الغرض منها وليه بيصرفوا مليارات علشان يوصلوا للي عاوزين يوصلوله وايه الحكمة وراء كدا ؟!! والاهم ان حياتهم مليانه بالانجازات وعمرهم ما بالغوا ولا اتنططوا ع القنوات الفضائيه والصحف والاعلام احنا واحنا واحنا ولا لاقيت انهم بينسيوا الانجازات دي للرئيس الامريكي ايا كان هو مين ع اعتبار انه راعي البحث العلمي والرئيس الاعلى لمجلس ادارة وكالة ناسا ، نااااس فكر تاني او بمعنى اصح هما بحد ذاااتهم كوكب تاني يعني انا بعتبر ان فيه ٣ كواكب داخل كوكب الارض ( امريكا-اوروبا - اليابان)