إجراءات الطلاق

[Ibrahim12345]

السلام عليكم ورحمة الله وبركاته
انا عضو معاكم هنا بس عامل عضويه مختلفه للموضوع ده فقط

سؤالى عن إجراءات الطلاق بدون الدخول فى تفاصيل وبدون النصح بأن أبغض الحلال عند الله الطلاق
انا طلقت زوجتى فى التليفون منذ شهرين
وأريد ان اوثق الطلاق عند مأذون
هل لو بعت ليها ورقتها كطلاق غيابى هل يوجد ضرر عليا مع العلم انى هديها القائمه كامله والمؤخر وكل حقوقها لاننى الحمدلله اتحرى الحلال فى كل تعاملاتى
والسؤال الاهم هل يمكن تنازل الام عن حضانة الاطفال بورق موثق يعنى عند محامى
وهل عند تسليمها الاثاث الموجود بالقائمه ما هل الجمله اللى تكتب على القائمه بانها استلمتها فى حاله جيده وفقط ولا لازم عند محامى تنكتب اصيغه معينه ولو كده بروح لمحامى تخصص احوال شخصيه ام تخصص ايه

[mk3]

متابع

[mody1982]

القايمه دي جايبه الناس ورا
ممكن يقرفوك بيها و يقولوا مخدناش العفش و هما واخدينه
رأيي
غير مفاتيح البيت لحد ما تتفق معاهم علي الانفصال واحد صاحبي مراته راحت خدت العفش كله و عملت ليه محضر تبديد منقولات علشن تسجنه

[Abo_Mazen]

هو توثيق الطلاق عند مأذون مفيهوش أي مشكلة ..عادي جدا ..وكمان مفيهوش أي ضرر عليك غير إنها هتعود عليك بحقوقها من قايمه ومؤخر ونفقه وغيره وغيره وغيره

حكاية بقى إن هي إستلمت المنقولات دي بيتكتب بيها ورقه وحد من أهلها يمضي شاهد ..يكون أبوها وأخوها مثلا يمضوا شهود إن هي إستلمت المنقولات في حالة جيده ..

التنازل عن الحضانة بيكون قدام القاضي

دي معلوماتي والله أعلم

[Fo1Fo]

تسليم المنقولات بمحضر رسمى فى قسم الشرطه . وفى حاجه أسمها عرض منقولات اذا كانت رافضه الأستلام وده بيتم عن طريق أنذار على يدمحضر . والطلاق عند المأذون نوعان حضورى للطرفين بيتم فيه أبراء زمه الزوج من التزاماته (كلها او تقر باستلام جزء منها ) امام مطلقته ( مؤخر الصداق ونفقه المتعه (3 شهور ) ونفقه سنه او سنتين حسب القاضى وده أذا كانت الزوجه بايعه بالبلدى كده . ولا تنازل عن نفقه الأولاد اوحق الأم فى حضانه الأطفال. او غيابى عند المأزون وفى الحاله دى تم حصر عدد القواضى اللى ممكن ترفعها المطلقه على زوجها وصلو ل11 قضيه ( مؤخر صداق نفقه متعه . نفقه سنتين . تبديد منقولات . نفقه أولاد .نفقه تعليم .علاج .......... الخ نصيحه اذا كانت الزوجه هى اللى بايعه او تصرفاتها هى اللى أدت الى خراب البيت فى الحاله دى لازم وجودها امام المأزون ويكون الطلاق حضورى وبأبراء ( طلقق ابراء زمه الزوج ) واذا رفضت تبقى تروح هى المحكمه تطلب الطلاق . اما اذا كان الراجل هو اللى بايع فى الحاله يمكن الطلاق غيابى عند الماذون ويكون مستعد لأعطائها كافه حقوقها القانونيه والشرعيه .

[Ibrahim12345]

تسليم المنقولات بمحضر رسمى فى قسم الشرطه . وفى حاجه أسمها عرض منقولات اذا كانت رافضه الأستلام وده بيتم عن طريق أنذار على يدمحضر . والطلاق عند المأذون نوعان حضورى للطرفين بيتم فيه أبراء زمه الزوج من التزاماته (كلها او تقر باستلام جزء منها ) امام مطلقته ( مؤخر الصداق ونفقه المتعه (3 شهور ) ونفقه سنه او سنتين حسب القاضى وده أذا كانت الزوجه بايعه بالبلدى كده . ولا تنازل عن نفقه الأولاد اوحق الأم فى حضانه الأطفال. او غيابى عند المأزون وفى الحاله دى تم حصر عدد القواضى اللى ممكن ترفعها المطلقه على زوجها وصلو ل11 قضيه ( مؤخر صداق نفقه متعه . نفقه سنتين . تبديد منقولات . نفقه أولاد .نفقه تعليم .علاج .......... الخ نصيحه اذا كانت الزوجه هى اللى بايعه او تصرفاتها هى اللى أدت الى خراب البيت فى الحاله دى لازم وجودها امام المأزون ويكون الطلاق حضورى وبأبراء ( طلقق ابراء زمه الزوج ) واذا رفضت تبقى تروح هى المحكمه تطلب الطلاق . اما اذا كان الراجل هو اللى بايع فى الحاله يمكن الطلاق غيابى عند الماذون ويكون مستعد لأعطائها كافه حقوقها القانونيه والشرعيه .

الزوجه بايعه ومش عاوزه العيال بس لو ينفع تتنازل عنهم بورقه يبقى افضل لانى متوقع من حالات مشابهه انها تخدهم كنوع من العند عند الطلاق او عند الزواج بأخرى

اللى فهمته من حضرتك ان لو طلقت عند مأذون طلاق إبراء ذمه فمش لازم اسلم العفش فى القسم هل صح كده ولا ايه



السؤال الاخر بعد إذنك حضرتك بتقول لو رفضت الطلاق حضورياً تبقى تروح المحكمه تطلب الطلاق
فما هى حقوقها فى هذه الحاله

[samyyousef]

بناء على طلبك بعدم النصيحة و خلافة انا احترم هذا الطلب لان كل واحد ادرى بظروفه
لكن هناك نصيحة اخرى بخصوص كيفية الطلاق....لو تسمح لي بها
لو طلقتها غيابي و بدون اتفاق و بدون سلام فستواجه اولا دعوى نفقة زوجية من تاريخ بدء الخلاف ثم سيعقبها دعوى نفقة عدة ثم يليها دعوى متعة ثم دعوى مؤخر صداق
اما بالنسبة للاولاد ستطلب عنهم نفقة طوال الفترة التي كانوا فيها معها
لذلك انا انصحك بان يتم الطلاق باحسان في حضور ذوو الحكمة من اهلها و ان تتفق على كل صغيرة و كبيرة و ان تتحلى باعلى درجات المرونة و التسامح حتى لو خسرت بعض المال....لان عواقب الطلاق اكثر خسرانا.....وخد بالك من موضوع انها بايعة و عاوزة تسلمك الاولاد....لان الموضوع ده فيه كلام و ممكن ترجع في كلامها....و الموضوع مرتبط بحق الاولاد الصغار اكتر من حقها هي

[Fo1Fo]

( اللى فهمته من حضرتك ان لو طلقت عند مأذون طلاق إبراء ذمه فمش لازم اسلم العفش فى القسم هل صح كده ولا ايه )طلاق أبراء الزمه من المؤخر ونفقه المتعه ونفقه العده فقط وليس قائمه المنقولات . للأسف قائمه المنقولات دى زيها زى أيصال الأمانه بالظبط . (السؤال الاخر بعد إذنك حضرتك بتقول لو رفضت الطلاق حضورياً تبقى تروح المحكمه تطلب الطلاق
فما هى حقوقها فى هذه الحاله )فى المحكمه بيبقى طلب الطلاق لسبب مقبول ( الضرر ... والأسباب كتيره وأولها عند الستات انه ما بيعرفش ........ ) بس فى الحاله دى اذا حكمت لها المحكمه بتاخد كل حقوقها برضه .بس مش ده اللى انا أقصده انا أقصد انها تعمل قضيه خلع وده شرعى وقانونى. وقانون الخلع ده لصالح لراجل مش للست بس أحنا بناخدها مسأله كرامه مش أكتر . بخصوص الأولاد هى دلوقت بتقول مش عاوزاهم بس بعد ما تطلق هاتاخدهم بدون أجراء قانونى (وحكايه انها تكتب ورقه تنازل تسأل فيها محامى ) لأنى لا أعتقد ان فى عقد فيما يخالف القانون .

[drcobra]

اللهم اصلح حال المسلمين
نفس ظروف صديق لي
بس للاسف اتفقوا على الطلاق بعد سفر والدة ووالدتة خارج البلد لمدة شهر

نصحتة اثناء الطلاق لازم اهلة واهلها يكونوا موجودين مش راضى
بالرغم من انها هى اللى عايزة تهد البيت وبايعة الاولاد

للاسف هو انسان طيب جدا وطيبتة معاها هى سبب طلبها الطلاق

لو فى نصيحة انقلها له تبقوا مشكوريين
وطبعا ربنا يصبر صاحب الموضوع