لو حياتك ملخبطه تعمل ايه

[mody1982]

مساء الخير يا جماعه
انا عندي مشكله و اتمني انكم تساعدوني فيها بالنصح و الارشاد
انا يمكن من مشاركاتي السابقه لو حد قراها تبقي عارفين عني بعض تفاصيل
انا مهندس عمري 34 شغال في مكان كويس الحمد لله
طيب المشكله فين
المشكله اني مش سعيد في حياني
انا وحيد بمعني الكلمه اصدقائي يا اما سافروا يا اما بعدوا عني بحكم ظروفهم او اختيارهم الشخصي
فبالتالي معنديش اصدقاء
زملائي في العمل يا اصغر مني بكتير يا اكبر مني بكتير و بالتالي مش قادرين نبقي اصدقاء بسبب فروق السن و فروق المناصب الوظيفيه و غيرها
هوايتي الوحيده هي القرأه و بقيت زهقان منها
بالتالي عندي احتياج لوجود اصدقاء في حياتي كبير جدا و ذلك لأني غير موفق في موضوع الارتباط و الزواج
و مش بأيدي اني اعدل الموقف ده
يبقي اولا انا محتاج وسيله او طريقه اكون بيها صدقات جديده بدل الوحده اللي انا فيها
ثانيا :- محتاج وسيله او طريقه اتعرف من خلالها علي حد ممكن يبقي زوجه في المستقبل بعيد عن فشل نظام الصالونات اللي فشل معايا كتير علي مدار 5 سنوات ( معنديش لا قرايب و لا معارف ينقع اتجوزهم)
انا عايش في اكتئاب شديد و حياتي اشبه بالجحيم
البني ادم كائن اجتماعي و انا اجتماعيا مدمر و غصب عني ده حصل
اجيب اصدقاء منين و اعرفهم ازاي مش عارف
تخيل لما تبقي قاعد مره مش لاقي ليك صاحب تخرج معاه
او خطيبه او زوجه تقعد معاها
حياه في منتهي القرف
انصحوني بالله عليكم

[eslamrace]

حاول تتطوع فى احدى الجمعيات الخيريه بمجهودك
تحياتى.

[hesham fawzy h]

دا حال ناس كتيييييير جدا جدا مش انت بس يعنى :)

انزل ايفنتات عربيات .. انزل على قهوة اتعرف على ناس جديدة .. الخ

و موضوع الجمعيات الخيرية دة انا شايفة احسن موضوووع للقضاء على الفراغ و تكوين صداقات بالهبل و بتاخد حسنات و بترضى ربنا فى نفس الوقت .. يبقى كدة ضربت عصفورين بحجر :)

[Bassem Youssef]

بدايه جديده في بلد جديده

[magid1010]

و الله نفس الشعور مع انى متجوز و عندى 3 عيال بس ما فيش صداقه حقيقيه كله يا سافر و اشتغل بره يا فى بلد تانيه و مقابلاتنا قليله قوى الواحد يشعر بالوحده حتى و هو متجوز لان مراتك لا يمكن تبقى صحبتك لان عندهم قدره غريبه جدا على التسجيل و فى اول اختلاف حتلاقيها رصلتك الكلام اللى انت بتقوله بحسن نيه

[volociximab]

و انا مليش اصدقاء
مع التقدم فى العمر بتنتقل من مكان لمكان لمكان و الى كنت صديقة بجد بتكون تركته من سنين و نسيتوا بعض
انا شايفك فى دائرة
انت من البيت للشغل و من الشغل للبيت
انت منطوى
متعرفش عن الدنيا غير بيتك و شغلك و بالتالى دائرة معارفك صغيرة
حاول توسعها
و الله انا بانصحك مع انى اعانى من حالة تشبه حالتك
اعانى من اكتئاب بسبب دراسة الطب و ضغوط اخرى منذ 13 سنة
و الاكتئاب بيجيب انطواء
و الانطواء بيجيب اكتئاب
وسع دايرة نشاطك-روح جيم(باتكلم جد و ده اثبت فاعليته علميا)-متشغلش نفسك بالجواز و لو لفترة شهرين مثلا-قلل الضغوط عليك
انت عندك-او على شفا الاكتئاب يا بشمهندس
يمكن كلامك و شكوتك تخلينى اتحرك و اعالج نفسي

[Ah.Farid]

كدة الواحد لازم يقول الحمد لله وربنا ما يحرمنا من نعمة الاصدقاء

لية انا بقول كدة لان اصدقائى من ايام الجامعة من حوالى 25 سنة واحنا بنحافظ حتى الان اننا نتقابل كل يوم خميس على قهوة فى وسط البلد ......وبنحاول بكل الطرق على كل مقابلة...... بحيث ما تنقطعش برغم المشاغل والسفريات وان كل واحد لة حياتة وشغلة ودنيتة .....لكن الجو اللى الواحد بيقعد فية حتى لو معندكش حاجة تقولها المهم نتقابل .....مجرد التواجد مع بعض بيعطى احساس بالسعادة والتنفيس عن اى شىء يكون مضايق منة ,,,,,وبيعمل اعادة شحن لقدراتك على مواجهة الحياة مرة تانية

[nilmaster]

للاسف دة بقال حال ناس كتير جدا
لضغوط الحياه والعمل
وللاسف انا بعتبر ان الواحد لو فقد اصحاب المدرسة والكليه صعب جدا يكون اصدقاء تانى
وانا بقؤل عندى اقتراح ان احنا نعمل تجمع لاعضاء المنتدى نتعرف على بعض ونكون صداقات جديدة
واكيد حيبقى فيه هوايات متشابهه
واهو نكسر حالة الملل دى

[Mohamed_Hamid]

مش لوحدك للأسف
فكرة الجمعيات الخيرية دى كويسة بس متنفعش لكل الناس خصوصا المتجوزين

[ESO101]

حالتك أهون .. مجربتش يكون عندك بيت وإستقلالية كاملة
لما يكون عندك بيت مستحيل تحتمل تعيش عازب تاني
فمن البداية .. إتجوز وحدة بتحبها أو خليك عازب
إنتا في النهاية لسه عازب حتى لو كبير دا أفضل بمليون مرة من مايكون عندك تجارب
أنا مواليد 85 و بتجربتين جواز .. وطفلة .. وضعك أحسن بكتير ياصاحبي !

[mody1982]

المشكله في انك تلاقي مكان تقابل فيه ناس جديده و يكون عند الناس دي استعداد لتكوين صدقات جديده مع اشخاص زي حالك
بس للأسف الموضوع مش سهل خصوصا في السن اللي الواحد فيه
و بالنسبه لموضوع الجواز بتاع استاذ eso101 لو حضرتك مكنتش منفصل و كانت حياتك الزوجيه سعيده مكنتش هتبقي ناظر النظره السوداويه دي للجواز

[gade2]

اولا تاخد بريك وتروح تاخدلك يومين على البحر تروق باللك
املى حياتك ب جيم - تطوع خيرى وطبعا الشغل
شيل من دماغك فكرة انك وحيد لانك طول مانت حاططتها قدامك فانت مش هتطلع منها وهتوقع منك حاجات كتير كنت ممكن تعملها
متندفعش تجاه اى شخص بسهوله ...مش معنى انى عطشان انى اشرب ميه ملوثه
ضيف لحياتك هدف جديد مهما كان صغير واسعى له

اى حاجه من اللى فوق هتلاقى فيها ناس ينفعوا يبقوا زمايل ثم صحاب

[ESO101]

المشكله في انك تلاقي مكان تقابل فيه ناس جديده و يكون عند الناس دي استعداد لتكوين صدقات جديده مع اشخاص زي حالك
بس للأسف الموضوع مش سهل خصوصا في السن اللي الواحد فيه
و بالنسبه لموضوع الجواز بتاع استاذ eso101 لو حضرتك مكنتش منفصل و كانت حياتك الزوجيه سعيده مكنتش هتبقي ناظر النظره السوداويه دي للجواز

هوا اللي خلف بيعرف ينفصل ؟
أنا عندي بنت هحافظ طبعًا على بيتي عشان تعيش بدون مشاكل
بس مش معنى كدا إني مبسوط وسعيد .. مش هظلم نفسي .. ولا هعيش عيشة والسلام

[mody1982]

هوا اللي خلف بيعرف ينفصل ؟
أنا عندي بنت هحافظ طبعًا على بيتي عشان تعيش بدون مشاكل
بس مش معنى كدا إني مبسوط وسعيد .. مش هظلم نفسي .. ولا هعيش عيشة والسلام

يبقي انا فهمت حضرتك غلط لما تقولت تجربتين زواج و طفله تخيلت يعني ان التجربتين مش ناجحين
اسف علي سوء الفهم

[ESO101]

يبقي انا فهمت حضرتك غلط لما تقولت تجربتين زواج و طفله تخيلت يعني ان التجربتين مش ناجحين
اسف علي سوء الفهم

مش ناجحين
الأولى كنت بدرس برا ووالدي أصر على الجواز عشان أركز في مذاكرتي
وأنا كنت مبسوط بالجواز
وبعد سنتين حصلت بينا مشاكل إنفصلنا
كنا عيال بس الحمدلله إننا إتفقنا مانخلفش إلا لما نخلص دراسة
والتانية بعد ماخلصت تزوجت وخلفت
وصبرت جامد و هيا كمان صبرت على تغيرات كتير حصلت
ولكن وصلنا لمرحلة إننا لم نعد قادرين على الصبر أكثر
يمكن أكتب مشكلتي بالتفصيل في موضوع
طبعًا كنت ماسك نفسي ماتكلمش .. لقيت إن دا بيأثر على نفسيتي وصحتي وأعصابي